1-2. Fa wi musu si den tesi di wi e kisi, soleki fa Mateyus 5:11 e taki?

YESUS ben pramisi den bakaman fu en taki den ben o de koloku trutru. Ma a ben taigi den tu taki den ben o kisi tesi (Mat. 10:22, 23; Luk. 6:20-23). Wi breiti taki wi na disipel fu Krestes. Ma fa wi e firi te sma fu wi osofamiri e bigin gens wi, te a regering e frufolgu wi, noso te sma na wrokope noso na skoro e dwengi wi fu du sani di no bun? A no de fu taki dati den sani disi kan meki wi frede.

² Furu sma no e frustan fa a kan gi wan sma prisiri te a e kisi frufolgu. Toku Gado Wortu e taigi wi taki wi musu prisiri te wi e kisi frufolgu. A disipel Yakobus e taki dati wi no musu bruya te wi e kisi tesi, ma taki wi musu prisiri te tesi e miti wi (Yak. 1:2, 12). Yesus ben taki dati wi kan de koloku awinsi sma e frufolgu wi. (Leisi Mateyus 5:11.) San wi kan du fu no lasi prisiri te wi e kisi tesi? Wi kan leri furu fu den sani di Yakobus ben skrifi na ini a brifi gi den fosi Kresten. Ma meki wi go luku fosi sortu tesi ben miti den Kresten na ini a ten dati.

3. San pasa syatu baka di Yakobus tron wan disipel fu Yesus?

³ Syatu baka di Yakobus, na afu brada fu Yesus, ben tron wan disipel, sma bigin frufolgu den Kresten na ini Yerusalem (Tori 1:14; 5:17, 18). Di sma kiri a disipel Stefanus, furu Kresten lowe komoto na ini a foto èn den „panya na ini den kontren fu Yudea nanga Samaria”. Te fu kaba den doro te na Siprus nanga Antiokia srefi (Tori 7:58–8:1; 11:19). Wi kan frustan taki a no ben makriki gi den disipel. Toku den tan preiki a bun nyunsu fayafaya awinsi pe den ben e go èn den opo gemeente na  ala sei fu a Gran Kownukondre Rome (1 Petr. 1:1). Ma moro hebi tesi ben de na pasi e kon.

4. Sortu tra tesi den fosi Kresten ben kisi?

⁴ Ala sortu tesi ben miti den fosi Kresten. Fu eksempre, na a ten fu a yari 50, Grankownu Klawdiyus fu Rome ben taki dati ala den Dyu ben musu gwe libi Rome. Dati meki den Dyu di ben tron Kresten ben abi fu gwe libi den heri oso fu go tan na wan tra presi (Tori 18:1-3). Na a ten fu a yari 61, na apostel Paulus ben skrifi taki sma ben gi den Kresten brada nanga sisa fu en syen na fesi trawan, taki den ben poti den na strafu-oso, èn taki den fufuru den sani fu den (Hebr. 10:32-34). Èn neleki tra sma, den Kresten ben pôti èn den ben siki.​—Rom. 15:26; Fil. 2:25-27.

5. Sortu aksi wi o go luku?

⁵ Di Yakobus skrifi a brifi fu en fosi a yari 62, a ben sabi heri bun sortu tesi ben miti den brada nanga sisa fu en. Yehovah ben meki Yakobus skrifi wan brifi gi den Kresten fu gi den rai di ben kan yepi den fu no lasi prisiri srefi te den ben e kisi tesi. Meki wi go luku fa a brifi fu Yakobus e piki den aksi disi: Fu san ede wan Kresten kan prisiri awinsi a e kisi tesi? San kan meki wan Kresten lasi prisiri? Fa koni, bribi, nanga deki-ati kan yepi wi fu no lasi prisiri te wi e kisi tesi?

6. Soleki fa Lukas 6:22, 23 e sori, dan fu san ede wan Kresten kan de nanga prisiri te a e kisi tesi?

⁶ Son sma kan denki taki den kan de koloku soso te den abi wan bun gosontu, te den lai moni, noso te den abi  wan koloku osofamiri-libi. Ma a prisiri di Yakobus e taki fu en, na wan fasi di a yeye fu Gado e meki wi kisi. Sma kan abi a prisiri disi awinsi san e pasa na ini den libi (Gal. 5:22). Wan Kresten kan de nanga prisiri, noso a kan de koloku trutru, te a sabi taki a e du san Yehovah feni bun èn te a e teki na eksempre fu Yesus (Leisi Lukas 6:22, 23; Kol. 1:10, 11). A prisiri fu wi de neleki a faya fu wan kokolampu. Awinsi winti e wai, awinsi alen e kon, a faya disi no e dede fu di a de na ini a kokolampu. Na so a de tu taki wi no o lasi wi prisiri, awinsi wi siki, awinsi wi abi moni problema, awinsi famiriman noso tra sma e spotu noso gens wi, noso awinsi sma e frufolgu wi. Ibri tron te sma e gens wi, a prisiri fu wi e kon moro bigi. Den tesi di wi e kisi e sori taki wi na trutru bakaman fu Krestes (Mat. 10:22; 24:9; Yoh. 15:20). Dati meki Yakobus ben skrifi: „Un musu prisiri srefisrefi, mi brada, te ala sortu tesi e miti unu.”​—Yak. 1:2.

7-8. Fu san ede a bribi fu wi e kon moro tranga te wi e kisi tesi?

⁷ Yakobus e taki fu ete wan sani di e meki taki wan Kresten no e lon gi tesi, awinsi o hebi a tesi de. A e taki: „A bribi fu unu di kisi tesi . . . e meki taki unu man horidoro” (Yak. 1:3). Te sma ben e meki feti-owru, dan den ben e faya na isri èn den ben e saka en go na ini watra fu meki a kon moro tranga. Tesi de leki a sani disi di sma ben e du fu meki na isri kon moro tranga. Te wi e horidoro awinsi wi e kisi tesi, dan a bribi fu wi e kon moro tranga. Dati meki Yakobus e taki: „Un musu tan horidoro te na a kaba, so taki unu kan kon bun dorodoro èn unu kan de sondro fowtu” (Yak. 1:4). Te wi e si fa den tesi fu wi e tranga wi bribi, dan wi kan horidoro nanga prisiri.

⁸ Yakobus e taki tu fu wan tu sani di kan meki wi lasi prisiri. San na den sani dati èn san wi kan du fu no lasi prisiri?

9. Fu san ede wi abi koni fanowdu?

⁹ A problema: Te wi no sabi san fu du. Te tesi e miti wi, wi wani teki koni bosroiti di Yehovah feni bun, di e gi wi brada nanga sisa deki-ati, èn di e yepi wi fu tan gi yesi na Yehovah (Yer. 10:23). Wi abi koni fanowdu fu sabi san wi musu du èn san wi musu taigi den wan di e gens wi. Efu wi no sabi san wi musu du, dan wi kan lasi-ati èn wi kan lasi wi prisiri esi-esi.

10. San wi musu du efu wi wani kisi koni, soleki fa Yakobus 1:5 e sori?

¹⁰ A lusu: Aksi Yehovah fu gi yu koni.  Efu wi wani horidoro sondro fu lasi wi prisiri, wi musu aksi Yehovah fosi fu gi wi a koni di wi abi fanowdu fu teki bun bosroiti. (Leisi Yakobus 1:5.) San wi musu du efu wi feni taki Yehovah no e piki a begi fu wi wantewante? Yakobus e taki „tan aksi” Gado. Yehovah no o mandi nanga wi te wi e tan aksi en fu gi wi koni. Te wi e begi wi hemel Tata fu gi wi koni fu horidoro te wi e kisi tesi, dan a e gi wi dati „nanga en heri ati” (Ps. 25:12, 13). A e si den tesi di e miti wi, a e firi gi wi, èn dati meki a wani yepi wi. A no de fu taki dati disi e gi wi prisiri. Ma fa Yehovah e gi wi koni?

11. Sortu tra sani wi musu du fu kisi koni?

¹¹ Yehovah e gi wi koni nanga yepi fu en Wortu (Odo 2:6). Efu wi wani kisi a koni dati, dan wi musu studeri Gado Wortu nanga den buku fu wi. Ma wi no musu studeri nomo. Wi musu du san Gado taigi wi tu. Yakobus ben skrifi: „Tron sma di e du san a wortu fu Gado e taki. Un no musu de sma di e yere nomo” (Yak. 1:22). Te wi e du san Gado e taigi wi, dan wi o lobi freide, wi no o hori nomo na san wi e prakseri, èn wi o sori sari-ati gi trawan (Yak. 3:17). Den fasi disi o yepi wi fu horidoro awinsi sortu tesi wi e kisi èn wi o du dati sondro fu lasi wi prisiri.

12. Fu san ede a prenspari fu sabi Bijbel bun?

¹² Gado Wortu de leki wan spikri. A e yepi wi fu kon si san wi musu du moro bun èn fa wi kan du dati (Yak. 1:23-25). Kon meki wi taki dati wi studeri Gado Wortu èn wi kon si taki wi musu leri fu hori wisrefi fu no atibron esi. Yehovah kan yepi wi fu kon abi safri-ati te sma noso problema e meki wi ati bron. Te wi abi safri-ati, dan wi o sabi moro bun san  fu du. Wi o man denki moro krin èn wi o man teki moro bun bosroiti (Yak. 3:13). Dati meki a prenspari taki wi sabi Bijbel bun!

13. Fu san ede wi musu luku san wi kan leri fu sma di kari na ini Bijbel?

¹³ Son leisi na te wi meki wan fowtu, dan fosi wi e kon si taki wi no ben musu du a sani dati. Ma a no so wi musu leri sani. Wan moro bun fasi fa wi kan kisi koni, na te wi e leri fu den fowtu fu trawan èn fu den sani di den du bun. Dati meki Yakobus e taigi wi fu luku san wi kan leri fu sma na ini Bijbel, soleki Abraham, Rakab, Yob, nanga Elia (Yak. 2:21-26; 5:10, 11, 17, 18). Den futuboi dati di ben lobi Yehovah ben kisi tesi, ma den ben man horidoro sondro fu lasi den prisiri. Te wi e luku fa den horidoro, dan disi e sori taki Yehovah kan yepi wi tu fu du a srefi.

14-15. Fu san ede wi musu du wan sani fu puru den tweifri di wi abi?

¹⁴ A problema: Te wi e tweifri. Ten na ten a kan pasa taki wi no e frustan wan sani di Bijbel e taki. Noso kande Yehovah no e piki den begi fu wi na a fasi fa wi ben denki. A sani disi kan meki wi tweifri. Efu wi no e du noti fu puru den tweifri dati, dan wi bribi kan kon swaki èn disi kan pori wi nanga Yehovah (Yak. 1:7, 8). A kan meki wi lasi howpu srefi.

¹⁵ Na apostel Paulus ben teki a howpu fu wi gersi nanga wan ankra (Hebr. 6:19). Wan ankra e hori wan sipi na en presi te bigi winti e wai, so taki a sipi no e go naki tapu den bigi ston. Ma wan ankra e yepi soso te a keti di fasi en na a sipi, no broko. Neleki fa frustu e swaki a keti fu wan ankra, na so wi bribi kan kon swaki te wi no e du noti fu puru den tweifri di wi abi. Te wan sma di e tweifri e kisi gens, dan a kan lasi bribi na ini den pramisi fu Yehovah. Efu wi lasi bribi, dan wi o lasi howpu. Yakobus e taki dati a sma di e tweifri „de leki wan skwala fu se di winti e wai go, wai kon” (Yak. 1:6). So wan sma no o prisiri srefisrefi!

16. San wi musu du te wi e tweifri?

¹⁶ A lusu: Puru tweifri èn tranga yu bribi. No draidrai fu du wan sani. Na a ten fu a profeiti Elia, a pipel fu Yehovah bigin tweifri. Elia taigi den: „O langa unu o draidrai fu teki wan bosroiti? Efu Yehovah na a tru Gado, go dini en. Ma efu na Bâal, go dini en” (1 Kow. 18:21). Na ini a ten disi wi no musu draidrai tu fu du wan sani. Wi musu ondrosuku sani fu kon sabi seiker taki Yehovah na a tru Gado, taki Bijbel na a Wortu fu en èn taki Yehovah Kotoigi na en pipel (1 Tes. 5:21). Te wi o du ala den sani disi, dan dati o puru den tweifri fu wi èn a o tranga wi bribi. Efu wi abi yepi fanowdu, dan wi kan aksi den owruman fu yepi wi. Wi no musu draidrai fu du wan sani efu wi wani tan dini Yehovah nanga prisiri!

17. San o pasa te wi e firi brokosaka?

¹⁷ A problema: Te wi e firi brokosaka. Gado Wortu e taki: „Yu e firi brokosaka te nowtu miti yu? Efu dati de so, dan yu no o abi furu krakti” (Odo 24:10). Efu yu e firi brokosaka, dan heri esi yu o lasi yu prisiri.

18. San a wani taki fu horidoro?

¹⁸ A lusu: Frutrow tapu Yehovah fu gi yu deki-ati fu horidoro. Wi musu abi deki-ati fu man horidoro te wi e kisi tesi (Yak. 5:11). A wortu „horidoro” di Yakobus e gebroiki, abi fu du nanga wan sma di e tanapu kánkan. A e meki wi prakseri wan  srudati di e tanapu kánkan te a feanti e kon feti nanga en. A abi deki-ati èn a no e lon gwe awinsi san a feanti e du.

19. San wi kan leri fu na apostel Paulus?

¹⁹ Wi kan leri furu fu a fasi na apostel Paulus ben sori deki-ati èn fa a horidoro. Son leisi a ben firi swaki. Ma a ben man horidoro fu di a ben frutrow tapu Yehovah. A ben de seiker taki Yehovah ben o gi en a krakti di a ben abi fanowdu (2 Kor. 12:8-10; Fil. 4:13). Wi kan abi a krakti nanga a deki-ati dati tu te wi e frustan taki wi abi yepi fu Yehovah fanowdu.​—Yak. 4:10.

20-21. Fu san wi kan de seiker?

²⁰ Wi kan de seiker taki a no Yehovah e strafu wi te wi e kisi tesi. Yakobus e taigi wi: „Te tesi e miti wan sma, a no musu taki: ’Na Gado e tesi mi’, bika nowan sma kan tesi Gado nanga ogri sani èn Gado srefi no e tesi sma tu” (Yak. 1:13). Te wi e bribi a sani disi, dan wi e kon moro krosibei na wi hemel Tata di lobi wi.​—Yak. 4:8.

²¹ Yehovah „e tan wán fasi nomo. A no e kenki” (Yak. 1:17). Neleki fa a ben yepi den fosi Kresten di den ben kisi tesi, na so a o yepi ibriwan fu wi na ini a ten disi tu. Begi Yehovah fayafaya fu yepi yu fu kisi moro koni, bribi, nanga deki-ati. Te yu o si fa a e piki den begi fu yu, dan yu kan de seiker taki a o yepi yu fu tan de nanga prisiri te yu e kisi tesi!