1. O ten ala den salfuwan o de na hemel?

 WAN tu yari psa, a pipel fu Yehovah ben aksi densrefi a sani disi: ’O ten den lasti salfu Kresten o opo go na hemel?’ Fosi, wi ben e denki taki kande wan tu fu den salfuwan o tan fu wan pisi ten na ini a Paradijs na grontapu baka Armagedon. Ma na ini A Waktitoren fu 15 yuli 2013, wi leri taki ala salfuwan di o de ete na grontapu o opo go na hemel fosi Armagedon bigin.​—Mat. 24:31.

2. Sortu aksi kan opo kon èn san wi o luku na ini na artikel disi?

² Ma na aksi disi kan opo kon: San o psa nanga den „tra skapu” fu Krestes di o dini Yehovah getrow na grontapu na a ten fu a „bigi banawtu”? (Yoh. 10:16; Mat. 24:21). Sonwan fu den „tra skapu” ben kan broko den ede taki nowan sma o de fu yepi den èn fu gi den rai baka te den lobi salfu brada nanga sisa fu den opo go na hemel. Kow go luku tu Bijbel tori di ben kan meki taki den e denki so. Baka dati wi o taki fu san ede den no abi fu broko den ede.

SAN NO O PSA NANGA DEN TRA SKAPU?

3-4. San son Kresten ben kan aksi densrefi, èn fu san ede?

³ Son Kresten ben kan aksi densrefi efu den tra skapu o tapu fu dini Yehovah te den salfu brada fu a Tiri Skin no e tiri den moro. Kande son tori fu Bijbel e meki den denki so. Kow luku tu eksempre. A fosiwan abi fu du nanga Granpriester Yoyada. A ben de wan getrow futuboi fu Gado. En nanga en wefi Yosabat ben kibri wan yongu boi di nen Yoas èn den yepi en fu tron wan bun kownu di ben e gi yesi na Gado. Yoas ben e anbegi Yehovah na wan  getrow fasi solanga Yoyada di ben owru kba ben de na libi. Ma baka di Yoyada dede, Yoas bigin du san no bun. A arki den ogri edeman èn a drai baka gi Yehovah.​—2 Kron. 24:2, 15-19.

⁴ A tra eksempre na a di fu den Kresten di ben e libi baka a ten fu den apostel. A lasti apostel di dede ben de Yohanes. Solanga a ben de na libi a ben e yepi furu Kresten fu tan getrow na Yehovah (3 Yoh. 4). Neleki den tra apostel fu Yesus, Yohanes ben du tranga muiti fu kibri den gemeente gi falsi leri nanga falsi gwenti (1 Yoh. 2:18; 2 Tes. 2:7). Ma baka di Yohanes dede, furu sma na ini den gemeente fadon kmoto na bribi. Na ini den yari baka dati a Kresten gemeente kon pori srefsrefi.

5. San wi no musu denki te wi e leisi den tu Bijbel tori di kari na ini den paragraaf disi?

⁵ Te wi e luku den tu Bijbel tori dati, dan kande wi e aksi wisrefi efu wan srefi sortu sani o psa nanga den tra skapu fu Krestes te den salfuwan opo go na hemel. Kande wi e denki taki getrow Kresten na grontapu o bigin du san no bun, neleki fa Yoas ben du dati. Wi ben kan denki tu taki getrow Kresten o fadon kmoto na bribi neleki fa a ben psa nanga furu Kresten baka di den apostel dede. Ma na den sani dati o psa? Kwetkweti! Wi kan de seiker taki te den salfuwan no de na grontapu moro, den tra skapu o tan anbegi Yehovah na a yoisti fasi èn Yehovah o tan sorgu gi den. Fu san ede wi kan abi a fertrow dati?

A TRU ANBEGI NO O PORI

6. San na den dri pisi ten di wi o luku syatu now?

⁶ Fu san ede wi kan de seiker taki a tru anbegi no o pori, srefi na ini den muilek ten di de na wi fesi? Fu di wi leri san Bijbel e taki fu a ten di wi e libi na ini. A ten disi de heri tra fasi leki a ten fu owruten Israel èn a ten baka di den apostel dede. Sobun, meki wi luku den dri pisi ten disi moro fini: (1) A ten fu owruten Israel, (2) a ten baka di den apostel dede, èn (3) a ten fu wi, noso a ’ten taki ala sani kon bun baka’.​—Tori 3:21.

7. Fu san ede getrow sma na ini Israel no las’ati di a pipel nanga den kownu fu den besroiti fu du ogri?

⁷ A ten fu owruten Israel. Syatu fosi Moses dede, a taigi den Israelsma: „Mi sabi heri bun taki te mi dede, unu o du sani di o tyari takru bakapisi gi unu èn unu no o gi yesi na den komando di mi taigi unu” (Deut. 31:29). Moses ben warskow den Israelsma tu taki efu den ben o opo densrefi teige Gado, dan Gado ben o meki den tron katiboman (Deut. 28:35, 36). Den sani di Moses ben taki kon tru? Iya. Na ini den hondrohondro yari di psa, furu kownu besroiti fu du sani di Yehovah no feni bun èn neleki den, a pipel bigin anbegi falsi gado tu. A sani disi meki taki Yehovah strafu a takru pipel Israel èn a no meki den Kownu fu Israel tiri den moro fara (Esek. 21:25-27). Ma getrow Israelsma kisi dek’ati di den si taki Gado wortu kon tru.​—Yes. 55:10, 11.

8. A musu ferwondru wi taki a Kresten gemeente kon pori baka di den apostel dede? Ferklari dati.

⁸ A pisi ten baka di den apostel dede. A musu ferwondru wi taki a Kresten gemeente kon pori baka di den apostel dede? Nôno. Yesus ben taki dati furu sma ben o drai baka gi a tru anbegi (Mat. 7:21-23; 13:24-30, 36-43). Den apostel Paulus, Petrus, nanga Yohanes ben taki  krin taki a profeititori fu Yesus ben e bigin kon tru kba na ini a fosi yarihondro (2 Tes. 2:3, 7; 2 Petr. 2:1; 1 Yoh. 2:18). Na ini a di fu tu yarihondro, a Kresten gemeente kon pori. Syatu baka di a lasti apostel dede, a falsi Kresten bribi tron wan pisi fu Babilon a Bigiwan, noso ala den falsi kerki na heri grontapu. Den sani di Yesus ben taki ben e kon tru.

9. Fa a ten fu wi e difrenti fu a ten fu owruten Israel èn fu a pisi ten baka di den apostel dede?

⁹ A ’ten te ala sani kon bun baka’. A ten fu wi e difrenti fu a ten fu owruten Israel èn fu a pisi ten di furu Kresten ben e fadon kmoto na bribi baka di den apostel dede. Fa wi e kari a ten fu wi? Kande wi ben gwenti kari en „den lasti dei” fu na ogri grontapu disi (2 Tim. 3:1). Ma Bijbel e sori taki wan moro prenspari èn moro langa pisi ten bigin na a srefi ten dati. A pisi ten dati o go doro teleki a Mesias Kownukondre meki taki libisma no abi sondu moro èn teleki a meki grontapu tron wan paradijs. Bijbel e kari a pisi ten disi a ’ten taki ala sani kon bun baka’ (Tori 3:21). A pisi ten disi bigin na ini 1914. San ben kon bun baka? We, Yesus tron Kownu na ini hemel. Sobun, disi leisi sosrefi Yehovah ben abi wan tiriman di ben e teki presi gi En èn a tiriman disi ben de wan bakapkin fu getrow Kownu David. Ma a no dati w’wan Yehovah ben seti kon bun baka. Syatu baka di Yesus tron kownu, Gado bigin seti a tru anbegi baka! (Yes. 2:2-4; Esek. 11:17-20) Yu denki taki a tru anbegi o pori baka?

10. (a) San o psa nanga a tru anbegi na ini a ten fu wi, soleki fa Bijbel e sori? (Yesaya 54:17) (b) Fu san ede den profeititori disi na wan dek’ati gi wi?

¹⁰ Leisi Yesaya 54:17. Prakseri a profeititori na ini a tekst disi: „Awinsi sortu fetisani sma meki fu feti nanga yu, a no o abi bun bakapisi!” Den wortu dati di skrifi nanga yepi fu santa yeye e kon tru na ini a ten disi. Den wortu di e kon now de wan trowstu gi wi èn den abi fu du tu nanga a ten fu wi: „Ala den pikin fu yu o de sma di kisi leri fu Yehovah èn ala sani o waka bun gi den. Ala ten yu o du san reti . . . . Yu no o frede nowan sma èn nowan sani o skreki yu, bika noti no o de fu frede yu” (Yes. 54:13, 14). Srefi „a gado fu a grontapu disi”, sobun Satan srefi, no o man tapu a wroko di Yehovah en pipel e du fu gi sma leri (2 Kor. 4:4). A tru anbegi seti kon bun baka èn noiti moro sma o  man pori en. A o tan fu ala ten. Awinsi sortu fetsani sma meki fu feti nanga wi, a no o abi bun bakapisi!

SAN O PSA?

11. Fu san ede wi kan de seiker taki Gado no o libi a bigi ipi te den salfuwan opo go na hemel?

¹¹ Ma san o psa te den salfuwan opo go na hemel? No fergiti taki Yesus na wi Skapuman. En na a ede fu a Kresten gemeente. Yesus ben taki krin: „Wán sma nomo na un Fesiman, dati na Krestes” (Mat. 23:10). Yesus di e tiri na ini hemel, ala ten o sorgu gi den tru bakaman fu en. Fu di Yesus e tiri den bakaman fu en dyaso na grontapu, meki den no o abi fu frede noti. A no de fu taki dati wi no sabi finfini fa Krestes o tiri a pipel fu en na a ten dati. Sobun, kow luku wan tu Bijbel eksempre di kan gi wi dek’ati.

12. Fa Yehovah sorgu gi a pipel fu en (a) baka di Moses dede? (b) baka di Elia kisi wan tra toewijzing? (Luku a prenki.)

¹² Moses dede fosi Israel go na ini a Pramisi Kondre. San psa nanga a pipel fu Gado? A de so taki Yehovah tapu fu yepi a pipel fu en baka di a getrow man disi dede? Nôno. Yehovah tan sorgu gi a pipel fu en solanga den ben e gi yesi na en. Fosi Moses dede, Yehovah ben taigi en fu poti Yosua leki fesiman fu a pipel. Moses train Yosua furu yari langa (Eks. 33:11; Deut. 34:9). Boiti dati, furu tra man ben de di ben man teki fesi. Sonwan fu den ben e tiri dusun sma, hondro sma, feifitenti sma, èn tin sma srefi (Deut. 1:15). Gado sorgu a pipel fu en bun. Wan tra man di Yehovah ben gebroiki, na Elia. A ben du muiti furu yari langa fu yepi den Israelsma fu anbegi Yehovah. Ma te fu kba Yehovah gi en wan tra toewijzing. A ben musu go dini na zuidsei fu Yuda (2 Kow. 2:1; 2 Kron. 21:12). A de so taki Yehovah ben libi den getrow futuboi fu en di ben de fu a tin-lo kownukondre Israel? Nôno. Elia ben train Elisa furu yari langa. Yu ben abi sosrefi den „profeiti” di ben kisi leri (2 Kow. 2:7). Sobun, furu getrow man ben de di ben kan yepi fu tiri a pipel fu Gado. Yehovah tan du san a ben abi na prakseri èn a sorgu gi den getrow futuboi fu en.

13. Sortu dyaranti Hebrewsma 13:5b e gi wi? (Luku a prenki.)

¹³ Te yu e luku den eksempre dati, dan san yu denki o psa te den lasti salfuwan opo go na hemel? Wi no abi fu  broko wi ede. Bijbel e gi wi a moi dek’ati disi: Noiti Yehovah o libi a pipel fu en di de na grontapu. (Leisi Hebrewsma 13:5b.) Neleki Moses nanga Elia, a pkin grupu salfu Kresten di e teki fesi na ini a ten disi e ferstan taki a prenspari fu train trawan. Furu yari kba, den brada fu a Tiri Skin e train brada di de fu den tra skapu, so taki den kan teki fesi. Fu eksempre, den orga furu skoro fu train owruman, kring-owruman, brada fu a Bijkantoro Komte, opziener na Betel, zendeling, nanga tra brada sosrefi. A Tiri Skin srefi e train brada di e yepi nanga a wroko fu den difrenti komte fu a Tiri Skin. Nownow kba, den yepiman disi e tyari hebi frantwortu na wan getrow fasi. Wi kan de seiker taki den brada o man tan sorgu gi den skapu fu Krestes.

14. San na artikel disi e leri wi?

¹⁴ Disi na san wi e leri fu na artikel disi: Te den lasti salfuwan opo go na hemel na a kba fu a bigi banawtu, dan a pipel fu Yehovah dyaso na grontapu o tan anbegi en na wan getrow fasi. Noiti den o tapu fu du dati. A tru taki na a ten dati wan grupu fu kondre di Bijbel e kari Gok fu Magok, o kon feti nanga wi (Esek. 38:18-20). Ma a feti disi o de fu wan syatu pisi ten nomo, èn a no o abi bun bakapisi. Boiti dati, a no o man tapu a pipel fu Yehovah fu tan anbegi en. Yehovah o ferlusu den seiker! Na ini wan fisyun, na apostel Yohanes ben si a „bigi ipi” fu den tra skapu fu Krestes. Na engel ben taigi Yohanes taki a „bigi ipi” disi e kmoto „na ini a bigi banawtu” (Openb. 7:9, 14). Sobun, wi kan de seiker taki Yehovah o kibri den.

15-16. Soleki fa Openbaring 17:14 e sori, dan san den salfuwan fu Krestes o du na a ten fu Armagedon, èn fu san ede dati e gi wi dek’ati?

¹⁵ Tòg son sma ben kan aksi densrefi: ’Ma fa a de nanga den salfuwan? San den o du baka te den opo go na hemel?’ Bijbel e piki na aksi dati krin. A e sori taki den regering fu a grontapu disi o „feti  nanga a Pikin Skapu”. A no de fu taki dati den o lasi a strei. Bijbel e taki: „[A Pikin Skapu] o wini den.” Èn suma o yepi en? A vers e piki na aksi disi. Dati na „den sma di Gado kari”, „den wan di a teki” èn den wan „di e tai hori na en”. (Leisi Openbaring 17:14.) Suma na den sma disi? Dati na den salfuwan di kisi wan opobaka! Sobun, te den lastiwan fu den salfuwan opo go na hemel na a kba fu a bigi banawtu, dan wan fu den fosi wroko di den o du, na fu feti. Son salfu Kresten ben de fetiman fosi den tron Yehovah Kotoigi. Sonwan fu den ben de srudati srefi. Ma bakaten den tron tru Kresten èn den leri fu libi na ini freide nanga trawan (Gal. 5:22; 2 Tes. 3:16). Den tapu fu teki prati na feti. Ma baka te den opo go na hemel, den o feti sei na sei nanga Krestes nanga den engel fu wini den feanti fu Gado.

¹⁶ Denki a tori! Son salfu Kresten na grontapu owru kba èn den no abi furu krakti moro. Ma te den kisi wan opobaka na hemel, dan den o tron makti yeye di no o man dede noiti. Den o feti makandra nanga Yesus Krestes, a Kownu fu den. Baka te a feti fu Armagedon kon na wan kba, dan den salfuwan disi o wroko makandra nanga Yesus fu yepi libisma fu tron sma di no abi sondu moro. Wi kan de seiker taki te den de na hemel, den o man yepi den lobi brada nanga sisa na grontapu moro bun leki di den ben de sondu libisma.

17. Fa wi du sabi taki ala den futuboi fu Gado o kisi kibri na a ten fu a feti fu Armagedon?

¹⁷ Yu de fu den tra skapu? Efu dati de so, dan san yu musu du te a bigi feti fu Armagedon bigin? Na disi nomo: Fertrow tapu Yehovah èn teki a tiri fu en. San dati wani taki? Bijbel e gi wi a moi rai disi: „Mi pipel, un go na ini un kamra èn tapu den doro. Un go kibri fu wan syatu pisi ten, teleki mi ati no bron moro” (Yes. 26:20). Ala den getrow futuboi fu Gado na hemel èn na grontapu o kisi kibri na a ten dati. Neleki na apostel Paulus wi de seiker taki „nowan tirimakti, nowan sani fu a ten disi noso fu a ten di e kon . . . sa man prati wi fu a lobi fu Gado” (Rom. 8:38, 39). Ala ten yu musu hori a sani disi na prakseri: Yehovah lobi yu èn noiti a o libi yu!