1-2. (a) O ten wi kan feni en muilek fu gi wan sma pardon? (b) Fa Denise sori taki a ben de klarklari fu gi wan trawan pardon?

 YU FENI en muilek fu gi trawan pardon? Furu fu wi feni en muilek fu du dati, spesrutu te wan sma taki noso du wan sani di hati wi trutru. Ma wan tu sani de di wi kan du fu no tan atibron èn fu gi trawan pardon. Fu eksempre, luku san ben miti wan sisa di nen Denise. a A sisa disi ben de klarklari fu gi wan trawan pardon aladi dati no ben makelek srefsrefi. Na ini 2017, Denise nanga en osofamiri ben go luku a nyun edekantoro fu Yehovah Kotoigi di no ben opo so langa ete. Di den ben de na pasi fu go baka na oso, dan wan tra oto rèi kon naki na oto fu den. Denise flaw di den meki na aanrijding èn di a kisi ensrefi, a yere taki den pkin fu en ben kisi hebi mankeri èn taki en masra ben lasi libi. Denise e prakseri a momenti dati baka èn a e taki: „Mi ben e firi brokosaka èn mi no ben man bribi san psa.” Bakaten a kon yere taki a man di ben naki na oto fu den no ben drungu, a no ben gebroiki drugs, èn a no ben e luku en telefon di a ben e rèi na oto. Dati meki Denise begi Yehovah fu yepi en fu no tan nanga atibron.

² Skowtu grabu a man disi èn a ben musu go na krutu fu di a ben meki taki Denise en masra lasi en libi. Efu krutubangi ben o besroiti taki a man ben fowtu, dan a ben o abi fu koti strafu. Ma krutubangi taigi Denise taki na den sani di a ben o taki te a ben go na fesi krutu ben o bepaal efu a man ben o abi fu koti strafu. Denise e taki: „Fu di mi ben musu taki baka fu den moro muilek momenti na ini mi libi, meki mi ben e firi leki wan sma ben koti a soro fu mi opo èn a fringi wan heri ipi sowtu go na ini.” Wan tu wiki baka dati, Denisi ben e sdon  na fesi krutu fu taki na fesi a man di ben meki taki sowan sari sani miti en osofamiri. San a taki? Denise aksi a krutuman fu sori sar’ati gi a man. b Di a kba taki, dan a krutuman bigin krei. A taki: „Na ini ala den 25 yari di mi de krutuman, noiti mi yere sowan sani na krutubangi. Noiti wan sma begi mi fu sori sar’ati gi wan sma di du wan ogri nanga wan famiriman fu den. Noiti mi yere sma e taki sani di e sori taki den abi lobi èn taki den de klarklari fu gi trawan pardon.”

 3. San yepi Denise fu gi a man pardon?

³ San yepi Denise fu gi a man pardon? A ben denki dipi fu a fasi fa Yehovah e gi sma pardon (Mika 7:18). Te wi de nanga tangi trutru taki Yehovah gi wi pardon fu den sondu fu wi, dan dati o yepi wi fu gi trawan pardon.

 4. San Yehovah wani taki wi du? (Efeisesma 4:32)

⁴ Yehovah wani taki wi musu gi trawan pardon nanga wi heri ati neleki fa en e du dati. (Leisi Efeisesma 4:32.) A wani taki wi musu de klarklari fu gi trawan pardon te den du wan hati sani nanga wi (Ps. 86:5; Luk. 17:4). Na ini na artikel disi wi o luku dri sani di o yepi wi fu gi trawan pardon nanga wi heri ati.

NO DU LEKI A NO E HATI YU

 5. Soleki fa Odo 12:18 e sori, dan fa wi ben kan firi te wan sma du wan hati sani nanga wi?

⁵ Kande a e hati wi trutru te wan sma e taki noso e du wan hati sani nanga wi, spesrutu te a sma dati na wan bun mati noso wan famiriman fu wi (Ps. 55:12-14). Son leisi, a sani di a sma du kan hati wi so te taki a gersi leki wan sma sutu wi nanga wan nefi. (Leisi Odo 12:18.) Kande wi e pruberi fu du leki a sani di a sma du no e hati wi. Ma dati ben o de neleki wan sma sutu wi nanga wan nefi èn wi libi a nefi na ini wi skin. Na so a de tu taki wi no kan ferwakti taki wi o firi moro bun te wi e du leki a sani di psa no e hati wi.

 6. Fa wi ben kan firi te wan sma du wan hati sani nanga wi?

⁶ Te wan sma du wan hati sani nanga wi, dan nofo tron wi e ati bron. A tru taki Bijbel e taki dati wi kan ati bron. Ma a e warskow wi tu taki wi no musu tan nanga ati bron (Ps. 4:4; Ef. 4:26). Fu san ede? Fu di a fasi fa wi e firi nofo tron abi krakti na wi tapu èn dati o de fu si na ini den sani di wi e du noso e taki. Èn atibron furu tron e tyari takru bakapisi kon (Yak. 1:20). Hori na prakseri taki wi kan ati bron, ma wi kan besroiti fu no tan nanga atibron.

 7. Sortu tra firi kan opo kon te wan sma du wan hati sani nanga wi?

⁷ Te sma no e libi bun nanga wi, dan tra firi kan opo kon tu. Fu eksempre, wan sisa di nen Ann e taki: „Di mi ben pkin, dan mi p’pa gwe libi mi m’ma èn a trow nanga na uma di den ben e pai fu sorgu gi mi. Mi ben e firi leki mi p’pa ben fergiti mi. Di den kisi pkin, dan mi ben e firi neleki den pkin dati ben teki a presi fu mi. Mi gro kon bigi nanga a denki taki mi p’pa no ben wani mi.” Wan sisa di nen Georgette e ferteri fa a ben e firi di en masra waka gi en. A e taki: „Wi ben de mati sensi di wi ben pkin. Mi nanga en ben de pionier patna. Mi ben e sari srefsrefi.” Èn wan sisa di nen Naomi e taki: „Noiti mi ben denki taki mi masra ben o du wan hati sani nanga mi. Sobun, di a taigi mi taki a ben e luku porno sondro taki mi sabi, dan mi ben feni taki a ben kori mi èn taki a no ben de fu fertrow.”

 8. (a) San na wan tu reide fu san ede wi musu gi trawan pardon? (b) Sortu wini wi e kisi te wi e gi trawan pardon? (Luku a faki „ San wi kan du te wan sma du wan hati sani nanga wi di wi no man fergiti?”)

 ⁸ Wi no man tapu trawan fu taki noso fu du sani di e hati wi. Ma wi kan hori wisrefi fu no pai ogri fu ogri. Èn nofo tron a moro bun fu gi sma pardon. Fu san ede? Fu di wi lobi Yehovah èn fu di a wani taki wi de klarklari fu gi trawan pardon. Efu wi e tan atibron èn efu wi e weigri fu gi trawan pardon, dan wi musu luku bun taki wi no e du wan don sani èn taki wi no e kon siki srefi (Odo 14:17, 29, 30). Luku na eksempre fu wan sisa di nen Christine. A e taki: „Te mi e atibron noso te mi feni taki wan sma du wan hati sani nanga mi, dan mi no e lafu so furu. Mi no e nyan gosontu n’nyan, mi no e sribi nofo, èn a moro muilek gi mi fu basi den firi fu mi. A sani disi abi krakti tapu a fasi fa mi e libi nanga mi masra èn nanga trawan.”

 9. Fu san ede wi no musu tan nanga atibron?

⁹ Awinsi a sma di du wan hati sani nanga wi no e aksi wi pardon, tòg wi kan du wan sani fu sorgu taki wi no e lasi prisiri. San wi kan du? Georgette di wi ben kari kba e taki: „A teki pkinso ten, ma mi besroiti fu no atibron moro tapu a man di ben de mi masra. A sani disi meki taki mi kon abi freide na ini mi ati.” Te wi no e tan nanga atibron, dan wi ati no o kon bita. Boiti dati, wi e du wisrefi wan bun fu di wi no e tan prakseri a sani di sma du nanga wi (Odo 11:17). Ma san yu musu du efu tòg yu no klari ete fu gi a sma pardon?

SAN YU KAN DU FU NO TAN NANGA ATIBRON

10. Fu san ede wi musu ferstan taki a e teki ten fosi wi man gi wan sma pardon nanga wi heri ati? (Luku den prenki.)

¹⁰ San kan yepi yu fu no tan nanga atibron te wan sma du wan hati sani nanga yu? Wan sani di kan yepi wi na te wi e ferstan taki a e teki ten fosi wi man gi wan sma pardon nanga wi heri ati. Te wan sma di kisi seryusu mankeri kisi datrayepi, dan a e teki ten fosi a kon betre baka. Na so a de tu taki a kan teki ten fosi wi man gi wan sma pardon nanga wi heri ati.​—Preik. 3:3; 1 Petr. 1:22.

11. (a) Fa begi kan yepi wi fu gi trawan pardon nanga wi heri ati? (b) San yu leri fu den felem di e sori fa wi kan gi sma pardon nanga wi heri ati?

¹¹ Begi Yehovah meki a yepi yu fu gi sma  pardon nanga yu heri ati. c Ann di ben kari kba, e ferteri fa begi yepi en. A e taki: „Mi aksi Yehovah fu gi ibri sma na ini mi famiri pardon gi den sani di den no du bun. Baka dati mi skrifi wan brifi gi mi p’pa nanga en nyun wefi fu taigi den taki mi gi den pardon.” Ann e taki dati a no ben makelek fu du dati. Ma a e taki tu: „Mi howpu taki a muiti di mi du fu gi mi p’pa nanga en wefi pardon nanga mi heri ati, o gi den dek’ati fu leri sabi Yehovah.”

12. Fu san ede wi musu fertrow tapu Yehovah na presi fu denki taki wi abi leti fu tan nanga atibron? (Odo 3:5, 6)

¹² Fertrow tapu Yehovah. No denki taki yu abi leti fu tan nanga atibron. (Leisi Odo 3:5, 6.) Ala ten Yehovah sabi san bun gi wi (Yes. 55:8, 9). Èn noiti a o aksi wi fu du wan sani di o tyari takru bakapisi kon gi wi. Sobun, te a e gi wi dek’ati fu gi sma pardon nanga wi heri ati, dan wi kan de seiker taki wi o kisi wini te wi e du dati (Ps. 40:4; Yes. 48:17, 18). Ma efu wi feni taki wi abi leti fu tan nanga atibron, dan kande wi no o man gi trawan pardon noiti (Odo 14:12; Yer. 17:9). Naomi di wi ben kari kba e taki: „Mi ben e bribi taki mi no ben abi fu gi mi masra pardon fu di a ben e luku porno. Mi ben frede taki a ben o hati den firi fu mi baka noso taki a ben o fergiti fa a ben meki mi sari. Èn mi ben e denki taki Yehovah ben e ferstan fa mi e firi. Ma mi kon si taki awinsi Yehovah e ferstan fa mi e firi, tòg dati no wani taki dati a e agri nanga mi. A sabi fa mi e firi èn taki a e teki ten fosi mi tapu fu atibron. Ma a wani tu taki mi e gi mi masra pardon nanga mi heri ati.”

SAN YU KAN DU FU SI DEN BUN FASI FU SMA

13. San wi musu du soleki fa Romesma 12:18-21 e sori?

¹³ Te wan sma du wan hati sani nanga wi èn wi e gi a sma dati pardon, dan a bun fu no taki moro fu a sani di psa. Ma wi wani du moro leki dati srefi. Efu a sma di hati den firi fu wi na wi Kresten brada noso sisa, dan wi wani meki freide nanga a sma (Mat. 5:23, 24). Na presi taki wi e tan ati bron na  a sma tapu, wi wani gi en pardon (Leisi Romesma 12:18-21; 1 Petr. 3:9). San kan yepi wi fu du dati?

14. San wi musu pruberi fu du èn fu san ede?

¹⁴ Yehovah e besroiti fu luku den bun fasi fu sma. Wi musu pruberi tu fu luku den bun fasi fu a sma di du wan hati sani nanga wi (2 Kron. 16:9; Ps. 130:3). Nofo tron te wi e denki takru fu wan sma, dan wi o si soso den takru fasi fu en. Èn te wi e denki bun fu wan sma, dan nofo tron wi e poti prakseri na den bun fasi fu en. Te wi e luku den bun fasi fu sma, dan a o moro makelek gi wi fu gi den pardon. Wan brada di nen Jarrod e taki: „Mi feni en moro makelek fu gi wan brada pardon te mi e prakseri den someni bun sani di mi lobi fu en, na presi fu tan luku a fowtu di a meki.”

15. Fu san ede a bun fu taigi wan sma taki yu gi en pardon?

¹⁵ Wan tra prenspari sani di wi musu prakseri fu du, na fu taigi a sma taki wi gi en pardon. Fu san ede? Luku san Naomi di wi ben kari kba e taki: „Mi masra aksi mi  ’Yu gi mi pardon?’ Di mi opo mi mofo fu taigi en taki mi ben gi en pardon, dan mi no ben man taki den wortu dati. Mi kon si taki na ini mi ati, mi no ben gi mi masra pardon trutru. Ma baka wan pisi ten mi ben man taki den wortu dati di abi furu krakti. Di mi gi mi masra pardon, dan en ai ben furu nanga watra. Mi no ben denki taki a sani disi ben o de so wan ferlekti gi en èn mi no ben denki tu taki mi srefi ben o firi moro bun. Sensi a dei dati, mi leri fu fertrow en baka èn wi tron bun mati baka.”

16. Fa wi kan gi sma pardon nanga wi heri ati?

¹⁶ Yehovah wani taki wi gi sma pardon nanga wi heri ati (Kol. 3:13). Ma tòg a kan muilek gi wi fu gi trawan pardon. San kan yepi wi, na te wi no e du leki a sani di a sma du nanga wi no e hati wi, te wi no e tan nanga atibron, èn te wi e si den bun fasi fu a sma. Na so wi o man gi a sma pardon.​—Luku a faki „ Dri sani di o yepi wi fu gi trawan pardon nanga wi heri ati”.

PRAKSERI DEN WINI DI A ABI TE YU E GI TRAWAN PARDON NANGA YU HERI ATI

17. Fu san ede wi musu gi trawan pardon nanga wi heri ati?

¹⁷ Furu reide de fu san ede a bun fu gi sma pardon nanga wi heri ati. Wi o luku wan tu fu den. A foswan, na taki wi musu teki na eksempre fu wi P’pa Yehovah di abi furu sar’ati (Luk. 6:36). A di fu tu reide, na taki wi e sori taki wi de nanga tangi taki Yehovah gi wi pardon (Mat. 6:12). Èn a di fu dri reide, na taki wi o abi wan moro bun gosontu èn wi o tan bun mati nanga trawan.

18-19. San kan psa te wi e gi sma pardon?

¹⁸ Te wi e gi trawan pardon, dan wi kan kisi blesi di wi no ben ferwakti. Luku san ben psa nanga Denise di wi ben kari kba. A no ben sabi taki a man di ben naki na oto fu den ben besroiti fu kiri ensrefi baka te a ben kisi krutu. Ma a man ben warderi en so te taki Denise gi en pardon, taki a bigin studeri Bijbel nanga Yehovah Kotoigi.

¹⁹ Wi ben kan denki taki a muilek srefsrefi fu gi wan sma pardon, ma wi srefi kan kisi furu wini te wi e du dati (Mat. 5:7). Dati meki wi musu du ala san wi man fu gi trawan pardon neleki fa Yehovah e du dati.