Mi p’pa nanga m’ma ben de fayafaya Lomsusma. Ma di den leri na ini Bijbel taki Gado nen na Yehovah, dan den ala tu tron fayafaya Yehovah Kotoigi. Mi p’pa tapu fu meki udu popki fu Yesus. Na presi fu dati a gebroiki a koni di a ben abi leki temreman fu kenki na ondrosei pisi fu na oso fu wi kon tron a fosi Kownukondre zaal na ini San Juan del Monte. Dati ben de na ini wan fu den birti fu Manila, a mamafoto fu den Filippijnen.

Baka di mi gebore na ini 1952, dan mi p’pa nanga m’ma bigin leri mi sani fu Yehovah, neleki fa den ben du nanga den fo bigi brada nanga den dri bigi sisa fu mi. Di mi ben e gro kon bigi, dan mi p’pa gi mi dek’ati fu leisi wan pisi fu Bijbel ibri dei èn a studeri furu fu den buku fu wi nanga mi. Ten na ten mi p’pa nanga m’ma ben e kari kring-owruman fu kon tan na wi oso èn den ben e du dati tu nanga brada di ben e wroko na Betel. Wi ben lobi fu arki den ondrofenitori di den brada disi ben e ferteri wi èn den tori disi ben e gi wi furu dek’ati. A sani disi meki taki wi alamala besroiti fu poti a diniwroko fu Yehovah na a fosi presi na ini wi libi.

Mi leri furu fu mi p’pa nanga m’ma di ben de getrow na Yehovah. Baka di mi lobi m’ma dede fu di a ben siki, dan mi nanga mi p’pa bigin pionier na ini 1971. Ma na ini 1973 di mi ben abi 20 yari, dan mi p’pa dede. Mi ben e sari taki mi no ben abi wan p’pa nanga wan m’ma moro, èn mi ben e firi leki mi de mi w’wan. Ma a Bijbel howpu fu wi di ’tranga èn di e hori wi tnapu’ yepi mi fu no las’ati tumsi èn fu tan krosbei na Yehovah (Hebr. 6:19). Syatu baka di mi p’pa dede, mi go dini leki spesrutu pionier na a farawe èilanti Coron, na ini a distrikt Palawan.

Mi ben abi 21 yari di mi doro na Coron. Fu di mi ben kweki na foto, meki mi ferwondru taki na èilanti no ben abi nofo stroom nanga kran watra, èn taki oto nanga bus no ben de drape. Wan tu brada ben de drape, ma mi no ben abi wan pionier patna èn son leisi mi ben musu preiki mi w’wan. A fosi mun, mi ben e misi mi famiriman nanga mati so te. Te neti, mi ben e luku go na hemel di ben lai nanga stari èn mi ben e krei. Mi ben wani gwe libi a toewijzing fu mi èn drai go baka na oso.

Na den momenti dati di mi ben de mi w’wan, mi ben e taigi Yehovah ala san de na tapu mi ati. Mi e memre den moi tekst ete di mi ben leisi na ini Bijbel èn na ini den buku fu wi. Mi ben gwenti prakseri Psalm 19:14. Mi kon si taki Yehovah ben o de ’mi Stonbergi nanga mi Ferlusuman’ efu mi ben e denki dipi fu den sani di a du èn fu den fasi fu en. A Waktitoren artikel di nen „U bent nooit alleen” a (Yu no de yu w’wan noiti), ben de wan bigi yepi gi mi. Mi leisi en ibri tron baka. Fu taki en leti, na den pisi ten dati, mi ben de nanga Yehovah w’wan èn a sani dati gi mi furu moi okasi fu begi, fu studeri, èn fu denki dipi fu sani.

A no langa baka di mi doro na a èilanti Coron, mi tron owruman. Fu di mi ben de a wan-enkri owruman drape, meki mi bigin hori na ibri wiki Theokrasia Diniwroko-skoro, a Diniwroko Konmakandra, a Gemeente Bukustudie, nanga a Waktitoren-studie. Mi ben e hori Bijbel-lezing tu ibri wiki. Mi ben abi so furu fu du taki mi no ben abi ten fu firi leki mi ben de mi w’wan.

A wroko di mi ben e du na Coron ben abi bun bakapisi èn wan tu fu den Bijbelstudie fu mi dopu. Ma tra tyalensi ben de tu. Son leisi mi ben musu waka wan afu dei fu doro a gebied, sondro fu sabi pe mi ben o sribi te mi doro drape. Tra moro pkin èilanti ben de tu na ini a gebied fu a gemeente. Mi ben gwenti go na den èilanti dati nanga boto na ten te a se ben krasi, aladi mi no ben sabi fa fu swen. Na ini ala den muilek ten disi, Yehovah kibri mi èn a horbaka gi mi. Bakaten mi kon ferstan taki Yehovah ben e sreka mi gi moro bigi tyalensi di mi ben o kisi na ini a tra toewijzing fu mi.

Na ini 1978, mi ben musu go dini na Papuwa Nyun Ginea, na a noordsei fu Australia. Papuwa Nyun Ginea na wan kondre di lai nanga bergi èn a bigi bijna leki Spanyorokondre. Mi no ben man bribi taki den sowan dri milyun sma drape ben e taki moro leki 800 tongo. Ma mi ben breiti taki furu sma drape ben man taki Melanesian Pidgin, a tongo di furu sma sabi leki Tok Pisin.

Wan pisi ten mi ben e dini na ini wan Ingrisitongo gemeente na ini a mamafoto, Port Moresby. Ma baka dati mi froisi go na wan Tok Pisin gemeente èn mi teki les fu leri taki a tongo. Mi ben e gebroiki den sani di mi ben e leri na ini a preikiwroko. Disi yepi mi fu leri a tongo moro esi. Fosi yu denki, mi ben man hori Bijbel-lezing na ini Tok Pisin. Mi ben breiti taki bijna wán yari baka di mi ben doro na Papuwa Nyun Ginea, mi ben musu go dini leki kring owruman gi den Tok Pisin gemeente na ini difrenti fu den bigi distrikt.

 Fu di den gemeente ben de fara fu makandra, meki mi ben musu orga furu kring-konmakandra èn mi ben musu reis furu. Na a bigin, mi ben e firi leki mi ben de mi w’wan na ini wan nyun kondre pe sma ben e taki wan tra tongo èn pe sma ben abi tra gwenti. Mi no ben man go na den gemeente nanga oto, fu di a kontren drape ben lai bergi. Dati meki bijna ibri wiki mi ben musu frei nanga plane fu go luku den gemeente dati. Son leisi, mi ben de a wan-enkri sma na ini wan pkin brokobroko plane di ben abi wán masyin nomo. Te mi ben e go luku den gemeente nanga plane, dan mi ben e frede neleki te mi ben e go nanga boto.

Wan tu sma nomo ben abi telefoon, èn dati meki mi ben abi fu skrifi brifi seni go gi den gemeente. Nofo tron, mi ben e doro na den gemeente fosi den ben kisi a brifi fu mi èn mi ben musu aksi den sma fu a kontren drape suma na den Kotoigi. Ma ibri leisi mi ben e feni den brada èn den ben breiti so te taki mi kon luku den. A sani disi ben e memre mi fu san ede mi ben e meki so furu muiti fu kon luku den gemeente. Yehovah yepi mi na furu difrenti fasi èn mi kon tron wan moro bun mati fu en.

Di mi ben de na a fosi konmakandra fu mi, na wan èilanti di nen Bougainville, dan wan trowpaar ben breiti fu si mi. Den kon aksi mi: „Yu sabi wi ete?” Mi ben sabi ete taki mi ben preiki gi a trowpaar disi a fosi leisi di mi ben doro na ini Port Moresby. Mi ben bigin wan Bijbelstudie nanga den èn baka dati mi aksi wan brada fu drape fu studeri nanga den. Now den ben dopu! Disi ben de wan fu den someni blesi di mi kisi na ini den dri yari di mi ben de na ini Papuwa Nyun Ginea.

Fosi mi ben gwe libi Coron na ini 1978, dan mi kon sabi wan sisa di ben abi moi fasi èn di ben de klarklari fu yepi trawan. A ben de wan gewoon pionier aladi a ben e kweki den tu pkin fu en, Samuel nanga Shirley. A ben e sorgu tu gi en m’ma di ben kon owru kba. Na ini mei 1981, mi drai go baka na den Filippijnen fu trow nanga Adel. Baka di wi trow, dan Adel bigin pionier makandra nanga mi èn wi sorgu gi na osofamiri.

Aladi mi ben abi wan osofamiri, tòg mi kisi a toewijzing na ini 1983 fu go dini baka leki spesrutu pionier na Linapacan èilanti na ini a distrikt Palawan. Mi nanga mi heri osofamiri froisi go na a farawe presi disi pe Kotoigi no ben de. Adel en m’ma dede sowan wán yari baka dati. Ma wi tan wroko tranga na ini a diniwroko èn dati ben de wan trowstu gi wi. Wi bigin someni Bijbelstudie tapu Linapacan èilanti èn den studie disi ben e waka bun. Fosi yu denki wi ben abi wan pkin Kownukondre zaal fanowdu. Dati meki wi srefi bow wan. Dri yari baka di wi ben doro drape, wi ben breiti fu si taki 110 sma kon na a Memrefesa. Baka di wi gwe libi na èilanti, furu fu den sma disi go na fesi èn den dopu.

Na ini 1986, mi ben musu go dini na Culion, wan èilanti pe wan grupu gwasiman ben e tan. Baka dati, Adel tron spesrutu pionier tu. Na a bigin, wi ben e frede fu preiki gi sma di ben abi lepra. Ma den preikiman fu a kontren drape  gi wi a dyaranti taki den sma di abi a siki disi ben kisi datrayepi èn taki wi no ben abi fu frede taki wi ben o kisi a siki tu. Wan tu sma di ben abi a siki disi ben e kon na den konmakandra di ben e hori na ini wan sisa en oso. Heri esi wi kon lobi en fu preiki gi den sma disi. Boiti dati, a ben switi fu taki fu a Bijbel howpu fu wi nanga den sma di ben e firi leki Gado nanga tra sma no ben e broko den ede nanga den. A ben moi fu si fa sma di ben siki ben breiti fu kon sabi taki wan dei den no ben o siki srefsrefi moro.​—Luk. 5:12, 13.

Fa den pkin fu wi feni a libi na Culion? We, mi nanga Adel aksi tu yongu sisa fu Coron fu kon tan nanga wi so taki den pkin fu wi ben kan abi bun demakandra. Samuel, Shirley, nanga den tu yongu sisa ben e prisiri fu yepi sma fu kon sabi a waarheid. Den ben e studeri nanga furu pkin, èn mi nanga Adel ben e studeri nanga den p’pa nanga m’ma fu den pkin disi. Te fu kba wi ben e studeri nanga erfu osofamiri. Fosi yu denki wi ben e hori someni studie taki wi ben man seti wan nyun gemeente.

Na bigin, mi ben de a wan-enkri owruman na ini a kontren drape. Dati meki a bijkantoro aksi mi fu hori den alawiki konmakandra gi aiti preikiman na ini Culion èn fu du a srefi gi neigi preikiman na ini wan dorpu di nen Marily. Fu doro a dorpu disi, a ben e teki dri yuru nanga boto. Baka te mi ben hori den konmakandra drape, dan mi nanga mi osofamiri ben e waka furu yuru langa na ini wan bergi kontren fu go hori Bijbelstudie na ini wan dorpu di nen Halsey.

Te fu kba, someni sma fu Marily nanga Halsey kon na ini a waarheid, taki wi ben abi fu bow Kownukondre zaal na ini ala tu dorpu. Tapu Linapacan, den brada makandra nanga man nanga uma di ben wani sabi moro, du a moro bigi pisi fu a bow-wroko. A zaal na ini Marily ben kan hori 200 sma èn a ben meki na sowan fasi taki a ben kan kon moro bigi. Dati meki wi ben man hori kongres drape.

Na ini 1993 di den pkin ben bigi kba, mi nanga Adel bigin nanga a kringwroko na ini den Filippijnen. Èn na ini 2000, mi go na a Dinari-skoro fu  kisi leri fu tron leriman na a skoro dati. Mi ben feni taki mi no bun nofo fu de wan leriman, ma Adel tan gi mi dek’ati. A ben e memre mi taki Yehovah ben o gi mi a krakti fu du a wroko disi (Fil. 4:13). Adel ben sabi taki a sani disi tru fu di a ben e du a wroko fu en aladi a ben abi problema nanga en gosontu.

Na ini 2006, Adel kon yere taki a abi a siki fu Parkinson. Di mi taigi Adel taki mi ben wani tapu nanga a toewijzing fu mi fu man sorgu gi en, dan a taki: „Mi e begi yu, suku wan datra di kan yepi mi nanga a siki fu mi, èn mi sabi taki Yehovah o yepi wi fu go doro.” Na ini den siksi yari baka dati, Adel tan dini Yehovah sondro fu krutukrutu. Di a no ben man waka moro, dan a ben e sdon na ini wan rolstoel e preiki. Èn di a no ben man taki so bun moro, dan a ben e gi syatu piki na den konmakandra. Te na a dede fu en na ini 2013, Adel ben gwenti kisi sms nanga karta fu brada nanga sisa di ben e sori warderi gi en fu di a ben e hordoro na so wan moi fasi. Mi ben libi moro leki 30 yari nanga mi lobi wefi, ma now mi ben e sari èn mi ben e firi baka leki mi ben de mi w’wan.

Adel ben wani taki mi tan go doro na ini a toewijzing fu mi, èn na dati mi du. Mi ben abi furu fu du èn a sani disi yepi mi fu no firi leki mi ben de mi w’wan. Fu 2014 te go miti 2017, mi kisi a toewijzing fu go luku den gemeente di ben e taki Tagalog, na ini den kondre pe den brada no ben man anbegi Yehovah fri. Baka dati, mi go luku den Tagalog gemeente na ini Taiwan, Amerkankondre, nanga Kanada. Na ini 2019, mi gi les na den Ingrisitongo klas fu a Skoro gi Kownukondre Preikiman na ini India nanga Thailand. Mi kisi furu prisiri fu den toewijzing disi. Mi e firi moro koloku te mi abi furu fu du na ini a wroko fu Yehovah.

Na ini ibri toewijzing di mi kisi, mi kon lobi den brada nanga sisa di mi miti. Dati meki a no ben makelek fu gwe libi den. Te mi ben musu gwe, dan mi leri fu fertrow dorodoro tapu Yehovah. Mi ondrofeni furu leisi fa a yepi mi, èn na so mi ben man hordoro awinsi sortu kenki ben psa na ini mi libi. Tide na a dei, mi na wan spesrutu pionier na ini den Filippijnen. Mi e firi switi na ini mi nyun gemeente di de leki wan lobi famiri èn den e sorgu bun gi mi. Mi breiti tu fu si taki Samuel nanga Shirley abi bribi neleki a m’ma fu den.​—3 Yoh. 4.

Iya, tesi miti mi na ini mi libi, èn mi si fa siki pina mi wefi teleki a dede. Mi ben musu fiti misrefi tu na furu difrenti situwâsi. Tòg mi si taki Yehovah „no de fara fu nowan fu wi” (Tori 17:27). Yehovah en anu ’no syatu’ tumsi fu horbaka gi den futuboi fu en èn fu gi den krakti, awinsi den e tan na farawe presi (Yes. 59:1). Mi heri libi langa, Yehovah, mi Stonbergi, de nanga mi èn mi de nanga tangi gi san a du gi mi. Noiti mi ben de mi w’wan.