1-3. (a) Fa wi sabi taki wi kan tron mati fu Gado? (b) Fu suma wi o taki na ini na artikel disi?

BIJBEL e taki dati Abraham ben de wan mati fu Gado (Yes. 41:8; Yak. 2:23). Fu taki en leti, a reti-ati man disi na a wan-enkri sma di Bijbel e kari a mati fu Gado. Ma disi wani taki dati soso Abraham ben tron wan mati fu Yehovah? Nôno. Bijbel e sori taki ibriwan fu wi kan tron wan mati fu Gado.

² Bijbel abi furu eksempre fu reti-ati man nanga uma di ben e lespeki Yehovah, di ben e bribi na ini en èn di ben tron bun mati fu en. (Leisi Psalm 25:14.) Na apostel Paulus ben taki fu den ’someni kotoigi di de na wi lontu neleki wan bigi wolku’ (Hebr. 12:1). Ala den sma disi ben de mati fu Gado.

³ Meki wi go luku na eksempre fu dri bun mati fu Yehovah di kari na ini Bijbel. Wi o luku a tori fu (1) Rut, wan yongu uma fu Moab di ben lasi en masra na ini dede, (2) Heskia, wan reti-ati kownu fu Yuda, nanga (3) Maria, Yesus mama di ben abi sakafasi. San wi kan leri fu a fasi fa ibriwan fu den sma disi tron wan mati fu Gado?

4, 5. Sortu muilek bosroiti Rut ben musu teki èn fu san ede a ben hebi gi en? (Luku a prenki na a bigin fu na artikel.)

⁴ Pruberi fu si fa dri uma di lasi den masra na ini dede, e waka wan langa pasi na ini Moab-sabana aladi winti e wai a krosi fu den. Den dri uma disi na Naomi, Rut nanga Orpa. Rut nanga Orpa ben de den wefi fu den manpikin fu Naomi. Ma now Orpa e waka gowe fu di a teki a bosroiti fu drai go baka na en kondre Moab. Ma Naomi poti na en ede taki a o waka go doro na en mamakondre Israel. Rut musu teki wan muilek bosroiti. San a o du? A o drai go baka na en pipel na Moab? Noso a o tan nanga Naomi, a mama fu en masra, èn go makandra nanga en na Betlehem?​—Rut 1:1-8, 14.

⁵ Rut ben kan prakseri: ’Mi abi mi famiri na Moab. Mi abi mi mama nanga den tra famiriman fu mi drape pe mi kan go libi èn den kan yepi mi.’ Moab ben de en mamakondre. A ben abi a kulturu fu den Moabsma, a ben e taki a tongo fu den èn den sma disi ben de en pipel. Naomi no ben kan pramisi Rut taki te a ben de na Betlehem, a ben o abi den sani disi. A ben taigi Rut srefi fu tan na Moab fu di a ben sabi taki a no ben o man gi Rut nanga Orpa wan masra noso wan presi fu tan. San Rut ben o du? Luku san Orpa e du. A e „drai go baka na a pipel nanga den gado fu en” (Rut 1:9-15). Yu denki taki Rut ben wani drai go baka na den falsi gado fu en pipel? Kwetikweti.

6. (a) Sortu koni bosroiti Rut teki? (b) Fu san ede Boas taki dati Rut go suku kibri na Yehovah?

⁶ Soleki fa a sori, dan kande a masra fu Rut noso Naomi fruteri Rut sani fu Yehovah Gado. Rut kon leri taki Yehovah no ben de leki den gado fu Moab. A ben sabi taki a musu lobi Yehovah èn anbegi en. Ma a no dati wawan. Rut ben o abi fu teki wan bosroiti. A ben o teki Yehovah leki en eigi Gado? Rut teki wan koni bosroiti. A taki: „Yu pipel o de mi pipel èn yu Gado o de mi Gado” (Rut 1:16). A moi fu si fa Rut ben lobi Naomi. Ma a moro prenspari sani na taki a ben lobi Yehovah. Bakaten Boas, wan guduman di ben abi furu gron, prèise Rut taki a suku kibri na Yehovah. (Leisi Rut 2:12.) Disi e meki wi denki wan pikin fowru di e go suku kibri na ondro den bigi frei fu wan mamafowru (Ps. 36:7; 91:1-4). Yehovah ben tron leki so wan kibripresi gi Rut èn a blesi na uma disi fu di a ben abi wan tranga bribi. Noiti Rut sari taki a teki so wan bosroiti.

7. San kan yepi den sma di e draidrai fu gi densrefi abra na Yehovah?

⁷ Furu sma leri sabi Yehovah, ma den e tweifri fu go suku kibri na en. Den e draidrai fu gi densrefi abra na en èn fu teki dopu. Efu yu e draidrai fu gi yusrefi abra na Yehovah, dan aksi yusrefi fu san ede yu e wakti. Ala libisma e dini wan gado (Yos. 24:15). Fu san ede yu no e go suku kibri na a wan-enkri tru Gado? Te yu e gi yusrefi abra na Yehovah, dan dati na wan moi fasi fu sori taki yu e bribi na ini en. A o yepi yu fu du a wani fu en èn fu lusu iniwan problema di o miti yu. Na dati a du gi Rut.

8. Fruteri wan sani fu a libi fu Heskia.

⁸ Luku a tori fu Heskia. En ben kweki heri tra fasi leki Rut. A ben de fu a pipel Israel di ben gi densrefi abra na Yehovah. Ma a no ala Israelsma ben e du san Gado wani. Kownu Akas, a papa fu Heskia, ben de so wan sma. Na ogri kownu disi ben meki a pipel fu Yuda go dini falsi gado. A ben e du sani srefi di ben meki taki a tempel  fu Yehovah no ben de santa moro. Wi no man frustan fa a ben musu de gi Heskia di a ben de wan pikin boi. Wan tu brada fu en dede na wan ogri-ati fasi fu di sma bron den libilibi leki ofrandi gi wan falsi gado!​—2 Kow. 16:2-4, 10-17; 2 Kron. 28:1-3.

9, 10. (a) Fu san ede Heskia ati ben kan bron nanga Gado? (b) Fu san ede wi ati no musu bron nanga Gado? (c) Fu san ede wi no musu denki taki a fasi fa wi kweki o sori sortu sma wi o tron?

⁹ Heskia ben kan gro kon tron wan man di ati ben bron nanga Gado. Aladi son sma no kisi den bigi problema di Heskia kisi, toku den ’ati e bron srefisrefi nanga Yehovah’ èn nanga na organisâsi fu en (Odo 19:3). Tra sma e denki taki fu di den no kisi wan bun kweki, meki den srefi musu libi wan takru libi tu. Kande den e meki den srefi fowtu di den papa nanga mama meki (Esek. 18:2, 3). Den sma disi e si sani na a yoisti fasi?

¹⁰ Den sani di pasa na ini a libi fu Heskia e sori taki den sma disi no abi leti kwetikweti. Noiti wi ati musu bron nanga Yehovah, fu di a no en e meki taki ogri e miti sma (Yob 34:10). A tru taki papa nanga mama kan leri den pikin fu den bun sani noso ogri sani (Odo 22:6; Kol. 3:21). Ma a fasi fa wi kweki no abi fu sori sortu sma wi o tron. Fu san ede wi kan taki disi? Fu di Yehovah gi wi alamala wan moi kado: Wi man bosroiti gi wisrefi san wi o du èn san wi wani tron (Deut. 30:19). Fa Heskia gebroiki a sani disi di Gado gi wi?

11. San meki Heskia ben de wan fu den moro bun kownu fu Yuda?

¹¹ Aladi Heskia ben de a manpikin fu wan fu den moro ogri kownu fu Yuda, toku a tron wan fu den moro bun kownu. (Leisi 2 Kownu 18:5, 6.) A tru taki en papa no ben de wan bun eksempre gi en, ma tra sani ben de di yepi en fu du bun. Na ini a ten fu Heskia, yu ben abi den profeiti Yesaya, Mika nanga Hosea. Kande Kownu Heskia ben lobi yere den boskopu fu Gado di den profeiti disi ben meki bekènti. Disi ben meki taki den rai nanga den warskow fu Yehovah sungu go dipi na ini en ati èn dati yepi en fu du san bun. A no du den ogri di en papa du, ma a seti ala  sani kon bun baka. A krin a tempel, a aksi pardon fu den sondu fu a pipel èn a broko ala den falsi gado na ini a kondre puru (2 Kron. 29:1-11, 18-24; 31:1). Di Heskia kisi wan tu bigi problema, soleki di Kownu Sanherib fu Asiria ben wani kon feti nanga Yerusalem, dan a sori taki a ben abi furu deki-ati nanga bribi. A frutrow na tapu Gado fu a frulusu den. Nanga den sani di a ben e taki èn ben e du, a meki a bribi fu a pipel kon moro tranga (2 Kron. 32:7, 8). Wan leisi Heskia kisi heimemre. Ma di Gado gi en piri-ai, a sori sakafasi èn a ben abi berow (2 Kron. 32:24-26). A de krin taki Heskia no ben meki den sani di pasa di a ben de wan boi, pori a libi fu en. Na presi fu dati, a sori taki a ben de Yehovah mati. Dati meki a de wan bun eksempre gi wi.

12. San yepi furu sma na ini a ten disi fu tron mati fu Yehovah, neleki Heskia?

¹² Wi e libi na ini wan ogri grontapu pe sma no abi lobi gi makandra. Dati meki a no musu fruwondru wi taki furu pikin-nengre e gro kon bigi sondro wan papa noso mama di lobi den èn di e sorgu gi den (2 Tim. 3:1-5). Furu Kresten na ini a ten disi kweki na ini osofamiri di ben lai problema. Ma toku den tron bun mati fu Yehovah. Neleki Heskia, den sori taki a no fu di den no kisi wan bun kweki meki den musu go du ogri tu. Yehovah gi wi na okasi fu teki wi eigi bosroiti. Sobun, wi kan sori efu wi wani tai hori na en èn gi en glori neleki Heskia.

13, 14. Fu san ede a kan taki a grani di Maria kisi ben sori hebi gi en, ma san a piki Gabrièl?

¹³ Hondrohondro yari baka a ten fu Heskia, wan yongu Dyu uma fu Nasaret di ben abi sakafasi, tron wan spesrutu mati fu Yehovah. Nowan tra libisma ben kisi so wan bigi grani. A ben o kon de nanga bere, a ben o kisi a Manpikin fu Gado èn a ben o kweki en. A musu de so taki Yehovah ben e frutrow Maria, na umapikin fu Eli, so furu taki a gi en so wan bigi grani. Ma fa Maria ben e firi di a yere taki a kisi a bigi grani disi?

¹⁴ Nofo tron wi e prakseri nomo taki Maria ben musu si a grani disi leki wan moi sani. Ma wi e frigiti taki a kan taki a ben e broko en ede nanga wan tu sani tu. Gabrièl, na engel fu Gado, taigi Maria taki a ben o kon de nanga bere sondro taki a sribi nanga wan man. A sani disi ben de wan wondru. Gabrièl no taigi Maria taki a ben musu go fruteri en famiri noso den birtisma fu en fu san ede a ben de nanga bere. San den ben o denki? A musu fu de taki Maria ben e broko en ede nanga Yosef, a man di ben o trow nanga en. Fa Maria ben kan sori Yosef taki aladi  a de nanga bere, a no waka gi en? Kande a ben e broko en ede tu fu di a ben de wan hebi frantwortu fu kweki a Manpikin fu a Moro Hei Gado, fu sorgu gi en èn fu gi en leri. Wi no sabi san Maria ben e denki di Gabrièl taki nanga en. Ma wi sabi san a piki en: „Luku, mi na a umasrafu fu Yehovah! Meki sani pasa nanga mi soleki fa yu taki.”​—Luk. 1:26-38.

15. Fu san ede Maria ben abi so wan tranga bribi?

¹⁵ Maria ben abi wan tranga bribi. Wan umasrafu ben musu du ala sani di en masra taigi en. Sobun, Maria ben de seiker taki en Masra Yehovah ben o sorgu en èn taki a ben o yepi en. Maria ben wani du ala san Gado ben aksi fu en. Fa a du kon taki a ben abi so wan tranga bribi? Bribi a no wan sani di wi e kisi te wi gebore. Wi musu meki muiti fu kon abi en èn wi musu aksi Gado fu a blesi a muiti di wi e meki (Gal. 5:22; Ef. 2:8). Fa wi sabi taki Maria tan meki muiti fu tranga a bribi fu en? We, luku fa a ben e arki èn fa a ben e taki.

16. Fa wi sabi taki Maria ben sabi fa fu arki?

¹⁶ Fa Maria ben e arki. Bijbel e gi wi rai taki wi ’musu de gaw fu yere. Wi no musu de gaw fu taki’ (Yak. 1:19). Maria ben sabi fa fu arki. Tu leisi Lukas e fruteri wi taki Maria ben e arki bun te sma ben e taki sani, spesrutu te a ben abi fu du nanga sani fu Yehovah. Te a ben yere den sani disi, dan a ben e teki a ten fu denki dipi fu san a yere. Di Yesus gebore, dan wan tu skapuman fruteri Maria a boskopu di wan engel ben taigi den. Sowan 12 yari baka dati, di Yesus ben de wan boi ete, a taki wan prenspari sani di ben meki Maria fruwondru. Ibri tron wi e si taki Maria ben arki, a ben hori den sani disi na ede èn a ben e denki dipi fu san a yere.​—Leisi Lukas 2:16-19, 49, 51.

17. San wi kan leri fu a fasi fa Maria ben e taki?

¹⁷ A fasi fa a ben e taki. A no ala den sani di Maria taki, skrifi na ini Bijbel. Lukas 1:46-55 na a wan-enkri presi na ini Bijbel pe Maria e taki so furu sani. Den wortu fu Maria e sori taki a ben sabi Bijbel bun. A kari wan tu sani di Hana, a mama fu a profeiti Samuel, ben taki na ini wan begi (1 Sam. 2:1-10). Soleki fa a sori, dan Maria kari sowan 20 difrenti sani di skrifi na ini den Hebrew Buku fu Bijbel. A de krin taki a ben lobi taki fu den tru tori di a leri fu en moro bun Mati, Yehovah Gado.

18. Fa wi kan abi bribi neleki Maria?

¹⁸ Neleki Maria, a kan pasa son leisi nanga wi tu taki Yehovah e gi wi wan grani di sori muilek. Ma te wi abi sakafasi neleki Maria èn wi e frutrow na tapu Yehovah, dan wi o si taki a abi a bun fu wi na prakseri. Dati meki wi musu arki bun te wi e leri sani di abi fu du nanga Yehovah èn nanga san a abi na prakseri. Wi musu denki dipi fu den tru tori fu Bijbel èn nanga prisiri wi musu fruteri trawan san wi leri. Na so wi e sori bribi neleki Maria.​—Ps. 77:11, 12; Luk. 8:18; Rom. 10:15.

19. Te wi e teki na eksempre fu sma di ben abi wan tranga bribi, dan san wi sabi seiker?

¹⁹ A de krin taki Rut, Heskia nanga Maria ben de mati fu Yehovah, neleki Abraham. Ala den futuboi disi fu Gado, makandra nanga den ’someni kotoigi di de na wi lontu neleki wan bigi wolku’ èn tra sma di dini Yehovah na ini den hondrohondro yari di pasa, ben abi a moi grani fu de wan mati fu Gado. Meki wi tan teki na eksempre fu den sma disi di ben abi wan tranga bribi (Hebr. 6:11, 12). Te wi du dati, dan wi kan de seiker taki wi o kisi wan bigi blesi: Fu têgo wi o de wan bun mati fu Yehovah.