Yu man memre san yu leisi na ini den Waktitoren di kon na doro a yari disi? Luku efu yu kan piki den aksi di e kon now:

San a wani taki fu kenki wi denki? (Rom. 12:2)

Te wi du wan tu bun sani, dan dati no wani taki dati wi e meki a denki fu wi kon nyun. Fu man kenki wi denki, wi musu ondrosuku suma wi de trutru na ini wi ati èn wi musu tyari kenki kon so taki wi kan libi na wan fasi di Yehovah feni bun.​—w23.01, blz. 8-9.

Fa wi kan tan nanga krin frustan te wi e luku den sani di e pasa na grontapu?

Wi e poti prakseri na den sani di e pasa now na grontapu fu si fa den e meki Bijbel profeititori kon tru. Ma wi no e kon nanga wi eigi denki fu di dati kan tyari pratifasi kon. Na presi fu dati wi e hori wisrefi na den sani di na organisâsi fu Yehovah tyari kon na doro (1 Kor. 1:10).​—w23.02, blz. 16.

Fa a dopu fu Yesus èn a dopu fu den bakaman fu en e difrenti?

Fu di Yesus ben de fu wan pipel di ben gi densrefi abra na Gado, meki a no ben abi fu gi ensrefi abra na Gado soleki fa wi e du dati. Yesus ben de wan man di no ben abi sondu. A no ben abi fu sori berow fu den sondu fu en.​—w23.03, blz. 5.

Fa wi kan yepi trawan fu gi piki na den konmakandra?

Wi kan gi syatu piki so taki trawan kisi na okasi fu gi piki. Wi no musu taki fu ala den penti. Na so sani o de ete gi trawan fu taki.​—w23.04, blz. 23.

San na „a Pasi fu Santafasi” di kari na ini Yesaya 35:8?

Na agersi pasi disi ben abi fu du fosi nanga a pasi di den Dyu ben teki fu Babilon go na a kondre fu den. San na a pasi na ini a ten disi? Hondrohondro yari fosi 1919, sma bigin sreka a pasi disi di den vertaal èn druk Bijbel. Den ben du tra sani tu. Fu di a pipel fu Gado e waka tapu „a Pasi fu Santafasi”, meki den man tan anbegi Yehovah èn na ini a ten di e kon den o kisi den blesi di a Kownukondre o tyari kon.​—w23.05, blz. 15-19.

Fu sortu tu agersi uma Odo kapitel 9 e taki?

Odo e taki fu „wan don uma” èn fu na uma di e prenki „trutru koni”. Den sma di e teki a kari fu a don uma e go na „Grebi”, aladi den sma di e teki a kari fu „trutru koni”, e ’waka na wan fasi di e sori taki den abi frustan’ èn den o kisi libi (Odo 9:1, 6, 13, 18).​—w23.06, blz. 22-24.

Fa Yehovah sori taki a abi sakafasi èn taki a no strak tumsi di a taigi Lot fu lowe?

Yehovah ben taigi Lot fu lowe fu Sodom èn fu go na den bergi. Ma di Lot begi en fu lowe go na Sowar, dan Yehovah gi en primisi fu du dati.​—w23.07, blz. 21.

San wan wefi kan du efu en trowpatna e luku porno?

A musu hori na prakseri taki a no en fowtu. A musu tan poti prakseri na a matifasi di a abi nanga Gado. A musu denki dipi tu fu den Bijbel tori fu uma di ben de nanga bigi sari ma di feni trowstu na Gado. A kan yepi en masra fu tan fara fu situwâsi di kan de wan tesi gi en.​— w23.08, blz. 14-17.

Fa koni fu man si sani krin kan yepi wi fu piki na wan safri fasi te sma e poti muilek aksi gi wi di abi fu du nanga a bribi fu wi?

Wi kan si na aksi leki wan okasi fu kon sabi fa a sma e denki noso san prenspari gi en. Disi o yepi wi fu piki a sma na wan safri fasi.​—w23.09, blz. 17.

Fa wi kan kisi krakti te wi e luku na eksempre fu Maria?

Di Maria kon sabi taki a ben o tron a mama fu a Mesias, dan a suku yepi na trawan di ben kan gi en krakti. Gabrièl nanga Elisabet gi Maria dek’ati nanga yepi fu Bijbel. Wi kan kisi krakti tu fu den Kresten brada nanga s’sa fu wi.​—w23.10, blz. 15.

Na sortu fasi Yehovah kan piki den begi fu wi?

A e pramisi wi taki a o arki den begi fu wi èn a o luku efu den begi fu wi e kruderi nanga san a abi na prakseri (Yer. 29:12). Te sma e begi fu den srefi sortu sani, dan Yehovah kan piki den begi dati na difrenti fasi. Wi kan de seiker taki a o horibaka gi wi ala ten.​—w23.11, blz. 21-22.

Romesma 5:2 e taki fu „howpu”, sobun fu san ede vers 4 e taki baka fu howpu?

Te wan sma e yere a bun nyunsu, dan a kan kisi a howpu fu libi fu têgo na ini wan paradijs na grontapu. Ma te tesi e miti en, te a e hordoro, èn te a e si taki Gado feni en bun, dan a howpu fu en e kon moro tranga èn a e firi taki Gado de nanga en.​—w23.12, blz. 12-13.