1-2. San p’pa nanga m’ma musu du te a pkin fu den e aksi den sani fu Gado èn fu Bijbel?

 FURU sma ben o agri taki fu kweki pkin na wan sani di e teki ala yu ten nanga krakti. Efu yu na wan p’pa noso wan m’ma, dan a no de fu taki dati yu e du ala san yu man fu tranga a bribi fu yu pkin. Yehovah breiti nanga dati (Deut. 6:6, 7). Te a pkin fu yu e kon bigi, dan a kan bigin aksi sani di abi fu du nanga a bribi fu wi, soleki fu san ede Yehovah no wani taki wi du son sani.

² Kande yu o denki taki a pkin fu yu e aksi den sani disi fu di a bribi fu en no tranga nofo. Ma fu taki en leti, a de fanowdu taki pkin di e gro kon bigi e poti aksi fu man tranga a bribi fu den (1 Kor. 13:11). Dati meki yu no abi fu broko yu ede. Ten den e poti aksi gi yu, dan yu kan gebroiki na okasi disi fu yepi den fu denki moro dipi fu sani èn fu tranga a bribi fu den na ini Gado nanga Bijbel.

3. San wi o luku na ini na artikel disi?

³ Na ini na artikel disi, wi o luku fa p’pa nanga m’ma kan yepi den pkin fu den (1) fu kon abi wan tranga bribi na ini Gado èn na ini Bijbel, (2) fu ferstan fu san ede den o kisi wini te den e hori densrefi na den wet fu Bijbel di e sori san bun èn san no bun, èn (3) fu kon sabi fa den kan taki fu a bribi fu den nanga trawan. Wi o luku tu fu san ede a bun te pkin e poti aksi. Boiti dati, wi o taki fu wan tu sani di yu kan du nanga den pkin fu yu, èn den sani dati o gi yu okasi fu taki nanga den fu a bribi fu wi.

 YEPI YU PKIN FU KON ABI WAN TRANGA BRIBI NA INI GADO ÈN NA INI BIJBEL

4. Sortu sani wan pkin ben kan aksi yu, èn fu san ede?

⁴ A pkin fu yu no o bribi na ini Yehovah soso fu di yu e du dati. Yu no gebore nanga bribi èn a pkin fu yu no gebore nanga en tu. Dati meki a kan taki a pkin fu yu o bigin aksi yu sani soleki: ’Fa mi kan sabi seiker taki wan Gado de? Mi kan bribi trutru san Bijbel e taki?’ Fu taki en leti, Bijbel e gi wi dek’ati fu gebroiki wi „frustan” èn fu „ondrosuku ala sani fu luku efu den tru” (Rom. 12:1; 1 Tes. 5:21). Ma fa yu kan yepi yu pkin fu tranga a bribi fu en?

5. San p’pa nanga m’ma kan du fu yepi den pkin fu bribi na ini Bijbel? (Romesma 12:2)

⁵ Gi yu pkin dek’ati fu feni beweisi di e sori taki san Bijbel e taki tru. (Leisi Romesma 12:2.) Te yu pkin e poti aksi gi yu, dan gebroiki na okasi dati fu sori en fa a kan feni piki tapu den aksi dati. Gebroiki den sani di wi abi fu ondrosuku Bijbel, soleki Ondrosuku Bijbel moro fini​—Gi Yehovah Kotoigi. Na ini a buku disi a kan go na a tori „Bijbel” èn a kan suku a pisi di nen „Gado gebroiki en santa yeye”. Drape a o feni beweisi di e sori taki Bijbel a no gewoon wan buku di libisma skrifi. Na presi fu dati, Bijbel na „a wortu fu Gado” (1 Tes. 2:13). A kan ondrosuku sani tu fu na owruten foto Ninefei di ben de na ini Asiria. Fosi, wan tu sabiman ben feni taki a foto Ninefei no ben de noiti. Ma na a ten fu 1850, sabiman feni a brokopresi fu Ninefei dipi na ondro gron. Disi ben de a beweisi taki Bijbel no ben lei (Sef. 2:13-15). Efu yu pkin wan sabi fa a pori di Ninefei kisi meki Bijbel profeititori kon tru, dan a kan luku na artikel „Yu ben sabi a sani disi?”, na ini A Waktitoren fu november 2021. Meki a pkin fu yu teki den sani di skrifi na ini den buku fu wi gersi nanga san skrifi na ini tra buku di de fu fertrow. Disi o yepi en fu bribi san Bijbel e taki.

6. Fa p’pa nanga m’ma kan yepi den pkin fu denki dipi fu den sani di Bijbel e taki? (Luku a prenki.)

⁶ Yepi yu pkin fu denki dipi fu den sani di Bijbel e leri. Yu abi furu difrenti okasi fu taki fu Bijbel èn fu Gado nanga den pkin fu yu. Kande yu kan leri yu pkin den sani disi te unu e go na presi soleki wan museum, wan park, noso na wan bijkantoro fu Yehovah Kotoigi. Te yu go luku wan museum, awinsi nanga yepi fu Internet, dan yu kan sori yu pkin fa wan sani di den e si drape, noso wan sani di ben psa na ini owruten, abi fu du nanga wan tori na ini Bijbel. Disi kan yepi yu pkin fu  si taki san Bijbel e taki, tru. A pkin fu yu sabi taki Gado en nen skrifi tapu wan pisi ston di sma sabi leki a Moab-ston èn di owru moro leki 3000 yari? A Moab-ston de fu si na ini a Louvre Museum na Parijs, na ini Fransikondre. Boiti dati, wan kopi fu a Moab-ston de fu si na a tentoonstelling di nen „Bijbel nanga a nen fu Gado”, èn a e hori na a edekantoro fu Yehovah Kotoigi na Warwick, na ini New York. Tapu a Moab-ston skrifi taki Kownu Meisa fu Moab ben opo ensrefi teige Israel. A sani disi e kruderi nanga san Bijbel e taki (2 Kow. 3:4, 5). Te yu pkin e si den beweisi di e sori taki san Bijbel e taki tru, dan a bribi fu en o kon moro tranga.​—Luku 2 Kroniki 9:6.

7-8. (a) San wi kan leri fu den moi sani di Gado meki? Gi wan eksempre. (Luku a prenki.) (b) Sortu aksi kan yepi yu pkin fu bribi taki wan Mekiman de?

⁷ Gi den pkin fu yu dek’ati fu denki dipi fu den sani di Yehovah meki. Te yu e waka na ini wan gron, noso te yu e wroko na ini yu dyari, dan yepi yu pkin fu si den moi patroon na ini den sani di Gado meki. Yepi yu pkin fu kon ferstan taki a musu fu de so taki na wan koni sma meki den sani disi. Fu eksempre, te yu e luku wan pakro, son bromki, den w’wiri fu son bon, èn son grupu stari, dan yu o si taki wan patroon fu spiraal de fu si na ini ala den sani disi. Sabiman studeri den sortu patroon disi furu yari langa. Sabiman Nicola Fameli e taki dati te yu e teri den spiraal di de fu si na ini sonwan fu den sani di Gado meki, dan yu o si taki den seti na wan spesrutu fasi. A sani disi nen de reeks van Fibonacci. Den spiraal disi de fu si na ini furu sani, soleki starisistema, pakro, den w’wiri fu bon, nanga zonnebloem. a

⁸ A kan taki na skoro, a pkin fu yu e leri fu tra wet di Gado meki gi grontapu. Fu eksempre, a wet fu a zwaartekracht e sorgu taki na atmosfeer e tan krosbei fu grontapu, a e sorgu taki falawatra nanga frudu e kon, taki a watra fu den liba nanga kriki e tan lon go na den se, èn taki sani e tan waka na so wan fasi taki libi man de na grontapu. Ma suma meki a wet di e hori ala sani na wán? Suma e sorgu taki den sani na ini a natuur seti na so wan orga fasi? O moro yu pkin e denki fu den sani disi, o moro a o bribi taki na Gado meki ala sani (Hebr. 3:4). Te fu kba, yu kan aksi en a sani disi: „Efu Gado meki libisma, dan yu no denki taki a gi wi rai di e sori wi fa wi kan de koloku?” Baka dati, yu kan sori yu pkin taki den prenspari rai dati de fu feni na ini Bijbel.

 YEPI YU PKIN FU FERSTAN FU SAN EDE A BUN FU GI YESI NA DEN WET DI E SORI SAN BUN ÈN SAN OGRI

9. Fu san ede yu pkin ben kan bigin poti aksi di abi fu du nanga son wet fu Bijbel?

⁹ Son leisi, yu pkin kan aksi yu sani fu di a wani sabi san bun èn san ogri, soleki fa Bijbel e taki. Pruberi fu kon sabi fu san ede yu pkin e aksi yu den sani dati. A de so taki a no e bribi san Bijbel e taki? Noso a de so taki a no sabi fa fu ferklari gi trawan san a e bribi? Awinsi fa a no fa, yu kan yepi yu pkin fu kon ferstan fu san ede a bun te wi e gi yesi na den wet fu Yehovah. Dati meki a bun fu studeri a Yu kan de koloku fu têgo!-buku nanga en. b

10. Fa yu kan yepi yu pkin fu tron wan mati fu Yehovah?

¹⁰ Gi yu pkin dek’ati fu tron wan bun mati fu Yehovah. Te yu e studeri Bijbel nanga yu pkin, dan gebroiki den aksi nanga den agersitori di de fu feni na ini a Yu kan de koloku fu têgo!-buku (Odo 20:5). Fu eksempre, les 8 e sori taki Yehovah de leki wan lobi’ati mati di e gi wi rai di kan yepi wi èn kibri wi. Te yu taki fu 1 Yohanes 5:3, dan yu kan aksi yu pkin: „Now di yu sabi taki Yehovah na so wan bun Mati, dan fa wi musu si den sani di a e taigi wi fu du?” Kande a gersi leki disi na wan simpel aksi, ma a kan yepi yu pkin fu kon ferstan taki Yehovah e gi wi wet fu di a lobi wi.​—Yes. 48:17, 18.

11. Fa yu kan yepi yu pkin fu kon ferstan fu san ede a bun fu gi yesi na san Bijbel e leri? (Odo 2:10, 11)

¹¹ Sori yu pkin fa wi e kisi wini te wi e gi yesi na san Bijbel e leri. Te unu e leisi Bijbel noso a deitekst makandra, dan ferteri yu pkin fa den gronprakseri fu Bijbel yepi a famiri fu unu. Fu eksempre, yu kan gebroiki den okasi disi fu yepi yu pkin fu kon ferstan taki a bun fu wroko tranga èn fu abi a gwenti fu taki san tru (Hebr. 13:18). Yu kan sori yu pkin tu taki te a e gi yesi na den rai fu Bijbel, dan dati o yepi en fu de gosontu èn fu de koloku (Odo 14:29, 30). Efu yu pkin e ferstan fu san ede a bun fu gi yesi na san Bijbel e leri, dan seiker a o wani du dati.​—Leisi Odo 2:10, 11.

12. Fa wan p’pa e yepi a boi fu en fu ferstan fu san ede a bun fu gi yesi na den rai fu Bijbel?

¹² Steve nanga en wefi abi wan boi di nen Ethan. Steve e ferteri fa den e yepi Ethan fu ferstan taki Yehovah e meki wet fu di a lobi wi. Steve e taki: „Wi e poti aksi gi en soleki: ’Fu san ede Yehovah wani taki wi gi yesi na a rai dati? Fa disi e sori taki a lobi wi? San ben o psa efu yu no ben o gi yesi na a rai disi?’” Den sortu takimakandra disi yepi Ethan fu bribi taki san Yehovah taki bun ala ten. Steve e taki moro fara: „Wi wani yepi Ethan fu kon si taki a koni fu Bijbel bun omeni tron moro a di fu libisma.”

13. Fa p’pa nanga m’ma kan train den pkin fu den fu gi yesi na den rai fu Bijbel? Gi wan eksempre.

¹³ Train yu pkin fu fiti den rai fu Bijbel. Wan okasi di wi kan gebroiki fu du dati, na te wi pkin musu leisi wan buku gi skoro. Kande den sma na ini a buku dati e du sani di Yehovah no feni bun. Kande den e du hurudu noso kande den e kisi faya atibron. Èn kande a buku skrifi na so wan fasi di e meki a gersi leki den sani dati no fowtu. Yu kan aksi yu pkin fu prakseri fa Yehovah e firi te sma e du den sortu sani disi (Odo 22:24, 25; 1 Kor. 15:33; Fil. 4:8). Disi kan yepi yu pkin fu si fu san ede a bun fu gi yesi na Yehovah. Èn efu a sma di e gi les, noso den tra studenti e aksi en fa a e  denki fu a buku, dan yu pkin kan gebroiki na okasi dati fu taki fu a bribi fu en.

LERI YU PKIN FA FU TAKI FU A BRIBI FU EN

14. Sortu tori wan Kresten yonguwan kan feni muilek fu taki fu en nanga trawan, èn fu san ede?

¹⁴ Son leisi, Kresten yonguwan kan frede fu taki nanga trawan fu a bribi fu den. Kande den e frede te den musu ferklari fu san ede den no e bribi na ini na evolutie-leri. Fu san ede? Kande a meneer noso a jufrow fu den e taki dati evolutie psa trutru. Efu yu na wan p’pa noso wan m’ma, dan fa yu kan yepi yu pkin fu de seiker taki den sani di a e bribi, tru?

15. San kan yepi wan Kresten yonguwan fu de seiker taki den sani di a e bribi, tru?

¹⁵ Yepi yu pkin fu de seiker fu den sani di a e bribi. A pkin fu yu no abi fu syen taki a e bribi na ini a Mekiman (2 Tim. 1:8). Fu san ede? Fu di furu sabiman e ferstan tu taki a libi no kon fu ensrefi. Den sabiman disi e si beweisi di e sori taki a musu fu de so taki wan koni Mekiman meki ala den difrenti libisani. Dati meki den no e bribi na ini na evolutie-leri di furu skoro e leri studenti. Wan sani di kan yepi yu pkin fu tranga a bribi fu en èn fu no frede, na te a e ondrosuku fu san ede tra brada nanga sisa e bribi taki na Gado meki ala sani. c

16. Fa p’pa nanga m’ma kan yepi a pkin fu den fu ferklari gi trawan fu san ede a e bribi na ini wan Mekiman? (1 Petrus 3:15) (Luku a prenki.)

¹⁶ Yepi yu pkin fu sabi fa fu ferklari gi trawan fu san ede a e bribi taki wan Mekiman de. (Leisi 1 Petrus 3:15.) Kande yu nanga yu pkin kan luku den artikel tapu jw.org di e taki fu den sani di Gado meki èn fu na evolutie-leri. Disi o yepi yu pkin fu sabi na sortu fasi a musu ferklari sani so taki sma man ferstan taki wan Mekiman de. Oefen nanga yu pkin san a kan taki. Memre en taki a no abi fu hartaki nanga den pkin fu en klas. Gi en dek’ati fu hori en simpel efu wan sma wani taki nanga en fu a tori. Kande wan fu den pkin na skoro o taki: „Mi e bribi soso san mi man si nanga mi ai, èn noiti mi no si Gado.” Wan Kresten yonguwan ben kan piki: „Kow taki dati yu e waka na ini wan busi di de farawe fu a foto èn yu e si wan moi oso drape. San yu ben o denki? Yu no ben o denki taki na wan sma bow  na oso disi? Na so a de tu nanga a planeiti fu wi nanga ala libisani na tapu. A de krin taki den sani disi no kon fu densrefi.”

17. Fa p’pa nanga m’ma kan yepi den pkin fu feni okasi fu taki nanga sma fu Bijbel? Gi wan eksempre fu sori san a pkin kan aksi wan pkin na skoro.

¹⁷ Yepi yu pkin fu feni okasi fu taki nanga sma fu Bijbel (Rom. 10:10). Yu kan agersi a muiti di yu pkin e meki fu leri sma fu Bijbel, nanga a muiti di wan sma e meki fu prei wan pokusani. Na a bigin a sma e oefen makelek singi. Ma te fu kba a o moro makelek gi en fu prei poku. Na so a de tu taki wan Kresten yonguwan kan taki wan tu simpel sani te a e bigin taki nanga trawan fu a bribi fu en. Kande a kan aksi wan pkin na skoro: „Yu ben sabi taki sabiman lobi teki sani abra fu den sani di Gado meki? Mi o sori yu wan moi felem.” Baka te yu pkin sori en wan fu den felem di nen Na wan sma meki en?, dan kande yu pkin kan taki: „Efu sma e prèise wan sabiman fu di a teki sani abra fu den sani di Gado meki, dan suma wi musu prèise te wi e luku den sani na grontapu?” Kande a tra pkin o wani kon sabi moro fu Yehovah.

TAN YEPI YU PKIN FU TRANGA A BRIBI FU EN

18. Fa p’pa nanga m’ma kan tan tranga a bribi fu a pkin fu den?

¹⁸ Wi e libi na ini wan grontapu di lai nanga sma di no e bribi na ini Yehovah (2 Petr. 3:3). P’pa nanga m’ma, dati meki unu musu yepi un pkin fu studeri tori di o yepi den fu kon abi moro lespeki gi Gado Wortu èn gi den wet fu en. Yepi en fu denki moro dipi fu sani èn yepi en fu tranga a bribi di a abi na ini Yehovah. Dati meki a bun fu taki nanga en fu den sani di Yehovah meki. Yepi yu pkin fu ferstan den moi Bijbel profeititori di kon tru kba. Ma san moro prenspari, na taki yu musu begi nanga yu pkin èn begi gi yu pkin. Te yu e du dati, dan yu kan de seiker taki Yehovah o blesi a muiti di yu e meki fu yepi yu pkin fu kon abi wan tranga bribi.​—2 Kron. 15:7.