1. San Yesus ben taigi den disipel fu en fu a kaba èn sortu warskow a gi den?

 WAN tu dei fosi Yesus dede, fo fu den disipel fu en aksi en: „San o de a marki . . . taki a kaba fu a grontapu disi de krosibei?” (Mat. 24:3) Kande den disipel dati ben e aksi densrefi fa den ben o man sabi o ten Yerusalem nanga a tempel ben o kisi pori. Di Yesus piki na aksi fu den, a no taki soso fu a pori di Yerusalem nanga a tempel ben o kisi, ma a taki tu fu „a kaba fu a grontapu disi”. Wi e libi now na ini a ten dati. Yesus ben taki fu a kaba fu a grontapu disi: „Nowan sma sabi a dei, noso a yuru dati. Iya, srefi den engel fu hemel nanga a Manpikin no sabi, ma soso a Tata sabi.” Baka dati a warskow ala den disipel fu en fu „tan na ai”.​—Mark. 13:32-37.

2. Fu san ede a ben prenspari taki den fosi Kresten tan na ai?

² Den fosi Dyu Kresten ben musu tan na ai efu den ben wani feni kibri. Yesus ben taigi den bakaman fu en san den ben musu luku fu man sabi o ten Yerusalem nanga a tempel ben o kisi pori. A taigi den: „Te unu e si taki legre seti kampu lontu Yerusalem, dan un musu sabi taki a ten doro te a foto o kisi pori.” Na a momenti dati den ben musu gi yesi na a warskow fu Yesus èn den ben musu „bigin lowe go na den bergi” (Luk. 21:20, 21). Den Kresten di ben gi yesi na a warskow disi tan na libi di den Romesma pori Yerusalem.

3. San wi o luku na ini na artikel disi?

 ³ Wi e libi na ini wan ten pe na ogri sistema o kon na wan kaba heri esi. Dati meki wi musu tan nanga krin frustan èn wi musu tan na ai. Na ini na artikel disi wi o si fa wi kan du dati aladi wi e tan luku bun san e pasa na grontapu. Wi o luku tu fa wi kan du a wani fu Gado èn fa wi kan gebroiki a ten di tan abra na wan koni fasi.

4. Fu san ede wi musu poti prakseri na a fasi fa den sani di e pasa now na grontapu e meki Bijbel profeititori kon tru?

⁴ A prenspari taki wi e luku fa den sani di e pasa now na grontapu e meki Bijbel profeititori kon tru. Fu eksempre, Yesus ben taki fu spesrutu sani di ben o pasa èn den sani disi ben o yepi wi fu kon sabi o ten a kaba fu a grontapu fu Satan ben de krosibei (Mat. 24:3-14). Na apostel Petrus gi wi deki-ati fu tan poti prakseri na den profeititori di e kon tru fu di dati ben o yepi wi fu tan abi wan tranga bribi (2 Petr. 1:19-21). A lasti buku fu Bijbel e bigin nanga den wortu: „Wan boskopu di Yesus Krestes tyari kon na krin èn di Gado gi en fu sori den srafu fu Gado den sani di musu pasa dyonsro” (Openb. 1:1). Sobun, wi e poti prakseri na den sani di e pasa now na grontapu èn wi e angri fu kon sabi fa den e meki Bijbel profeititori kon tru. Kande wi wani taki fu den sani dati tu nanga trawan.

5. San wi no musu du, ma na san wi musu hori wisrefi? (Luku den fowtow.)

⁵ Ma te wi e taki fu Bijbel profeititori, dan wi no musu kon nanga wi eigi denki. Fu san ede? Fu di wi no wani taki nowan sani tyari pratifasi kon na ini a gemeente. Fu eksempre, kande wi yere fa den tiriman fu grontapu fruteri fa den kan lusu wan spesrutu problema fu tyari freide kon so taki sani o waka bun nanga libisma. Na presi fu denki taki den sani di den e taki e meki a profeititori na 1 Tesalonikasma 5:3 kon tru, a prenspari taki wi e hori wisrefi na den sani di kon na doro fu a tori dati no so langa pasa. Te wi e hori wisrefi na den sani di na organisâsi fu Yehovah tyari kon na doro, dan wi e yepi a gemeente fu de wán ’na ini a fasi fa wi e denki’.​—1 Kor. 1:10; 4:6.

6. San wi kan leri fu 2 Petrus 3:11-13?

⁶ Leisi 2 Petrus 3:11-13. Na apostel Petrus e yepi wi fu frustan fu san ede wi e ondrosuku Bijbel profeititori. A e gi wi deki-ati fu „tan hori bun na prakseri taki a dei [fu Yehovah] e kon”. Fu san ede? A no fu di wi de nomonomo fu kon sabi „a dei nanga a yuru” te Yehovah o tyari Armagedon kon, ma fu di wi wani gebroiki a ten di tan abra ete fu ’tyari wisrefi na wan santa fasi èn fu du sani di e sori taki wi e dini Gado fayafaya’ (Mat. 24:36; Luk. 12:40). Fu taki en leti, wi wani tan tyari wisrefi na a yoisti fasi èn wi wani sorgu taki ala sani di wi e du gi Yehovah, na fu di wi lobi en trutru. Fu man du dati, wi musu tan nanga krin frustan.

7. Fa wi e sori taki wi e luku bun nanga san wi e du? (Lukas 21:34)

⁷ Boiti taki Yesus ben taigi den disipel fu en fu poti prakseri na den sani di e pasa na grontapu, a ben taigi den tu fu luku bun san den e du. Wi e si a warskow dati krin na ini Lukas 21:34. (Leisi en.)  Yesus ben e memre wi taki wi musu luku bun fa wi e tyari wisrefi èn fa wi e denki. Dati meki wi musu luku bun nanga sani di kan pori a matifasi di wi abi nanga Yehovah èn wi musu wai pasi gi den sani dati. Na so Gado o tan lobi wi.​—Odo 22:3; Yud. 20, 21.

8. Sortu rai na apostel Paulus ben gi Kresten?

⁸ Na apostel Paulus ben gi den Kresten a rai fu luku bun fa den ben e tyari densrefi. Fu eksempre, a ben taigi den Kresten na ini Efeise: „Luku bun taki unu no waka leki don sma, ma leki koni sma” (Ef. 5:15, 16). Satan e suku nomonomo fu pori a matifasi di wi abi nanga Yehovah èn dati meki Bijbel e gi wi a rai fu „tan du muiti fu frustan san na a wani fu Yehovah”. Na so wi o man kibri wisrefi gi ala sortu triki fu Satan.​—Ef. 5:17.

9. Fa wi kan sabi san na a wani fu Yehovah?

⁹ Bijbel no e taki fu ibri sani di kan pori a matifasi di wi abi nanga Yehovah. Nofo tron wi musu teki bosroiti di abi fu du nanga sani di Bijbel no e taki krin fu den. Fu man teki koni bosroiti, wi musu frustan san na „a wani fu Yehovah”. Dati meki wi musu studeri Gado Wortu doronomo èn wi musu denki dipi fu en. O moro wi e frustan san na a wani fu Yehovah èn o moro wi e „denki soleki fa Krestes e denki”, o moro wi o man waka „leki koni sma”, srefi te wan Bijbel wet no de di e taigi wi san wi musu du (1 Kor. 2:14-16). Son leisi a makelek fu sabi gi sortu sani wi musu wai pasi. Ma tra leisi baka a no makelek fu sabi dati.

10. Gi sortu sani wi musu wai pasi?

¹⁰ Bijbel e yepi wi fu frustan taki a no bun fu prei nanga den firi fu trawan, fu dringi tumusi furu sopi, fu nyan pasa marki, fu taki sani di e hati trawan, èn fu luku ogri-ati felem, porno, nanga den sortu sani dati (Ps. 101:3). Wi gensman, Didibri, e tan suku okasi fu pori a matifasi di wi abi nanga Yehovah (1 Petr. 5:8). Efu wi no e luku bun, dan Satan kan prani siri fu takru fasi na ini wi ati nanga wi frustan. Kande wi e bigin dyarusu tapu trawan, kande wi no de eerlijk moro, kande wi e kisi bigi-ai, bita-ati, heimemre, noso kande wi e hori sma na ati (Gal. 5:19-21). Te wi abi den fasi disi, dan kande wi no o si dati leki wan problema na a bigin. Ma efu wi no e meki muiti wantewante fu rutu den puru, dan den o gro neleki takru wiwiri di e tyari dede kon te fu kaba.​—Yak. 1:14, 15.

11. San na wan sani di kan kisi wi sondro taki wi sabi?

¹¹ Wan sani di kan kisi wi sondro taki wi sabi, na taki wi kan kon abi takru mati. Luku a situwâsi disi. Kow taki dati yu e wroko makandra nanga wan sma di no de wan Yehovah Kotoigi. Fu di yu wani taki a sma disi abi wan bun denki fu Yehovah Kotoigi, meki yu e sori switifasi gi en èn yu de klariklari fu yepi en. Kande yu e go nyan wan sani nanga a sma disi wanwan leisi te unu abi pauze. Fosi yu denki a sani disi e tron wan gwenti. Ma son leisi a sma e taki sani di no fiti. Biginbigin yu no lobi a sani dati, ma te fu kaba yu e kon gwenti en èn a no e trobi yu moro. Ne wan dei a sma disi e aksi yu fu go dringi wan sani baka wroko èn yu e go nanga en. Te fu kaba yu e bigin denki leki a sma disi. A no o teki langa moro fosi yu bigin du den srefi sani di a sma disi e du. A no de fu taki dati wi e sori switifasi nanga lespeki gi ala sma, ma wi  musu hori na prakseri taki den sma nanga suma wi e moksi o abi krakti na wi tapu (1 Kor. 15:33). Te wi e luku bun san wi e du soleki fa Yesus ben taigi wi, dan wi no o moksi tumusi nanga sma di no e hori densrefi na den wet fu Yehovah (2 Kor. 6:15). Wi o man si sortu bakapisi dati o tyari kon èn wi o wai pasi gi en.

12. San den disipel fu Yesus ben e du aladi den ben e wakti a pori fu Yerusalem nanga a tempel?

¹² Den disipel fu Yesus no ben musu sidon nomo e wakti a kaba fu a grontapu disi. Yesus gi den wroko fu du. A ben taigi den fu preiki a bun nyunsu „na ini Yerusalem, na ini heri Yudea nanga Samaria, èn te na den moro farawe presi fu grontapu” (Tori 1:6-8). Dati na wan bigi wroko di den bakaman fu Yesus kisi! Den gebroiki a ten fu den na wan koni fasi di den du ala san den man fu preiki gi trawan.

13. Fu san ede wi musu gebroiki wi ten na wan koni fasi? (Kolosesma 4:5)

¹³ Leisi Kolosesma 4:5. Wi musu luku bun tu fa wi e gebroiki wi ten. ’Sani di wi no e fruwakti kan miti wi alamala’ (Preik. 9:11). Wi kan lasi wi libi wantronso.

14-15. Fa wi kan gebroiki wi ten na wan koni fasi? (Hebrewsma 6:11, 12) (Luku a fowtow.)

 ¹⁴ Wan koni fasi fa wi kan gebroiki wi ten, na te wi e du a wani fu Yehovah èn te wi e du muiti fu tron moro bun mati fu en (Yoh. 14:21). Wi musu ’tanapu kánkan, wi no musu degedege, èn ala ten wi musu abi furu fu du na ini a wroko fu Masra’ (1 Kor. 15:58). Te a kaba fu a grontapu disi kon noso te a libi fu wi kon na wan kaba, dan wi no o winsi taki wi ben du moro Yehovah.​—Mat. 24:13; Rom. 14:8.

¹⁵ Na ini a ten disi, Yesus du san a pramisi fu di a e tan tiri den disipel fu en aladi den e preiki Gado Kownukondre na heri grontapu. Na den konmakandra fu wi èn nanga yepi fu den buku fu wi Yesus e leri wi fa fu preiki a bun nyunsu. Boiti dati, a e gi wi ala san wi abi fanowdu fu man du a wroko dati (Mat. 28:18-20). Wi e du san Yesus e fruwakti fu wi. Dati meki wi e wroko tranga fu preiki a bun nyunsu gi tra sma èn fu gi den leri. Boiti dati wi e tan na ai aladi wi e wakti teleki Yehovah tyari wan kaba kon na a grontapu disi. Te wi e fiti a rai di skrifi na Hebrewsma 6:11, 12, dan wi o tai hori na a howpu fu wi „te na a kaba”.​—Leisi en.

16. Sortu fasti bosroiti wi musu abi?

¹⁶ Yehovah poti wan dei nanga yuru fu tyari wan kaba kon na a grontapu fu Satan. Te a dei dati doro, Yehovah o meki ala den profeititori di skrifi na ini a Wortu fu en kon tru. Toku a kan gersi son leisi leki a e teki langa fosi a kaba fu a grontapu disi doro. Ma Bijbel e taki dati a dei fu Yehovah „no o kon lati” (Hab. 2:3). Sobun, meki wi abi a fasti bosroiti fu „wakti Yehovah”, iya, meki wi sori taki wi e „wakti [wi] Gado di o frulusu [wi]”.​—Mika 7:7.