1. Fu san ede son sma e frudini en fu kisi grani èn san wi o luku now?

TE WI e gi grani na wan sma, dan dati wani taki dati wi e du spesrutu sani gi en fu di wi e lespeki en. A no de fu taki dati a sma musu frudini a grani dati, kande fu di a du wan sani, noso fu di a abi wan spesrutu frantwortu. Dati meki a bun fu aksi wisrefi suma wi o gi grani èn fu san ede a fiti fu du dati.

2, 3. (a) Fu san ede Yehovah e frudini en fu kisi grani? (Luku a prenki na a bigin fu na artikel.) (b) Suma na a Pikin Skapu na ini Openbaring 5:13 èn fu san ede a e frudini en fu kisi grani?

² Soleki fa Openbaring 5:13 e sori, dan „a sma di e sidon na tapu a kownusturu, nanga a Pikin Skapu” warti fu kisi grani trutru. Na ini kapitel 4 fu a srefi Bijbel buku wi e si fu san ede Yehovah e frudini en fu kisi grani. Den engel na hemel e opo den sten fu prèise Yehovah „a sma di e libi fu têgo, iya, fu ala ten”. Den e taki: „Na yu, Yehovah wi Gado, warti fu sma prèise yu gi a glori, a grani nanga a makti di yu abi, bika na yu meki ala sani. Na fu di yu ben wani, meki den  sani disi kon de èn na yu meki den.”—Openb. 4:9-11.

³ A Pikin Skapu na Yesus Krestes. En na „a Pikin Skapu fu Gado di e puru a sondu fu grontapu” (Yoh. 1:29). Bijbel e sori wi taki a hei moro ala sma di de kownu now noso di ben de kownu fosi. Bijbel e taki: „En na Kownu fu den wan di e tiri leki kownu èn Masra fu den wan di e tiri leki masra. En na a wan-enkri sma di no man dede èn a e tan na ini wan leti pe sma no man go. Nowan sma no si en èn nowan sma man si en” (1 Tim. 6:14-16). Iya, sortu tra kownu ben de klariklari fu dede leki lusu-paiman gi den sondu fu wi? Kande yu e firi neleki den milyunmilyun engel di e singi: „A Pikin Skapu di den srakti, warti fu kisi makti, gudu, koni, krakti, grani, glori, nanga blesi.”—Openb. 5:12.

4. Fu san ede wi musu gi grani na Yehovah nanga Krestes?

⁴ Wi musu gi grani na Yehovah nanga Krestes efu wi wani kisi têgo libi. Den wortu fu Yesus di wi e leisi na Yohanes 5:22, 23 e sori dati krin: „A Tata no e krutu nowan sma. Ma a meki a Manpikin du ala a wroko fu krutu sma, so taki ala sma kan gi a Manpikin grani neleki fa den e gi a Tata grani. A sma di no e gi a Manpikin grani, no e gi grani tu na a Tata di seni a Manpikin kon.”—Leisi Psalm 2:11, 12.

5. Fu san ede a fiti taki wi e gi grani na trawan?

⁵ Libisma meki „soleki fa Gado de” (Gen. 1:27). Disi wani taki dati furu sma man sori den fasi fu Gado. Libisma man sori lobi nanga switifasi gi makandra èn den man firi gi makandra. Fu di Gado meki libisma nanga wan konsensi, meki furu sma man frustan san bun èn sani ogri, san reti èn san no reti, san fiti èn san no fiti (Rom. 2:14, 15). Furu sma lobi sani di krin èn di moi. Nofo tron den wani libi na ini freide nanga trawan. Te yu luku en bun, dan furu sma e sori a glori fu Yehovah èn fu dati ede a fiti taki wi e gi den sma disi grani.—Ps. 8:5.

6, 7. Fa Yehovah Kotoigi de tra fasi leki furu sma?

⁶ Fa wi musu gi grani na trawan èn o furu grani wi musu gi den? Furu sondusma e meki a yeye fu a grontapu fu Satan tiri den. Dati meki sma e anbegi son man nanga uma, na presi taki den e sori lespeki gi den na wan fasi di fiti. Den e hei kerki fesiman, politiekman, sportman, pokuman nanga sma di e prei na ini felem. Nofo tron den e si den sma disi leki gado. Furu yonguwan nanga bigisma sosrefi e si den sma dati leki wan eksempre. Kande den e du neleki den, den e weri krosi leki den, noso kande den e tyari densrefi leki den.

⁷ Tru Kresten no e gi grani na sma na a fasi dati, fu di dati no bun. Fu di Krestes ben libi na grontapu leki wan sma di no ben abi sondu, meki en na a moro bun eksempre gi wi (1 Petr. 2:21). Gado no ben o feni en bun efu wi ben o gi sma moro grani leki en. Wi musu hori a prenspari sani disi na prakseri: „Ala sma sondu èn den no man sori a glori fu Gado kwetikweti” (Rom. 3:23). Nowan sma e frudini en taki wi e gi en grani na so wan fasi taki a gersi leki wi e anbegi en.

8, 9. (a) Fa Yehovah Kotoigi e si hei lantiman? (b) O ten wi no musu gi yesi na hei lantiman?

⁸ Wi musu lespeki son sma fu di den  abi wan hei posisi. Hei lantiman musu sorgu taki sma e hori densrefi na wet èn taki sani e waka na wan orga fasi. Den musu sorgu tu taki den borgu fu den e kisi san den abi fanowdu. A sani disi e tyari wini kon gi ala sma. Dati meki na apostel Paulus ben gi Kresten a rai fu saka densrefi na ondro den lantiman dati, fu di den na „tiriman” fu a kondre. Paulus ben taigi den Kresten: „Gi ala sma san den abi reti na tapu. Efu yu musu pai wan sma belasting-moni, dan pai a belasting-moni. . . . Efu wan sma wani taki yu musu gi en grani, dan gi en grani.”—Rom. 13:1, 7.

⁹ Dati meki Yehovah Kotoigi e gi den tiriman disi grani te den e fruwakti dati fu den, noso te dati na a gwenti na ini a kondre. Wi e gi yesi na den te den e du a wroko fu den. Ma a no de fu taki dati wi e luku bun taki wi no e pasa den wet fu Bijbel. Fu di wi na Kresten, meki wi wani tan gi yesi na Gado èn wi no wani bumui nanga politiek.—Leisi 1 Petrus 2:13-17.

10. San wi kan leri fu den futuboi fu Yehovah na ini Bijbel ten?

¹⁰ Wi kan teki leri fu den futuboi fu Yehovah na ini Bijbel ten te wi e luku a fasi fa den ben e saka densrefi na ondro tirimakti nanga hei lantiman. Di a Gran Kownukondre Rome ben wani taki sma go skrifi den nen na ini lantibuku, dan Yosef nanga Maria gi yesi. Den go na Betlehem aladi Maria ben de fu kisi en fosi pikin (Luk. 2:1-5). Bakaten, di sma krutu Paulus taki a ben du ogri, dan Paulus opo taki gi ensrefi na wan lespeki fasi. A sori lespeki gi Kownu Herodes Agrepa èn gi Festus di ben de a tiriman fu Yudea, wan distrikt fu Rome.—Tori 25:1-12; 26:1-3.

11, 12. (a) Fu san ede wi no e gi kerki fesiman spesrutu grani? (b) Sortu bun bakapisi wan Kotoigi fu Oostenrijk ben abi di a sori lespeki gi wan politiekman?

¹¹ Ma Yehovah Kotoigi no e gi spesrutu grani na kerki fesiman, awansi den e fruwakti dati fu wi. Falsi bribi e fruteri sma lei fu Gado èn den no e leri sma san Bijbel e taki trutru. Dati meki wi e lespeki kerki fesiman neleki fa wi e lespeki ala tra sma, ma wi no e gi den spesrutu grani. Wi sabi ete taki Yesus ben kari den man disi hoigriman nanga breniman di wani sori trawan a pasi (Mat. 23:23, 24). Ma na a tra sei, a no fowtu fu gi grani na tiriman, fu di dati kan abi bun bakapisi son leisi, srefi te wi no e fruwakti dati.

¹² Leopold Engleitner ben de wan fayafaya Kotoigi fu Oostenrijk. Den Nazisma ben grabu en èn den seni en nanga loko go na a strafuman-kampu Buchenwald. Heinrich Gleissner di ben de wan politiekman fu Oostenrijk, ben de ini a srefi loko dati. A ben de wan strafuman fu di den Nazisma ben kon si en leki wan feanti. Di den ben de na pasi fu go na a kampu, dan Brada Engleitner fruteri Gleissner na wan lespeki fasi fu a bribi fu en èn Gleissner arki en bun. Baka a Di Fu Tu Grontapufeti, Gleissner gebroiki a makti fu en ibri tron baka fu yepi den Kotoigi na ini Oostenrijk. Kande yu sabi tra eksempre fu den bun bakapisi di Kotoigi kan abi te den e sori lespeki gi lantiman, noso te den e gi den grani soleki fa Bijbel wani Kresten fu du.

13. Suma spesrutu musu kisi grani èn fu san ede?

¹³ Wi musu gi grani tu na den Kresten  brada nanga sisa fu wi èn wi musu sori lespeki gi den. Wi musu gi grani spesrutu na den owruman di e teki fesi. (Leisi 1 Timoteyus 5:17.) Wi e gi grani na den brada disi awansi fu sortu kondre den de, awansi sortu skoro den kisi, awansi sortu wroko den e du, noso awansi den gudu noso pôti. Bijbel e kari den brada disi „mansma di abi spesrutu koni”. Den brada disi abi a prenspari frantwortu fu sorgu gi a pipel fu Gado (Ef. 4:8). Prakseri den gemeente owruman, den kring-opziener, den memre fu den Bijkantoro Komte, nanga den memre fu a Tiri Skin. Den brada nanga sisa fu a fosi yarihondro ben abi furu lespeki gi den wan di ben e teki fesi èn na so a de tu nanga wi na ini a ten disi. Wi no e si den wan di e teki fesi na ini a Kresten gemeente leki gado. Te wi de makandra nanga den, dan wi no e du neleki wi e tanapu krosibei fu engel. Toku wi e sori lespeki gi den brada dati èn wi e gi den grani fu di den e wroko tranga èn fu di den abi sakafasi.—Leisi 2 Korentesma 1:24; Openbaring 19:10.

14, 15. Fa reti-ati Kresten skapuman de tra fasi leki den kerki fesiman?

¹⁴ Wi sabi den owruman dati leki skapuman di abi sakafasi. Fu di den abi sakafasi meki den no wani taki trawan e si den leki pôpi sma. Dati meki den de heri tra fasi leki den kerki fesiman fu a ten disi èn fu a fosi yarihondro. Yesus ben taki fu den kerki fesiman dati: „Den lobi sidon na den moro prenspari presi na den fesa èn den lobi sidon na fesisei na ini den snoga. Den lobi te sma na wowoyo e gi den odi.”—Mat. 23:6, 7.

¹⁵ Reti-ati Kresten skapuman de klariklari fu gi yesi na a sani disi di Yesus ben taki: „Un no musu meki sma kari unu Leriman, bika wán sma nomo na un Leriman èn un alamala na brada. Sosrefi, no kari nowan sma na grontapu un Tata, bika wán sma nomo na un Tata, dati na a wan di de na hemel. Un no musu meki sma kari unu fesiman tu, bika wán sma nomo na un Fesiman, dati na Krestes. Ma a moro bigiwan na un mindri musu de un dinari. Gado o saka a sma di e hei ensrefi èn a o hei a sma di e saka ensrefi” (Mat. 23:8-12). Dati meki yu kan frustan fu san ede den owruman na ini den gemeente na heri grontapu e frudini en taki den Kresten brada nanga sisa fu den e sori lobi nanga lespeki gi den.

16. Fu san ede yu musu tan du muiti fu kon frustan fa Bijbel wani taki wi musu gi grani na trawan?

 ¹⁶ A tru taki a e teki ten fu kon sabi fa wi musu gi sma grani èn na suma wi musu gi grani. Den fosi Kresten ben musu leri dati tu (Tori 10:22-26; 3 Yoh. 9, 10). Ma a bun te wi e meki muiti fu du san Bijbel e leri wi. Te wi e gi grani na sma na wan fasi di Gado feni bun, dan dati o tyari furu wini kon.

17. Sortu wini wi kan kisi te wi e gi grani na sma di abi spesrutu frantwortu?

¹⁷ Te wi e sori lespeki gi hei lantiman, dan a kan taki den o opo taki gi wi te sma wani gens a wroko fu wi. Nofo tron lantiman e lespeki a wroko di wi e du. Wan tu yari pasa, Birgit, wan pionier na ini Doisrikondre, en umapikin ben o kisi diploma na skoro èn Birgit go nanga en. Den leriman taigi Birgit taki den ben lobi fu gi leri na den Kotoigi pikin na ini den yari di pasa. Den taigi en taki a ben o de wan sari sani efu Kotoigi pikin no ben de na a skoro fu den. Birgit piki den: „Den pikin fu wi leri fu tyari densrefi soleki fa Gado wani. Dati meki den e sori lespeki gi leriman èn den e gi grani na den.” Wan skoromisi ben taki: „Efu ala den pikin ben de leki di fu yu, dan a ben o switi srefisrefi fu gi leri.” Wan tu wiki baka dati, wan fu den skoromisi ben de na wan kongres di hori na ini Leipzig.

18, 19. San wi musu hori na prakseri te wi e gi grani na owruman?

¹⁸ Den koni rai na ini Gado Wortu kan yepi wi fu kon sabi fa wi musu gi gemeente owruman grani na a yoisti fasi. (Leisi Hebrewsma 13:7, 17.) Wi musu prèise den gi a tranga wroko di den e du èn wi musu gi yesi na den rai di den e gi wi. Te wi e du dati, dan a kan yepi den fu tan du a wroko fu den nanga prisiri. Ma disi no wani taki dati wi musu pruberi fu taki soifri leki fa wan spesrutu owruman e du dati, noso taki wi musu weri krosi èn hori lezing neleki en. Efu wi ben o du dati, dan a ben o gersi leki wi e si libisma leki wi gado. Wi no musu frigiti taki na owruman dati abi sondu tu. Wi musu teki na eksempre fu Krestes.

¹⁹ Te wi e gi grani na den owruman na wan yoisti fasi, sondro taki wi e si den leki pôpi sma, dan wi e yepi den. Wi e yepi den fu no kisi heimemre, èn fu no denki taki den hei noso bun moro trawan.

20. Fa wi e kisi wini te wi e gi grani na trawan?

²⁰ Ma wi srefi e kisi wini tu te wi e gi grani na den wan di e frudini dati. A sani disi e yepi wi fu no denki wisrefi nomo èn te wan sma e gi wi grani, dan wi srefi no o kisi heimemre. Boiti dati, wi o tan na ini wánfasi nanga na organisâsi fu Yehovah di no e gi sma tumusi furu grani, awansi den sma dati de na bribi noso awansi den no de na bribi. Na so wi no o naki futu efu wan sma di wi ben gi grani e du wan sani di no bun.

21. San na a moro bigi wini di wi e kisi te wi e gi grani na den wan di e frudini en?

²¹ A moro prenspari fasi fa wi e kisi wini te wi e gi grani na trawan, na taki Gado o prisiri nanga wi. Wi e du san a wani èn na so wi e tai hori na en. Te wi e du dati, dan Yehovah kan gi wan piki na iniwan sma di e spotu en (Odo 27:11). Grontapu lai nanga sma di no sabi san na a yoisti fasi fu gi trawan grani. Dati meki wi breiti taki wi sabi fa fu gi sma grani na wan fasi di Yehovah feni bun.