1, 2. (a) Fu san ede na eksempre fu Noa, Danièl nanga Yob kan gi wi deki-ati? (b) Fa a situwâsi ben de di Esekièl skrifi den wortu na ini Esekièl 14:14?

YU E siki, yu abi moni problema, noso yu e kisi gens? A muilek gi yu son leisi fu du a wroko fu Yehovah nanga prisiri? Efu dati de so, dan na eksempre fu Noa, Danièl nanga Yob o gi yu deki-ati. Den man disi ben de sondusma neleki wi èn den ben e kisi den srefi tesi di wi e kisi. Son leisi sani ben e miti den di ben kan meki taki den lasi den libi srefi. Toku den tan du san reti. Dati meki Gado ben e si den leki sma di abi bribi èn di tan gi yesi na en.​—Leisi Esekièl 14:12-14.

² Esekièl skrifi den wortu na ini Esekièl 14:14 di a ben de na Babilonia na ini 612 Fosi Krestes (Esek. 1:1; 8:1). * Dati ben de syatu  fosi Yerusalem kisi pori na ini 607 Fosi Krestes. Na a ten dati wan tu sma nomo ben e sori bribi èn ben e gi yesi na Gado neleki Noa, Danièl nanga Yob. Èn den sma dati tan na libi (Esek. 9:1-5). Wan tu fu den sma disi na Yeremia, Baruk, Ebed-Meilek nanga den Rekabsma.

3. San wi o luku na ini na artikel disi?

³ Te Yehovah o pori na ogri grontapu disi, a o kibri reti-ati sma di de leki Noa, Danièl nanga Yob (Openb. 7:9, 14). Meki wi go luku fu san ede Yehovah ben e si den dri man disi leki reti-ati sma. Te wi o taki fu den, dan wi o luku (1) sortu tesi den ben kisi èn (2) fa wi kan sori bribi neleki den èn fa wi kan gi yesi na Gado neleki den.

4, 5. Sortu tesi Noa ben kisi èn san wi kan leri te wi luku fa a horidoro?

⁴ Den tesi di Noa kisi. Na ini a ten fu Heinok, di ben de wan afo fu Noa, sma ben e du furu ogri kaba. Den ben e taki „takru sani” fu Yehovah srefi (Yud. 14, 15). Moro nanga moro sma ben e du ogri-ati sani nanga trawan. Fu taki en leti, na ini a ten fu Noa, „grontapu ben kon lai ogridu”. Ogri engel ben kon na grontapu, den teki libisma skin, den teki wefi èn den meki pikin di ben tron bigiskin man di ben e du soso ogri (Gen. 6:2-4, 11, 12). Ma Noa ben de tra fasi. „Noa ben e plisi Yehovah. . . . Te yu ben e luku den sma fu en ten, dan a ben de sondro fowtu. Noa ben e waka nanga a tru Gado.”​—Gen. 6:8, 9.

⁵ San den wortu disi e leri wi fu a reti-ati man dati? Prakseri o langa Noa tan gi yesi na Gado fosi a Frudu kon. A no du dati 70 noso 80 yari nomo. Ma a du dati 600 yari langa! (Gen. 7:11) No frigiti tu taki a no ben abi brada nanga sisa di ben e gi en deki-ati neleki fa wi e kisi deki-ati na ini a gemeente now. A sori leki en eigi famiri no ben e dini Yehovah. *

6. Fa Noa sori taki a ben abi deki-ati?

⁶ Noa no ben denki taki a ben nofo fu libi wan krin libi. A bribi fu en ben meki taki a ben e fruteri sma fu Yehovah. Dati meki Bijbel e kari en wan „preikiman fu retidu” (2 Petr. 2:5). Na apostel Paulus ben skrifi: „Nanga a bribi disi Noa ben krutu grontapu” (Hebr. 11:7). Dati meki sma ben e spotu Noa èn den ben e gens en. Kande son sma ben wani du ogri nanga en srefi. Ma Noa no ben e „frede libisma” (Odo 29:25). Yehovah ben gi en deki-ati fu di a ben sori bribi.

7. Sortu tesi Noa kisi di a ben e bow na ark?

⁷ Baka di Noa dini Gado moro leki 500 yari, Yehovah aksi en fu bow wan ark so taki libisma nanga meti ben kan tan na libi te a Frudu kon (Gen. 5:32; 6:14). A no ben makriki fu bow so wan bigi ark. Èn Noa ben sabi tu taki disi ben o meki taki sma ben o spotu en moro èn den ben o gens a wroko fu en. Toku a sori bribi èn a gi yesi na Gado. Bijbel e taki: „A du leti so.”​—Gen. 6:22.

8. Fa Noa sori taki a ben frutrow taki Yehovah ben o sorgu gi en nanga en osofamiri?

⁸ Wan tra sani di ben kan de wan tesi gi Noa, na taki a ben musu sorgu gi en frow nanga pikin. Fosi a ten fu a Frudu, sma ben musu wroko bun tranga fu prani nyanyan èn Noa srefi ben musu du dati tu (Gen. 5:28, 29). Ma aladi Noa ben musu sorgu en osofamiri, toku a sani dati no ben de a moro prenspari sani na ini en libi. A matifasi fu en nanga Gado ben de a moro prenspari sani gi en. Srefi di a ben musu bow na ark sowan 40 noso 50 yari langa, a tan poti prakseri na  a matifasi di a ben abi nanga Yehovah. Èn baka di a Frudu kon, a tan du dati ete 350 yari (Gen. 9:28). Iya, a fasi fa Noa sori bribi èn a fasi fa a ben e gi yesi na Gado, na wan moi eksempre gi wi.

9, 10. (a)  Fa wi kan sori bribi èn fa wi kan gi yesi na Gado neleki Noa? (b) Fa Gado e si ala den sma di e du san a taki?

⁹ Fa wi kan sori bribi èn fa wi kan gi yesi na Gado neleki Noa? Wi kan du dati te wi abi a deki-ati fu du san reti, te wi no de wan pisi fu Satan grontapu èn te wi e poti a Kownukondre na a fosi presi (Mat. 6:33; Yoh. 15:19). Ma disi e meki taki den sma na grontapu no lobi wi. Fu eksempre, sma e taki ogri fu wi fu di wi e hori wisrefi na san Yehovah e taki fu seks nanga a trowlibi. (Leisi Maleaki 3:17, 18.) Ma neleki Noa wi no e frede libisma. Wi e du san Yehovah taki fu di wi abi bigi lespeki gi en. Wi sabi taki na en wawan kan gi wi têgo libi.​—Luk. 12:4, 5.

¹⁰ Ma fa a de nanga yu? Yu o tan ’waka nanga Gado’ awinsi sma e spotu yu noso awinsi den e krutu yu? Yu o abi a frutrow taki Yehovah o yepi yu te moni problema e meki en muilek gi yu fu sorgu yu osofamiri? Te yu abi bribi èn te yu e gi yesi na Gado neleki Noa, dan yu kan de seiker taki a o sorgu gi yu.​—Fil. 4:6, 7.

11. Sortu bigi tesi Danièl nanga den dri mati fu en kisi na ini Babilon? (Luku a prenki na a bigin fu na artikel.)

¹¹ Den tesi di Danièl kisi. Danièl ben e libi leki katiboman na ini Babilon, wan foto di ben lai nanga falsi gado èn pe furu sma ben e du afkodrei. Boiti dati, den Babilonsma ben e wisiwasi den Dyu. Den ben e spotu den èn den ben spotu a Gado fu den, Yehovah (Ps. 137:1, 3). A sani disi ben musu fu hati reti-ati Dyu soleki Danièl. Boiti dati, furu sma ben e luku fa Danièl, Hananya, Misael nanga Asaria ben e tyari densrefi fu di den ben o kisi leri fu kan wroko gi a kownu. Sma ben e fruwakti taki den ben musu nyan den srefi sani di a kownu ben e nyan. A sani disi ben de wan tesi gi Danièl fu di a no ben wani „doti ensrefi nanga a switi nyanyan fu Kownu”.​—Dan. 1:5-8, 14-17.

12. (a) Sortu moi fasi Danièl ben abi? (b) Fa Yehovah ben e denki fu Danièl?

¹² Danièl ben koni èn dati meki a kownu ben e gi en furu grani. A sani dati ben kan de wan tesi gi en (Dan. 1:19, 20). Ma Danièl no kisi heimemre èn a no ben e denki taki en wawan sabi ala sani. A ben tan sori sakafasi èn ala ten a ben gi Yehovah a grani fu den sani di a ben e du (Dan. 2:30). Fu taki en leti, Danièl ben de wan yonguman ete di Yehovah kari en wan reti-ati sma, makandra nanga tra bigiman soleki Noa nanga Yob. Yu denki taki Yehovah ben abi leti fu du dati? Iya, fu di Danièl tan gi yesi na Gado en heri libi langa. Di Gado engel kon taigi Danièl taki a ben de „wan man di Gado lobi srefisrefi”, dan Danièl ben pasa 90 yari kaba.​—Dan. 10:11.

13. Fu san ede Yehovah yepi Danièl fu kisi wan hei posisi?

¹³ Fu di Yehovah ben de nanga Danièl, meki a kownu fu Babilon èn bakaten a kownu fu Media nanga Persia, ben gi en wan hei posisi (Dan. 1:21; 6:1, 2). Kande Yehovah meki Danièl kisi a posisi disi, so taki a ben kan yepi en pipel neleki fa Yosef ben du dati na ini Egepte èn neleki fa Ester nanga Mordekai ben du dati na ini Persia (Dan. 2:48). * Wi kan de seiker taki Esekièl nanga tra Dyu di ben de na ini katibo ben kisi trowstu di  den si fa Yehovah ben gebroiki Danièl fu yepi den.

14, 15. (a) Na sortu fasi a situwâsi fu wi de a srefi leki a di fu Danièl? (b) San brada nanga sisa di abi pikin kan leri fu a papa nanga mama fu Danièl?

¹⁴ Fa wi kan sori bribi èn fa wi kan gi yesi na Gado neleki Danièl? Wi e libi na ini wan grontapu pe falsi anbegi lai èn pe furu sma e libi wan morsu libi. Babilon a Bigiwan, sobun den falsi kerki, e kori furu sma. Bijbel e kari Babilon a Bigiwan „wan presi pe ogri yeye e tan” (Openb. 18:2). Fu di wi de tra fasi leki den sma fu a grontapu disi, meki den e spotu wi (Mark. 13:13). Dati meki wi musu du muiti fu kon krosibei na Yehovah wi Gado, neleki Danièl. Te wi abi sakafasi, te wi e gi yesi na Gado èn te wi e frutrow na en tapu, dan Gado o lobi wi tu.​—Hag. 2:7.

¹⁵ Brada nanga sisa di abi pikin kan leri wan sani fu a papa nanga mama fu Danièl. Fu san ede wi kan taki dati? Ogridu ben lai na ini Yuda na a ten di Danièl ben e gro kon bigi, toku Danièl ben kon lobi Gado. Fa yu denki taki disi du kon? Na fu di en papa nanga mama ben gi en bun leri (Odo 22:6). Srefi a nen di Danièl papa nanga mama gi en e sori taki den ben lobi Gado. Danièl wani taki „Gado na mi Krutuman” (Dan. 1:6). Sobun, papa nanga mama, no kon weri fu gi den pikin fu unu leri (Ef. 6:4). Begi nanga den èn begi gi den tu. Te yu e du muiti fu meki den leri fu Bijbel saka go dipi na ini den ati, dan Yehovah o blesi yu.​—Ps. 37:5.

16, 17. San ben kan de wan tesi gi Yob di a ben gudu èn di a kon pôti?

¹⁶ Den tesi di Yob kisi. Furu sani pasa na ini a libi fu Yob. Fosi den problema miti en, a ben „prenspari moro ala den sma di ben e libi na Owstusei” (Yob 1:3). A ben gudu, furu sma ben sabi en èn den ben abi furu lespeki gi en (Yob 29:7-16). Toku Yob no bigin denki furu fu ensrefi èn a no ben feni taki a no abi Gado fanowdu. Dati meki Yehovah kari en „mi futuboi” èn a ben taki tu: „A de wan bun man di lobi retidu, di abi bigi lespeki gi Gado, èn di e wai pasi gi ogri.”​—Yob 1:8.

¹⁷ Ma na ini wan syatu pisi ten, Yob en heri libi kenki. A lasi ala sani èn dati meki a lasi-ati so te, taki a no ben wani libi moro. Wi sabi taki na Satan ben e meki den tesi disi miti Yob. A ben taki dati Yob ben e dini Yehovah soso fu di a ben e suku wini gi ensrefi. (Leisi Yob 1:9, 10.) San Yehovah ben o  du fu sori taki Satan na wan leiman? Yehovah gi Yob na okasi fu sori taki a ben e anbegi en nanga en heri ati èn taki a ben lobi en.

18. (a) San yu lobi fu a fasi fa Yob horidoro? (b) San yu e leri fu Yehovah te yu e luku fa a ben e denki fu Yob èn san a du gi en?

¹⁸ Satan meki Yob kisi bigi tesi baka makandra. A du wan lo ogri-ati sani nanga en èn a du en na so wan fasi taki Yob ben denki taki na Gado e tesi en (Yob 1:13-21). Baka dati den dri man di ben e du leki den na Yob mati, taigi en wan lo hati sani. Den ben feni taki na fu di Yob ben du ogri, meki Gado ben e strafu en (Yob 2:11; 22:1, 5-10). Toku Yob no drai baka gi Yehovah. A tru taki son leisi a ben taki sani sondro fu denki (Yob 6:1-3). Ma Yehovah ben e frustan taki a ben abi furu pen èn taki a ben brokosaka. Yehovah si taki Yob no drai baka gi en, aladi Satan du ogri-ati sani nanga en èn aladi a meki sma taigi Yob wan lo hati sani. Baka di den sani disi miti Yob, Yehovah gi en tu tron so furu leki san a ben abi fosi a kisi tesi. A meki a libi ete 140 yari tu (Yak. 5:11). Na ini a heri pisi ten dati Yob tan anbegi Yehovah nanga en heri ati. Fa wi du sabi dati? Yob ben dede omeni hondrohondro yari kaba di Esekièl skrifi den wortu fu a tekst na a bigin fu na artikel.

19, 20. (a) Fa wi kan sori bribi èn fa wi kan gi yesi na Gado neleki Yob? (b) Fa wi kan sori sari-ati gi trawan neleki fa Yehovah e du dati?

¹⁹ Fa wi kan sori bribi èn fa wi kan gi yesi na Gado neleki Yob? Awinsi sortu sani e miti wi, meki wi tan poti Yehovah na a fosi presi na ini wi libi, meki wi tan frutrow na en tapu èn meki wi gi yesi na en ala ten. Now wi abi moro reide fu du dati. Fu san ede wi kan taki dati? Fu di now wi sabi fa Satan e tesi sma (2 Kor. 2:11). Fu di wi abi a buku Yob, meki wi sabi fu san ede Gado e gi pasi taki wi e pina. A profeititori fu Danièl e sori wi taki Gado Kownukondre o tiri heri grontapu èn taki Yesus Krestes na a Kownu fu en (Dan. 7:13, 14). Wi sabi tu taki na a Kownukondre disi o puru pina na grontapu.

²⁰ A tori fu Yob e leri wi tu taki wi musu firi gi den Kresten brada nanga sisa fu wi di e kisi tesi. Neleki Yob, a kan taki son leisi den o taki sani sondro fu denki (Preik. 7:7). Ma wi no musu krutu den. Wi musu pruberi fu frustan den èn sori sari-ati gi den. Te wi e du disi, dan wi e teki na eksempre fu wi Papa, Yehovah, di lobi wi èn di e sori sari-ati gi wi.​—Ps. 103:8.

21. Fa 1 Petrus 5:10 e memre wi san ben miti Noa, Danièl nanga Yob?

²¹ Aladi Noa, Danièl nanga Yob ben e libi na ini difrenti pisi ten èn aladi a situwâsi fu den no ben de a srefi, toku den ala dri horidoro di den kisi tesi. Den tori fu den e meki wi prakseri a sani di na apostel Petrus skrifi: „Baka te unu pina wan syatu pisi ten, dan a Gado di e sori sma bun-ati na ala fasi . . . o gi unu leri dorodoro. A o meki unu tanapu kánkan, a o meki unu kon tranga.”​—1 Petr. 5:10.

22. San wi o luku na ini a tra artikel?

²² Na ini 1 Petrus 5:10 Yehovah e gi den anbegiman fu en a dyaranti taki a o gi den krakti èn taki a o meki den tanapu kánkan te den e kisi tesi. Na dati a e du tu gi en pipel na ini a ten disi. Wi alamala wani taki Yehovah tranga wi èn taki a yepi wi fu tanapu kánkan na ini na anbegi fu wi. Dati meki wi wani sori bribi èn wi wani gi yesi na Gado neleki Noa, Danièl nanga Yob. Na ini a tra artikel wi o si taki den ben man horidoro fu di den ben sabi Yehovah heri bun. Fu taki en leti, den ben „frustan ala sani” di Yehovah ben e aksi fu den (Odo 28:5). Wi srefi kan de neleki den.