FOSI Yesus go na hemel, a taigi den bakaman fu en: „Unu sa de kotoigi fu mi . . . te na den moro farawe presi fu grontapu” (Tori 1:8). Fa den fosi Kresten ben o man du a bigi wroko disi?

Martin Goodman, wan professor fu Oxford Universiteit, e taki dati „den Kresten di ben e libi na ini a Gran Kownukondre Rome, ben feni en prenspari srefisrefi fu preiki gi sma. Na so den ben sori taki den ben e difrenti fu sma di ben abi a Dyu bribi noso fu tra kerkigrupu.” Yesus ben go fu a wan presi na a trawan fu preiki. Den tru Kresten di ben teki na eksempre fu en ben sabi taki fu panya „a bun nyunsu fu Gado Kownukondre”, den ben musu suku sma tu di ben wani sabi den tru tori fu Bijbel (Luk. 4:43). Dati meki a fosi Kresten gemeente ben abi „apostel”. A wortu „apostel” abi fu du nanga wan boskopuman, noso nanga wan sma di seni go na wan tra presi (Mark. 3:14). Yesus ben taigi den bakaman fu en: „Fu dati ede, go na sma fu ala kondre èn meki den tron disipel.”​—Mat. 28:18-20.

Nowan fu den 12 apostel fu Yesus de nanga wi na ini a ten disi, ma furu futuboi fu Yehovah sori taki den wani du a wroko fu wan zendeling. Te den kisi a kari fu du moro na ini a preikiwroko, den e taki: „Dya mi de! Seni mi” (Yes. 6:8). Sonwan fu den, soleki den dusundusun brada nanga sisa di go na a Gileadskoro, froisi go na farawe kondre. Trawan froisi go na wan tra presi na ini a kondre fu den. Furu brada nanga sisa leri wan tra tongo fu go dini na ini a gemeente noso grupu di e taki a tongo dati. Son leisi a situwâsi no makriki gi den brada nanga sisa di e go dini pe moro preikiman de fanowdu noso di e leri wan tra tongo, fu di sani no de leki fa den gwenti na ini a kontren pe den komoto. Toku  den e du disi fu di den no e prakseri densrefi nomo. Na so den e sori taki den lobi Yehovah nanga tra sma. Fu di den teri den kostu, meki den ben man yepi trawan (Luk. 14:28-30). Brada nanga sisa di e teki so wan bosroiti, e du wan heri bun sani.

Ma a situwâsi fu ibri Kresten e difrenti. A no alamala man go dini na wan kontren pe moro preikiman de fanowdu noso leri wan tra tongo. Toku ibri Kresten man du a wroko fu wan zendeling na ini en eigi gemeente. Yu man du dati?

A de krin taki den fosi Kresten ben e wroko fayafaya neleki wan zendeling. Ma soleki fa a sori, dan moro furu fu den no ben froisi go na wan tra kondre. Timoteyus ben kisi a rai disi: „Du a wroko fu wan preikiman fu a bun nyunsu, du yu wroko finifini” (2 Tim. 4:5). A rai disi ben fiti gi den Kresten fu a ten dati èn te now ete a fiti gi futuboi fu Gado. A wroko fu preiki a Kownukondre boskopu èn fu meki sma tron disipel, de gi ala Kresten, awinsi pe den e libi. Dati meki furu fu wi kan du a wroko fu wan zendeling na ini wi eigi gemeente.

Nofo tron wan zendeling musu fiti ensrefi na a nyun libi fu en. Furu sani na ini a kondre pe a go dini, no de a srefi leki a kondre pe a komoto. Ma fa a de nanga wi? San wi musu du efu wi no man froisi go dini na wan presi pe yepi de fanowdu? Wi musu denki taki wi sabi ala sani kaba fu a kontren fu wi? Wi e luku san wi kan du moro fu preiki gi sma? Fu eksempre, na ini 1940, brada nanga sisa ben kisi a deki-ati fu gebroiki wán dei na ini a wiki fu du stratiwroko. Yu denki taki yu man du disi tu? Sonwan fu wi e preiki nanga den pikin bukuwagi. Yu man preiki so tu? Fu san ede wi e poti den aksi disi? Wi wani yepi yu fu go prakseri san yu srefi kan du fu preiki a bun nyunsu na wan tra fasi di yu no ben gwenti.

Te wi e si sani na a yoisti fasi, dan dati o yepi wi fu de fayafaya na ini a preikiwroko. Furu brada nanga sisa di froisi go na wan presi pe moro yepi de fanowdu noso di go dini na ini wan gemeente pe den e taki wan tra tongo, na heri bun preikiman. Sobun, den kan yepi furu brada nanga sisa na ini a gemeente pe den de. Wan fasi fa den e du dati na te den e teki fesi na ini a preikiwroko. Nofo tron zendeling e teki fesi tu na ini a gemeente fu den teleki brada fu a kontren pe den e dini man du dati. Efu yu na wan dopu brada, yu e suku fu teki moro frantwortu  èn fu dini na ini a gemeente fu yu?​—1 Tim. 3:1.

Boiti taki wi kan wroko fayafaya na ini a preikiwroko èn teki moro frantwortu na ini a gemeente, tra fasi de tu fa wi kan yepi na ini wi gemeente. Ala sma, awinsi na yonguwan noso owruwan, mansma noso umasma, kan gi tra brada nanga sisa deki-ati.​—Kol. 4:11.

Ma fu man yepi wi brada nanga sisa, wi musu leri sabi den bun. Bijbel e sori taki te wi e kon makandra, wi musu „poti prakseri na makandra” (Hebr. 10:24). Sobun, aladi wi no e bumui nanga tra sma tori, toku wi musu meki muiti fu kon sabi wi brada nanga sisa èn wi musu luku san den abi fanowdu. Kande wi musu yepi den nanga wan tu sani, noso gi den deki-ati. A kan tu taki wi musu yepi den nanga sani di abi fu du nanga na anbegi. A no soso den owruman nanga den dinari ini a diniwroko abi a frantwortu fu yepi den. A tru taki na ini son situwâsi a moro bun taki den brada disi e gi yepi (Gal. 6:1). Ma wi alamala man du sani fu yepi owru brada nanga sisa, noso osofamiri di abi problema.

Luku na eksempre fu Salvatore. Di a kisi moni problema, a ben musu seri en bisnis, en oso èn furu sani di a ben abi. A ben e aksi ensrefi fa en nanga en osofamiri ben o du. Wan tra osofamiri na ini a gemeente si a nowtu fu en. Dati meki den yepi Salvatore nanga moni, èn den yepi en nanga en wefi fu feni wroko. Boiti dati, omeni neti den ben e go na a osofamiri disi fu arki san den ben abi fu taki èn fu gi den deki-ati. Na so den tu osofamiri disi tron bun mati fu makandra teleki now. Aladi na a bigin Salvatore ben abi someni problema, toku now den tu osofamiri disi kan prakseri a moi ten di den ben abi nanga makandra.

Tru Kresten e frustan taki na anbegi fu den no abi fu du nanga den wawan. Fu san ede wi kan taki dati? We, soleki fa Yesus ben taki, dan wi musu fruteri ala sma sortu moi sani Bijbel pramisi. Awinsi wi man froisi go na wan tra presi, noso awinsi wi no man du dati, toku wi kan meki muiti fu du bun gi ala sma. Wi kan du dati spesrutu na ini a gemeente pe wi e dini now (Gal. 6:10). Te wi e du dati, wi o de koloku fu di wi de klariklari fu yepi trawan èn wi o ’abi bun bakapisi nanga ala san wi e du’.​—Kol. 1:10; Tori 20:35.