1. San Bijbel e taki fu piri-ai?

TE YU yere a wortu „piri-ai”, dan san yu e denki? Furu sma e denki taki piri-ai na strafu di wan sma e kisi. Ma piri-ai no abi fu du nomo nanga strafu. Bijbel e sori taki piri-ai bun gi wi èn taki a kan meki wi kisi ondrofeni, koni nanga libi (Odo 1:2-7; 4:11-13). Sobun, te Gado e gi wi piri-ai, dan a e du en fu di a lobi wi èn fu di a wani taki wi kisi têgo libi (Hebr. 12:6). Son leisi te a e gi wi piri-ai, dan a e strafu wi. Ma noiti a e du dati na wan ogri-ati fasi. Fu taki en leti, piri-ai wani taki dati yu e gi wan sma leri neleki fa wan papa noso mama e gi en pikin leri fu di a lobi en.

2, 3. Son tron piri-ai wani taki dati wi e kisi leri nanga strafu. Fruklari dati. (Luku a prenki na a bigin fu na artikel.)

² Luku na eksempre disi: Wan pikin boi di nen Johnny e prei nanga wan bal na ini oso. En mama e taki: „Johnny, yu sabi taki yu no mag prei nanga a bal na ini na oso! Yu o broko wan sani.” Ma Johnny no e arki en mama èn a e tan prei nanga a bal. Te fu kaba a naki wan vaas broko. San en mama o du nanga en? A o gi Johnny piri-ai. A o sori en fu san ede a sani di a du no bun. A wani taki a musu frustan fu san ede a musu gi yesi na en papa nanga mama èn fu san ede a bun taki den e poti regel na ini oso.  Kande a mama si taki a de fanowdu tu fu strafu Johnny. A kan taki a e puru a bal na Johnny anu wan tu dei. A sani disi kan leri Johnny taki a no e tyari bun bakapisi kon te a e trangayesi en papa nanga mama.

³ Leki Kresten wi de na ini na osofamiri fu Gado (1 Tim. 3:15). Dati meki Yehovah abi a reti fu poti wet gi wi èn fu piri-ai gi wi te wi e trangayesi den wet fu en. Boiti dati, efu wi meki wan fowtu di tyari takru bakapisi kon gi wi, dan dati e leri wi tu o prenspari a de fu gi yesi na wi hemel Tata (Gal. 6:7). Gado lobi wi èn dati meki a no wani taki ogri miti wi.​—1 Petr. 5:6, 7.

4. (a) Fa wi musu gi leri efu wi wani taki Yehovah blesi wi? (b) San wi o luku na ini na artikel disi?

⁴ Te wi e gi wi pikin noso wan Bijbelstudie leri fu Bijbel, dan wi e yepi den fu tron bakaman fu Krestes. Gado Wortu na a moro prenspari sani di wi e gebroiki fu gi sma leri èn a e yepi wi fu „gi piri-ai na wan reti fasi”. Sobun, wi kan yepi wi pikin noso Bijbelstudie fu frustan ’ala san Yesus taigi wi’ èn fu du den sani disi (2 Tim. 3:16; Mat. 28:19, 20). Yehovah o blesi wi te wi e yepi sma na a fasi disi. Na so den srefi o man yepi tra sma fu tron disipel fu Krestes. (Leisi Titus 2:11-14.) Meki wi poti prakseri now na dri prenspari aksi: (1) Fa a piri-ai di Gado e gi wi e sori taki a lobi wi? (2) San wi kan leri fu sma di Gado gi piri-ai na ini a ten di pasa? (3) Fa wi kan teki na eksempre fu Yehovah nanga en Manpikin te wi e gi trawan piri-ai?

5. Fa a piri-ai di Yehovah e gi wi e sori taki a lobi wi?

⁵ Fu di Yehovah lobi wi, meki a e yepi wi te wi meki wan fowtu, a e gi wi leri èn a e sori wi sortu kenki wi musu tyari kon. A wani taki wi tan krosibei fu en èn taki wi kisi têgo libi (1 Yoh. 4:16). Noiti a e gi wi syen èn noiti a e gi wi a firi taki wi no warti noti (Odo 12:18). Na presi fu dati, Yehovah e luku den bun fasi di wi abi èn a e hori na prakseri taki wi kan teki wi eigi bosroiti. Fa yu e si a piri-ai di yu e kisi fu Bijbel, fu den buku fu wi, fu yu papa nanga mama noso fu den owruman? Yu e si en leki rai di Yehovah e gi yu fu di a lobi yu? Son leisi wi kan „meki wan fowtu” sondro fu wi sabi. Te den owruman e pruberi fu gi wi rai na wan safri-ati fasi, dan disi e sori taki Yehovah lobi wi.​—Gal. 6:1.

6. Te wan sma lasi den grani fu en, dan fa dati e sori taki Gado lobi en?

⁶ Ma son leisi a no sari fu gi wan sma rai noso fu sori en san a no du bun. Efu wan sma du wan seryusu sondu, dan a kan lasi den grani di a abi na ini a gemeente. Awinsi dati pasa, toku a piri-ai dati e sori taki Gado lobi en. Fa so? Te wan sma lasi wan grani, dan dati kan yepi en fu frustan taki a prenspari fu meki moro ten fu studeri Bijbel, fu denki dipi fu san a studeri èn fu begi. Na so a kan kon abi wan moro bun matifasi nanga Yehovah (Ps. 19:7). Baka wan pisi ten a kan kisi grani baka. Srefi te wan sma puru fu a gemeente, dan dati e sori taki Yehovah lobi wi fu di dati e kibri a gemeente gi sma di no e tyari densrefi bun (1 Kor. 5:6, 7, 11). Ala ten Gado e gi wi a strafu di wi e frudini. Sobun, te wan sma puru fu a gemeente, dan dati kan yepi en fu frustan o seryusu a sondu fu en de èn a kan meki a sori berow.​—Tori 3:19.

7. Suma ben de Sebna èn sortu fasi a ben kon abi?

⁷ Fu frustan o prenspari a de fu kisi piri-ai, wi o luku a tori fu tu sma di Yehovah gi  piri-ai. A wan na Sebna, di ben e libi na ini a ten fu Kownu Heskia èn a trawan na Graham, wan brada na ini a ten fu wi. Sebna ben abi a frantwortu fu luku na oso fu Kownu Heskia èn a sani disi ben de wan bigi grani (Yes. 22:15). Ma a kon abi heimemre èn a ben wani taki tra sma si en leki wan prenspari sma. A meki wan diri grebi gi ensrefi èn a ben e rèi na ini „kefalek asiwagi”.​—Yes. 22:16-18.

8. Fa Yehovah piri-ai gi Sebna èn san ben de a bakapisi?

⁸ Fu di Sebna ben e suku biginen, meki Gado ’puru en na a prenspari wroko fu en’ èn a gi Eliakim den frantwortu fu en (Yes. 22:19-21). A sani disi pasa di Kownu Sanherib fu Asiria ben wani kon feti nanga Yerusalem. Wan pisi ten baka dati Sanherib seni wan tu heihei man go na Yerusalem makandra nanga wan bigi legre fu meki den Dyu kon frede èn fu tapu skreki gi Heskia, so taki a gi ensrefi abra na en (2 Kow. 18:17-25). Heskia seni Eliakim fu go taki nanga den heihei man disi, ma tu tra man ben de nanga en. Wan fu den ben de Sebna, di ben e dini now leki sekretarsi. A sori leki Sebna ben kon abi sakafasi. A no ben firi wan fasi taki a kisi wan moro lagi wroko èn a no ben firi leki a no warti noti. Meki wi go luku dri sani di wi kan leri fu Sebna.

9-11. (a) San na dri prenspari sani di wi kan leri fu a tori fu Sebna? (b) Fa yu feni a fasi fa Yehovah gi Sebna piri-ai?

⁹ A fosi sani, na taki Sebna lasi den grani fu en. Disi e sori taki „bigimemre e kon bifo wan sma fadon èn heimemre bifo wan sma naki futu” (Odo 16:18). Kande yu abi grani na ini a gemeente èn a kan taki tra sma e si yu leki wan prenspari sma. Efu dati de so, yu o tan abi sakafasi? Yu o hori na prakseri taki na Yehovah yu musu gi grani fu den koni di yu abi èn fu den sani di yu ben man du? (1 Kor. 4:7) Na apostel Paulus skrifi: „Mi e taigi un alamala drape fu no denki moro fu unsrefi leki san de fanowdu. Ma ibriwan fu unu musu tyari ensrefi na wan fasi di e sori taki a de nanga krin frustan.”​—Rom. 12:3.

¹⁰ Wi e leri wan tra sani fu a tori fu Sebna. Kande Yehovah piri-ai gi Sebna fu di a ben bribi taki a ben man kenki (Odo 3:11, 12). Sma di lasi wan grani na ini a gemeente kan leri wan moi sani fu a tori disi. Na presi taki den mandi noso taki den e firi wan fasi, den musu tan dini Gado  nanga den heri ati. Den musu frustan taki Yehovah piri-ai gi den fu di a lobi den. Hori na prakseri taki efu wi e saka wisrefi, dan Yehovah o blesi wi te fu kaba. (Leisi 1 Petrus 5:6, 7.) A piri-ai di Yehovah e gi wi kan yepi wi fu tron moro bun sma. Dati meki wi musu tan abi sakafasi èn wi musu de leki safu klèidoti na ini en anu.

¹¹ A di fu dri sani, na taki den sma di e gi trawan piri-ai kan leri wan moi sani fu a fasi fa Yehovah gi Sebna piri-ai. San papa, mama nanga owruman kan leri fu disi? Yehovah no lobi sondu kwetikweti, ma dati no wani taki dati a no lobi a sma di du a sondu. Yehovah e luku den bun sani fu wi. Sobun, efu yu na wan papa, wan mama, noso wan owruman, dan yu e gi piri-ai neleki fa Yehovah e du dati?​—Yud. 22, 23.

12-14. (a) San son sma e du te den e kisi piri-ai fu Yehovah? (b) Fa Gado Wortu yepi wan brada fu kenki a fasi fa a ben si sani èn san ben de a bakapisi?

¹² Ma a sari taki te son sma kisi piri-ai, a e hati den so te, taki den e gowe libi Yehovah nanga a gemeente (Hebr. 3:12, 13). Ma disi wani taki dati yepi no de gi den sma disi? Luku na eksempre fu Graham di ben puru fu a gemeente. Bakaten den teki en baka na ini a gemeente. Ma baka wan pisi ten a no ben e go na den konmakandra moro èn a no ben e preiki moro. Wan tu yari baka dati a aksi wan owruman di ben meki mati nanga en, fu studeri Bijbel nanga en.

¹³ Na owruman e taki: „A problema fu Graham na taki a ben abi heimemre. A ben e krutu den owruman di ben puru en fu a gemeente. Dati meki wan tu leisi di mi ben studeri nanga en, wi luku Bijbeltekst di e taki fu heimemre èn di e sori fu san ede a no bun. A ben de leki Graham ben e luku ensrefi na ini wan spikri èn a no ben lobi san a ben e si. Mi no ben man bribi san pasa baka dati! Graham kon si taki a heimemre fu en ben de leki wan ’postu na ini en ai’ di ben meki taki a no ben e si sani na a yoisti fasi. A kon frustan taki na dati ben meki taki a ben e krutu den owruman. A bigin tyari kenki kon esi-esi. A bigin go baka na ala den Kresten konmakandra, a bigin studeri Gado Wortu fayafaya èn a ben e begi ala dei. Leki edeman fu na osofamiri, a bigin yepi en frow nanga pikin baka fu kon abi wan tranga bribi. Disi ben gi den furu prisiri.”​—Luk. 6:41, 42; Yak. 1:23-25.

¹⁴ Na owruman taki moro fara: „Wan dei, Graham taigi mi wan sani di naki mi ati. A taki: ’Mi e dini Yehovah furu yari kaba èn mi dini leki pionier srefi. Ma now fosi mi kan taki dati mi lobi Yehovah.’ Baka wan pisi ten a kisi a grani fu waka nanga mikrofon na den gemeente konmakandra èn a ben lobi a wroko disi. Na eksempre fu en leri mi taki te wan sma e teki a piri-ai fu Yehovah nanga sakafasi, dan a o kisi furu blesi!”

15. San wi musu du efu wi wani taki tra sma teki a piri-ai di wi e gi den?

¹⁵ Efu wi wani de bun leriman, dan wi musu de bun studenti fosi (1 Tim. 4:15, 16). Na so a de tu taki den sma di Gado gi a frantwortu fu gi piri-ai, musu tan abi sakafasi èn den musu teki a tiri fu Yehovah. Te tra sma e si taki yu abi sakafasi, dan den o abi lespeki gi yu èn a o moro makriki gi den fu teki a rai di yu e gi den. Luku na eksempre fu Yesus.

16. San wi kan leri fu Yesus te wi e luku fa a ben e gi sma piri-ai èn fa a ben e gi leri?

 ¹⁶ Ala ten Yesus ben e gi yesi na en Papa, srefi di a ben muilek gi en (Mat. 26:39). A ben e memre den arkiman taki den sani di a ben leri den èn a koni di a abi ben kon fu en Papa (Yoh. 5:19, 30). Fu di Yesus ben abi sakafasi èn fu di a ben e gi yesi na en Papa, meki a ben de wan leriman di ben e broko en ede nanga trawan. Dati meki reti-ati sma ben lobi go na en. (Leisi Mateyus 11:29.) A ben e gi deki-ati na den wan di lasi-ati èn di ben firi swaki (Mat. 12:20). A ben e piri-ai gi den apostel fu en na wan switifasi. Yesus ben abi pasensi nanga den aladi den ben e haritaki nanga makandra doronomo sortuwan fu den moro bigi.​—Mark. 9:33-37; Luk. 22:24-27.

17. Sortu moi fasi o yepi owruman fu sorgu bun gi den skapu fu Yehovah?

¹⁷ Ibri leisi te owruman e gebroiki Bijbel fu gi piri-ai, den musu teki na eksempre fu Krestes. Te den e du dati, dan den e sori taki den e teki a tiri fu Gado nanga en Manpikin. Na apostel Petrus ben skrifi: „Luku den skapu fu Gado di a gi unu fu sorgu. No du dati neleki na dwengi sma dwengi unu, ma du en nanga prisiri. No du en tu fu di unu lobi fu kisi wini na wan fasi di no fiti, ma du en fu di unu e angri fu dini trawan. No prei basi tu gi den wan di de wan gudu fu Gado, ma tron eksempre gi den skapu” (1 Petr. 5:2-4). Te owruman de klariklari fu teki a tiri fu Gado nanga Krestes, dan dati o tyari wini kon gi den èn gi den brada nanga sisa fu a gemeente.​—Yes. 32:1, 2, 17, 18.

18. (a) San Yehovah e aksi fu papa nanga mama? (b) Fa Yehovah e yepi papa nanga mama fu tyari den frantwortu fu den?

¹⁸ Fa papa nanga mama musu gi den pikin fu den leri nanga piri-ai? Bijbel e gi edeman fu na osofamiri a rai disi: „No tanteri den pikin fu unu, ma tan kweki den nanga a leri èn nanga den rai fu Yehovah” (Ef. 6:4). O seryusu a rai disi de? Odo 19:18 e taki: „Piri-ai gi a manpikin fu yu te na okasi de ete. No winsi dede gi en.” Te papa nanga mama no e gi den pikin fu den leri, dan gi Yehovah a de neleki na winsi den e winsi dede gi den (1 Sam. 3:12-14). Sobun, papa nanga mama musu begi Yehovah fu yepi den, den musu frutrow na tapu en Wortu èn den musu meki a santa yeye tiri den. Te den e du dati, dan Yehovah o gi den koni nanga krakti.​—Leisi Yakobus 1:5.

19, 20. (a) Sortu blesi wi o kisi te wi e teki a piri-ai fu Gado? (b) San wi o luku na ini a tra artikel?

¹⁹ Wi o kisi bun furu blesi te wi e teki a piri-ai fu Gado èn te wi e pruberi fu gi trawan piri-ai neleki fa Yehovah nanga Yesus e du dati. Freide o de na ini wi osofamiri èn na ini a gemeente. Wi o abi lobi gi makandra, wi o warderi makandra èn sani o go bun nanga wi. Disi e sori wi o switi a libi o de na ini a ten di e kon (Ps. 72:7). Iya, a piri-ai fu Yehovah e sreka wi gi a libi na ini a nyun grontapu. Wi hemel Papa e leri wi fu libi na ini freide nanga wánfasi na ini na osofamiri fu en. (Leisi Yesaya 11:9.) Te wi e hori disi na prakseri, dan wi o si taki Gado e gi wi piri-ai fu di a lobi wi.

²⁰ Na ini a tra artikel wi o leri moro fu a piri-ai di wi kan kisi na ini na osofamiri èn na ini a gemeente. Wi o luku tu fa wi kan ondrosuku wisrefi èn tyari kenki kon. Boiti dati, wi o si sortu sani e hati moro piri-ai èn fa wi kan sorgu taki dati no miti wi.