1, 2. (a) San e gi Gado pipel prisiri na ini a ten disi? (b) Fa Kresten papa nanga mama, nanga owruman kan yepi wan yonguwan fu sabi san a wani taki fu teki dopu?

„MI SABI yu sensi di yu gebore. Mi breiti fu yere taki yu wani teki dopu. Ma fu san ede yu wani dopu?” Na dati wan owruman aksi Christopher di a ben abi 12 yari. Na wan prenspari sani na owruman aksi a yongu brada disi. Wi alamala e prisiri taki ibri yari dusundusun yonguwan na heri grontapu e teki dopu (Preik. 12:1). Ma Kresten papa nanga mama, nanga den owruman na ini a gemeente wani de seiker efu na a yonguwan srefi bosroiti fu teki dopu èn efu a sabi san disi wani taki.

 ² Bijbel e sori taki te wan Kresten gi ensrefi abra na Gado èn a teki dopu, dan dati na a bigin fu wan nyun libi pe a o kisi furu blesi fu Yehovah. Ma a o kisi tesi tu fu Satan (Odo 10:22; 1 Petr. 5:8). Dati meki papa nanga mama e teki ten fu leri den pikin fu den san a wani taki fu de wan Kresten. Te wan yonguwan no abi papa nanga mama di de Kotoigi, dan den owruman fu a gemeente o yepi en fu kon frustan san a wani taki fu de wan bakaman fu Krestes. (Leisi Lukas 14:27-30.) Neleki fa wan sma musu luku san a musu du fu man kaba bow wan oso, na so wan sma musu luku san a musu du fu kan tan dini Yehovah „te na a kaba” (Mat. 24:13). Ma fa wan yonguwan kan kon sabi efu a wani dini Yehovah en heri libi langa? Meki wi go luku.

3. (a) Fa den sani di Yesus nanga Petrus taki, e sori taki a prenspari fu teki dopu? (Mat. 28:19, 20; 1 Petr. 3:21) (b) Sortu aksi wi o go luku èn fu san ede?

³ Yu na wan yonguwan di e prakseri fu teki dopu? Efu dati de so, dan wi breiti nanga yu! Na wan bigi grani fu de wan dopu Kotoigi fu Yehovah. Boiti dati, Bijbel e sori taki ibri Kresten musu teki dopu èn taki a sani disi prenspari efu den wani kisi frulusu (Mat. 28:19, 20; 1 Petr. 3:21). Efu yu wani du trutru san yu pramisi Yehovah, dan yu musu sreka yusrefi gi a prenspari sani disi. Dati meki a bun fu luku dri aksi di o yepi yu fu kon sabi efu yu man teki dopu kaba. Den aksi disi na: (1) Mi lepi nofo fu teki a bosroiti disi? (2) Na misrefi wani du en? (3) Mi e frustan san a wani taki fu gi misrefi abra na Yehovah? Meki wi go luku san na a piki tapu den aksi disi.

4, 5. (a) Fu san ede dopu a no gi bigisma nomo? (b) O ten wi kan taki dati wan Kresten lepi nofo?

⁴ Bijbel no e sori taki na soso bigisma kan teki dopu noso taki na soso sma di lanti e si leki bigisma kan du dati. Odo 20:11 e taki dati srefi ’wan boi kan sori  suma a de trutru. Na so sma kan sabi efu a e du san reti èn efu a e du sani nanga wan krin ati.’ Wan sma di yongu ete kan frustan san a wani taki fu du bun èn fu gi ensrefi abra na en Mekiman. Sobun, te wan yonguwan sori kaba taki a lepi èn a gi ensrefi abra na Yehovah, dan a fiti taki a e teki dopu fu di dati prenspari srefisrefi.​—Odo 20:7.

⁵ O ten wan sma lepi nofo? A no te wan sma skin gersi di fu wan bigisma, dan a lepi. Bijbel e taki dati lepi sma e „gebroiki den frustan fu man si sani krin, so taki den kan sabi san bun èn san no bun” (Hebr. 5:14). Sobun, lepi sma sabi san Yehovah feni bun èn na ini den ati den teki a bosroiti fu tan gi yesi na en. Dati meki sma no man kori den makriki fu du san ogri. Sma no abi fu taigi den ibri leisi baka fu du san bun. Fu dati ede wi kan fruwakti taki wan yonguwan di dopu kaba o du san Gado feni bun srefi te en papa nanga mama noso tra bigisma no de nanga en.​—Luku Filipisma 2:12.

6, 7. (a) Fruteri sortu problema miti Danièl di a ben de na Babilon. (b) Fa Danièl sori taki a ben de wan lepi sma?

⁶ Yonguwan man sori taki den lepi nofo? We, luku na eksempre fu Danièl. A kan taki a ben yongu di den Babilonsma teki en puru fu en papa nanga mama, tyari go na ini katibo. Now Danièl ben musu libi na mindri sma di ben e denki heri tra fasi fu san bun noso san ogri. Ete wan tra problema miti en: Di a ben de na Babilon, sma ben e si en leki wan spesrutu sma. Fu taki en leti, Danièl ben de wan fu den yonguwan di ben musu wroko gi a kownu (Dan. 1:3-5, 13). Soleki fa a sori, dan a ben kan kisi wan moro hei posisi na ini Babilon di noiti a ben o abi na Israel.

⁷ San a yongu Danièl ben o du? A ben o meki a fasi fa sma na Babilon ben e libi kori en? Noso a ben o meki den moimoi sani di den ben abi tyari en ede gowe? A ben o meki a kondre pe a ben de now kenki en noso pori a bribi fu en? Kwetikweti! Bijbel e taki dati di Danièl ben de na Babilon, a „ben teki a bosroiti taki a no ben o doti ensrefi nanga” nowan sani di ben abi fu du nanga falsi bribi (Dan. 1:8). A sori taki a ben de wan lepi sma.

8. San yu kan leri fu na eksempre fu Danièl?

⁸ San yu kan leri fu na eksempre fu Danièl? We, wan lepi yonguwan na wan sma di ala ten abi wan tranga bribi. A no de leki wan agama di e kenki kloru ala leisi baka. A no e du leki en na wan mati fu Gado te a de na ini a Kownukondre zaal, ma dan te a de na skoro a de wan mati fu grontapu. A no e bruya esi te sani miti en. Ma ala ten te a e kisi tesi, a e du san Gado wani.​—Leisi Efeisesma 4:14, 15.

9, 10. (a) Fu san ede a bun te wan yonguwan e prakseri san a du di a kisi tesi na ini a ten di pasa? (b) San dopu wani taki?

⁹ Wi sabi taki ala sma e meki fowtu son leisi, awinsi den na yongusma noso bigisma (Preik. 7:20). Toku a bun fu hori na prakseri taki te yu wani teki dopu, yu musu luku efu yu de seiker taki yu o du ala ten san Yehovah wani. Fa yu kan kon sabi dati? Aksi yusrefi: ’Mi gi yesi na Yehovah ala ten na ini den mun di pasa?’ Prakseri san yu du di yu kisi tesi na ini a ten di pasa. Yu sori taki yu man si krin san bun èn san ogri? Kon meki wi taki dati neleki Danièl, sma e gi yu a firi taki yu abi spesrutu koni di yu  man gebroiki bun na ini a grontapu disi. San yu o du? Yu man „tan du muiti fu frustan san na a wani fu Yehovah”, srefi te yu wani du wan tra sani leki san a e aksi fu yu?​—Ef. 5:17.

¹⁰ Fu san ede wi e poti den prenspari aksi disi? Den o yepi yu fu frustan taki dopu na wan seryusu sani. Soleki fa wi ben taki kaba, dan dopu wani taki dati na Yehovah srefi yu pramisi wan sani. Yu pramisi en taki yu o lobi en èn taki ala ten yu o dini en nanga yu heri ati (Mark. 12:30). Ala sma di e teki dopu musu de seiker taki den o du san den pramisi.​—Leisi Preikiman 5:4, 5.

11, 12. (a) San wan sma di e prakseri fu teki dopu musu sabi seiker? (b) San o yepi yu fu tan si dopu leki fa Yehovah e si en?

¹¹ Bijbel e taki dati a pipel fu Yehovah, sosrefi yonguwan, „o de klariklari” fu du a diniwroko fu en (Ps. 110:3). Sobun, wan sma di wani teki dopu musu de seiker taki na ensrefi bosroiti fu du disi. Dati wani taki dati yu musu ondrosuku yusrefi bun. Fu san ede? Fu di a situwâsi fu yu kan de tra fasi leki di fu tra yonguwan, spesrutu te yu gro kon bigi na ini a tru anbegi.

¹² Kande na ini den yari di pasa, yu si omeni sma teki dopu. A kan taki sonwan fu den sma disi na yu mati noso kande den na yu brada noso sisa srefi. Efu dati de so, dan nanga sortu sani yu musu luku bun? Luku bun taki yu no e kisi a firi fu teki dopu soso fu di yu doro wan spesrutu yari noso fu di ala tra yonguwan e dopu. San yu kan du fu sorgu taki yu e tan si dopu leki fa Yehovah e si en? Teki ten fu sidon prakseri fu san ede a de so prenspari fu teki dopu. Na artikel disi nanga a trawan di e kon, e kari wan tu sani di e sori fu san ede a bun fu teki dopu.

13. Fa yu kan kon sabi efu nanga yu heri ati yu bosroiti fu teki dopu?

¹³ Wan tu sani de di kan yepi yu fu si efu nanga yu heri ati yu bosroiti fu teki dopu. Wan fu den sani dati na den begi fu yu. Den kan sori efu yu wani dini Yehovah nanga yu heri ati. Te yu abi a gwenti fu begi furu èn yu e fruteri Yehovah finifini san de na tapu yu ati, dan disi o sori efu yu e si Yehovah leki wan bun Mati fu yu (Ps. 25:4). Wan prenspari fasi fa Yehovah e piki den begi fu wi na taki a e sori wi san skrifi na ini en Wortu. Sobun, te wi e meki muiti fu studeri Bijbel, dan dati na ete wan fasi fu sori taki wi wani de wan mati fu Yehovah trutru èn taki wi wani dini en nanga wi heri ati (Yos. 1:8). Aksi yusrefi: ’Mi e fruteri Yehovah finifini san de na tapu mi ati? Mi abi a gwenti fu studeri Bijbel?’ Efu na osofamiri fu yu e hori na Osofamiri Anbegi, dan aksi yusrefi: ’Sma musu dwengi mi fu teki prati na a Osofamiri Anbegi?’ A piki tapu den aksi disi o yepi yu fu si efu na yusrefi bosroiti fu teki dopu.

14. Fruteri san na a difrenti te wan sma e gi ensrefi abra na Gado èn te a e teki dopu.

¹⁴ Son sma e denki taki te wan sma gi ensrefi abra na Gado, dan dati na a srefi leki te a e teki dopu. Fu eksempre, yu abi yonguwan di e taki dati den gi densrefi abra na Yehovah, ma den no klari ete fu teki dopu. Ma disi kan? Te yu gi yusrefi abra na Yehovah, dan dati wani taki dati yu e taigi en taki yu o dini en  fu ala ten. Te wan sma e dopu, a e sori taki a gi ensrefi abra na Gado. Dati meki dopu na wan fasi fu sori ala sma taki yu ben gi yusrefi abra Yehovah na ini begi kaba fu dini en. Fosi yu teki dopu, yu musu de seiker taki yu e frustan san a wani taki fu gi yusrefi abra na Gado.

15. San a wani taki fu gi yusrefi abra na Yehovah?

¹⁵ Sobun, te yu gi yusrefi abra na Yehovah, dan yu e taigi en taki yu no o libi gi yusrefi moro. Yu e pramisi en taki yu o si a wani fu en leki a moro prenspari sani na ini yu libi. (Leisi Mateyus 16:24.) Te yu pramisi libisma wan sani, dan dati na wan seryusu tori, lastan te yu pramisi Yehovah Gado wan sani! (Mat. 5:33) Ma fa yu kan sori taki yu no e teri yusrefi moro èn taki yu de fu Yehovah?​—Rom. 14:8.

16, 17. (a) Gi wan eksempre di e sori san a wani taki fu no libi moro gi yusrefi. (b) Te yu luku en bun, dan san wan sma di gi ensrefi abra na Yehovah e taki?

¹⁶ Luku wan eksempre. Kon meki wi taki dati wan mati gi yu wan wagi. A e gi yu den papira fu a wagi èn a e taki: „A wagi na fu yu.” Ma dan a e taki: „Mi o hori den sroto. Na mi o rèi a wagi. Yu no o rèi en.” Fa yu ben o firi? San yu ben o denki fu a sma di gi yu a wagi?

¹⁷ Fa a de nanga Yehovah? San a kan fruwakti fu wan sma di gi ensrefi abra na en? So wan sma e taki: „Mi e gi yu mi libi. Mi na fu yu.” Kon meki wi taki dati a sma disi e du ogri kibrikibri. Kande a e hori nanga wan sma di no de wan Kotoigi. Noso kande a e teki wan wroko di kan tapu en fu go na den konmakandra, noso di o meki taki a no man dini Yehovah moro nanga en heri ati. Yu no denki taki a ben o de leki a sma di hori den sroto fu a wagi? Te yu luku en bun, dan wan sma di gi ensrefi abra na Yehovah e taki: „Mi libi na fu yu. Mi no e libi gi misrefi moro. Ala ten mi o du san yu wani. Solanga mi si taki wan sani di mi wani du, o tapu mi fu du san yu wani, mi no o du en.” Na so Yesus ben denki di a ben de na grontapu. A taki: „Mi no saka komoto fu hemel fu du mi wani, ma fu du a wani fu en di seni mi kon.”​—Yoh. 6:38.

18, 19. (a) Fa den sani di Rose nanga Christopher taki, e sori taki wan sma di teki dopu o kisi furu blesi? (b) Fa yu e si a grani fu teki dopu?

¹⁸ A de krin taki dopu na wan seryusu sani. Nowan sma musu si en leki wan pikin sani. Na wan bigi grani fu gi yusrefi abra na Gado èn fu teki dopu. Yonguwan di lobi Yehovah èn di e frustan san a wani taki fu gi densrefi abra na en, no e draidrai fu teki dopu. Den no o feni tu taki a bosroiti di den teki no ben bun. Rose, wan yongu sisa di teki dopu, e taki: „Mi lobi Yehovah. Nowan tra sani e gi mi so furu prisiri leki fu dini en. Noiti mi tweifri taki a bosroiti di mi teki fu dopu, ben de a moro bunwan.”

¹⁹ Fa a de nanga Christopher di wi kari na a bigin fu na artikel disi? Na wan bun bosroiti a teki di a dopu leki wan boi fu 12 yari? Christopher e prisiri taki a teki so wan bosroiti. Di a ben abi 17 yari, a tron wan gewoon pionier. A tron wan dinari ini a diniwroko di a ben abi 18 yari èn now a e wroko na Betel. A taki: „Di mi teki dopu, mi teki wan bun bosroiti. A wroko di mi e du gi Yehovah èn gi na organisâsi fu en, e gi mi furu prisiri.” Efu yu e prakseri fu teki dopu, dan fa yu kan sreka yusrefi gi dati? Na ini a tra artikel wi o luku a piki tapu na aksi disi.