1. Fu san ede a no makelek ala ten fu ferstan san wan sma e bedoel te a taki dati a gi yu pardon?

 „MI GI YU PARDON.” Wi e firi bun te wan sma e taigi wi a sani disi, spesrutu efu wi taki noso du wan sani di hati a sma. Ma san den wortu „Mi gi yu pardon” wani taki trutru? Kande a sma di gi yu pardon e bedoel taki yu nanga en na bun mati ete. Noso kande a wani sori yu taki a no wan taki moro fu a tori, ma taki yu nanga en a no bun mati moro. Te libisma e taki dati den gi wan trawan pardon, dan dati wani taki difrenti sani.

 2. San Bijbel e taki fu a fasi fa Yehovah e gi pardon? (Luku a futuwortu.)

² A fasi fa Yehovah e gi pardon e difrenti furu fu a fasi fa wi leki sondu sma e gi makandra pardon. Nowan sma kan gi pardon leki fa Yehovah e du dati. A psalm skrifiman ben taki disi fu Yehovah: „Na yu e gi sma pardon trutru, so taki sma kan sori bigi lespeki gi yu” a (Ps. 130:4). Iya, Yehovah „e gi sma pardon trutru”. En na a sma di e sori wi san a wani taki fu gi wan sma pardon nanga wi heri ati. Na ini son vers fu den Hebrew Buku fu Bijbel, Bijbel skrifiman e gebroiki wan Hebrew wortu fu sori fa Yehovah e gi pardon. Noiti den e gebroiki a wortu dati fu taki fa libisma e gi pardon.

 3. Fa a fasi fa Yehovah e gi sma pardon e difrenti fu a fasi fa wi e gi trawan pardon? (Yesaya 55:6, 7)

³ Te Yehovah gi wan sma pardon, dan a e figi a sondu puru di a sma dati ben du. Na so wi kan tan abi wan bun  matifasi nanga Yehovah. Wi de nanga tangi taki te Yehovah gi wi pardon, a e figi a sondu fu wi puru krinkrin èn a e du dati ibri leisi baka.​—Leisi Yesaya 55:6, 7.

 4. Fa Yehovah e yepi wi fu ferstan san a wani taki fu gi sma pardon trutru?

⁴ Efu a fasi fa Yehovah e gi sma pardon e difrenti fu a fasi fa wi e gi trawan pardon, dan fa sondu libisma kan ferstan san a wan taki fu gi wan sma pardon trutru? Yehovah e gebroiki moi agersitori fu yepi wi fu ferstan fa e gi wi pardon. Na ini a artikel disi wi o poti prakseri na wan tu fu den agersitori disi. Den o sori wi taki te wi abi trutru berow, dan Yehovah o figi den sondu fu wi puru èn wi o man de bun mati fu en baka. Te wi o luku den agersitori, dan wi o kon abi moro lobi nanga warderi gi wi lobi’ati Papa, di de klarklari fu gi wi pardon.

YEHOVAH E PURU DEN SONDU FU WI NA WI TAPU

 5. San e psa te Yehovah gi wi pardon fu den sondu fu wi?

⁵ Furu tron Bijbel e agersi den sondu fu wi nanga hebi lai. Disi na san Kownu David ben taki fu den sondu fu en: „Den fowtu fu mi furu so te, taki den psa mi ede. Den de leki wan hebi lai na mi tapu, iya, den hebi tumsi fu tyari” (Ps. 38:4). Ma te sma e sori berow fu den sondu fu den, dan Yehovah e gi den pardon (Ps. 25:18; 32:5). Den Hebrew wortu di vertaal nanga „gi pardon”, wani taki „ fu opo” noso „fu tyari” wan sani. Sobun, te Yehovah e gi wi pardon fu den sondu fu wi, dan a e puru wan hebi na wi tapu. A de neleki wi ben e tyari wan hebi lai na tapu wi skowru èn a e teki en puru na wi tapu.

 6. Te o fara Yehovah e tyari den sondu fu wi?

⁶ Wan tra agersitori e sori taki Yehovah e tyari den sondu fu wi gwe bun fara. Psalm 103:12 e taki: „So fara leki son-opo de fu sondongo, na so fara fu wi a poti den sondu fu wi.” Son-opo nanga sondongo e psa na tu difrenti ten èn na tu difrenti presi. Disi wani taki dati Yehovah e tyari den sondu fu wi gwe moro fara leki san wi ben man denki. Disi e gi wi a dyaranti taki Yehovah e gi wi pardon trutru.

 7. San Yehovah e du nanga den sondu fu wi, soleki fa Bijbel e sori? (Mika 7:18, 19)

⁷ A tru taki Yehovah e tyari den sondu fu wi gwe fara na agersi fasi. Ma disi wani taki dati a e tan prakseri den? Nôno. Kownu Heskia ben skrifi disi fu Yehovah: „Yu teki ala mi sondu trowe na yu baka” (Yes. 38:9, 17). Na agersitori disi e sori taki Yehovah e trowe den sondu gwe fu den sma di sori berow èn a no e luku den moro. Wi kan ferstan den wortu fu a tekst disi tu leki: „Yu meki a gersi leki mi no du nowan sondu.” Bijbel e tyari a tori disi kon moro na krin na ini wan tra agersitori di skrifi na Mika 7:18, 19. (Leisi en.) Den tekst dati e taki dati Yehovah e trowe den sondu fu wi na ini a dipi fu a se. Efu wan sma na ini owruten ben trowe wan sani go na ini a dipi fu a se, dan a no ben o feni a sani dati noiti moro.

 8. San wi leri te now?

⁸ Den agersitori disi leri wi taki te Yehovah e gi wi pardon, dan a e puru den sondu fu wi na wi tapu so taki wi konsensi no e trobi wi moro. A de trutru soleki fa David taki: „Koloku fu den sma di kisi pardon fu den kruktudu fu den èn koloku fu den sma di Gado tapu den sondu fu den.  Koloku fu a sma di Yehovah no e prakseri den sondu fu en moro” (Rom. 4:7, 8). Disi e sori taki a gi wi pardon trutru.

YEHOVAH E FIGI SONDU PURU

 9. Fa Bijbel e yepi wi fu si taki Yehovah e gi wi pardon trutru?

⁹ Nanga yepi fu a lusu-paiman, Yehovah man figi den sondu puru fu den wan di abi berow. Wi o luku san Yehovah e du, soleki fa Bijbel e sori. Na ini Bijbel wi e leisi taki Yehovah e wasi den sondu disi puru. Na so a sma di sondu e kon krin (Ps. 51:7; Yes. 4:4; Yer. 33:8). Yehovah srefi e taki san na a bakapisi te a wasi den sondu fu wan sma puru: „Awinsi den sondu fu unu redi leki brudu, toku den o kon weti leki snew. Awinsi den redi leki redi krosi, den o tron srefi leki weti skapuwiwiri” (Yes. 1:18). A muilek srefsrefi fu puru redi flaka fu wan krosi. Ma Yehovah gebroiki na agersitori disi fu gi wi a dyaranti taki den sondu fu wi kan wasi kon so krin taki wi no man si den moro.

10. San na wan tra agersitori di Yehovah e gebroiki fu sori wi taki a e gi wi pardon trutru?

¹⁰ Soleki fa wi si na ini na artikel na fesi, dan Bijbel e agersi sondu nanga paiman (Mat. 18:32-35). Sobun, ibri leisi te wi e sondu teige Yehovah, dan a de neleki den paiman fu wi e kon moro bigi. A paiman di wi abi na en bigi srefsrefi. Ma te Yehovah e gi wi pardon, dan a de neleki wi no abi fu pai a paiman moro di wi abi na en. Te a gi wi pardon fu sondu, dan a no e dwengi wi fu tan pai gi den sondu dati. Neleki fa wan sma e firi prisiri te a no abi fu pai den paiman fu en moro, na so wi e prisiri te Yehovah e gi wi pardon.

11. Te Bijbel e taki dati Yehovah figi den sondu fu wi puru, dan san dati wani taki? (Tori fu den apostel 3:19)

¹¹ Boiti taki wi no abi fu pai Yehovah gi den sondu fu wi moro, a e figi den sondu fu wi puru tu. (Leisi Tori fu den apostel 3:19.) Prakseri taki wan sma e hari wan strepi na ini a bedrag di yu musu pai. Tòg ala sma man si a bedrag ete di skrifi. Ma dati no de so te sma ben o figi a bedrag puru. Fu man ferstan na agersitori disi, dan wi musu hori na prakseri taki na ini owruten sma ben man figi enki puru makelek. Wan sma ben kan gebroiki wan nati sponsu fu figi puru san ben skrifi. Sobun, te sma ben figi wan paiman puru, dan a paiman dati no ben de fu si srefsrefi moro. Nowan sma ben man si moro san ben skrifi drape fosi. A ben de neleki a sma noiti no ben abi a paiman dati. Wi breiti so te fu sabi taki te Yehovah e gi wi pardon fu den sondu fu wi, dan a de neleki noiti wi ben du den sondu dati.​—Ps. 51:9.

12. San wi e leri fu na agersitori fu a wolku?

¹² Yehovah e gebroiki wan srefi sortu agersitori fu sori wi fa a e figi den sondu fu wi puru. A e taki: „Mi o figi den ogri fu yu puru èn mi o tapu den sondu fu yu nanga wan wolku” (Yes. 44:22). Te Yehovah e gi wi pardon, dan a de neleki a e tapu den sondu fu wi nanga wan wolku, so taki wi no e si den èn en srefi no e si den tu.

13. Te Yehovah e gi wi pardon fu den sondu fu wi, dan fa wi e firi?

¹³ San den agersitori disi e leri wi? Te Yehovah e gi wi pardon fu den sondu fu wi, dan wi no musu meki wi konsensi tan fon wi fu di wi ben du den sondu dati. A ferlusu-ofrandi fu Yesus pai kba gi den  sondu fu wi. Te Yehovah gi wi pardon fu wan sondu, dan a de neleki wi noiti no ben du a sondu dati. Na so Yehovah e gi wi pardon te wi abi berow fu den sondu fu wi.

YEHOVAH E TEKI WI BAKA LEKI EN MATI

14. Fu san ede wi kan abi a fertrow taki Yehovah e gi wi pardon trutru? (Luku .)

¹⁴ Te Yehovah e gi wi pardon, dan wi kan de seiker taki a tron wi mati baka. Disi e yepi wi fu no tan sari fu a sondu di wi du. Wi no abi fu frede tu taki Yehovah e mandi ete na wi tapu èn taki a e suku wan fasi fu strafu wi. Noiti a o du dati. Fu san ede wi kan fertrow Yehovah te a e taki dati a gi wi pardon? Yehovah ben taigi a profeiti Yeremia: „Mi o gi den pardon fu den ogri sani di den du, èn mi no o memre den sondu fu den moro” (Yer. 31:34). Paulus ben gebroiki den srefi wortu disi di a taki: „Mi no o memre den sondu fu den kwetikweti moro” (Hebr. 8:12). Ma san disi wani taki trutru?

15. Te Bijbel e taki dati Yehovah no e memre den sondu fu wi moro, dan san dati wani taki?

¹⁵ Te Bijbel e gebroiki a wortu „memre” dan a no de so ala ten taki wan sma e prakseri wan sani di ben psa wan leisi. Na presi fu dati, a kan de so tu taki a sma e du wan sani. Na ogriman di ben e anga na a postu sei Yesus ben aksi en: „Yesus, memre mi te yu kon na ini yu Kownukondre” (Luk. 23:42, 43). A man disi ben e aksi Yesus fu du wan sani gi en. Yesus taigi a man taki a ben o gi en wan opobaka. Sobun, te Yehovah e taki dati a no e memre den sondu fu wi moro, dan dati wani taki dati a gi wi pardon èn taki a no o du wan sani na ini a ten di e kon fu strafu wi gi den sondu di wi ben du.

16. Nanga san Bijbel e agersi wi?

¹⁶ Te Yehovah e gi wi pardon, dan wi e firi fri. Bijbel e gebroiki wan tra agersitori fu yepi wi fu ferstan dati. Fu di wi abi sondu, meki Bijbel e agersi wi nanga „srafu fu sondu”. Ma fu di Yehovah e gi wi pardon, meki wi de leki srafu di „kon  fri fu sondu” (Rom. 6:17, 18; Openb. 1:5). Iya, te wi sabi taki Yehovah gi wi pardon, dan wi kan de koloku neleki wan srafu di kon fri.

17. Fa wi e kon betre baka te Yehovah gi wi pardon? (Yesaya 53:5)

¹⁷ Leisi Yesaya 53:5. Fu di wi na sondusma, meki Bijbel e agersi wi nanga sma di abi wan takru siki. A ferlusu-ofrandi di Yehovah pai nanga yepi fu en Manpkin, meki taki wi kon betre baka (1 Petr. 2:24). Te wi e du sondu, dan wi e pori a matifasi di wi abi nanga Yehovah. Ma nanga yepi fu a lusu-paiman, Yehovah kan gi wi pardon èn wi kan tron bun mati baka fu en. Neleki fa wan sma di ben abi wan seryusu siki e prisiri srefsrefi fu di a kon betre baka, na so wi e prisiri te wi e tron mati baka fu Yehovah èn te a feni wi bun baka.

FA WI E KISI WINI TE YEHOVAH GI WI PARDON

18. San wi leri fu den agersitori di e sori fa Yehovah e gi wi pardon? (Luku a faki „Fa Yehovah e gi wi pardon”.)

¹⁸ San wi leri fu den agersitori di e sori fa Yehovah e gi wi pardon? Te Yehovah e gi wi pardon fu den sondu fu wi, dan a de neleki noiti wi ben du den sondu dati èn wi kan de seiker taki a no o strafu wi gi den sondu dati na ini a ten di e kon. Na so wi kan de mati fu wi P’pa na hemel. Ma wi sabi taki te Yehovah e gi wi pardon, dan dati na wan kado di a e gi wi fu di a lobi wi èn fu di a de klarklari fu du bun gi wi. A no e gi wi pardon fu di wi e ferdini dati.​—Rom. 3:24.

19. (a) Gi san wi musu de nanga tangi? (Romesma 4:8) (b) San wi o luku na ini a tra artikel?

¹⁹ Leisi Romesma 4:8. Wi de nanga tangi trutru taki Yehovah e gi wi pardon fu den sondu fu wi (Ps. 130:4). Ma efu wi wani taki Yehovah gi wi pardon, dan wi musu du wan prenspari sani. Luku san Yesus ben taki: „Efu unu no e gi sma pardon fu den sondu fu den, dan un Tata no o gi unu pardon fu den sondu fu unu” (Mat. 6:14, 15). Sobun, neleki Yehovah wi musu de klarklari fu gi trawan pardon. Na artikel di e kon o sori wi fa wi kan du dati.