1. San ben de krin fu si sensi di Gado bigin meki sani?

SENSI di Yehovah bigin meki sani, a ben de krin taki wánfasi de na mindri en nanga a fosi Manpikin di a meki. Bijbel e agersi a Manpikin disi nanga koni. A e taki: „Mi ben e wroko nanga [Yehovah] sei na sei leki wan tumusi bun wrokoman. Ala dei mi ben e gi en bigi prisiri” (Odo 8:30). A Tata nanga a Manpikin wroko makandra di den meki libisma, meti, bon nanga tra sani. Den futuboi fu Yehovah srefi ben wroko makandra tu fu du sani. Wi kan si disi di Noa meki na ark èn di Gado pipel ben e waka na ini a sabana. Na ini a sabana den ben musu seti a tabernakel, den ben musu broko en puru èn den ben musu tyari en go na tra presi. Wi kan si disi srefi na a fasi fa Gado pipel ben e prei poku èn ben e singi makandra fu prèise Yehovah na ini a tempel fu en. Ala den sani disi den ben man du fu di den ben e wroko makandra.​—Gen. 6:14-16, 22; Num. 4:4-32; 1 Kron. 25:1-8.

2. (a) San ben de moi fu si na ini a fosi Kresten gemeente? (b) Sortu aksi wi o luku?

 ² Den fosi Kresten ben man wroko makandra tu fu di den ben abi Yesus Krestes leki den Edeman. Na apostel Paulus ben sori taki a no ala salfu Kresten ben man du den srefi sani. Aladi sonwan fu den ben e du sani di trawan no ben man du, toku den ben de wán skin. (Leisi 1 Korentesma 12:4-6, 12.) Ma fa a de na ini a ten disi? Fa wi kan tan wroko makandra te wi e preiki a bun nyunsu? Fa wi kan wroko makandra na ini a gemeente èn na ini na osofamiri?

3. Sortu fisyun na apostel Yohanes kisi?

³ Na a kaba fu a fosi yarihondro, na apostel Yohanes kisi wan fisyun. Na ini a fisyun a si fa seibi engel ben e bro tapu trompeti. Di a di fu feifi engel bro a trompeti fu en, Yohanes si „wan stari” e fadon komoto fu hemel kon na grontapu. A „stari” ben abi wan sroto di a gebroiki fu opo wan dipi peti di no abi gron. Deki smoko ben e kon na doro èn wan heri ipi sprenka ben komoto na ini a smoko. Den sprenka disi no ben e nyan den sani di e gro, ma den ben e du ogri nanga „den sma di no abi a marki fu Gado na tapu den fesi-ede” (Openb. 9:1-4). A no de fu taki dati Yohanes ben sabi fa sprenka kan pori sani. A ben sabi taki na ini a ten fu Moses sprenka ben nyan ala sani na ini Egepte (Eks. 10:12-15). Den sprenka di Yohanes si e prenki den salfu Kresten di e meki den krutuboskopu fu Yehovah bekènti. Now milyunmilyun sma di abi a howpu fu libi na grontapu, e wroko makandra nanga den salfu Kresten disi. Dati meki a no musu fruwondru wi taki a preikiwroko yepi furu sma fu gowe libi den falsi kerki so taki den no de moro na ini a makti fu Satan.

4. Sortu wroko Gado pipel abi fu du èn san na a wan-enkri fasi fa den kan du disi?

⁴ Yehovah en pipel kisi a bigi wroko fu preiki a „bun nyunsu” na heri grontapu fosi a kaba fu a grontapu disi doro (Mat. 24:14; 28:19, 20). Disi wani taki dati wi musu gi „ibri sma di wani”, a kari fu kon „dringi fu a watra di e gi libi èn di de fu kisi fu soso” (Openb. 22:17). Fa wi kan du disi na ini a gemeente fu wi? Wi o man du disi soso te wi e „wroko makandra na ini wánfasi”.​—Ef. 4:16.

5, 6. Fa a bun nyunsu di wi e preiki e meki taki wi de wán?

⁵ Efu wi wani preiki a bun nyunsu fu a Kownukondre gi someni sma leki wi man, dan a preikiwroko musu orga bun. Dati meki wi e kisi rai fa wi musu du a wroko disi. Den rai disi di wi e kisi na ini den gemeente e sreka wi fu wroko makandra na ini wánfasi. Baka te wi hori a preikiwroko konmakandra, dan wi e go preiki. Wi e taki nanga den sma fu a Kownukondre boskopu èn wi e prati milyunmilyun buku nanga tijdschrift gi den. Son leisi ala Kotoigi e kisi a kari fu preiki wan spesrutu boskopu gi sma na heri grontapu. Yu e teki prati na a spesrutu wroko disi? Te yu e du dati, dan yu e wroko makandra nanga milyunmilyun brada nanga sisa di e preiki a boskopu fu na ’engel di e frei na loktu’, soleki fa Openbaring 14:6 e sori.

⁶ Wi e feni en wan span sani fu leisi na ini a Jaarboek fa a preikiwroko na heri grontapu waka. Te wi e preiki leki wán man fu gi sma wan kari gi den spesrutu kongres, den internationaal kongres nanga den dri-dei kongres, dan wi e feni en wan span sani tu. Na den bigi konmakandra disi, wi e arki Bijbel-lezing di e gi wi deki-ati èn wi e poti prakseri na drama nanga demonstrâsi. Furu tron den pisi disi e gi wi deki-ati fu  dini wi lobi-ati Gado nanga wi heri ati. Te wi e hori a Memrefesa, dan dati e meki tu taki wi de wán. Fu di wi wani sori warderi gi a bun-ati fu Gado èn fu di wi wani du san Yesus ben taigi wi, meki wi e hori a fesa disi ibri yari tapu 14 Nisan, baka te son dongo (1 Kor. 11:23-26). A no soso dopu Kotoigi kan go na a fesa disi. Na ini den wiki fosi a Memrefesa wi e gi someni sma leki wi man wan kari fu kon hori a prenspari fesa disi makandra nanga wi.

7. San wi man du te wi e wroko makandra?

⁷ Wán sprenka nomo no man du furu. Na so a de tu taki wán Kotoigi nomo no man preiki gi ala sma. Ma fu di wi e wroko makandra na heri grontapu, meki wi man fruteri milyunmilyun sma fu Yehovah, wi Gado di wi musu prèise èn gi grani. Ma a no na ini a preikiwroko nomo Gado pipel man wroko makandra leki wán man.

8, 9. (a) Sortu eksempre Paulus gebroiki fu sori taki Kresten musu de wán? (b) Fa wi kan wroko makandra na ini a gemeente?

⁸ Na ini a brifi di Paulus skrifi gi den Efeisesma, a sori fa a gemeente ben orga, ma a sori tu taki ala sma na ini a gemeente musu „gro na ala fasi”. (Leisi Efeisesma 4:15, 16.) San o yepi ibriwan fu wi fu go na fesi? Na apostel Paulus ben teki a libisma skin leki eksempre fu sori taki a gemeente musu de wán èn taki Yesus Krestes na a ede fu a gemeente. A ben taki dati „ibri skrufu fu a skin e du san de fanowdu” so taki den pisi fu a skin man wroko makandra. Sobun, awinsi wi yongu noso wi owru, awinsi wi gosontu noso wi swaki, fa ibriwan fu wi kan sorgu taki wánfasi de na ini a gemeente èn taki wi tan abi wan tranga bribi?

⁹ Wan prenspari sani na taki wi musu saka wisrefi na ondro den owruman di Yesus poti fu teki fesi na ini a gemeente èn wi musu lespeki den (Hebr. 13:7, 17). A no ala ten a makriki fu du disi. Ma wi no abi fu frede fu aksi Gado fu a yepi wi. A santa yeye fu en kan yepi wi fu horibaka gi den seti fu a gemeente. Sobun, efu wi no e firi fu teki a rai fu den owruman, dan wi musu prakseri taki te wi e saka wisrefi na den ondro èn wi e wroko makandra nanga den, dan dati o meki taki wánfasi de na ini a gemeente. Boiti dati, a lobi fu wi alamala o kon moro tranga.

10. Fa dinari ini a diniwroko e sorgu taki wánfasi de na ini a gemeente? (Luku a prenki na a bigin fu na artikel.)

¹⁰ Dinari ini a diniwroko e du furu fu meki wánfasi de na ini a gemeente. Awinsi o owru den brada disi de, den no e prakseri densrefi nomo, ma den e wroko tranga na ini a gemeente so taki wi alamala kan kisi wini fu dati. Fu eksempre, den e yepi den owruman fu di den e sorgu taki wi abi nofo buku nanga tijdschrift gi a preikiwroko. Boiti dati, te wan sani broko na a Kownukondre zaal, den e meki en èn den e sorgu tu taki a zaal e krin. Den e gi den sma di e kon na den konmakandra fu wi wan switikon. Te wi e wroko makandra nanga den, dan wi srefi o meki tu taki sani e go bun na ini a gemeente.​—Luku Tori fu den apostel 6:3-6.

11. San yonguwan kan du fu meki taki wánfasi de na ini a gemeente fu den?

¹¹ Furu lepi brada ben abi frantwortu na ini a gemeente omeni yari langa. Ma fu di den kon owru, meki den no man du so furu moro. Dati meki den ben abi fu kenki wan tu sani. Yongu brada kan yepi den nanga son wroko. Aladi den musu kisi ondrofeni ete, toku den kan leri fu tyari moro  frantwortu. A moi fu si te dinari ini a diniwroko e meki muiti fu tron owruman (1 Tim. 3:1, 10). Son yongu owruman go na fesi so furu taki den tron kring-owruman. Na so den ben man dini brada nanga sisa na ini furu gemeente. Wi no breiti taki yonguwan wani yepi na a fasi disi?​—Leisi Psalm 110:3; Preikiman 12:1.

12, 13. San kan yepi ala sma na ini wan osofamiri fu wroko makandra?

¹² Now wi o taki fa wi kan wroko makandra na ini na osofamiri. Furu sma kon si taki wan bun Osofamiri Anbegi di e hori ibri wiki, e meki taki a lobi na mindri yonguwan nanga owruwan e kon moro tranga. Na den moi okasi disi na osofamiri e poti prakseri na Bijbel tori èn dati e yepi den fu abi wánfasi. Den e oefen gi a preikiwroko so taki den man preiki moro bun gi sma. Te den sma na ini na osofamiri e fruteri makandra san den leri fu Gado Wortu, dan den e tron moro bun mati fu makandra fu di den alamala lobi a srefi Gado èn den wani du a wani fu en.

¹³ Fa trowpaar kan wroko makandra so taki den man prèise Yehovah? Te ala tu patna e dini Yehovah, dan den o de koloku èn den o de wán. Denki Abraham nanga Sara, Isak nanga Rebeka, sosrefi Elkana nanga Hana. Ibriwan fu den ben sori a patna fu den taki den lobi en. Wi srefi musu meki muiti fu du dati tu (Gen. 26:8; 1 Sam. 1:5, 8; 1 Petr. 3:5, 6). Disi o meki taki wánfasi de na mindri wi nanga a trowpatna fu wi èn wi o tron wan moro bun mati fu wi hemel Papa.​—Leisi Preikiman 4:12.

14. Te yu masra noso wefi no e anbegi Yehovah, dan san yu kan du fu tan abi wan bun trowlibi?

¹⁴ Kresten no musu kon de wán nanga sma di no de na bribi (2 Kor. 6:14). Ma san wan brada noso wan sisa musu du te en patna no e anbegi Yehovah? Son sma di e dini Gado now ben trow kaba di den leri sabi a tru anbegi, ma a trowpatna fu den no de wan Kotoigi. Ma te den sma disi di de wan Kotoigi e fiti Bijbel rai na ini en libi, dan dati kan meki taki wánfasi de na ini na osofamiri. Sobun, den musu du ala san den man fu wroko makandra nanga a trowpatna fu den, sondro taki den broko den wet fu Yehovah. Kande a muilek fu du en, ma denki den wini di yu kan kisi fu dati. Te wan trowpatna gowe libi a tru anbegi, dan a no makriki tu fu fiti Bijbel rai na ini yu libi. Disi pasa nanga wan sisa di nen Mary. En nanga en masra David ben dini Yehovah makandra. Ma sowan 25 yari pasa a masra fu en no ben wani go moro na den konmakandra. Toku Mary tan go na den konmakandra nanga den kongres èn na oso a ben pruberi fu du san Bijbel e taki. Boiti dati, a ben tan gi leri na den siksi pikin fu den. Di den pikin kon bigi èn den gowe libi oso, a ben kon moro hebi gi Mary èn dati meki a ben sari. Ne David bigin leisi den tijdschrift di Mary ben e libi gi en. Baka wan pisi ten David bigin go baka na den konmakandra fu di wan granpikin fu en di ben abi siksi yari ben e hori presi gi en. Te David no ben kon, a boi ben e taigi en: „Owpa, mi misi yu na a konmakandra tide.” Now David breiti fu dini Yehovah baka èn Mary e prisiri taki den man du disi makandra.

15. Fa owru trowpaar kan yepi yongu trowpaar?

¹⁵ Na ini a ten disi, Satan e du ala san a man fu pori osofamiri. Dati meki a prenspari taki ala futuboi fu Gado e wroko makandra nanga den tra memre fu na osofamiri. Awinsi o langa yu trow kaba, prakseri san yu srefi kan taki noso du fu kon abi  wan moro bun trowlibi. Owru trowpaar kan yepi den yongu trowpaar na ini a gemeente fu du disi. Son leisi yu kan aksi wan yongu trowpaar fu kon na yu oso te yu nanga yu trowpatna o hori na Osofamiri Anbegi. Te den yongu trowpaar de nanga yu, dan den kan si taki a prenspari fu lobi makandra èn fu wroko makandra awinsi o langa wan sma trow.​—Tit. 2:3-7.

16, 17. Sortu blesi e wakti den futuboi fu Gado di e wroko makandra leki wán man?

¹⁶ Pruberi fu si fa den Israelsma de na wan fesa na ini a tempel fu Yehovah na Yerusalem fu prèise en. Fosi den teki waka fu go na a fesa disi, den ben abi fu sreka densrefi èn di den ben de na pasi den ben musu sorgu gi makandra. Now den doro na a tempel pe den alamala e anbegi Yehovah leki wán man. Na so den e sori taki den e wroko makandra (Luk. 2:41-44). Na ini a ten disi, wi srefi de na pasi fu go na ini a nyun grontapu. Wi musu abi wánfasi tu èn wi musu wroko makandra. Wi musu meki muiti fu man du disi. Yu denki taki yu musu poti moro prakseri na a tori disi?

¹⁷ Prakseri den blesi di wi o kisi. Wi teki a bosroiti kaba fu drai baka gi wan grontapu pe soso pratifasi nanga bruya de. Now wi e si fa den wortu fu Yesaya nanga Mika e kon tru. Den ben taki dati Gado pipel ben o go na „a bergi fu Yehovah” fu anbegi en leki wán man. (Yes. 2:2-4; leisi Mika 4:2-4.) Spesrutu „na ini den lasti dei” disi, yu man si krin taki wánfasi de na mindri a pipel fu Yehovah. Ma te wi o de na ini a nyun grontapu pe ala sma o wroko makandra leki wán man, dan wi o de koloku trutru èn wi o prisiri srefisrefi.