1. Fa wi kan kon koni, èn fa disi o yepi wi?

NA YEHOVAH abi ala koni, èn a de klariklari fu gi wi koni tu. Yakobus 1:5 e taki: „Efu wan fu unu e mankeri koni, dan meki a tan aksi Gado fu dati, bika te Gado e gi sma sani, a e du dati nanga en heri ati èn sondro fu suku fowtu na den.” Wan fasi fa wi kan kon koni na te wi e teki a piri-ai fu Yehovah. A koni dati o yepi wi fu no du sani di no bun èn fu tan krosibei na Yehovah (Odo 2:10-12). Na so ’Gado o tan lobi wi èn wi o kisi têgo libi’.​—Yud. 21.

2. San o yepi wi fu teki a piri-ai di Yehovah e gi wi?

² Den sondu firi fu wi, a fasi fa wi kweki nanga tra sani kan meki en muilek gi wi fu teki piri-ai noso fu si en leki wan bun sani. Te wi e si sortu wini a piri-ai fu Yehovah e tyari kon gi wi, dan wi o de klariklari fu teki en fu di wi sabi taki a lobi wi. Odo 3:11, 12 e taki: „Mi manpikin, no weigri fu teki a leri fu Yehovah, . . . bika Yehovah e piri-ai gi a sma di a lobi.” Iya, noiti wi musu frigiti taki Yehovah wani taki sani go bun nanga wi. (Leisi Hebrewsma 12:5-11.) Fu di Yehovah sabi wi bun, meki ala ten a e gi wi piri-ai na wan bun fasi èn a e gi wi soifri san wi abi  fanowdu. Na ini na artikel disi wi o luku den fo sani disi: (1) Fa wi kan dwengi wisrefi? (2) Fa papa nanga mama kan gi den pikin leri? (3) Fa wi e kisi leri na ini a gemeente? èn (4) Sortu sani e hati moro piri-ai?

3. Fa wan pikin e leri fu dwengi ensrefi? Gi wan eksempre.

³ Wan sma di e dwengi ensrefi man tyari kenki kon te a e si taki a no e tyari ensrefi bun èn taki a denki fu en no bun. Wi no e gebore nanga a fasi disi. Wi abi fu leri fu dwengi wisrefi. Fu eksempre, te wan pikin e leri rèi baisigri, dan en papa noso mama e hori a baisigri, so taki a no fadon. Ma te den si taki a pikin man rèi a baisigri pikinso, dan wanwan leisi den e lusu en fu luku efu a man rèi en wawan. Te den e si taki a pikin man rèi bun, dan den no o hori en moro. Na so a de tu taki te papa nanga mama e kweki den pikin fu den „nanga a leri èn nanga den rai fu Yehovah”, dan den pikin o leri fu dwengi densrefi èn den o abi koni.​—Ef. 6:4.

4, 5. (a) Fu san ede wan sma musu leri fu dwengi ensrefi efu a wani tron wan lepi Kresten? (b) Fu san ede wi no musu lasi-ati te wi meki wan fowtu?

⁴ Na so a de tu nanga bigisma di kon leri sabi Yehovah. A kan taki den man dwengi densrefi kaba na ini son sani. Toku den a no lepi Kresten ete. Ma te den e kon kisi „nyun fasi” di wan Kresten musu abi, dan den o tron lepi Kresten (Ef. 4:23, 24). Wan fu den „nyun fasi” di den o kisi, na taki den o man dwengi densrefi. Disi o yepi den „fu kakafutu gi ogridu èn gi den lostu fu grontapu”. Den o ’leri tu fu libi nanga krin frustan, fu de reti-ati sma èn fu dini Gado fayafaya na ini a ten disi’.​—Tit. 2:12.

⁵ Wi alamala na sondusma (Preik. 7:20). Dati meki son leisi wi o meki fowtu, ma dati no wani taki dati wi no man dwengi wisrefi. Odo 24:16 e taki: „Awinsi wan reti-ati sma fadon seibi tron a o opo tanapu.” San kan yepi en fu „opo tanapu” baka? A no man du dati nanga en eigi krakti, ma nanga a santa yeye fu Gado. (Leisi Filipisma 4:13.) A dwengi di wi man dwengi wisrefi na wan fu den fasi di a santa yeye e meki wi kisi.

6. San o yepi wi fu kon lobi studeri Gado Wortu? (Luku a prenki na a bigin fu na artikel.)

⁶ Tra sani di o yepi wi fu dwengi wisrefi, na te wi e begi, te wi e studeri Bijbel èn te wi e denki dipi fu san wi leri. Ma san yu musu du te a muilek gi yu fu studeri Bijbel? Kande yu a no wan sma di lobi studeri. Hori na prakseri taki Yehovah kan yepi yu efu yu wani. A kan yepi yu fu kisi wan „angri” gi a Wortu fu en (1 Petr. 2:2). Aksi Yehovah fu yepi yu fu dwengi yusrefi, so taki yu kan studeri en Wortu. Kande na a bigin yu no musu studeri tumusi langa. Baka wan pisi ten a o moro makelek gi yu fu studeri èn yu o lobi en. A o gi yu prisiri te yu e meki ten fu sidon denki fu den moi sani di yu leri fu Yehovah.​—1 Tim. 4:15.

7. Te wi man dwengi wisrefi, dan fa dati o yepi wi fu du moro gi Yehovah?

⁷ Te wi man dwengi wisrefi, dan wi o man du moro gi Yehovah. Luku na eksempre fu wan papa di ben feni taki a no ben de so fayafaya moro na ini a preikiwroko. Dati meki a poti en leki marki fu tron gewoon pionier. A dwengi ensrefi fu du san ben de fanowdu fu doro a marki di a ben poti. A bigin leisi artikel na ini den tijdschrift fu wi di ben taki fu a pionierwroko èn a ben begi tu fu a tori. Den sani disi yepi en fu kon abi wan tranga bribi èn wan moro bun matifasi nanga Yehovah. Boiti dati, a ben  dini leki yepi-pionier te a ben man. A no ben meki noti tapu en èn te fu kaba a tron wan gewoon pionier.

8-10. San kan yepi papa nanga mama fu kweki den pikin, so taki den kan dini Yehovah? Gi wan eksempre.

⁸ Kresten papa nanga mama abi a moi grani fu kweki den pikin „nanga a leri èn nanga den rai fu Yehovah” (Ef. 6:4). A sani disi no makelek na ini na ogri grontapu disi (2 Tim. 3:1-5). Te wan pikin gebore a no sabi san bun èn san no bun. Wan pikin e gebore nanga wan konsensi, ma a musu kisi leri so taki a konsensi man wroko bun (Rom. 2:14, 15). Wan buku di e fruklari sani fu Bijbel, e taki dati a Griki wortu di vertaal nanga „leri” wani taki tu taki yu e kweki yu pikin so taki den tron bigisma di man tyari frantwortu.

⁹ Te papa nanga mama e gi den pikin fu den leri na wan lobi-ati fasi, dan den pikin o si taki den e broko den ede nanga den èn taki den no wani taki ogri miti den. Den pikin e leri taki den no kan du ala san den wani èn taki den bosroiti di den e teki kan abi bun bakapisi noso takru bakapisi. Dati meki a prenspari taki Kresten papa nanga mama suku yepi na Yehovah. Na ini ibri kulturu sma abi den eigi fasi fa den e kweki pikin. Wan tra sani, na taki a fasi fa sma e kweki pikin e kenki baka wan pisi ten. Ma te papa nanga mama e arki Gado, dan den no o abi fu aksi densrefi ala ten baka fa den musu kweki den pikin, den no o frutrow tapu den eigi ondrofeni èn den no o meki a grontapu disi leri den fa den musu kweki den pikin.

¹⁰ Meki wi luku san wi kan leri fu na eksempre fu Noa. Di Yehovah taigi Noa fu bow wan ark, Noa no ben sabi fa a ben musu du dati. A ben musu frutrow tapu Yehovah. Dati meki a du ala san Yehovah taigi en. Bijbel e taki dati „a du leti so” (Gen. 6:22). San ben de a bakapisi? Na ark di Noa bow kibri en nanga en osofamiri! Noa ben de wan bun papa tu. Fu san ede? Fu di a ben frutrow tapu a koni fu Yehovah. A sani disi yepi en fu gi den pikin fu en leri èn fu de wan bun eksempre gi den, aladi den sma di ben libi fosi a Frudu ben e du furu ogri.​—Gen. 6:5.

11. Fu san ede a prenspari taki papa nanga mama e du furu muiti fu yepi den pikin?

¹¹ Efu yu na wan papa noso wan mama, dan fa yu kan kweki yu pikin leki fa Yehovah wani? Arki Yehovah. Gebroiki a Wortu fu en nanga den rai di yu e kisi fu en organisâsi fu kweki yu pikin. Bakaten den pikin fu yu o de nanga tangi gi dati. Wan brada ben skrifi: „Mi de nanga tangi gi a fasi fa mi papa nanga mama kweki mi. Den du ala san den man fu doro mi ati. Na den  yepi mi fu go na fesi èn fu tron wan lepi Kresten.” Ma awinsi o furu muiti papa nanga mama e du, toku son pikin e gowe libi Yehovah. Den papa nanga mama disi di du ala muiti fu yepi den pikin kan abi wan bun konsensi. Den kan tan howpu taki wan dei a pikin fu den o drai kon baka na Yehovah.

12, 13. (a) Fa papa nanga mama kan gi yesi na Yehovah te wan pikin fu den puru fu a gemeente? (b) Fa wan osofamiri kisi wini fu di a papa nanga mama gi yesi na Yehovah?

¹² Wan fu den sani di e meki en muilek gi papa nanga mama fu gi yesi na Yehovah na te wan pikin fu den puru fu a gemeente. Meki wi luku na eksempre fu wan mama di ben abi wan meisje di puru fu a gemeente èn di gowe libi oso. A mama e taki: „Mi ben e leisi den buku fu wi soso fu si efu trutru nowan okasi de fu kan bumui nanga mi meisje nanga mi granpikin.” A taki moro fara: „Ma mi masra yepi mi fu kon si taki a pikin fu wi de na ini na anu fu Yehovah now, èn taki wi musu gi Yehovah pasi fu gi en piri-ai.”

¹³ Baka wan tu yari a meisje fu en tron wan Kotoigi baka. A mama e taki: „Now a e bel èn a e sms mi bijna ala dei! A abi furu lespeki gi mi nanga mi masra fu di wi tan gi yesi na Gado. Now wi nanga en e libi switi nanga makandra.” Efu yu abi wan pikin di puru fu a gemeente, dan yu e „frutrow na tapu Yehovah nanga yu heri ati” na presi taki yu e „frutrow na tapu yu eigi frustan”? (Odo 3:5, 6) Hori na prakseri taki a piri-ai di Yehovah e gi e sori o furu koni a abi èn o furu a lobi wi. Noiti wi musu frigiti taki Yehovah seni en Manpikin kon dede gi wi alamala, sosrefi gi a pikin fu yu. Gado no wani taki sma kisi pori. (Leisi 2 Petrus 3:9.) Sobun, abi a frutrow taki a piri-ai fu Yehovah bun èn gi yesi na en. Du dati awinsi a e hati yu taki yu no man bumui nanga yu pikin. Iya, wroko makandra nanga Yehovah, no feti nanga en.

14. Fa den leri di Yehovah e gi wi nanga yepi fu „a futuboi di de fu frutrow” e tyari wini kon gi wi?

¹⁴ Yehovah pramisi taki a o kibri a Kresten gemeente, a o sorgu en èn a o gi en leri. A e du dati na difrenti fasi. Fu eksempre, a poti Yesus fu luku a gemeente èn Yesus poti a „futuboi di de fu frutrow” fu gi a gemeente leri na a reti ten (Luk. 12:42). A „futuboi” disi e gi wi bun leri nanga piri-ai te dati de fanowdu. Sobun aksi yusrefi: ’Omeni leisi a pasa taki mi yere wan lezing noso mi leisi wan tijdschrift di yepi mi fu kenki a denki fu mi noso a fasi fa mi e tyari misrefi?’ Yu kan breiti efu yu ben tyari kenki kon. Na so yu e gi Yehovah okasi fu kenki yu kon tron wan moro bun sma.​—Odo 2:1-5.

15, 16. (a) Fa wi kan kisi wini fu a wroko di den owruman e du? (b) Fa wi kan sorgu taki den owruman e du den wroko nanga prisiri?

¹⁵ Krestes poti owruman tu fu sorgu gi a gemeente. Bijbel e kari den brada disi „mansma di abi spesrutu koni” (Ef. 4:8, 11-13). Fa wi kan kisi wini fu a wroko di den owruman e du? Wan fasi fa wi kan du dati, na fu luku a bribi fu den èn fu teki a bun eksempre fu den. Wan tra sani di wi kan du na fu teki a rai di den e gi wi fu Bijbel. (Leisi Hebrewsma 13:7, 17.) No frigiti taki den owruman lobi wi èn den wani yepi wi fu tron moro bun mati fu Gado. Fu eksempre, efu den e si taki wi e misi konmakandra noso taki wi no e preiki so fayafaya moro, dan den o wani yepi wi wantewante. Den o arki wi èn den o pruberi fu gi wi deki-ati nanga rai komoto fu Bijbel. Yu e si taki na fu di Yehovah lobi yu, meki a poti den owruman fu yepi yu?

¹⁶ Hori na prakseri taki a no ala ten a  makriki gi den owruman fu kon na yu fu gi yu rai. Fu eksempre, prakseri o muilek a ben de gi a profeiti Natan fu go taki nanga Kownu David baka di a pruberi fu kibri a seryusu sondu fu en (2 Sam. 12:1-14). Di na apostel Paulus si taki Petrus, wan fu den 12 apostel, ben e desko den brada nanga sisa di no ben de Dyu, dan a no ben makelek gi en fu piri-ai gi Petrus (Gal. 2:11-14). Sobun, fa yu kan meki en moro makelek gi den owruman na ini yu gemeente? Sori sakafasi, de nanga tangi èn meki en makelek gi den fu kon taki nanga yu. Hori na prakseri taki na fu di Gado lobi yu, meki a poti den owruman fu yepi yu. Te yu e du disi, dan a o tyari wini kon gi yu èn den owruman o du den wroko nanga prisiri.

17. Fa den owruman yepi wan sisa?

¹⁷ Wan sisa taki dati den sani di pasa nanga en fosi, ben meki en muilek gi en fu lobi Yehovah. Dati meki a ben lasi-ati srefisrefi. A taki: „Mi ben sabi taki mi ben musu go suku yepi na den owruman. Den no taki grofu nanga mi èn den no krutu mi, ma den gi mi deki-ati. Aladi den ben abi furu fu du, toku baka ibri gemeente konmakandra wán fu den ben e aksi mi fa a e go nanga mi. Den sani di pasa nanga mi ben meki en muilek gi mi fu bribi taki Gado lobi mi. Ma ibri tron baka Yehovah gebroiki a gemeente nanga den owruman fu sori mi taki a lobi mi. Mi e tan begi Yehovah fu yepi mi so taki mi no tapu fu dini en.”

18, 19. Sortu sani e hati moro piri-ai? Gi wan eksempre.

¹⁸ Aladi piri-ai kan hati wi, toku wan sani de di e hati moro piri-ai. Dati na den takru bakapisi di wi o kisi te wi no e teki piri-ai (Hebr. 12:11). Meki wi luku na eksempre fu Kain nanga Kownu Sedekia. Di Gado si taki Kain ben abi bita-ati gi en brada èn taki a ben wani kiri en, a taigi Kain: „Fu san ede yu ati e bron so? Fu san ede yu e swa yu fesi? Yu no denki taki mi o prisiri nanga yu baka, efu yu bigin du bun? Ma efu yu no du bun, dan sondu de leti na yu doro e luru yu. A e angri fu basi yu. Ma yu denki taki yu o man basi en?” (Gen. 4:6, 7) Kain no teki a piri-ai fu Yehovah èn a kiri en brada. En heri libi langa a ben abi fu libi nanga den takru bakapisi fu a sani di a du (Gen. 4:11, 12). Efu Kain ben arki Yehovah, a hati sani disi no ben o miti en.

¹⁹ Sedekia ben de wan ogri kownu di ben frede sma. Di a ben e tiri, sani no ben e go bun nanga den sma fu Yerusalem. Ibri leisi baka a profeiti Yeremia ben e taigi Sedekia taki a ben musu kenki. Ma fu di a kownu no teki a piri-ai fu Yehovah, meki sani no waka bun gi en srefisrefi (Yer. 52:8-11). Yehovah no wani taki den sortu hati sani disi miti wi!​—Leisi Yesaya 48:17, 18.

20. San o pasa nanga sma di e teki a piri-ai fu Gado èn nanga den wan di no e du dati?

²⁰ Furu sma na ini a grontapu disi no lobi te den e kisi piri-ai èn den no e dwengi densrefi. Ma heri esi a sani dati o tyari takru bakapisi kon gi den ogrisma disi (Odo 1:24-31). Dati meki wi musu ’arki rai èn wi musu teki piri-ai, so taki wi kan tron koni sma’. Iya, Odo 4:13 e taki: „Teki a piri-ai di yu kisi, grabu en hori steifi. No lusu en. Kibri en bun, bika na dati o gi yu libi.”