MI KWEKI na ini a foto Graz, na Oostenrijk. Di mi ben abi seibi yari, den seni mi go na wan kerki skoro. Ma mi skreki di mi kon sabi taki den priester nanga den non drape ben e abi seks nanga makandra. Dati meki mi mama meki mi libi a skoro baka wán yari.

Bakaten den seni mi go na wan skoro pe mi ben e tan. Wan neti, mi papa kon teki mi bika opolani ben e trowe bom na tapu Graz. Wi lowe go na a foto Schladming. Syatu baka di wi abra wan broki go na ini a foto, den sutu a broki panya. Wan tra leisi opolani di ben e frei bun lagi ben sutu na tapu mi nanga mi granmama di wi ben de na ini a dyari. Di a feti kaba, wi no ben abi nowan frutrow na ini kerki èn na ini lanti.

Na ini 1950 wan Yehovah Kotoigi bigin taki fu Bijbel nanga mi mama. Mi ben e arki te den ben e taki èn mi ben go nanga mi mama na den konmakandra. Di mi mama kon si taki Yehovah Kotoigi abi a tru bribi, a dopu na ini 1952.

Na a ten dati mi ben feni taki soso owru frow ben de na ini a gemeente. Ma bakaten wi go na wan gemeente di ben abi furu yonguwan. Di wi drai go baka na Graz mi bigin go na ala den konmakandra. Heri esi mi srefi ben de seiker taki den sani di mi ben leri tru. Mi kon sabi Yehovah tu leki wan Gado di e horibaka gi den futuboi fu en ala ten. A e du dati srefi te wi de na ini muilek situwâsi pe wi e firi leki nowan sma man yepi wi.​—Ps. 3:5, 6.

Mi ben wani fruteri tra sma san mi leri na ini Bijbel. Mi bigin preiki gi mi brada nanga den sisa fu mi. Den fo bigi sisa fu mi no ben libi na oso moro èn den ben de skoro jufrow. Ma mi ben e go luku den na ini den difrenti dorpu pe den ben e tan èn mi ben e gi den  deki-ati fu studeri Bijbel. Te fu kaba mi brada nanga ala den sisa fu mi tron Yehovah Kotoigi.

A di fu tu wiki di mi bigin preiki oso fu oso, mi miti wan uma di ben abi sowan 30 yari èn mi bigin studeri Bijbel nanga en. A go na fesi teleki a dopu, èn bakaten en masra nanga den tu boi fu en dopu tu. Fu di mi ben e studeri nanga en, mi bribi kon moro tranga. Fa so? Noiti wan sma studeri Bijbel nanga mi. Dati meki mi ben abi fu sreka misrefi bun gi ibri studie. Yu kan taki dati mi ben musu studeri nanga misrefi, fosi mi ben kan studeri Bijbel nanga na uma dati. Disi yepi mi fu frustan Bijbel moro bun. Na ini april 1954 mi gi misrefi abra na Yehovah èn mi teki dopu.

Na ini 1955 mi go na internationaal kongres na ini Doisrikondre, Fransikondre nanga Ingrisikondre. Di mi ben de na ini Londen, mi miti Albert Schroeder. A ben de wan fu den leriman fu Gileadskoro èn bakaten a tron wan memre fu a Tiri Skin. Di wi ben go luku a British Museum, Brada Schroeder sori wi wan tu owru Bijbel. Den ben abi a nen fu Gado na ini Hebrew letter èn a fruteri o prenspari den buku dati de. A sani disi meki taki mi kon lobi Yehovah nanga a tru bribi moro. Mi ben kon abi moro faya fu fruteri tra sma den tru tori fu Gado Wortu.

Na tapu 1 yanuari 1956 mi tron gewoon pionier. Fo mun baka dati den aksi mi fu dini leki spesrutu pionier na ini Oostenrijk. Na a ten dati, Kotoigi no ben de na ini a foto Mistelbach, a foto pe mi ben musu dini. Ma wan tra sani ben de tu di ben e meki en muilek gi mi. Mi nanga a sisa di ben e pionier makandra nanga mi ben difrenti furu fu makandra. Mi ben abi bijna 19 yari èn mi kweki na ini foto. En ben abi 25 yari èn a kweki na boiti. En ben lobi wiki fruku mamanten, ma mi no ben gwenti opo fruku. Te neti, en ben lobi go sribi fruku, ma mi ben lobi go sribi lati. Ma fu di wi ben e du san Bijbel e leri wi, meki wi ben man feni en nanga makandra èn wi ben wroko bun nanga makandra leki pionier.

Fu taki en leti, wi kisi tra hebi tesi. Sma frufolgu wi srefi, ma ’Gado no gowe libi wi’ (2 Kor. 4:7-9). Wan leisi di wi ben e preiki na ini wan dorpu, den sma lusu den dagu gi wi. Fosi yu denki wan lo bigi dagu lontu mi nanga mi patna. Den ben e meki wan lo babari èn den ben wani beti wi. Wi hori makandra anu èn wi begi Yehovah: „Yehovah, grantangi, efu den beti wi, meki wi dede esi-esi!” Di den dagu doro krosibei fu wi, den stop, den bigin seki den teri, dan den waka gowe. Wi firi taki Yehovah kibri wi. Baka dati wi preiki na ini a heri dorpu èn den sma ben e arki wi srefi. Kande den ben fruwondru taki den dagu no beti wi, noso kande den ben lobi en taki wi preiki go doro aladi so wan sani miti wi. Wan tu fu den sma tron Kotoigi srefi.

Wan tra sani miti wi di ben meki wi frede srefisrefi. Wan dei a man di ben yuru a kamra gi wi kon na oso drungudrungu. A man bari gi wi taki a o kiri wi fu di a ben feni taki wi e muilek den sma na ini a birti. En wefi  pruberi fu taki nanga en, ma a no ben yepi. Wi ben kan yere den na ini a kamra fu wi di ben de na sodro. Esi-esi wi poti sturu baka a doro fu wi èn wi bigin poti ala den sani fu wi na ini kofru. Di wi opo a doro, a man disi ben tanapu na tapusei fu a trapu nanga wan bigi nefi na ini en anu. Dati meki wi lon go na a baka doro, dan wi gowe nanga ala den bagasi fu wi. Noiti moro wi drai go baka.

Wi go yuru wan kamra na ini wan hotel. Wi tan drape pikinmoro wán yari èn disi ben bun gi a preikiwroko fu wi. Fa so? A hotel ben de na mindrisei fu a foto èn son Bijbelstudie fu wi ben wani studeri drape. Fosi yu denki wi ben e hori a Bukustudie nanga A Waktitoren-studie ibri wiki na ini a hotel kamra fu wi. Sowan 15 sma ben e kon.

Wi tan na ini Mistelbach moro leki wán yari. Baka dati den brada seni mi go na Feldbach, di de na a zuid-owstusei fu Graz. Mi kisi wan nyun pionier patna, ma a foto dati no ben abi wan gemeente tu. Wi ben e libi na ini wan pikin kamra na a di fu tu sodro fu wan udu oso. A winti ben e froiti te a ben pasa den olo na mindri den planga fu na oso. Dati meki wi ben musu tapu den olo nanga koranti. Wi ben musu teki watra tu na ini wan peti. Aladi a no ben makriki fu libi drape, toku wi ben abi bun bakapisi. Na ini wan tu mun nomo wi ben man seti wan grupu drape. Wi ben e studeri nanga wan famiri, èn te fu kaba sowan 30 sma fu a famiri dati tron Yehovah Kotoigi.

Den sani disi di wi ondrofeni meki mi kisi moro warderi gi Yehovah fu di ala ten a e horibaka gi den wan di e poti a Kownukondre na a fosi presi. Awinsi libisma no man yepi wi, Yehovah de nanga wi ala ten.​—Ps. 121:1-3.

Na ini 1958 wan internationaal kongres ben o hori na ini New York City, na Yankee Stadion nanga den Polo Ground stadion. Di mi aksi a bijkantoro fu Oostenrijk efu mi ben kan go, den aksi mi efu mi ben wani go na a di fu 32 klas fu a Gileadskoro. Noiti mi ben o weigri so wan moi grani! Wantewante mi taigi den: „Iya!”

Di mi ben de na Gileadskoro mi ben e sidon na sei Martin Poetzinger. Den ben du  furu ogri-ati sani nanga en na ini den Nazi strafuman-kampu. Bakaten a tron wan memre tu fu a Tiri Skin. Son leisi te wi ben de na ini a klas, Martin ben aksi mi safri: „Erika, san disi wani taki na ini Doisritongo?”

Di wi ben de na a skoro wan tu mun kaba Nathan Knorr taigi wi pe wi ben o go dini. Mi ben o go na Paragwai. Fu di mi ben yongu ete, mi papa ben musu gi mi primisi fu go na a kondre dati. Baka di mi kisi primisi, mi doro na ini Paragwai na ini maart 1959. Mi nanga a nyun pionier patna fu mi ben musu tan na ini wan zendeling oso na ini Asunción.

A no teki langa fosi mi miti Walter Bright, wan zendeling di ben de na ini a di fu 30 klas fu a Gileadskoro. Baka wan pisi ten wi trow èn now wi ben kan yepi makandra fu pasa iniwan tesi. Te wi ben e kisi tesi, wi ben e leisi a pramisi fu Yehovah na ini Yesaya 41:10: „No frede, bika mi de nanga yu. No luku leki yu e frede, bika mi na yu Gado. Mi o meki yu kon tranga.” A tekst disi meki wi si taki solanga wi e gi yesi na Gado èn wi e poti a Kownukondre fu en na a fosi presi, dan noiti a o gowe libi wi.

Bakaten wi go dini na wan kontren krosibei fu Brasyonkondre. Drape den kerki fesiman ben e gi den yonguwan deki-ati fu trowe ston na tapu a zendeling oso fu wi, di no ben steifi. Ma Walter bigin studeri nanga a komandanti fu den skowtu. A man dati sorgu taki wán wiki langa skowtu ben e tanapu na krosibei fu wi oso. Na so den gensman no ben e muilek wi moro. Syatu baka dati wi froisi go na wan moro bun oso abrasei fu a liba na ini Brasyonkondre. Disi ben de wan bun sani fu di wi ben kan hori konmakandra na ini Paragwai èn na ini Brasyonkondre. Fosi wi go dini na wan tra presi, tu pikin gemeente ben seti drape.

Datra ben taigi mi taki mi no ben man kisi pikin. Dati meki wi skreki di mi kon de nanga bere na ini 1962. Te fu kaba wi go tan na ini Hollywood, na Florida, krosibei fu den famiri fu Walter. Wan tu yari langa mi nanga Walter no ben man pionier. Wi ben musu sorgu gi wi osofamiri. Toku wi ben poti a Kownukondre na a fosi presi.​—Mat. 6:33.

Di wi doro na Florida na ini november 1962, wi ben fruwondru fu si taki den weti brada nanga sisa no ben e hori konmakandra makandra nanga den blaka brada nanga sisa. Den no ben e preiki na ini a srefi kontren tu. Den ben e du disi fu di den sma na ini a kontren no ben lobi taki weti sma ben e bumui nanga blaka sma. Ma Yehovah no feni a wan ras moro bun leki a trawan. Dati meki syatu baka dati, sani ben seti so taki weti sma nanga blaka sma ben de na ini wan gemeente. A ben de krin taki Yehovah blesi a seti disi fu di now omeni gemeente de na ini a kontren dati.

A sari taki Walter dede na ini 2015 fu di a ben abi kanker na en edetonton. Wi ben trow 55 yari èn a ben de wan bun masra. A ben lobi Yehovah èn a yepi furu brada nanga sisa. Mi no man wakti fu si en baka te a kisi wan opobaka èn te a de gosontu.​—Tori 24:15.

Mi breiti taki mi ben man du a furuten diniwroko moro leki 40 yari. A gi mi furu prisiri èn mi kisi furu blesi. Fu eksempre, mi nanga Walter ben man si fa 136 Bijbelstudie fu wi teki dopu. A no de fu taki dati wi kisi tesi tu. Ma noiti wi meki den sani disi tapu wi fu dini wi Gado fayafaya. Na presi fu dati, wi ben e suku yepi na en. Wi ben abi a frutrow taki a ben o yepi wi na a yoisti ten èn na en fasi. Na dati a du tu!​—2 Tim. 4:16, 17.

Mi e misi Walter trutru, ma a pionierwroko e yepi mi. Mi lobi leri tra sma sani fu Bijbel. Mi e fruteri den spesrutu fu na opobaka howpu. Mi kan taki nanga mi heri ati taki noiti Yehovah gowe libi mi. Soleki fa a pramisi, a horibaka gi mi, a gi mi krakti èn a tan hori mi steifi nanga en „reti-anu fu retidu”.​—Yes. 41:10.