1. Sortu problema ben e miti den Kresten na ini a ten fu na apostel Petrus?

NA A pisi ten fu a yari 62 te go miti a yari 64, na apostel Petrus skrifi wan brifi gi den brada nanga sisa ’di ben e libi na ala sei fu Pontus, Galasia, Kapadosia, Asia nanga Bitinia’ (1 Petr. 1:1). Den gemeente disi na ini Pikin Asia ben abi brada nanga sisa fu difrenti kulturu. Den ben abi deki-ati nanga rai fanowdu fu di sma ben e gens den èn fu di sma ben e taki ogri fu den. Den ben e kisi „hebi tesi” èn den ben libi na ini wan muilek ten. Petrus ben taki dati „a kaba fu ala sani kon krosibei”. A no ben o teki tin yari moro fosi Yerusalem kisi pori. San ben o yepi den Kresten disi fu pasa a muilek ten dati?​—1 Petr. 4:4, 7, 12.

2, 3. Fu san ede Petrus ben gi den Kresten a rai fu gi makandra wan switikon? (Luku a prenki na a bigin fu na artikel.)

² Wan fu den rai di Petrus ben gi den brada nanga sisa, na taki den ben musu „gi makandra wan switikon” (1 Petr. 4:9). A Griki wortu di vertaal nanga „switikon” wani taki „sori switifasi gi sma  di yu no sabi”. Den brada nanga sisa ben sabi makandra kaba, toku Petrus ben gi den a rai fu „gi makandra” wan switikon. Fa dati ben o yepi den?

³ A ben o yepi den fu tron moro bun mati fu makandra. Prakseri san yu srefi ondrofeni. Wan sma ben kari yu kon na en oso fu abi wan prisiri ten? Yu sabi ete fa a ben switi? Di yu ben kari wan tu sma fu yu gemeente kon na yu oso, yu no feni taki yu nanga den tron moro bun mati? Wan fasi fa wi kan kon sabi wi brada nanga sisa moro bun, na te wi e kari den kon na wi oso. Den Kresten di ben e libi na ini a ten fu Petrus ben musu sori moro lobi gi makandra fu di a situwâsi ben e kon moro ogri. Fu di wi e libi na ini „den lasti dei”, meki wi musu du a srefi sani tu.​—2 Tim. 3:1.

4. Sortu aksi wi o luku na ini na artikel disi?

⁴ Sortu okasi wi abi fu „gi makandra” wan switikon? Fa wi kan sorgu taki noti no e tapu wi fu kari sma kon na wi oso? Fa wi musu tyari wisrefi te wan sma kari wi kon na en oso?

5. Fa wi kan gi sma di kon na den konmakandra wan switikon?

⁵ Na den konmakandra: Yehovah nanga en organisâsi e gi wi a kari fu kon na den konmakandra. Wi wani taki ala sma di kon na den konmakandra e firi switi, spesrutu den nyunwan (Rom. 15:7). Wi musu si den leki sma di Yehovah gi wan kari tu. Dati meki wi musu meki den firi switi awinsi fa den tan noso awinsi sortu krosi den weri (Yak. 2:1-4). Efu wi si taki wan sma kon en wawan, dan wi kan kari en fu kon sidon na wi sei. A o breiti te wi e yepi en fu frustan san e pasa na a konmakandra èn te wi e yepi en fu suku den Bijbeltekst. Na so wi e sori switifasi gi sma di kon na den konmakandra.​—Rom. 12:13.

6. Suma musu de den fosi sma di wi e kari kon na wi oso?

⁶ Kari sma kon na yu oso fu dringi noso nyan wan sani: Na ini Bijbel ten sma ben abi a gwenti fu meki trawan kon nyan na den oso. Na so den ben e sori switifasi gi den (Gen. 18:1-8; Krut. 13:15; Luk. 24:28-30). Te sma ben kari wan trawan fu kon nyan wan sani, dan den ben e sori en taki den wani de mati fu en èn taki den wani taki freide musu de. Suma na den fosi sma di wi musu kari kon na wi oso? Dati na den brada nanga sisa fu wi gemeente, fu di wi e miti makandra furu. Te muilek ten doro, wi o abi makandra tranga fanowdu. Wi wani de bun mati nanga den alamala. Na ini 2011, a Tiri Skin kenki a yuru di a Betel famiri fu Amerkankondre ben e hori A Waktitoren-studie. Now den e hori en 6.15 bakadina, na presi fu 6.45 bakadina. Fu san ede? Den ben meki bekènti taki te a konmakandra kaba moro fruku, dan a ben o moro makelek gi a Betel famiri fu kari trawan kon na den kamra noso fu teki a kari di trawan gi den. Baka dati tra bijkantoro kenki a yuru fu den tu. A seti disi meki taki sma di e wroko na Betel tron moro bun mati fu makandra.

7, 8. Fa wi kan gi brada di e kon hori lezing na ini wi gemeente wan switikon?

⁷ Te brada e kon hori lezing na ini wi gemeente, dan dati na moi okasi fu gi den wan switikon. A kan de wan brada fu wan tra gemeente, wan kring-opziener èn son leisi wan brada fu a bijkantoro. (Leisi 3 Yohanes 5-8.) Wan fasi fa wi kan du dati, na fu kari den fu kon nyan noso dringi wan sani nanga wi. Yu kan du dati?

⁸ Wan sisa fu Amerkankondre e taki: „Na ini den yari di pasa, mi nanga mi masra kisi furu okasi fu kari den takiman nanga den wefi fu den kon na wi oso. Ibri leisi te wi ben e du dati, wi ben abi prisiri èn wi ben e gi makandra deki-ati. Noiti a hati wi taki wi du disi.”

9, 10. (a) Suma ben kan abi wan tanpresi fanowdu fu wan pisi ten? (b) Den brada nanga sisa di no abi wan bigi oso kan meki sma kon tan na den? Gi wan eksempre.

 ⁹ Sma di abi wan tanpresi fanowdu fu wan pisi ten: Na ini owruten, sma ben abi a gwenti tu fu meki son sma kon tan na den fu wan pisi ten (Yob 31:32; Fileim. 22). Son leisi a de fanowdu fu du dati na ini a ten disi tu. Nofo tron te a kring-opziener kon luku a gemeente, dan a abi wan presi fanowdu fu tan. Son leisi brada nanga sisa di e go na den skoro fu na organisâsi èn di e du bow-wroko abi wan presi fanowdu fu tan. Te wan rampu pasa, dan a kan taki son famiri abi wan tanpresi fanowdu teleki den brada seti den oso kon bun baka. Wi no musu denki taki na soso den sma di abi wan bigi oso man du dati. Kande den du en furu leisi kaba. Yu kan kari sma kon na yu oso awinsi yu no abi wan bigi oso?

¹⁰ Wan brada fu Zuid-Korea ben abi a gwenti fu meki studenti di ben go na den skoro fu na organisâsi tan na en oso. A skrifi: „Biginbigin mi ben e tweifri fu du dati fu di wi no ben trow langa èn wi ben abi wan pikin oso. Ma a ben gi wi furu prisiri te den studenti ben de na wi oso. Mi nanga mi wefi di no ben trow so langa ete, kon si taki trowpaar kan de koloku trutru te den e dini Yehovah makandra èn te den e suku fu du moro gi en.”

11. Fu san ede wi musu sori switifasi gi sma di froisi kon na ini wi gemeente?

¹¹ Sma di froisi kon na ini wi gemeente: Son tron wan brada, wan sisa noso wan heri osofamiri kan froisi kon na ini wi gemeente. Kande den kon fu di a gemeente abi yepi fanowdu. Sonwan fu den na pionier di kon dini na ini a gemeente. Disi na wan bigi kenki gi den alamala. Den musu kon gwenti wan nyun kontren, wan nyun gemeente, kande den musu leri wan nyun tongo noso wan nyun kulturu. Yu kan kari den fu kon nyan noso dringi wan sani na yu oso. Noso yu kan go koiri nanga den. Disi o yepi den fu meki nyun mati èn fu kon gwenti a nyun situwâsi fu den.

12. Sortu ondrofenitori e sori taki wi kan gi trawan wan switikon, awinsi wi no abi furu sani?

¹² Yu no abi fu sreka wan lo sani te yu e kari sma kon na yu oso. (Leisi Lukas 10:41, 42.) Wan brada e fruteri fa sani waka den fosi dei di en nanga en wefi bigin dini leki zendeling. A taki: „Wi ben yongu, wi no ben abi furu ondrofeni èn wi ben e misi wi kondre. Wan neti mi frow ben e misi den famiri fu en so te, taki noti san mi ben e du ben e trowstu en. Ne wan sma naki na tapu wi doro, wan ten fu 7.30 neti. A ben de wan Bijbelstudie èn a ben tyari dri apresina kon gi wi. A ben kon gi unu wan switikon. Wi kari en kon na inisei èn wi gi en wan grasi watra. Baka dati wi meki te nanga cacao. Wi no ben sabi taki Swahilitongo ete èn a studie no ben sabi taki Ingrisitongo tu. Ma a sani disi yepi wi fu bigin meki mati nanga den brada nanga sisa.”

13. Sortu wini wi e kisi te wi e kari sma kon na wi oso?

¹³ Yu ben feni en muilek fu kari sma kon na yu oso? Efu dati de so, dan a kan taki yu misi moi okasi fu abi prisiri èn fu meki bun mati di yu o abi fu ala ten. Te wi abi a gwenti fu sori switifasi gi trawan, dan dati o yepi wi fu no firi leki wi de wi wawan. Ma kande yu e aksi yusrefi: ’Fu san ede son sma e frede fu kari trawan kon na den oso?’ Wan tu sani de di e tapu den fu du dati.

14. San wi kan du efu wi no abi ten èn efu wi weri tumusi fu kari sma kon na wi oso?

¹⁴ A e teki ten nanga muiti: A pipel fu Yehovah abi furu fu du èn den abi difrenti frantwortu. Sonwan kan denki taki den no abi a ten èn den weri tumusi fu kari sma kon na den oso. Efu yu e firi so, dan a bun fu luku yu schema.  Kande yu kan kenki wan tu sani so taki yu kan kari sma kon na yu oso noso so taki yu kan teki a kari di trawan e gi yu. Bijbel e gi Kresten a deki-ati fu gi sma wan switikon (Hebr. 13:2). Sobun, a no fowtu fu meki ten fu du a sani disi. Na wan bun sani fu du. Ma dati wani taki dati yu o abi fu libi wan tu sani di no de so prenspari.

15. Fu san ede son sma e frede fu kari trawan kon na den oso?

¹⁵ A fasi fa yu e denki fu yusrefi: Oiti yu ben wani kari sma kon na yu oso, ma yu ben feni taki yu no ben o man du en? Son sma e syensyen èn den e frede taki den sma o fuga fu di den no abi sani fu fruteri den. Trawan no abi furu moni èn dati meki den e denki taki den no o man gi sma den srefi sani di tra brada nanga sisa e gi den. Son sma feni taki den oso pikin èn taki den no abi furu sani. Ma hori na prakseri taki yu no abi fu abi wan kefalek moi oso. San prenspari na taki a musu netjes, a musu krin èn yu musu sori switifasi gi den sma di yu kari.

16, 17. San o yepi yu fu no frede fu kari sma kon na yu oso?

¹⁶ Efu yu e frede fu kari sma kon na yu oso, dan a bun fu sabi taki a no yu wawan e firi so. Wan owruman na ini Ingrisikondre e taki: „Mi e senwe furu te mi musu kari sma kon na mi oso. Ma te wi e du sani di abi fu du nanga na anbegi, dan ala ten den wini di wi e kisi furu moro iniwan broko-ede di wi ben abi. A ben e gi mi furu prisiri te mi nanga den sma di mi kari kon na mi oso ben e dringi pikinso kofi èn ben e gi tori.” Hori na prakseri taki te yu e du muiti fu leri sabi den sma di yu kari kon na yu oso, dan yu no o frede so moro (Fil. 2:4). Furu sma e breiti te den kan fruteri den ondrofenitori. Èn wan fu den moro bun fasi fa wi kan yere den ondrofenitori fu trawan, na te wi kari den kon na wi oso. Wan tra owruman skrifi: „Te mi e kari mati fu mi gemeente kon na mi oso, dan dati e yepi mi fu frustan den moro bun èn mi e kisi a ten fu leri sabi den. Mi lobi en te mi e kon sabi fa den kon na ini a tru anbegi.” Wi kan de seiker taki den okasi disi kan gi wi furu prisiri te wi e meki muiti fu leri sabi makandra.

¹⁷ Wan pionier sisa di ben meki studenti fu den skoro fu na organisâsi kon tan na en, e taki: „Na a bigin mi ben e broko mi ede fu di mi no abi wan bigi oso èn den kasi nanga den sturu fu mi a no nyun sani. Ma a wefi fu wan fu den leriman taigi mi wan sani di meki mi firi bun. A taki dati te en nanga en masra e du a kringwroko, dan a ben e gi den moro prisiri te den ben e tan nanga sma di no ben abi furu, ma di ben abi wan tranga bribi. Den sma disi e dini Yehovah fayafaya èn den de tevrede nanga san den abi. A sani disi meki mi prakseri san mi mama ben gwenti taigi wi di wi ben pikin: ’A moro betre fu nyan wan preti nanga gruntu na wan presi pe lobi de’” (Odo 15:17). Solanga yu e sori lobi gi sma di yu kari kon na yu oso, dan yu no abi fu broko yu ede.

18, 19. Te wi e kari trawan kon na wi oso, dan fa dati kan meki taki wi no e denki takru fu den?

¹⁸ A fasi fa yu e denki fu tra sma: Yu no man feni en nanga wan sma na ini yu gemeente? Efu yu no e du wan sani fu kenki a fasi fa yu e si a sma, dan a situwâsi o tan so. Efu yu no lobi fa wan sma de, yu no o wani kari en kon na yu oso. Noso kande wan sma ben du wan hati sani nanga yu èn yu no man frigiti a sani dati.

¹⁹ Bijbel e gi wi a rai fu sori switifasi gi trawan, srefi gi den feanti fu wi. Dati o yepi wi fu feni en moro bun nanga den. (Leisi Odo 25:21, 22.) Te yu e kari wan sma kon na yu oso aladi yu no man feni en bun nanga en, dan dati o yepi yu fu no denki takru fu en. Kande yu o bigin si den bun fasi fu a sma di meki taki Yehovah hari en kon na ini a tru anbegi (Yoh. 6:44). Kande a sma no ben fruwakti taki yu ben o kari en kon na yu oso, ma te yu e du dati fu di yu wani sori lobi, dan yu nanga en kan tron mati. Fa yu kan  sorgu taki yu e kari sma kon na yu oso fu di yu abi lobi? A sani di o yepi yu na te yu e du san Filipisma 2:3 e taki: ’Abi sakafasi èn si trawan moro hei leki yusrefi.’ Pruberi fu si yu brada nanga sisa moro hei leki yusrefi. Kande na a bribi fu den, a fasi fa den e horidoro, a deki-ati fu den noso tra moi fasi di den abi e meki taki yu e si den so. Disi o meki taki yu o kon lobi den moro èn yu o feni en moro makriki fu kari den kon na yu oso.

20. Te wi meki mofo nanga wan sma taki wi o go na en oso, dan fu san ede wi no musu meki pikinpikin sani tapu wi fu go?

²⁰ A psalm skrifiman David ben aksi: „Yehovah, suma kan kon tan nanga yu na ini yu tenti?” (Ps. 15:1) Baka dati a kari wan tu moi fasi di Gado wani taki den sma di e kon na ini en tenti musu abi. Wan fu den sani na taki a sma musu du san a taki. Psalm 15:4 e taki: „Ala ten a e du san a pramisi, awinsi dati e tyari takru bakapisi kon gi en.” Efu wan sma kari wi kon na en oso, èn wi taigi en taki wi o kon, dan wi no musu meki pikinpikin sani tapu wi fu no go. Kande a sma du furu muiti fu sreka sani gi wi. Efu wi no go moro, dan na fu soso a du ala den sani dati (Mat. 5:37). Son leisi wan sma no e go moro te wan trawan kari en fu di a kisi wan tra kari di a feni moro bun. Ma efu wi ben o du a sani disi, dan wi no ben o sori lobi nanga lespeki gi a sma. Te wan sma gi wi wan kari, wi musu de nanga tangi, awinsi san a e gi wi (Luk. 10:7). Èn efu wan bun reide de di meki taki wi no man go na a sma, dan wi musu taigi en biten. Na so wi e sori lobi nanga switifasi gi a sma.

21. Fu san ede wi musu lespeki den gwenti fu sma?

²¹ A prenspari tu fu sori lespeki gi den gwenti fu sma. Na ini son kulturu yu kan go na wan sma awinsi a no ben kari yu. Ma na ini tra kulturu yu musu meki mofo nanga a sma fosi yu go na en. Na son presi, a sma di kari wan trawan kon na en oso e gi en den moro bun sani di a abi èn a famiri e kisi san tan abra. Ma na ini tra kulturu ala sma e kisi a srefi. Na son presi, a sma di kisi wan kari e tyari wan sani gi a sma. Ma na tra presi, a sma di kari wan trawan no e fruwakti taki a sma musu tyari wan sani. Na ini son kulturu, a sma di e gi yu wan kari e fruwakti taki yu o weigri a fosi leisi noso a di fu tu leisi. Ma na ini tra kulturu sma kan mandi efu yu no wani teki a kari di den gi yu. Meki wi du ala san wi man so taki a sma di kari wi kan breiti.

22. Fu san ede a prenspari fu „gi makandra wan switikon” na ini a ten disi?

²² Petrus ben taki dati „a kaba fu ala sani kon krosibei” (1 Petr. 4:7). Nownow a kaba de moro krosibei srefi. Heri esi wan bigi banawtu o de na grontapu di noiti ete ben de. Fu di sani o kon moro takru, meki wi musu abi tranga lobi gi wi brada nanga sisa. Na ini a ten disi, a rai di Petrus ben gi den Kresten prenspari srefisrefi: „Gi makandra wan switikon” (1 Petr. 4:9). Iya, fu ala ten wi o prisiri te wi e gi trawan wan switikon.