1. San wi musu du fu tron wan lepi Kresten?

 A MOI fu si o esi wan pkin e gro kon tron wan bigisma. A gersi leki a sani disi e psa fu ensrefi. Ma efu wi wani tron wan lepi Kresten, dan dati na wan heri tra sani fu di wi o abi fu du muiti fu doro a marki dati b (1 Kor. 13:11; Hebr. 6:1). Fu man tron wan lepi Kresten, wi musu de bun mati fu Yehovah. Wi abi en santa yeye fanowdu tu fu yepi wi fu kon abi fasi di Gado feni bun, fu leri du sani di kan yepi wi na ini na ala dei libi, èn fu sreka wi srefi gi frantwortu di wi kan kisi na ini a ten di e kon.​—Odo 1:5.

2. San wi e leri fu Genesis 1:27, èn san wi o luku na ini na artikel disi?

² Yehovah meki libisma leki man nanga uma. (Leisi Genesis 1:27.) A de krin fu si taki a skin fu man e difrenti fu a di fu umasma, ma den e difrenti fu makandra na tra fasi tu. Fu eksempre, Yehovah meki man nanga uma fu tyari spesrutu frantwortu. Dati meki den abi fasi nanga koni fanowdu di o yepi den fu tyari den frantwortu dati (Gen. 2:18). Na ini na artikel disi, wi o luku san wan yongu s’sa kan du fu tron wan lepi Kresten uma. Na ini a tra artikel wi o luku san yongu brada kan du.

3-4. Pe yongu s’sa kan feni bun eksempre? (Luku a prenki.)

³ Bijbel e taki fu furu uma di ben lobi Yehovah èn di ben e dini en. (Luku na artikel tapu jw.org di nen „Vrouwen in de Bijbel: Wat kunnen we van ze leren?”) Soleki fa a thema  tekst e sori, den uma disi no ben e „du sani pasa marki” èn den ben e ’sori na ala fasi taki den ben e gi yesi na Gado’. Boiti dati, den s’sa kan luku na eksempre fu lepi Kresten uma na ini den eigi gemeente èn den kan leri furu fu den.

⁴ Un yongu s’sa, un sabi wan tu lepi Kresten uma di de bun eksempre gi unu? Poti prakseri na den moi fasi fu den. Baka dati, luku fa yu kan sori den fasi dati. Na ini den paragraaf di e kon, wi o taki fu dri prenspari fasi di wan lepi Kresten s’sa musu abi.

5. Fu san ede a prenspari taki wan lepi Kresten uma abi sakafasi?

⁵ Efu wi wani de lepi Kresten, dan wi musu abi sakafasi. Efu wan uma abi sakafasi, dan a o de bun mati fu Yehovah èn fu trawan (Yak. 4:6). Fu eksempre, wan uma di lobi Yehovah de klarklari fu gi yesi na a rai di skrifi na ini 1 Korentesma 11:3. A tekst disi e sori suma Yehovah gi a frantwortu fu teki fesi na ini a gemeente èn na ini na osofamiri. c

6. San yongu s’sa kan leri fu Rebeka di ben abi sakafasi?

⁶ Luku na eksempre fu Rebeka. A ben de wan koni uma, a no ben frede fu teki besroiti, èn a ben sabi san fu du èn o ten a ben musu du en (Gen. 24:58; 27:5-17). Toku a ben abi lespeki èn a ben e saka ensrefi (Gen. 24:17, 18, 65). Efu yu abi sakafasi neleki Rebeka èn yu e horbaka gi den seti fu Yehovah, dan yu o de wan bun eksempre gi yu osofamiri èn gi a gemeente.

7. Fa yongu s’sa kan de leki Ester?

⁷ Wan tra fasi di ala lepi Kresten musu abi na taki a no musu denki tumsi furu fu ensrefi. Bijbel e gi wi dek’ati fu no denki tumsi furu fu wisrefi (Odo 11:2). Ester ben de wan futuboi fu Gado di no ben e  denki tumsi furu fu ensrefi. Dati meki a no ben kisi heimemre di a tron a frow fu kownu. A arki a rai fu en neef Mordekai èn a du san a taki (Ester 2:10, 20, 22). Te yu e suku bun rai èn te yu e fiti den rai dati tu, dan yu e sori tu taki yu no e denki tumsi furu fu yusrefi.​—Tit. 2:3-5.

8. Soleki fa 1 Timoteyus 2:9, 10 e sori, dan fa wan s’sa di no e denki tumsi furu fu ensrefi o weri krosi?

⁸ Wan tra fasi de fa Ester ben sori taki a no ben denki tumsi furu fu ensrefi. Ester „ben abi wan moi skin èn a ben e fiti ai”. Ma toku a no ben e du sani fu meki ala sma luku en (Ester 2:7, 15). San Kresten uma kan leri fu na eksempre fu Ester? Wan sani di den kan leri fu en skrifi na 1 Timoteyus 2:9, 10. (Leisi en.) Dyaso na apostel Paulus e taigi umasma fu weri krosi na wan fasi di e sori taki den abi lespeki gi Gado. Den Griki wortu di a gebroiki e sori taki ala ten wan uma musu weri krosi di fiti èn taki a musu lespeki a fasi fa trawan e denki fu den krosi di a e weri. Wi breiti nanga den lobi s’sa di e weri krosi na wan lespeki fasi.

9. San wi kan leri fu na eksempre fu Abigayil?

⁹ Wan tra fasi di ala lepi Kresten s’sa musu abi, na koni. Sortu koni? Den musu abi a koni fu sabi san bun èn san no bun èn fu teki yoisti besroiti. Luku na eksempre fu Abigayil. A masra fu en ben teki wan don besroiti di ben o tyari seryusu problema kon gi ala sma na ini en oso. Abigayil no draidrai, ma a du wan sani wantewante. Fu di a ben ferstan san na a yoisti sani fu du, meki a kibri a libi fu furu sma (1 Sam. 25:14-23, 32-35). Te wi koni, dan wi o sabi o ten wi musu taki èn o ten wi musu tan tiri. Wi o sabi fa fu poti prakseri na trawan sondro fu meki den firi ferferi.

10-11. Fa yu kan tyari wini kon gi yusrefi èn gi trawan te yu e leisi èn skrifi bun? (Luku a prenki.)

¹⁰ Wan Kresten uma musu leri fu du spesrutu sani di kan yepi en na ini en libi. Son sani di wan meisje e leri te a yongu ete o tyari wini kon gi en, en heri libi langa. Luku wan tu eksempre.

¹¹ Leri fu leisi èn skrifi bun. Na ini son kulturu, a no prenspari taki umasma e leri leisi èn skrifi. Ma ibri Kresten musu man du den sani disi d (1 Tim. 4:13). Sobun, no meki nowan sani tapu yu fu leri leisi èn skrifi bun. Sortu wini yu o kisi? Te yu sabi leisi èn skrifi bun, dan yu o man feni wan wroko. Boiti dati, a o moro makelek gi yu fu studeri Gado Wortu èn fu  leri trawan sani fu Bijbel. Ma san moro prenspari, na taki yu o tron wan moro bun mati fu Yehovah te yu e leisi a Wortu fu en èn te yu e denki dipi fu en.​—Yos. 1:8; 1 Tim. 4:15.

12. Fa Odo 31:26 kan yepi yu fu arki bun èn taki na wan switifasi nanga trawan?

¹² Leri fu arki bun èn fu taki na wan switifasi nanga sma. Disi na wan prenspari sani gi Kresten. Dati meki a disipel Yakobus e gi wi a rai disi: „Ibriwan sma musu de gaw fu yere. A no musu de gaw fu taki” (Yak. 1:19). Te yu e arki bun te trawan e taki, dan yu o man „firi gi tra sma” (1 Petr. 3:8). Efu yu no ferstan san wan sma taki noso fa a e firi, dan poti aksi gi en di fiti. Baka dati, teki ten fu denki fosi yu taki wan sani (Odo 15:28). Aksi yusrefi: ’A sani di mi o taki tru èn a o gi trawan dek’ati? A e sori taki mi abi lespeki nanga switifasi?’ Yu kan leri fu lepi s’sa di e arki bun èn di e taki nanga switifasi. (Leisi Odo 31:26.) Poti prakseri na a fasi fa den e taki. Te yu e leri fu arki bun èn fu taki na wan switfasi nanga trawan, dan a o moro makelek gi yu fu meki mati èn fu abi freide nanga sma.

13. San yu musu du fu man leri fu drai wan oso? (Luku a prenki.)

¹³ Leri fu drai wan oso. Na furu presi, umasma e du furu fu a wroko di de fu du na ini wan oso. Kande yu m’ma noso wan tra lepi s’sa kan leri yu fa fu du den wroko disi bun. Wan s’sa di nen Cindy e taki: „Wan fu den moro bun sani di mi leri fu mi m’ma, na taki tranga wroko e gi prisiri. Fu di mi leri fu bori, fu krin sani, fu nai krosi, èn fa fu bai sani nanga koni, meki mi ben man sorgu misrefi èn mi ben man du moro tu gi Yehovah. Mi m’ma leri mi tu fu kari trawan kon na mi oso, èn na so mi ben leri sabi furu brada nanga s’sa di de wan eksempre gi mi” (Odo 31:15, 21, 22). Wan uma di e wroko tranga, di lobi fu kari sma kon na en oso, èn di sabi fa fu drai en oso na wan blesi gi ala sma na ini en osofamiri èn na ini a gemeente.​—Odo 31:13, 17, 27; Tori 16:15.

14. San yu e leri fu na ondrofenitori fu Crystal èn na san yu musu tan poti prakseri?

¹⁴ Leri fu sorgu yusrefi. Ala lepi Kresten musu leri fu sorgu densrefi èn den musu breiti nanga san den abi (Fil. 4:11; 2 Tes. 3:7, 8). Wan s’sa di nen Crystal e taki: „Mi p’pa nanga m’ma gi mi dek’ati fu leri sani na skoro di ben o yepi mi bakaten. Mi p’pa gi mi dek’ati fu teki boekhouden les, èn a sani dati ben de wan bigi yepi.” Boiti taki yu musu leri fu du spesrutu sani di o yepi yu fu feni wan wroko, yu musu leri fa fu gebroiki a moni di yu e meki na wan koni fasi (Odo 31:16, 18). Tan poti prakseri na den marki di yu wani doro na ini na anbegi èn no meki paiman te dati no  de fanowdu. Leri fu libi wan sempel libi èn fu de tevrede.​—1 Tim. 6:8.

15-16. Fa s’sa di no trow kan de wan blesi gi trawan? (Markus 10:29, 30)

¹⁵ Te yu e kon abi fasi di Yehovah feni bun èn te yu e leri du sani di kan yepi yu na ini na aladei libi, dan dati o yepi yu fu teki bun besroiti bakaten. Luku wan tu sani di yu kan du.

¹⁶ Yu kan besroiti fu no trow ete. Soleki fa Yesus ben taki, son uma e besroiti fu no trow, srefi efu a kulturu fu den e gi umasma dek’ati fu trow (Mat. 19:10-12). Tra umasma abi difrenti reide fu no trow. Ma yu kan de seiker taki Yehovah nanga Yesus no e wiswasi Kresten di no trow. Na heri grontapu s’sa di no trow na wan bun eksempre gi a gemeente. Fu di den lobi trawan èn fu di den e broko den ede nanga den, meki den e kon de leki s’sa nanga m’ma gi furu sma.​—Leisi Markus 10:29, 30; 1 Tim. 5:2.

17. Fa wan yongu s’sa kan sreka nownow kba fu tron wan furuten dinari?

¹⁷ Yu kan tron wan furuten dinari. Kresten uma e du a moro bigi pisi fu a preikiwroko di e du na heri grontapu (Ps. 68:11). Yu kan seti sani now fu go na ini a furuten diniwroko? Kande yu kan dini leki pionier, kande yu kan yepi nanga bow-wroko, noso kande yu kan go dini na Betel. Begi fu a marki di yu wani doro. Taki nanga trawan di doro a marki dati èn kon sabi san yu musu du fu tron wan furuten dinari. Baka dati, meki wan plan di o yepi yu fu doro a marki dati. Te yu tron wan furuten dinari, dan yu o man du furu moi sani gi Yehovah.

18. Fu san ede wan s’sa musu luku bun suma a o teki leki masra? (Luku a prenki.)

¹⁸ Yu kan besroiti fu trow. Te yu kon abi den fasi di wi taki fu den èn te yu leri du sani di kan yepi yu na ini na aladei libi, dan dati o yepi yu fu tron wan bun wefi. A no de fu taki dati efu yu e prakseri fu trow, dan yu musu luku bun suma yu o teki leki trowpatna. Dati na wan fu den moro prenspari besroiti di yu o teki na ini yu libi. Hori na prakseri taki yu o abi fu saka yusrefi na ondro a man di o tron yu masra (Rom. 7:2; Ef. 5:23, 33). Sobun, aksi yusrefi: ’A de wan lepi Kresten? A e poti Yehovah na a fosi presi na ini en libi?  A e teki koni besroiti? Te a meki wan fowtu, dan a man taki dati krin? A e lespeki umasma? A o man yepi mi fu tan wan bun mati fu Yehovah, a o man sorgu mi, èn a o de wan bun mati gi mi? A man tyari frantwortu bun? Fu eksempre, sortu frantwortu a abi na ini a gemeente èn fa a e tyari den frantwortu dati?’ (Luk. 16:10; 1 Tim. 5:8) A no de fu taki dati efu yu wani feni wan bun masra, dan yu musu de wan bun wefi tu.

19. Fu san ede a de wan grani gi wan wefi taki a kan yepi en masra?

¹⁹ Bijbel e taki dati wan bun wefi na wan „patna di fiti” en masra èn di „kan yepi en” (Gen. 2:18). A sani disi e lagi wan wefi? Nôno! A frantwortu di wan wefi abi fu yepi en masra na wan grani. Fu taki en leti, furu tron Bijbel e kari Yehovah wan „yepiman” (Ps. 54:4; Hebr. 13:6). Wan wefi na wan bigi yepi gi en masra te a e horibaka gi en èn te a e wroko makandra nanga en fu du san a masra besroiti gi na osofamiri. Èn fu di a lobi Yehovah, meki a e du san a man fu yepi trawan fu si den bun fasi fu en masra (Odo 31:11, 12; 1 Tim. 3:11). Yu kan sreka nownow kba fu tron wan bun wefi te yu e tron wan moro bun mati fu Yehovah èn te yu e yepi sma na ini yu osofamiri èn na ini a gemeente.

20. Fa wan m’ma kan yepi en osofamiri?

²⁰ Yu kan de wan bun m’ma. Baka te yu trow, dan kande yu nanga yu masra o meki pkin (Ps. 127:3). Dati meki a bun fu prakseri san de fanowdu fu de wan bun m’ma. Soleki fa wi si na ini na artikel disi, dan den fasi di yu musu kon abi èn den sani di yu leri fu du na ini na aladei libi, o yepi yu fu tron wan bun wefi nanga wan bun m’ma. Te yu abi lobi, switifasi, nanga pasensi, dan dati o yepi yu fu abi wan koloku osofamiri pe den pkin fu yu o de seiker taki sani o waka bun nanga den.​—Odo 24:3.

21. Fa wi e si den s’sa fu wi, èn fu san ede? (Luku a prenki na tapu a kafti.)

²¹ Lobi s’sa, wi lobi unu èn wi breiti nanga ala san unu e du gi Yehovah nanga a pipel fu en (Hebr. 6:10). Unu e du tranga muiti fu kon abi den fasi di Gado feni bun èn fu leri du sani di o tyari wini kon gi unsrefi èn gi un famiri nanga mati. Boiti dati, unu e sreka bun gi den frantwortu di unu kan tyari na ini a ten di e kon. Unu warti srefsrefi gi Yehovah en organisâsi.