STUDIE-ARTIKEL 6
SINGI 18 Wi de nanga tangi gi a lusu-paiman
Wi de nanga tangi taki Yehovah e gi wi pardon fu den sondu fu wi
„Gado ben lobi grontapu so te, taki a gi en wan-enkri Manpikin.”—YOH. 3:16.
SAN WI O LERI
Wi o leri san Yehovah du so taki wi kan kisi pardon gi den sondu fu wi. Dati o yepi wi fu kon abi moro warderi gi a lobi di a e sori gi wi.
1-2. Fu san ede wi kan agersi a situwâsi fu libisma nanga a di fu a yonguman di kari na ini paragraaf 1?
PRAKSERI wan yonguman di kweki na ini wan gudu famiri. Ma wan dei, en p’pa nanga m’ma e kisi mankeri èn den lasi den libi. A yonguman e sari srefsrefi. Ma a o kisi moro takru nyunsu fu yere. A e kon sabi taki en p’pa nanga m’ma fermorsu den moni èn taki den meki wan lo paiman. Sobun, den no libi noti gi en. Na presi fu dati, a musu pai ala den paiman di en p’pa nanga m’ma meki èn den sma wani den moni wantewante. Noiti a o man pai den sma disi baka.
2 Fu taki en leti, a situwâsi fu wi gersi a di fu a yonguman. Wi fosi p’pa nanga m’ma, Adam nanga Eva, no ben abi sondu èn den ben e libi na ini wan moi paradijs (Gen. 1:27; 2:7-9). Den ben abi a howpu fu libi wan koloku libi fu ala ten. Ma den lasi ala sani. Den lasi a Paradijs pe den ben e tan èn den lasi a howpu di den ben abi fu libi fu têgo. San den libi na baka gi den pkin fu den? Bijbel e taki: „Wán man meki sondu kon na grontapu èn sondu tyari dede kon. Dati meki ala sma e dede, bika den alamala sondu” (Rom. 5:12). Wi kisi sondu fu Adam èn dati meki wi e dede. A sondu di wi kisi de leki wan bigi paiman di nowan fu wi man pai.—Ps. 49:8.
3. Fu san ede wi kan agersi den sondu fu wi nanga paiman?
3 Bijbel e agersi sondu nanga paiman (Mat. 18:32-35). Te wi e sondu, dan a de neleki wi e meki wan paiman na Yehovah. Wi srefi no man pai a paiman dati, èn na soso te wi dede wi no ben o abi fu pai en moro.—Rom. 6:7, 23.
4. (a) San ben o psa nanga ala sondusma efu den no ben o kisi yepi? (Ps. 49:7-9) (b) Nanga san a wortu „sondu” abi fu du na ini Bijbel? (Luku a faki „ Sondu”.)
4 Yu denki taki wi man kisi ala den sani baka di Adam nanga Eva lasi? Wi w’wan no o man sorgu taki wi kisi den baka. (Leisi Psalm 49:7-9.) Efu wi no ben o kisi yepi, wi no ben o abi a howpu fu libi fu têgo noso fu kisi wan opobaka. Wi ben o dede èn wi no ben o libi baka noiti moro, neleki fa a de nanga den meti.—Preik. 3:19.
5. Fa wi lob’ati P’pa yepi wi fu pai gi den sondu fu wi? (Luku a na tapu a kafti.)
5 Prakseri a yonguman baka di ben kari na a bigin. Fa a ben o firi efu wan guduman ben de klarklari fu pai ala den paiman fu en? A no de fu taki dati a yonguman disi ben o breiti èn a ben o feni en bun. Na wan srefi sortu fasi wi lob’ati P’pa pai gi a sondu di wi kisi fu Adam nanga Eva. Yesus ben ferklari en so: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yoh. 3:16). A sani disi di Yehovah du, e meki tu taki wi man abi wan bun matifasi nanga en.
Yesus preiki a bun nyunsu di e sori taki Yehovah e gi sma pardon nanga yepi fu a lusu-paiman (Yoh. 3:16). Yesus ben de klarklari fu gi en libi leki ofrandi so taki a lusu-paiman ben man pai (Luku paragraaf 5)
6. San wi o luku na ini na artikel disi èn fu san ede?
6 Fa wi kan kisi wini fu a moi sani di Yehovah du so taki wi kan kisi pardon gi den sondu fu wi? Fu piki na aksi dati, dan wi o poti prakseri na difrenti sani di Bijbel e leri èn wi o luku tu san den wani taki. Te wi e denki dipi fu den sani disi, dan wi o kisi moro warderi gi a lobi di Yehovah sori gi wi.
SAN YEHOVAH WANI: A WANI TAKI WI TRON EN MATI
7. (a) San moro Adam nanga Eva lasi? (b) San wi leki bakapkin fu Adam nanga Eva abi tranga fanowdu? (Romesma 5:10, 11)
7 Di Adam nanga Eva sondu, dan den no ben man libi fu têgo moro. Ma den tron feanti tu fu den P’pa, Yehovah. Fosi den ben sondu, den ben de na ini a famiri fu Gado (Luk. 3:38). Ma di den trangayesi Yehovah, a no ben wani den moro na ini a famiri fu en. A sani disi psa fosi den ben meki pkin (Gen. 3:23, 24; 4:1). Nowan fu den pkin fu den ben o man de na ini Yehovah en famiri. Wi no ben o abi a grani dati tu. Dati meki wi ben abi yepi fanowdu fu man tron mati fu en. (Leisi Romesma 5:10, 11.) Wi no ben musu de feanti fu Gado moro, ma wi ben musu tron en mati. A moi fu si taki na Yehovah fosi du wan sani fu sorgu taki wi kan tron mati fu en. Fa so?
SAN A SETI: GADO SORGU TAKI WI KAN TRON EN MATI
8. Sortu sani Yehovah seti so taki wi kan tron mati baka fu en?
8 Yehovah seti sani so taki sondu libisma man tron mati baka fu en. A sorgu gi wan sani di abi a srefi waarde leki den sani di Adam lasi, so taki wi kan kisi den sani dati baka. Den Kresten Griki Buku fu Bijbel e taki tu fu a sani di Yehovah du fu sorgu taki wan sma kan tron wan mati fu en.—Rom. 3:25.
9. San Yehovah du so taki den Israelsma ben kan kisi pardon fu den sondu fu den?
9 Yehovah ben du wan sani fu sorgu taki den Israelsma ben kan kisi pardon fu den sondu fu den èn tron mati fu en. Ibri yari den Israelsma ben musu hori wan fesa tapu wan spesrutu dei. Dati ben de a dei di sma ben e tyari ofrandi fu tapu den sondu fu den. Na a dei dati, a granpriester ben e tyari meti ofrandi fu aksi pardon gi a pipel. A no de fu taki dati den meti ofrandi no ben o man tapu den sondu fu den Israelsma dorodoro, fu di meti lagi moro libisma. Ma solanga den Israelsma ben abi berow èn den ben e tyari den ofrandi di Gado ben feni bun, dan a ben de klarklari fu gi den pardon fu den sondu fu den (Hebr. 10:1-4). Den ofrandi di den Israelsma ben e tyari na a spesrutu dei dati èn na tra okasi sosrefi, ben e yepi den fu kon ferstan taki den ben de sondusma èn taki moro ben de fanowdu fu tapu den sondu fu den.
10. San Yehovah du so taki libisma ben man kisi pardon fu den sondu fu den?
10 San Yehovah du so taki libisma ben man kisi pardon fu den sondu fu den? A seti sani so taki en lobi Manpkin ben o ’gi ensrefi leki wan ofrandi wán leisi nomo, fu tyari den sondu fu wan heri ipi sma’ (Hebr. 9:28). Yesus „gi en libi leki wan lusu-paiman fu ferlusu furu sma” (Mat. 20:28). San na wan lusu-paiman?
A PRIJS: A LUSU-PAIMAN
11. (a) San na wan lusu-paiman soleki fa Bijbel e sori? (b) Suma w’wan ben kan pai a lusu-paiman?
11 Soleki fa Bijbel e sori, Yehovah besroiti taki wan lusu-paiman ben musu pai so taki wi kan kisi pardon fu sondu èn so taki wi kan tron en mati. San ben de a lusu-paiman di ben musu pai so taki libisma ben kan kisi baka san Adam lasi? Hori na prakseri taki Adam nanga Eva lasi a libi fu den di ben de sondro sondu èn den no ben o man libi fu têgo moro tu. Sobun, a lusu-paiman ben musu de wan prijs di ben abi a srefi waarde fu den sani di ben lasi (1 Tim. 2:6). A sma di ben kan pai a lusu-paiman ben o abi fu de wan man di (1) ben de sondro sondu; (2) ben o man libi fu têgo na grontapu; èn (3) a ben musu de klarklari fu gi en libi fu a bun fu wi. Dan fosi a libi fu a sma dati ben o man pai gi san Adam ben lasi.
12. Fu san ede Yesus ben man pai a lusu-paiman?
12 Luku dri reide fu san ede Yesus ben man pai a lusu-paiman: (1) „A no du nowan sondu” (1 Petr. 2:22). (2) Fu di a no ben abi sondu, meki a ben o man libi fu têgo na grontapu. (3) A ben de klarklari fu dede èn fu gi en libi fu a bun fu wi (Hebr. 10:9, 10). Yesus no ben abi sondu, neleki fa a ben de nanga a fosi man, Adam, fosi a sondu teige Gado (1 Kor. 15:45). Sobun, fu di Yesus dede, meki a ben man pai a prijs di ben de fanowdu fu bai baka san Adam ben lasi (Rom. 5:19). Na so Yesus tron „a lasti Adam”. A no de fanowdu taki wan tra sma di no abi sondu e kon na grontapu fu pai gi san Adam lasi. Yesus dede „wán leisi nomo fu ala ten”.—Hebr. 7:27; 10:12.
13. Fa a du kon taki wi man tron mati fu Yehovah?
13 Fa a du kon taki wi man tron mati fu Yehovah? Yehovah du wan sani fu sorgu taki wi kan kisi pardon fu sondu. A seti sani so taki Yesus gi en libi di ben de sondro sondu, fu pai gi den sondu wi.—Ef. 1:7; Hebr. 9:14.
A BAKAPISI: YEHOVAH FERLUSU WI FU SONDU NANGA DEDE ÈN A E SI WI LEKI RET’ATI SMA
14. San wi o luku now èn fu san ede?
14 Fa wi e kisi wini fu a sani di Yehovah du gi wi? Fu man piki na aksi dati, dan wi o luku tu sani di Bijbel e leri. Disi o yepi wi fu ferstan fa wi e kisi wini fu di Yehovah e gi wi pardon fu sondu.
15-16. (a) Fa wi e kisi wini fu di a lusu-paiman pai? (b) Fa wi e firi fu di wi kisi ferlusu fu sondu nanga dede?
15 Bijbel e taki dati wi kisi ferlusu fu di a lusu-paiman pai gi den sondu fu wi. Na apostel Petrus ben taki en so: „Unu sabi taki di a frulusu unu fu a soso fasi fu libi di unu ben teki abra fu den afo fu unu, a no gebroiki sani di man pori, soleki solfru noso gowtu. Ma a frulusu unu nanga brudu di warti trutru, neleki a brudu fu wan pikin skapu di no abi nowan mankeri èn di no flaka, iya, a brudu fu Krestes.”—1 Petr. 1:18, 19.
16 A ferlusu-ofrandi e meki taki wi man kisi ferlusu fu sondu nanga dede di e tyari furu pina kon (Rom. 5:21). Wi de nanga bigi tangi taki Yehovah nanga Yesus sorgu taki wi kisi ferlusu nanga yepi fu a warti brudu, noso a libi, fu Yesus.—1 Kor. 15:22.
17-18. (a) San a wani taki dati Gado e si wi leki ret’ati sma? (b) Fa wi e kisi wini fu di Gado e si wi leki ret’ati sma?
17 Bijbel e taki dati Yehovah e si den futuboi fu en leki ret’ati sma. Disi wani taki dati a no e ferwakti taki wi e pai gi den sondu fu wi. Aladi Yehovah du disi, tòg a e tan hori ensrefi na den wet fu en di reti ala ten. A no fu di wi e ferdini en, meki a e si wi leki ret’ati sma. Boiti dati, Yehovah no feni en bun taki sma e sondu. Ma Yehovah de klarklari fu gi wi pardon fu den sondu fu wi, fu di wi e sori taki wi e bribi na ini a lusu-paiman di Yesus pai. Èn wi de nanga tangi taki Yehovah seti sani so taki disi ben kan psa.—Rom. 3:24; Gal. 2:16.
18 Fa wi e kisi wini te Yehovah e si wi leki ret’ati sma? Wán fasi fa son sma e kisi wini, na taki Gado teki den fu tiri na ini hemel makandra nanga Yesus èn den tron Gado pkin (Tit. 3:7; 1 Yoh. 3:1). Den kisi pardon gi den sondu fu den. A de neleki noiti den ben du den sondu dati, èn dati meki den warti nofo fu de na ini a Kownukondre (Rom. 8:1, 2, 30). Den sma di abi a howpu fu libi fu têgo na grontapu, na sma di Gado e si leki ret’ati sma fu di den tron en mati èn a gi den pardon fu den sondu fu den (Yak. 2:21-23). Wi leki sma fu a bigi ipi di o psa Armagedon libilibi, abi a howpu fu no dede noiti (Yoh. 11:26). Bijbel e taki dati den wan di dede kba, o kisi wan opobaka. Dati na „den sma di du san reti” èn „den sma di no du san reti” (Tori 24:15; Yoh. 5:28, 29). Te fu kba, ala futuboi fu Yehovah na grontapu di e gi yesi na en, o „kon fri na wan tumusi moi fasi leki pikin fu Gado” (Rom. 8:21). Wi no man wakti a ten te wi o man libi sondro sondu leki pkin fu wi P’pa Yehovah.
19. Fa a sani di Yehovah nanga Yesus du gi wi meki taki a situwâsi fu wi kon moro betre? (Luku a faki „ San a wani taki gi wi”.)
19 A tru taki fosi, a situwâsi fu wi ben de leki a di fu a yonguman di ben lasi ala sani èn di ben kisi wan bigi paiman di en srefi no ben o man pai noiti. Ma Yehovah yepi wi. A situwâsi fu wi kenki fu di Yehovah du wan sani so taki wi kan kisi pardon gi den sondu fu wi èn fu di Yesus pai a lusu-paiman. Wi kisi ferlusu fu sondu nanga dede fu di wi e bribi na ini Yesus Krestes. Te Yehovah e gi wi pardon fu den sondu fu wi, dan a de neleki noiti wi ben du den sondu dati. Ma san moro prenspari, na taki wi kan de mati fu wi lobi P’pa Yehovah di de na hemel.
20. San wi o luku na ini a tra artikel?
20 Te wi e denki dipi fu a sani di Yehovah nanga Yesus du gi wi, dan wi ati e furu nanga warderi (2 Kor. 5:15). Efu den no ben yepi wi, dan wi no ben o abi nowan howpu. Ma fa ibriwan fu wi kan kisi wini fu di Yehovah e gi wi pardon fu den sondu fu wi? Wi o luku dati na ini a tra artikel.
SINGI 10 Prèise Yehovah wi Gado!
