1-2. Fu san ede Yehovah seti sani fu teki wi na ini en famiri èn fa a du dati?

YEHOVAH kari wi kon na ini en famiri fu anbegiman. A sani disi na wan moi grani! Na ini a famiri disi yu abi sma di gi densrefi abra na Yehovah èn di e sori bribi na ini na ofrandi di en Manpikin tyari. Wi de na ini wan koloku famiri èn wi abi wan bun libi nownow kaba. Boiti dati, wi alamala abi a moi howpu fu libi fu têgo, awinsi dati de na hemel noso na ini wan paradijs na grontapu.

² Fu di Yehovah lobi wi meki a seti sani fu teki wi na ini en famiri. Fu man du disi, Yehovah gi a moro warti sani di a ben abi (Yoh. 3:16). ’A bai wi’ nanga a libi fu en Manpikin (1 Kor. 6:20). A lusu-paiman e meki taki wi kan tron bun mati fu Yehovah. Wi abi a grani fu kari a moro makti sma fu hemel nanga grontapu wi Papa. Èn soleki fa wi si na ini na artikel na fesi, Yehovah na a moro bun Papa di wi kan abi.

3. Te wi e prakseri ala den bun sani di Yehovah du gi wi, dan san wi kan aksi wisrefi? (Luku a faki tu „ Yehovah e si mi?”)

³ Wan skrifiman fu Bijbel ben aksi: „San mi o pai Yehovah baka fu ala bun di a e du gi mi?” (Ps. 116:12) Kande wi srefi wani sabi fa wi kan pai Yehovah baka. Ma noiti wi o man du dati. Toku wi kan sori taki wi lobi en. Na apostel Yohanes ben skrifi: „Wi abi lobi, fu di na Gado fosi ben lobi wi” (1 Yoh. 4:19). Fa wi kan sori wi hemel Papa taki wi lobi en?

4. (a) Fu san ede wi musu meki muiti fu tron wan mati fu Yehovah, soleki fa Yakobus 4:8 e sori? (b) Fa wi kan kon krosibei na Yehovah?

⁴ Yehovah wani taki wi tron en mati èn taki wi e taki nanga en. (Leisi Yakobus 4:8.) A e gi wi deki-ati fu „tan  begi” èn ala ten a e arki wi (Rom. 12:12). Noiti Yehovah abi tumusi furu fu du èn noiti a weri taki a no man arki wi. Wi e arki en te wi e leisi Bijbel nanga den tra buku di e yepi wi fu frustan Bijbel. Wi e arki en tu te wi e arki bun te wi de na den konmakandra. Te pikin abi a gwenti fu taki nanga den papa nanga mama, den o abi wan bun matifasi nanga den. Na so a de tu taki te wi abi a gwenti fu taki nanga Yehovah wi o de bun mati fu en.

5. Fa wi musu begi Yehovah?

⁵ Fa a de nanga den begi fu yu? Yehovah wani taki wi taigi en san wi e denki èn san wi e firi (Ps. 62:8). A bun fu aksi wisrefi: ’Mi e taki a srefi sani ibri leisi noso mi e teki mi ten fu fruteri Yehovah san de tapu mi ati?’ A no de fu taki dati yu lobi Yehovah èn yu wani tan de wan bun mati fu en. Fu man du dati yu musu abi a gwenti fu taki nanga en. Fruteri en sani di yu no wani fruteri nowan tra sma. Taigi en san e gi yu prisiri èn san e meki yu sari. Abi a frutrow taki yu kan go suku yepi na en.

6. San wi musu du efu wi wani tan krosibei na wi hemel Papa?

⁶ Efu wi wani tan krosibei na Yehovah, wi musu de nanga tangi gi den sani di a du gi wi. Wi e agri nanga a psalm skrifiman di ben taki: „Yehovah mi Gado, yu du furu sani. Iya, yu du kefalek moi sani gi wi èn ala ten baka yu e prakseri wi. Nowan sma de leki yu. Awinsi mi ben sa wani fruteri sma fu ala den sani di yu du, toku mi no ben o man, bika den furu so te, taki mi no man teri den” (Ps. 40:5). Wi no de nanga tangi nomo, ma wi e taki èn e du sani fu sori taki wi de nanga tangi. A sani disi e meki taki wi de tra fasi leki furu sma na ini a ten disi. Furu sma na ini a grontapu no de nanga tangi gi den sani di Gado du gi den. Disi na wan fu den sani di e sori taki wi e libi na ini „den lasti dei” (2 Tim. 3:1, 2). Noiti wi wani de sma di no de nanga tangi!

7. San Yehovah wani taki wi du èn fu san ede?

⁷ Papa nanga mama no wani taki den pikin fu den e feti nanga makandra, ma den wani taki den de mati. Na so Yehovah wani taki ala den anbegiman fu en de mati fu makandra. Te wi lobi makandra, dan dati e sori taki wi na tru Kresten (Yoh. 13:35). Wi e agri nanga a psalm skrifiman di ben taki: „Luku o bun èn o switi a de te brada e libi makandra leki wán famiri!” (Ps. 133:1) Te wi lobi den brada nanga sisa fu wi, wi e sori Yehovah taki wi lobi en (1 Yoh. 4:20). Wi breiti fu de na mindri brada nanga sisa di e ’sori switifasi gi makandra èn di abi sari-ati nanga makandra’.​—Ef. 4:32.

8. Soleki fa 1 Yohanes 5:3 e sori, dan san na a moro prenspari reide fu san ede wi e gi yesi na Yehovah?

⁸ Yehovah e fruwakti fu pikin taki den e gi yesi na den papa nanga mama. A e fruwakti a srefi sani fu wi (Ef. 6:1). A fiti taki wi gi yesi na en fu di en na wi Mekiman, na en e hori wi na libi èn en na a moro koni papa di de. Ma a moro prenspari reide fu san ede wi e gi yesi na Yehovah, na fu di wi lobi en. (Leisi 1 Yohanes 5:3.) Aladi wi abi furu reide fu gi yesi na Yehovah, toku a no e dwengi wi fu du dati. Yehovah gi wi a grani fu teki wi eigi bosroiti. Dati meki a breiti te wi e bosroiti fu gi yesi na en fu di wi lobi en.

9-10. Fu san ede a prenspari fu sabi den wet fu Gado èn fu gi yesi na den?

 ⁹ Papa nanga mama no wani taki ogri miti den pikin fu den. Dati meki den e sori den san den mag du èn san den no mag du. Te den pikin e gi yesi, den e sori taki den e frutrow den papa nanga mama èn taki den e lespeki den. A moro prenspari srefi taki wi sabi den wet fu wi hemel Papa èn taki wi e gi yesi na den wet disi. Te wi e du dati, wi e sori Yehovah taki wi lobi en èn taki wi e lespeki en. Boiti dati, sani o waka bun nanga wi (Yes. 48:17, 18). Ma sani no e waka bun gi den sma di no e gi yesi na Yehovah.​—Gal. 6:7, 8.

¹⁰ Te wi e libi na a fasi di Yehovah feni bun, dan wi no o du sani di o meki wi kon siki èn di o meki wi lasi-ati. Boiti dati, wi o tan abi wan bun matifasi nanga Yehovah. Yehovah sabi san bun gi wi. Aurora, wan sisa di e libi na ini Amerkankondre e taki: „Mi sabi taki te mi e gi yesi na Yehovah, dan mi o abi a moro bun libi.” Wi alamala kan ondrofeni a sani disi. Sortu wini yu kisi fu di yu e gi yesi na wi lobi-ati Papa Yehovah?

11. Fa begi e yepi wi?

¹¹ Begi e yepi wi fu gi yesi na Yehovah srefi te a no makelek fu du dati. Son leisi a muilek gi wi fu gi yesi na Yehovah fu di wi na sondusma, ma wi musu tan meki muiti fu no pasa den wet fu en. A psalm skrifiman ben begi Gado: „Yepi mi, so taki mi kan de klariklari fu gi yesi na yu”  (Ps. 51:12). Denise di de wan gewoon pionier e taki: „Te a muilek gi mi fu gi yesi na wan fu den wet fu Yehovah, dan mi e begi en fu gi mi krakti fu du san bun.” Wi kan de seiker taki ala ten Yehovah o piki den begi fu wi.​—Luk. 11:9-13.

12. San Efeisesma 5:1 e taigi wi fu du?

¹² Leisi Efeisesma 5:1. Leki „lobi pikin” fu Yehovah wi e du ala san wi man fu teki na eksempre fu en. Neleki en wi e sori lobi nanga switifasi gi tra sma èn wi e gi den pardon. Te den sma di no sabi Gado e si a bun fasi fa wi e tyari wisrefi, dan kande den o wani kon sabi moro fu en (1 Petr. 2:12). Kresten papa nanga mama musu meki muiti fu sori den srefi fasi fu Yehovah te den e kweki den pikin. Te den e du dati, dan dati kan gi den pikin deki-ati fu tron mati tu fu wi lobi-ati Papa.

13. San o yepi wi fu kon abi deki-ati?

¹³ Nofo tron wan yongu pikin lobi taki fu en papa. Na so a de tu taki wi breiti taki Yehovah na wi Papa èn wi wani yepi tra sma fu kon sabi en tu. Na ini wi ati, wi e firi neleki Kownu David di ben skrifi: „Mi o prèise Yehovah gi den sani di a du” (Ps. 34:2). Ma san wi kan du te wi e syen fu taki fu Yehovah? Fa wi kan kon abi deki-ati? Wi kan kisi deki-ati te wi e prakseri fa Yehovah o prisiri te wi e fruteri tra sma fu en. Wi o kisi deki-ati tu  te wi e prakseri sortu wini a o tyari gi trawan te den kon sabi Yehovah. Yehovah o gi wi a deki-ati di wi abi fanowdu. A yepi den Kresten na ini Bijbel ten fu abi deki-ati èn a o yepi wi tu.​—1 Tes. 2:2.

14. Fu san ede a prenspari fu preiki a bun nyunsu?

¹⁴ Yehovah no feni a wan sma bun moro a trawan èn a breiti te a e si taki wi e sori lobi gi sma awinsi pe den komoto (Tori 10:34, 35). Wan fu den moro bun fasi fa wi kan sori lobi gi sma, na te wi e preiki a bun nyunsu gi den (Mat. 28:19, 20). San na den bun bakapisi fu a wroko disi? Den sma di e arki wi kan kon abi wan moro bun libi now èn den o abi a howpu fu libi fu têgo na ini a paradijs.​—1 Tim. 4:16.

15-16. Fu san ede wi kan de koloku?

¹⁵ Fu di wi Papa Yehovah lobi wi, meki a wani taki wi de koloku (Yes. 65:14). Wi abi furu reide fu de koloku now, awinsi wi e kisi problema. Fu eksempre, wi de seiker taki wi hemel Papa lobi wi. Wi e frustan Bijbel tu (Yer. 15:16). Èn wi de na ini wan famiri fu sma di lobi Yehovah, di lobi den wet fu en èn di lobi makandra.​—Ps. 106:4, 5.

¹⁶ Wi kan tan koloku fu di wi abi a howpu taki a libi o kon moro bun na ini a ten di e kon. Wi sabi taki heri esi Yehovah o puru ala ogri na grontapu èn nanga yepi fu en Kownukondre a heri grontapu o tron wan paradijs. Wi abi a moi howpu tu taki den sma di dede o kisi wan opobaka èn taki den o de baka nanga wi (Yoh. 5:28, 29). Dati o de wan moi ten! San moro prenspari na taki te fu kaba ala sma na hemel èn na grontapu o gi grani na wi lobi-ati Papa, den o prèise en èn den o dini en wawan.