1. San wan brada musu du fu man tron wan lepi Kresten?

 KOWNU David ben taigi Salomo: „Sori taki yu na wan man èn taki yu abi deki-ati” (1 Kow. 2:1-3). A rai disi prenspari gi ala Kresten man na ini a ten disi. Efu den wani tron lepi Kresten, dan den musu leri fu gi yesi na den wet fu Gado èn fu fiti Bijbel gronprakseri na ini ala situwâsi fu den libi (Luk. 2:52). Fu san ede a prenspari so, taki yongu brada tron lepi Kresten man?

2-3. Fu san ede a prenspari taki wan yongu brada tron wan lepi Kresten?

² Wan Kresten man abi prenspari frantwortu na ini en osofamiri èn na ini a gemeente. Yongu brada, a no de fu taki dati yu prakseri den frantwortu di yu kan kisi na ini a ten di e kon. Kande yu wani tron wan pionier, wan dinari ini a diniwroko, èn bakaten wan gemeente owruman. Kande yu o wani trow tu èn meki pikin (Ef. 6:4; 1 Tim. 3:1). Fu man doro den marki disi èn fu man tyari yu frantwortu bun, dan yu musu tron wan lepi Kresten. b

³ San kan yepi yu fu tron wan lepi Kresten? Wan tu prenspari sani de di yu musu leri du bun. San yu kan du fu sreka gi den frantwortu di yu o kisi kande na ini a ten di e kon, so taki yu kan tyari den bun?

4. Pe yu kan feni bun eksempre? (Luku a prenki.)

⁴ Suku bun eksempre. Bijbel lai nanga bun eksempre fu yonguman. Den man dati fu owruten ben lobi Gado èn  den ben e sorgu gi a pipel fu en na difrenti fasi. Yu kan feni bun eksempre tu na mindri den lepi Kresten man na ini yu eigi famiri èn na ini a gemeente (Hebr. 13:7). Èn a moro bun eksempre di yu abi, na Yesus Krestes (1 Petr. 2:21). Te yu e studeri den eksempre fu den sma disi finifini, dan poti prakseri na den moi fasi fu den (Hebr. 12:1, 2). Baka dati, luku fa yu kan teki na eksempre fu den.

5. Fa yu kan leri fu gebroiki yu ferstan, èn fu san ede disi prenspari? (Psalm 119:9)

⁵ Leri fu gebroiki yu „frustan” (Odo 3:21). Wan man di e gebroiki en ferstan no e hasti ensrefi fu du sani, ma a e denki bun fosi a bosroiti san a o du. Sobun, du tranga muiti fu leri fa fu gebroiki yu ferstan èn tan du dati. Fu san ede? A grontapu disi lai yonguman di e meki den eigi denki nanga den firi tiri den te den musu teki besroiti (Odo 7:7; 29:11). Radio, telefisi, Internet, nanga social media kan abi bigi krakti na yu tapu tu. Ma fa yu kan leri fu gebroiki yu ferstan? Wan sani di o yepi yu, na te yu e ondrosuku Bijbel fu kon sabi fa Yehovah e denki èn fa a e firi. Prakseri tu fu san ede a bun fu du san a taki. Baka dati, gebroiki den sani di yu leri fu teki bosroiti di Yehovah feni bun. (Leisi Psalm 119:9.) Efu yu e leri fu gebroiki yu ferstan na so wan fasi, dan dati o yepi yu trutru fu tron wan lepi Kresten man (Odo 2:11, 12; Hebr. 5:14). Kow go luku fa yu o kisi wini te yu e gebroiki yu ferstan na ini den tu situwâsi disi: (1) a fasi fa yu e tyari yusrefi te yu de nanga s’sa èn (2) te yu musu besroiti sortu krosi yu o weri èn fa yu o moi yusrefi.

6. Te wan yongu brada e gebroiki en ferstan, dan fa dati o yepi en fu sori lespeki gi s’sa?

⁶ Wan man di e gebroiki en ferstan e sori lespeki gi umasma. Fu eksempre, a no fowtu te wan yongu brada wani kon sabi wan s’sa moro bun. Ma wan yonguman di e gebroiki en ferstan, no o taki, skrifi, noso du nowan sani di e sori taki a abi lobi firi gi a s’sa te a no e prakseri fu trow nanga a s’sa dati (1 Tim. 5:1, 2). Efu a e hori nanga wan s’sa, dan a o sorgu taki noiti a de en wawan nanga a s’sa sondro  taki wan lepi sma de nanga den fu di a no wani taki a s’sa kisi porinen.​—1 Kor. 6:18.

7. Te wan yongu brada e gebroiki en ferstan, dan fa dati o yepi en te a musu besroiti sortu krosi a o weri èn fa a o moi ensrefi?

⁷ Wan tra fasi fa wan yonguman e sori taki a e gebroiki en ferstan, na te a e luku bun sortu krosi a e weri èn fa a e moi ensrefi. Nofo tron den sma di e kon nanga nyun modo na sma di no e lespeki Yehovah noso den e libi wan yayolibi. Den krosi di den e meki strak èn den e meki mansma gersi umasma. Te wan yonguman di e leri fu tron wan lepi Kresten e bosroiti sortu krosi a o weri, dan a o prakseri san Yehovah feni bun èn a o teki na eksempre fu tra lepi sma na ini a gemeente. A kan aksi ensrefi: ’Den bosroiti di mi e teki e sori taki mi e gebroiki mi ferstan èn taki mi e lespeki trawan? Den krosi di mi e weri e meki en makelek gi trawan fu bribi taki mi na wan futuboi fu Gado?’ (1 Kor. 10:31-33; Tit. 2:6) Te wan yonguman e gebroiki en ferstan, dan a no soso en brada nanga sisa o lespeki en, ma Yehovah tu.

8. Fa wan yongu brada kan leri fu de wan sma di trawan man fertrow?

⁸ De wan sma di de fu fertrow. Wan yonguman di de fu fertrow e du muiti fu tyari ala den frantwortu fu en na wan bun fasi (Luk. 16:10). Luku a moi eksempre fu Yesus. Noiti a ben e du leki den frantwortu fu en no prenspari. Na presi fu dati, a ben e du ala den sani di Yehovah ben aksi en fu du, srefi te a ben muilek. A ben lobi libisma, spesrutu den disipel fu en, èn a ben de klarklari fu gi en libi gi den (Yoh. 13:1). Neleki Yesus yu musu wroko tranga fu tyari iniwan frantwortu di yu kisi. Efu yu no sabi fa fu du wan sani, dan sori sakafasi èn aksi lepi brada fu yepi yu. No du a wroko afu-afu (Rom. 12:11). Na presi fu dati, du a wroko fu yu ’leki na gi Yehovah èn no gi libisma’. Disi o yepi yu fu du en bun èn fu klari en (Kol. 3:23). A no de fu taki dati yu o meki fowtu, sobun sori sakafasi èn taki krin efu yu meki wan fowtu.​—Odo 11:2.

9. Fu san ede wan yongu brada musu leri fu du sani di o yepi en na ini a libi?

⁹ Fu man tron wan lepi Kresten man, dan yu musu leri fu du sani di kan yepi yu na ini a libi. Disi o yepi yu fu tyari frantwortu na ini a gemeente, yu o man feni wan wroko fu sorgu yu nanga yu osofamiri, èn yu o man libi bun nanga trawan. Luku wan tu fu den sani di yu kan leri fu du.

10-11. Fa wan yongu brada o man yepi ensrefi èn a gemeente te a leri fu leisi èn skrifi bun? (Psalm 1:1-3) (Luku a prenki.)

¹⁰ Leri fu leisi èn skrifi bun. Bijbel e taki  dati wan man di wani de koloku èn di wani taki sani waka bun nanga en e teki ten ibri dei fu leisi Gado Wortu èn fu denki dipi fu en. (Leisi Psalm 1:1-3.) Fu di a e leisi Bijbel ibri dei, meki a o kon sabi fa Yehovah e denki èn dati o yepi en fu denki krin èn fu leri fa fu fiti Gado Wortu na ini en libi (Odo 1:3, 4). Na den man dati wi abi fanowdu na ini a gemeente. Fu san ede?

¹¹ Wi brada nanga sisa abi yepi fanowdu fu brada di man gi leri èn di man gi rai fu Bijbel (Tit. 1:9). Efu yu man leisi èn skrifi bun, dan yu o man hori lezing èn gi piki di e tranga a bribi fu trawan. Boiti dati yu o man skrifi moi penti di yu feni te yu e studeri èn te yu e arki lezing na den konmakandra, den bigi konmakandra, nanga den kongres. Yu kan gebroiki den penti disi fu tranga yu eigi bribi èn fu gi trawan dek’ati.

12. San o yepi yu fu taki bun nanga trawan?

¹² Leri fu taki bun nanga trawan. Wan Kresten man musu leri fu taki bun nanga trawan. Disi wani taki dati a musu arki bun te wan sma e fruteri en fa a e denki èn fa a e firi èn a musu du muiti fu ferstan a sma dati (Odo 20:5). Wan fasi fa o man ferstan fa wan sma e firi, na te a e arki fa a sma e taki, te a e luku fa a poti en fesi, èn fa a e du. Yu no o man du disi te yu no e teki ten fu de makandra nanga sma. Efu doronomo yu e gebroiki soso yu cel fu taki nanga sma, dan te fu kba yu no o man taki bun moro nanga sma te yu de nanga den. Dati meki yu musu suku okasi fu miti nanga sma fu taki nanga den.​—2 Yoh. 12.

13. Sortu tra sani wan yonguman musu leri? (1 Timoteyus 5:8) (Luku a prenki.)

¹³ Leri fu sorgu gi yusrefi. Wan lepi brada musu man sorgu gi ensrefi èn gi en osofamiri. (Leisi 1 Timoteyus 5:8.) Na ini son kondre, yongu brada kan leri fu den papa noso fu wan tra famiriman fa fu du wan wroko. Na ini tra kondre, wan yonguman kan leri na middelbaar skoro kba fa fu du wan wroko. Awinsi fa a no fa, a bun fu leri fa fu du wan sani di o yepi yu feni wan wroko (Tori 18:2, 3; 20:34; Ef. 4:28). Wroko tranga èn sorgu taki yu tan du wan wroko teleki a kba. Efu yu e du dati, dan a o moro makelek gi yu fu feni wan wroko èn fu no lasi a wroko dati. A prenspari tu taki wan brada du den sani di kari na ini na artikel disi, so taki a o man tyari moro frantwortu. Kow go luku wan tu fu den frantwortu dati.

14. Fa wan yongu brada kan sreka fu tron wan furuten dinari?

¹⁴ Furuten dinari. Furu lepi Kresten man e go na ini a furu ten diniwroko yonguyongu kba. Wan yonguman di e pionier e leri fa fu wroko makandra nanga difrenti sortu sma. A e leri tu fa fu gebroiki a moni di a e meki na wan koni fasi èn fu no gebroiki moro moni leki san a abi (Fil. 4:11-13). Wan bun fasi fu sreka gi a furuten diniwroko, na fu go na ini a yepi-pionierwroko. Furu brada e dini leki yepi-pionier wan pisi ten èn dati e sreka den gi a gewoon pionierwroko. Te den bigin pionier, dan te fu kba den kan kisi a kari fu go du bow-wroko noso fu go dini na Betel.

15-16. Fa wan yongu brada kan doro den marki fu man dini na ini a gemeente?

¹⁵ Dinari ini a diniwroko noso owruman. Kresten man musu pruberi fu doro den marki fu man tron owruman so taki den kan dini den brada nanga sisa na ini a gemeente. Bijbel e taki dati den man di e suku fu kisi a frantwortu disi „e suku fu du wan tumusi bun wroko” (1 Tim. 3:1). Fosi wan brada tron owruman a musu doro den marki fu man dini leki dinari ini a diniwroko. Den dinari ini a diniwroko e yepi den owruman fu du difrenti sortu wroko. Owruman nanga dinari ini a diniwroko de klarklari fu dini den brada nanga sisa èn den e preiki fayafaya. Yongu brada kan bigin du muiti fu doro den marki fu man dini leki dinari ini a diniwroko srefi te den abi sowan 17 te go miti 19 yari. Èn wan dinari ini a diniwroko di e du en wroko bun kan tron wan owruman awinsi a abi 20 yari nomo.

¹⁶ San yu musu du fu kisi den frantwortu disi? Bijbel e sori krin san brada musu du fu man kisi den frantwortu disi. Boiti dati, den musu lobi Yehovah, den osofamiri, nanga a gemeente (1 Tim. 3:1-13; Tit. 1:6-9; 1 Petr. 5:2, 3). Du muiti fu ferstan ibriwan fu den sani di yu musu du fu man kisi frantwortu na ini a gemeente. Begi Yehovah fu yepi yu fu doro den marki disi. c

17. Fa wan yongu brada kan sreka fu tron wan masra nanga wan osofamiri-edeman? (Luku a prenki.)

¹⁷ Masra nanga osofamiri-edeman. Soleki fa Yesus ben taki, dan son lepi Kresten man e tan sondro fu trow (Mat. 19:12). Ma efu yu besroiti fu trow, dan yu o abi fu tyari a frantwortu tu leki masra nanga osofamiri-edeman (1 Kor. 11:3).  Yehovah e fruwakti taki wan masra lobi en wefi, taki a e sorgu gi en, taki a de wan bun mati fu en, èn taki a e yepi en fu tan krosibei fu Yehovah (Ef. 5:28, 29). Soleki fa wi ben si kba na ini na artikel disi, dan yu o man de wan bun masra te yu e leri fu gebroiki yu ferstan, te yu e lespeki umasma, èn te yu de fu fertrow. Yu o de srekasreka fu tyari den frantwortu di yu abi leki masra nanga osofamiri-edeman.

18. Fa wan yongu brada kan sreka fu tron wan bun papa?

¹⁸ Papa. Baka te yu trow, dan kande yu o kisi pkin. San yu kan leri fu Yehovah efu yu wani de wan bun papa? Yu kan leri furu sani fu en (Ef. 6:4). Yehovah ben taigi en Manpikin Yesus na fesi ala sma taki a lobi en èn taki a feni en bun (Mat. 3:17). Efu yu tron wan papa, dan sorgu taki yu abi a gwenti fu taigi yu pkin taki yu lobi den. Prèise den furu tron gi den bun sani di den e du. Papa di e teki na eksempre fu Yehovah e yepi den pkin fu gro kon tron lepi Kresten man nanga uma. Nownow kba yu kan sreka yusrefi gi a frantwortu dati te yu e sorgu na wan lobi-ati fasi gi den sma na ini yu famiri èn gi a gemeente. Wan tra fasi fa yu kan sreka yusrefi, na te yu e leri fu taigi den taki yu lobi den èn taki yu e warderi den (Yoh. 15:9). Disi o yepi yu fu tyari a frantwortu di yu o kisi kande leki masra èn leki papa. Na a srefi ten, Yehovah o man gebroiki yu bun èn yu o de wan bigi yepi gi yu osofamiri èn gi a gemeente.

19-20. San o yepi yongu brada fu tron lepi Kresten man? (Luku a prenki na tapu a kafti.)

¹⁹ Yongu brada, unu no o tron wan lepi Kresten gewoon so. Yu musu suku bun eksempre, yu musu leri fu gebroiki yu ferstan, yu musu de wan sma di trawan kan fertrow, yu musu leri du sani di o yepi yu na ini yu libi, èn yu musu sreka yusrefi gi frantwortu di yu kan kisi bakaten.

²⁰ Te yu e prakseri ala den sani di yu musu leri, dan kande a o gersi leki a furu tumsi gi yu. Ma yu man du en! Hori na prakseri taki Yehovah de klarklari fu yepi yu (Yes. 41:10, 13). A no de fu taki dati den brada nanga s’sa na ini a gemeente o yepi yu tu. Te yu tron a man di Yehovah wani taki yu tron, dan yu o abi furu prisiri na ini yu libi. Un yongu brada, wi lobi unu! Meki Yehovah blesi unu bogobogo aladi unu e du muiti fu tron lepi Kresten man.​—Odo 22:4.