1. O prenspari brede ben de gi den sma di kari na ini Bijbel?

 BREDE ben de a moro prenspari n’nyan gi den sma na ini Bijbel ten (Gen. 14:18; Luk. 4:4). Brede ben prenspari so te taki son leisi te Bijbel e gebroiki a wortu „brede”, dan dati ben abi fu du nanga a ’n’nyan’ di sma ben e nyan ibri dei (Mat. 6:11). Boiti dati, tu fu den wondru di Yesus ben du, ben abi fu du nanga brede (Mat. 16:9, 10). Wan fu den tori dati de fu feni na ini Yohanes kapitel 6. Meki wi go luku a tori dati fu si san wi kan leri fu en.

2. Sortu situwâsi ben meki taki dusundusun sma ben abi n’nyan fanowdu?

² Di den apostel fu Yesus ben kba nanga a preikiwaka fu den, dan Yesus teki boto makandra nanga den èn den go abrasei fu a Se fu Galilea. Drape den ben o man rostu pkinso (Mark. 6:7, 30-32; Luk. 9:10). Den doro krosbei fu Betsaida, na wan presi pe den ben kan de den w’wan. Ma sma yere taki Yesus ben de drape èn heri esi dusundusun sma doro drape fu di den ben wani si en. Yesus no libi den sma so, ma a teki en ten fu leri den sani fu a Kownukondre èn a dresi den sikiwan. Fu di a ben e kon lati kba, meki den disipel ben e aksi densrefi fa ala den sma disi ben o man feni wan sani fu n’nyan. Kande sonwan fu den ben abi pkinso n’nyan na den, ma furu fu den ben o abi fu go bai n’nyan na ini den dorpu (Mat. 14:15; Yoh. 6:4, 5). San Yesus ben o du?

YESUS DU WAN WONDRU FU GI SMA BREDE

3. San Yesus taigi den apostel fu du gi den ip’ipi sma? (Luku a prenki.)

³ Yesus ben taigi den apostel: „Den no abi fu gowe. Gi den wan sani fu nyan” (Mat. 14:16). Ma fa den ben o man du  dati, fu di sowan 5000 man ben de drape. Èn te yu ben o teri den uma nanga den pkin, dan a kan taki sowan 15.000 sma ben musu kisi n’nyan (Mat. 14:21). Ne Andreas taki: „Wan pikin boi de dya èn a abi feifi brede nanga tu pikin fisi. Ma disi no sa sari gi den someni sma di de dya” (Yoh. 6:9). Sma ben gwenti nyan brede di ben meki fu groto èn a kan taki den fisi disi ben de drei fisi di sma ben sowtu. Ma den fisi nanga den brede di a boi ben abi noiti no ben o sari gi so furu sma. Na dati den disipel ben e denki.

4. San wi kan leri fu Yohanes 6:11-13? (Luku den prenki.)

⁴ Fu di Yesus ben wan sori swit’fasi gi den sma, meki a aksi den fu sdon na ini grupu na tapu a grasi (Mark. 6:39, 40; leisi Yohanes 6:11-13). Ne Yesus taigi en P’pa tangi gi den brede nanga den fisi. Na so a sori taki na Gado ben de a sma di ben sorgu gi a n’nyan èn a sori tu taki a ben de nanga tangi gi a n’nyan. Neleki Yesus, wi musu begi tu fosi wi n’nyan, awinsi wi de wi w’wan noso nanga trawan. Baka dati Yesus meki den prati a n’nyan èn den sma nyan den bere furu. N’nyan ben lai so te taki den sma no ben man nyan ala. Yesus no ben wani taki den trowe a n’nyan dati gwe. Dati meki a taigi den disipel fu tyari a n’nyan di ben tan abra kon na wan, so taki den ben kan gebroiki en bakaten. Yesus ben e gebroiki den sani di a ben abi na wan koni fasi. Disi na wan bun eksempre gi wi. Efu yu abi pkin, dan yu kan gebroiki a tori disi fu leri den fu san ede a prenspari fu begi fosi den nyan, fu sori swit’fasi gi trawan, èn fu de klarklari fu prati san den  abi nanga trawan, neleki fa Yesus ben du dati.

5. San a pipel ben wani du di den si den wondru di Yesus du a dei dati, ma san Yesus du?

⁵ Den sma ben e ferwondru fu a fasi fa Yesus ben e gi leri èn fu den wondru di a ben e du. Den ben sabi taki Moses ben pramisi taki Gado ben o seni wan profeiti kon. Dus, kande den ben e aksi densrefi efu Yesus ben de a profeiti dati (Deut. 18:15-18). Kande den ben e denki taki Yesus ben o de wan bun tiriman, èn taki a ben o man sorgu srefi gi nyan gi ala sma na ini Yerusalem. Dati meki den sma ben wani „grabu [Yesus] fu meki a tron kownu” (Yoh. 6:14, 15). Efu Yesus ben o gi pasi taki sma poti en leki kownu, dan a ben o teki sei na ini den politiek afersi fu den Dyu di ben de na ondro a tiri fu Rome. Ma a no du dati. Bijbel e sori taki Yesus besroiti fu ’go na a bergi en w’wan’. Aladi tra sma ben e dwengi en, tòg a weigri fu bemui nanga politiek. Disi e leri wi wan prenspari sani.

6. Fa wi kan sori taki wi wani teki na eksempre fu Yesus? (Luku a prenki.)

⁶ A no de fu taki dati tra sma no o aksi wi fu du wan wondru so taki moro brede de èn so taki sikisma kan kon betre. Den no o pruberi tu fu meki wi tron kownu noso tiriman fu a kondre fu den. Ma den kan dwengi wi fu stem noso fu horbaka gi  wan sma di den denki taki a o man tyari kenki kon. Na eksempre fu Yesus de krin. A weigri fu bemui nanga politiek afersi, èn bakaten a taki srefi: „Mi kownukondre no de fu a grontapu disi” (Yoh. 17:14; 18:36). Leki Kresten, wi musu abi a srefi denki leki Yesus èn wi musu teki na eksempre fu en. Neleki en, wi e horbaka gi Gado Kownukondre. Wi e ferteri trawan fu a Kownukondre disi èn wi e begi fu a kon (Mat. 6:10). Meki wi go luku san moro wi kan leri fu a wondru di Yesus ben du fu sorgu taki den sma ben abi brede.

„SAN DEN BREDE WANI TAKI”

7. San Yesus nanga den apostel du? (Yohanes 6:16-20)

⁷ Baka di Yesus gi den sma n’nyan, a meki den apostel fu en gwe libi a kontren drape nanga boto fu go baka na Kaperna-um. Ma Yesus go na den bergi en w’wan fu di a no ben wani taki den sma poti en leki kownu. (Leisi Yohanes 6:16-20.) Di den apostel ben de na ini a boto, dan wan bigi winti wai di meki taki a watra bigin seki kfalek. Ne Yesus waka tapu a watra fu kon na den. A taigi na apostel Petrus fu waka tapu a watra tu (Mat. 14:22-31). Di Yesus kren go na ini a boto, dan a winti saka. Den disipel no ben man bribi èn den taki: „Yu na trutru a Manpikin fu Gado” a (Mat. 14:33). Fu san ede den disipel ben taki a sani disi baka di Yesus ben waka na tapu watra? Fu san ede den no ben taki disi di Yesus ben du wan wondru nanga a brede? Luku san Markus ben taki fu a srefi okasi disi. A ben skrifi: „Di den [apostel] si disi, den fruwondru srefisrefi. Den no ben frustan ete san a wondru fu den brede ben wani taki. A ben tranga gi den fu frustan” (Mark. 6:50-52). Iya, den no ben e ferstan taki Yehovah ben gi Yesus a makti fu du moro leki fu sorgu gi brede nomo. Syatu baka dati, Yesus taki ete wan leisi fu a wondru di a ben du nanga a brede èn wi kan leri wan tra sani fu dati.

8-9. Fu san ede den sma ben go suku Yesus? (Yohanes 6:26, 27)

⁸ Den sma di Yesus ben gi n’nyan ben e suku nomo fu furu den bere. Fa so? A dei baka dati, den si taki Yesus nanga den apostel ben gwe. Dati meki den sma teki boto di ben kmoto fu Tiberias èn den go na Kaperna-um fu go suku Yesus (Yoh. 6:22-24). Yu denki taki den ben du dati fu di den ben wani yere moro fu a Kownukondre? Nôno. A moro prenspari sani di den ben e prakseri, na fu kisi brede. Fa wi du sabi dati?

⁹ Luku san psa di den sma feni Yesus krosbei fu Kaperna-um. Yesus taigi den krin taki den ben kon suku en soso fu di den ben wani n’nyan. Aladi den ’ben nyan a brede teleki den bere furu’, tòg dati ben de „nyanyan di e pori”. A taigi den fu wroko „gi nyanyan di e tan langa èn di e gi sma têgo libi”. (Leisi Yohanes 6:26, 27.) Yesus ben taki dati en P’pa ben o sorgu gi a n’nyan dati. Di den sma yere taki n’nyan de di kan gi den têgo libi, dan a musu de so taki den no ben man bribi a sani dati. Sortu n’nyan ben kan du dati èn fa den ben kan kisi en?

10. San a pipel ben musu du fu man kisi „têgo libi”?

¹⁰ Soleki fa a sori, dan den Dyu dati ben wani sabi san den ben musu du fu man kisi a n’nyan dati. Kande den ben e prakseri den sani di den ben musu du, soleki fa a Wet fu Moses ben taki. Ma Yesus ben taigi  den: „Disi na san Gado e aksi fu unu: Un musu bribi na ini a sma di Gado seni kon” (Yoh. 6:28, 29). Den ben musu bribi na ini Yesus efu den ben wani kisi „têgo libi”. Fu taki en leti, Yesus ben taki kba fu a tori dati (Yoh. 3:16-18, 36). Èn bakaten a ben o taki moro fara fa wi kan kisi têgo libi.​—Yoh. 17:3.

11. Fa den Dyu sori taki na n’nyan nomo den ben wani? (Psalm 78:24, 25)

¹¹ Den Dyu dati no ben feni taki den ben musu bribi na ini Yesus. Den aksi en: „Dan sortu marki yu o sori wi, so taki wi kan si dati èn bribi yu?” (Yoh. 6:30) Den taki dati na ini a ten fu Moses, den afo fu den ben kisi mana di ben de den aladei n’nyan (Neh. 9:15; leisi Psalm 78:24, 25). A de krin taki den ben e prakseri soso fu kisi brede di den ben kan nyan. Baka dati, Yesus taki fu „a trutru brede fu hemel” di ben de leki a mana di ben kmoto fu hemel en di ben kan gi den têgo libi. Ma den no aksi en srefi san a ben wani taki nanga dati (Yoh. 6:32). Fu di den ben e prakseri soso n’nyan, meki den no ben arki san Yesus ben e pruberi fu taigi den fu a têgo libi. San wi kan leri fu a tori disi?

SAN MUSU DE A MORO PRENSPARI SANI GI WI

12. Fa Yesus sori san na a moro prenspari sani?

¹² San na wan prenspari sani di wi kan leri fu Yohanes kapitel 6? Wi e leri taki wi musu gi yesi na Gado èn taki wi musu tan bun mati fu en. Dati musu de a moro prenspari sani gi wi. Di Satan ben tesi Yesus, dan Yesus sori tu taki a moro prenspari fu gi yesi na Gado, leki fu abi n’nyan (Mat. 4:3, 4). Èn na ini a prenspari lezing di a ben hori na tapu wan bergi, a leri wi taki a prenspari fu de wan bun mati fu Gado (Mat. 5:3). Dati meki wi musu aksi wisrefi: ’A fasi fa mi e libi e sori taki a matifasi di mi abi nanga Yehovah prenspari moro gi mi leki fu plisi den lostu fu mi?’

13. (a) Fu san ede a no fowtu fu nyan nanga prisiri? (b) Gi san Paulus e warskow wi? (1 Korentesma 10:6, 7, 11)

¹³ A no fowtu fu begi Gado fu gi wi den sani di wi abi fanowdu èn fu nyan bun fu den sani dati (Luk. 11:3). Bijbel e taki dati a bun te wan sma e ’nyan, dringi èn e prisiri nanga a tranga wroko fu en’ (Preik. 2:24; 8:15; Yak. 1:17). Ma wi musu luku bun taki den sani di wi abi no e tron den moro prenspari sani gi wi. Na disi na apostel Paulus ben wani leri wi te wi e luku san a ben skrifi den Kresten brada nanga sisa fu en. A ben taki fu den ogri di den Israelsma ben du di den ben de na ini a gran sabana, èn a taki tu fu a sani di psa krosbei fu Sinai-bergi. A ben warskow den Kresten fu no „angri fu du ogri, soleki fa [den Israelsma] ben e angri fu du den sani dati”. (Leisi 1 Korentesma. 10:6, 7, 11). Yehovah ben du wan wondru fu sorgu taki den Israelsma dati ben abi n’nyan. Ma fu di den ben gridi gi n’nyan, meki a sani dati tron wan takru sani gi den (Num. 11:4-6, 31-34). Di den Israelsma ben e anbegi a gowtu pkin kaw, dan den ben e nyan, dringi, èn meki prisiri (Eks. 32:4-6). Paulus ben taki fu den eksempre disi fu warskow den Kresten di ben e libi na a ten fosi Yerusalem nanga a tempel fu en kisi pori na ini a yari 70. Fu di wi e doro a kba fu a grontapu disi, meki a prenspari srefsrefi taki wi no e meki a srefi fowtu di den Israelsma ben meki.

14. San wi kan ferwakti na ini a a nyun grontapu te a abi fu du nanga n’nyan?

¹⁴ Di Yesus taigi wi fu begi Gado so taki a gi wi „a brede di wi abi fanowdu gi a dei disi”, dan a leri wi tu fu begi so taki a wani  fu Gado psa na grontapu „soleki fa a e pasa na hemel” (Mat. 6:9-11). Fa grontapu o de na a ten dati? Bijbel e sori taki Gado wani taki gosontu n’nyan de na grontapu. Yesaya 25:6-8 e sori wi taki bogobogo switi n’nyan o de gi libisma te a Kownukondre fu Yehovah o tiri. Psalm 72:16 e taki: „Furu n’nyan o kon de na grontapu. Srefi na tapu den ede fu den bergi n’nyan o lai.” Yu e si kba fa yu e bori a n’nyan di yu lobi, noso wan tra sani di noiti yu no bori ete? Yu o man prani yu eigi droifidyari èn nyan bun fu den froktu fu en (Yes. 65:21, 22). Èn yu no o de yu w’wan.

15. San den sma di o kisi wan opobaka o leri? (Yohanes 6:35)

¹⁵ Leisi Yohanes 6:35. Prakseri den sma baka di ben nyan den brede nanga den fisi di Yesus ben gi den. Awinsi furu fu den sma disi no ben poti bribi na ini Yesus, tòg a kan taki den o kisi wan opobaka èn kande yu o miti wan tu fu den (Yoh. 5:28, 29). Ma den o abi fu leri san den wortu disi fu Yesus wani taki: „Mi na a brede di e gi libi. Noiti angri o kiri a sma di e kon na mi.” Den o abi fu sori taki den e bribi taki Yesus gi en libi gi den. Na a ten dati, sma di kisi wan opobaka èn sosrefi den pkin di o gebore na ini a nyun grontapu, o kon sabi san na den tru tori fu Yehovah èn san a abi na prakseri nanga libisma. Wi o prisiri trutru fu leri sma den moi sani disi. Te wi e yepi trawan fu tron mati fu Yehovah, dan dati o gi wi moro prisiri leki ala a switi n’nyan di wi o nyan na ini a nyun grontapu.

16. San wi o luku na ini a tra artikel?

¹⁶ Wi poti prakseri na wan pisi fu a tori na ini Yohanes kapitel 6, ma Yesus ben abi moro sani fu leri wi fu „a têgo libi”. Den Dyu ben musu arki bun san Yesus ben e taigi den, èn wi musu du dati tu. Wi o luku Yohanes kapitel 6 moro fara na ini a tra artikel.