1. San dyarusu du nanga a famiri fu Yosef?

YAKOB ben lobi ala den boi fu en, ma a ben lobi Yosef, di ben abi 17 yari, moro. Fa den brada fu Yosef ben feni dati? Den ben dyarusu na en tapu. Aladi Yosef no ben du nowan ogri nanga den, toku den no ben lobi en. Den seri Yosef leki wan srafu èn den lei gi den papa taki na wan ogri meti ben kiri a manpikin fu en di a ben lobi so te. A dyarusu fu den pori a freide na ini a famiri èn den broko den papa ati.​—Gen. 37:3, 4, 27-34.

2. Te wi e luku san Galasiasma 5:19-21 e taki, dan fu san ede a no bun srefisrefi fu dyarusu?

² Bijbel e sori taki dyarusu * na wan fu den takru maniri di wi abi fu di wi na sondusma. Dyarusu kan meki taki wan sma no kisi a Kownukondre fu Gado. (Leisi Galasiasma 5:19-21.) Nofo tron dyarusu e meki taki sma e meki trobi nanga trawan, den strei nanga sma èn den e si trawan leki feanti.

3. San wi o luku na ini na artikel disi?

³ Na eksempre fu den brada fu Yosef e sori taki dyarusu kan tyari trobi na ini wan famiri èn a kan pori a freide. Noiti wi ben o du san den brada fu Yosef du, ma wi alamala na sondusma èn wi ati e kori wi (Yer. 17:9). Dati meki son leisi wi e dyarusu tapu trawan. Meki wi taki fu wan tu eksempre na ini Bijbel di e sori wi san e meki taki sma  dyarusu tapu trawan. Baka dati wi o taki fu wan tu sani di kan yepi wi fu no dyarusu èn fu libi bun nanga makandra.

4. Fu san ede den Filisteasma ben e dyarusu tapu Isak?

⁴ Te wan sma gudu. Isak ben de wan guduman èn den Filisteasma ben dyarusu na en tapu (Gen. 26:12-14). Dati meki den ben tapu den peti pe den meti fu Isak ben e go dringi watra (Gen. 26:15, 16, 27). Neleki den Filisteasma, son sma na ini a ten disi e dyarusu tapu den sma di abi moro sani leki den. Boiti taki den wani den sani di tra sma abi, den e winsi tu taki den sma lasi den sani di den abi.

5. Fu san ede den kerki fesiman ben e dyarusu tapu Yesus?

⁵ Te furu sma lobi wan sma. Den Dyu kerki fesiman ben e dyarusu tapu Yesus fu di furu sma ben lobi en (Mat. 7:28, 29). Gado ben seni Yesus kon na grontapu fu leri sma san tru. Toku den kerki fesiman ben e fruteri ogri-ati lei fu en èn den ben pori en nen (Mark. 15:10; Yoh. 11:47, 48; 12:12, 13, 19). San wi kan leri fu a tori disi? Wi musu du ala san wi man fu no dyarusu tapu sma di abi fasi di e meki taki a gemeente lobi den. Na presi fu dati, wi musu pruberi fu sori den srefi moi fasi di den abi.​—1 Kor. 11:1; 3 Yoh. 11.

6. San Diotrefes du fu di a ben dyarusu tapu trawan?

⁶ Te wan sma abi grani na ini a gemeente. Na a ten fu den apostel, Diotrefes ben e dyarusu tapu den brada di ben e teki fesi na ini a Kresten gemeente. A ben wani „teki a fosi presi” na ini a gemeente, èn dati meki a ben e taki wan lo ogri fu na apostel Yohanes nanga den tra brada (3 Yoh. 9, 10). Aladi noiti wi ben o wani du san Diotrefes du, toku wi ben kan dyarusu tapu wan brada noso sisa di kisi wan grani di wi srefi ben o wani. Wi kan dyarusu na en tapu spesrutu te wi feni taki wi ben o man du a wroko dati bun tu.

7. San dyarusu kan du nanga wi?

⁷ Efu wan sma e bigin dyarusu tapu trawan, dan a kan muilek fu puru a firi dati. Te wan sma abi heimemre èn te a e denki ensrefi nomo, dan dati kan meki a dyarusu moro tapu sma. Te wan sma e dyarusu, dan a no man kweki bun fasi soleki lobi, sari-ati nanga switifasi. Sobun, te wi e si taki wi e dyarusu tapu wan sma awinsi na pikinso nomo, dan wi no musu draidrai fu rutu a firi disi puru na ini wi ati. San wi musu du fu no dyarusu tapu sma?

8. Sortu fasi kan yepi wi fu no dyarusu tapu trawan?

⁸ Te wi e leri fu abi sakafasi èn fu de tevrede, dan dati kan yepi wi fu no dyarusu tapu trawan. Sakafasi o yepi wi fu no denki tumusi furu fu wisrefi. Wan sma di abi sakafasi no feni taki a e frudini en fu abi moro sani leki tra sma (Gal. 6:3, 4). Wan sma di de tevrede breiti nanga den sani di a abi èn a no o suku fu kon abi den sani fu wan trawan (1 Tim. 6:7, 8). Te wan sma abi sakafasi èn te a de tevrede, dan a o breiti te wan tra sma kisi wan bun sani.

9. Soleki fa Galasiasma 5:16 nanga Filipisma 2:3, 4 e sori, dan fa a santa yeye kan yepi wi?

⁹ Wi abi a santa yeye fu Gado fanowdu fu yepi wi fu no dyarusu tapu sma. A santa yeye kan yepi wi fu abi sakafasi èn fu de tevrede. (Leisi Galasiasma 5:16;  Filipisma 2:3, 4.) A santa yeye fu Yehovah kan yepi wi fu ondrosuku wisrefi. A kan yepi wi fu si fa wi e denki èn sortu takru firi wi abi. Gado kan yepi wi fu no dyarusu tapu sma, ma fu denki bun fu den (Ps. 26:2; 51:10). Meki wi go luku na eksempre fu Moses nanga Paulus, tu man di ben leri fu no dyarusu tapu trawan.

10. Fa Moses sori taki a no ben dyarusu tapu trawan? (Luku a fowtow tapu a kafti.)

¹⁰ Moses ben de a fesiman fu Gado pipel, ma a no ben e tapu tra sma fu kisi frantwortu tu. Fu eksempre, na wan okasi Yehovah puru pikinso fu en santa yeye na Moses tapu, dan a gi dati na wan grupu owru man fu Israel di ben tanapu lontu a konmakandra tenti. Syatu baka dati wan sma kon taigi Moses taki tu owru man di no ben kon na a konmakandra tenti ben kisi santa yeye èn den bigin du leki profeiti. San Moses du di Yosua aksi en fu tapu den tu owru man dati? A no ben dyarusu taki Yehovah ben gi den tu man disi santa yeye. Na presi fu dati a ben abi sakafasi èn a ben breiti taki den ben kisi a grani dati (Num. 11:24-29). San wi kan leri fu Moses?

11. Fa owruman kan de neleki Moses?

¹¹ Efu yu na wan owruman, dan oiti yu ben abi fu leri wan tra brada fu du wan wroko na ini a gemeente, aladi yu srefi lobi a wroko dati? Fu eksempre, kande yu lobi hori a Waktitoren-studie ibri wiki. Ma efu yu abi sakafasi neleki Moses, dan yu no o firi wan fasi te yu musu leri wan tra brada fu man tyari a frantwortu disi tu. Na presi fu dati, yu o yepi yu brada nanga prisiri.

12. Fa furu Kresten na ini a ten disi e sori taki den de tevrede èn taki den abi sakafasi?

¹² Luku wan tra sani di e miti furu owru brada. Furu yari langa den brada disi dini leki fesiman fu den owruman na ini a gemeente fu den. Ma te den tapu 80 yari, den de klariklari fu meki wan tra brada tyari a frantwortu disi. Brada di e dini leki kring-opziener musu tapu nanga a wroko disi te den abi 70 yari. Ma fu di den brada abi sakafasi, meki den de klariklari fu tyari tra frantwortu na ini na organisâsi. Na ini den yari di pasa furu brada nanga sisa ben musu komoto na Betel fu go du wan tra toewijzing. Den brada nanga sisa disi no e dyarusu tapu trawan di e du a wroko di den ben e du fosi.

13. Fu san ede Paulus ben kan dyarusu tapu den 12 apostel?

¹³ Na apostel Paulus na wan tra sma di ben de tevrede èn di ben abi sakafasi. Paulus no ben dyarusu tapu trawan. A ben e wroko tranga na ini a diniwroko, ma toku a ben taki: „Mi na a moro pikinwan fu den apostel èn mi no warti fu den kari mi wan apostel” (1 Kor. 15:9, 10). Den 12 apostel ben de nanga Yesus di a ben de na grontapu, ma Paulus tron wan Kresten, baka di Yesus dede èn kisi wan opobaka. Te fu kaba a tron „wan apostel gi den trakondre sma”, ma noiti a tron wan fu den 12 apostel (Rom. 11:13; Tori 1:21-26). Paulus no ben dyarusu tapu den 12 man disi di ben wroko skinskin nanga Yesus, ma a ben de tevrede nanga san en ben man du.

14. San wi o du te wi de tevrede èn te wi abi sakafasi?

¹⁴ Efu wi de tevrede èn efu wi abi sakafasi, dan wi o de neleki Paulus. Wi o lespeki den wan di e tyari frantwortu na ini na organisâsi (Tori 21:20-26). Yehovah poti owruman fu teki fesi na  ini a Kresten gemeente. Aladi den na sondusma, toku Yehovah poti den fu yepi wi (Ef. 4:8, 11). Te wi e lespeki den owruman èn te wi e du san den e taigi wi, dan wi o tan krosibei na Yehovah èn wi o libi bun nanga wi brada nanga sisa.

15. San wi musu du?

¹⁵ Efu wi e dyarusu tapu sma noso efu sma e dyarusu na wi tapu, dan wi no o man libi bun nanga makandra. Wi musu rutu dyarusu puru na ini wi ati èn wi no musu du sani di o meki trawan dyarusu. A sani disi prenspari efu wi wani du san skrifi na ini Romesma 14:19: „Du muiti fu libi bun nanga trawan èn fu du sani di e gi trawan deki-ati.” San wi kan du fu yepi trawan fu no dyarusu èn fa wi kan sorgu taki freide de na ini a gemeente?

16. Fa wi kan yepi trawan fu no dyarusu?

¹⁶ A fasi fa wi e denki èn den sani di wi e du kan abi krakti tapu trawan. Grontapu wani taki wi musu „prodo” nanga den sani di wi abi (1 Yoh. 2:16). Ma a sani disi kan meki sma dyarusu na wi tapu. Wi kan yepi trawan fu no dyarusu te wi no e taki ala ten fu den sani di wi abi noso fu den sani di wi o bai. Wan tra fasi fa wi kan yepi sma fu no dyarusu, na fu luku bun fa wi e tyari wisrefi te wi abi frantwortu na ini a gemeente. Efu wi e taki furu fu den grani di wi abi, dan wi kan meki trawan dyarusu na wi tapu. Ma efu wi e poti prakseri na trawan èn efu wi e prèise den  gi den bun sani di den e du, dan wi e yepi den fu de tevrede. Boiti dati, wánfasi nanga freide o de na ini a gemeente.

17. San den brada fu Yosef ben man du èn san ben de a bakapisi?

¹⁷ Wi kan de sma di no e dyarusu moro tapu trawan! Luku na eksempre baka fu den brada fu Yosef. Furu yari baka di den ben du ogri nanga Yosef, den miti en na ini Egepte. Fosi Yosef sori den brada fu en taki na en ben e taki nanga den, a du wan tu sani fu luku efu den ben kenki. A kari den kon nyan nanga en èn a gi en pikin brada Benyamin moro nyanyan leki den trawan (Gen. 43:33, 34). Ma den brada fu en no ben dyarusu tapu Benyamin. Na presi fu dati, den sori taki den ben e broko den ede nanga den pikin brada èn nanga den papa Yakob (Gen. 44:30-34). Fu di den brada fu Yosef leri fu no dyarusu moro, meki freide ben de baka na ini a famiri (Gen. 45:4, 15). Efu wi e leri fu no dyarusu tapu sma, dan wi o sorgu taki freide de na ini wi famiri èn na ini a gemeente.

18. Soleki fa Yakobus 3:17, 18 e sori, dan san o pasa efu wi sorgu taki freide de na ini a gemeente?

¹⁸ Yehovah wani taki wi musu du tranga muiti fu no dyarusu tapu trawan èn a wani taki wi musu libi bun nanga makandra. Wi musu meki tranga muiti fu du den tu sani disi. Soleki fa wi si na ini na artikel disi, wi alamala kan dyarusu tapu trawan fu di wi na sondusma (Yak. 4:5). Èn wi e libi na ini wan grontapu di e gi wi deki-ati fu du sani di kan meki tra sma dyarusu. Ma efu wi abi sakafasi, efu wi de tevrede èn efu wi e sori tra sma taki wi e warderi den sani di den e du, dan wi no o dyarusu. Na presi fu dati, freide o de na wi mindri èn wi o sori moro lobi, sari-ati nanga switifasi gi trawan.​—Leisi Yakobus 3:17, 18.