1. San Kresten papa nanga mama musu sabi seiker, fosi den pikin fu den teki dopu?

„OMENI mun langa mi ben taigi mi papa nanga mama taki mi wani teki dopu. Dati meki den ben taki furu nanga mi fu a tori disi. Den ben wani de seiker taki mi ben sabi o seryusu a bosroiti disi de. Te fu kaba a prenspari dei disi doro. Mi teki dopu tapu 31 december 1934.” Na so Blossom Brandt e fruteri fa sani waka fosi a teki dopu. Kresten papa nanga mama na ini a ten disi e pruberi fu yepi den pikin tu fu teki koni bosroiti. Efu den ben o tapu den pikin fu teki dopu sondro taki bun reide de, dan dati kan pori a matifasi fu a pikin nanga Yehovah (Yak. 4:17). Ma toku koni papa nanga mama wani de seiker taki fosi den pikin fu den teki dopu, den man tyari den frantwortu di disipel fu Krestes abi.

2. (a) San son kring-opziener kon si? (b) San wi o luku na ini na artikel disi?

² Wan tu kring-opziener kon si taki son yonguwan di  kweki na ini Kresten osofamiri no teki dopu ete, aladi den abi bijna 20 yari noso den pasa 20 yari kaba. Furu fu den yonguwan disi e go na den konmakandra èn den e preiki kaba. Den e si densrefi leki Yehovah Kotoigi tu. Ma toku wan sani e tapu den fu gi densrefi abra na Yehovah èn fu teki dopu. San e tapu den fu teki a bosroiti disi? Son leisi na den papa nanga mama e feni taki den no kaba ete fu teki dopu. Na ini na artikel disi wi o luku fo sani di e tapu papa nanga mama fu yepi den pikin fu den fu go na fesi, so taki den kan teki dopu.

3. Sortu broko-ede a papa nanga mama fu Blossom ben abi?

³ A papa nanga mama fu Blossom di kari na ini a fosi paragraaf, ben aksi densrefi efu na umapikin fu den ben owru nofo fu frustan san a wani taki fu teki dopu èn efu a ben sabi o seryusu a bosroiti disi de. Fa papa nanga mama kan kon sabi efu den pikin klari kaba fu gi densrefi abra na Yehovah?

4. Fa a sani di Yesus taki na Mateyus 28:19, 20 kan yepi papa nanga mama te den e gi den pikin leri?

⁴ Leisi Mateyus 28:19, 20. Soleki fa wi si na ini na artikel na fesi, Bijbel no e taki o owru wan sma musu de fosi a kan teki dopu. Ma a bun te papa nanga mama e prakseri san a wani taki fu meki disipel. Na ini Grikitongo den wortu „meki den tron disipel” na ini Mateyus 28:19 wani taki dati wi e gi wan sma leri so taki a kan tron wan bakaman fu Krestes. Wan disipel na wan sma di kon sabi den leri fu Krestes, di e frustan den leri disi èn di wani gi yesi na den. Sobun, papa nanga mama musu gi den pikin fu den leri te den yongu ete, so taki den kan teki dopu èn tron disipel fu Krestes. A no de fu taki dati wan beibi no kan teki dopu. Ma Bijbel e sori taki yonguyongu pikin kan frustan den leri fu Bijbel èn den kan lobi den.

5, 6. (a) Te wi e luku san Bijbel e taki fu Timoteyus, dan san wi kan leri fu a dopu fu en? (b) San na a moro bun fasi fa papa nanga mama kan yepi den pikin?

⁵ Timoteyus ben de wan disipel di bosroiti fu dini Yehovah di a ben yongu ete. Na apostel Paulus ben taki dati Timoteyus kisi leri fu Gado Wortu sensi di a ben de wan beibi. Timoteyus en papa no ben e dini Yehovah, ma en mama nanga en granmama yepi en fu kon lobi Gado Wortu. Dati meki a ben abi wan tranga bribi (2 Tim. 1:5; 3:14, 15). Di a ben abi sowan 20 yari a ben lepi nofo fu kan kisi spesrutu grani na ini a Kresten gemeente.​—Tori 16:1-3.

⁶ A no de fu taki dati nowan pikin de a srefi. A wan pikin e go na fesi moro esi leki a trawan. Son pikin e frustan den leri fu Bijbel, den e teki koni bosroiti èn den wani teki dopu te den yongu ete. Ma trawan musu wakti teleki den kon moro owru fosi den lepi nofo fu kan teki dopu. Dati meki koni papa nanga mama no o dwengi den pikin fu teki dopu. Den o yepi a pikin fu go na fesi, ma den o luku tu san a man èn san a no man. Papa nanga mama kan breiti te a pikin fu den e pruberi fu du san skrifi na Odo 27:11. (Leisi en.) Ma den no musu frigiti taki den musu yepi a pikin fu tron wan disipel fu Krestes. Nanga disi na prakseri, papa nanga mama musu aksi densrefi: ’Mi pikin sabi nofo fu Bijbel so taki a kan gi ensrefi abra na Gado èn teki dopu?’

7. Wan sma musu sabi ala sani fu Bijbel fu kan teki dopu? Fruklari disi.

⁷ Te papa nanga mama e studeri nanga den pikin fu den, dan den musu yepi den fu frustan den tru leri fu Bijbel bun. A sabi disi o meki taki den pikin srefi o bosroiti fu gi densrefi abra na Gado. Ma disi no wani taki dati a pikin musu sabi ala sani fu Bijbel finifini fu kan teki dopu. Ibri disipel fu Krestes musu tan leri moro fu Bijbel baka te a dopu. (Leisi Kolosesma 1:9, 10.) Sobun, o furu wan sma musu sabi fosi a kan teki dopu?

8, 9. San wi kan leri fu a tori fu Paulus nanga a waktiman na ini Filipi?

⁸ Papa nanga mama kan leri wan sani fu na ondrofenitori fu wan osofamiri na ini a ten fu den apostel (Tori 16:25-33). Na ini a yari 50, di Paulus ben go preiki leki zendeling a di fu tu leisi, a go na a foto Filipi. Di a ben de drape, sma ben lei gi en nanga Silas èn den grabu den tyari go sroto. Na neti wan tranga gronseki seki a fondamenti fu a strafu-oso èn ala den doro opo. Fu di a waktiman fu a strafu-oso ben denki taki den strafuman ben lowe, meki a ben wani kiri ensrefi. Ma Paulus tapu en. Paulus nanga Silas ben gi a waktiman nanga en osofamiri leri fu Yesus. Den sma disi bribi den sani di den leri èn den frustan o prenspari a de fu gi yesi na Yesus. Dati meki den teki dopu wantewante. San wi kan leri fu a tori disi?

⁹ A kan taki fosi a man disi tron wan waktiman, a ben de wan srudati fu Rome. A no ben sabi a Wortu fu Gado. Sobun, fu tron wan Kresten a man disi ben musu kon sabi den moro prenspari leri fu Bijbel, a ben musu frustan san a wani taki fu dini Yehovah èn a ben musu bosroiti fu gi yesi na den leri fu Yesus. Den sani di a leri na ini wan syatu ten meki taki a ben wani teki dopu. A no de fu taki dati a tan teki leri baka di a dopu. Sobun, te yu pikin taigi yu taki a wani teki dopu fu di a lobi Yehovah èn fu di a wani gi yesi na en, dan san yu kan du? Yu kan meki a go taki nanga den owruman. Den owruman o luku efu a lepi nofo fu teki dopu. * Neleki ala dopu Kresten, yu pikin o tan leri moro fu Yehovah en heri libi langa, iya fu têgo.​—Rom. 11:33, 34.

10, 11. (a) San son papa nanga mama e denki? (b) San musu de a moro prenspari sani gi papa nanga mama?

¹⁰ Son papa nanga mama feni taki a moro bun taki den pikin fu den dopu, baka te den kisi bun skoroleri èn te den abi wan bun wroko. Kande den papa nanga mama disi abi a bun fu den pikin na prakseri. Ma den sani disi o yepi den pikin fu abi wan bun libi èn fu de koloku trutru? Na dati Bijbel e leri wi? Fa Yehovah wani taki wi gebroiki wi libi?​—Leisi Preikiman 12:1.

¹¹ A prenspari fu hori na prakseri taki a grontapu disi nanga den sani fu grontapu no e gi wi deki-ati fu du a wani fu Yehovah èn fu denki neleki en (Yak. 4:7, 8; 1 Yoh. 2:15-17; 5:19). Te wan pikin abi wan bun matifasi nanga Yehovah, dan dati na a moro bun sani di o kibri en gi Satan, gi grontapu èn gi a denki  fu grontapu. Efu papa nanga mama e poti skoroleri nanga wroko na a fosi presi, dan den pikin o denki taki den sani fu grontapu prenspari moro den matifasi nanga Yehovah. Disi kan tyari takru bakapisi kon. Papa nanga mama di lobi den pikin no ben o wani taki a grontapu disi leri den pikin fa den kan de koloku. A wan-enkri fasi fa wi kan abi wan bun libi èn de koloku trutru, na te wi e poti a wani fu Yehovah na a fosi presi.​—Leisi Psalm 1:2, 3.

12. Fu san ede son papa nanga mama no wani taki den pikin teki dopu ete?

¹² Wan mama fruteri fu san ede a no ben wani taki en umapikin teki dopu. A taki: „Mi e syen fu taki dati a moro bigi reide fu san ede mi no ben wani, na taki mi ben frede taki a kan puru fu a gemeente.” Neleki a sisa dati, furu papa nanga mama feni taki a moro bun fu meki a pikin wakti teleki a moro owru. Na so fasi a no o meki den dondon fowtu di yonguwan e meki (Gen. 8:21; Odo 22:15). Kande den e denki: ’Solanga mi pikin no dopu, den no man puru en fu a gemeente.’ Fu san ede a denki disi no bun?​—Yak. 1:22.

13. Efu wan sma no dopu, dan disi wani taki dati a no abi fu gi frantwortu na Yehovah? Fruklari disi.

¹³ Wi kan frustan taki Kresten papa nanga mama no ben o wani meki a pikin fu den dopu efu a no klari ete fu gi ensrefi abra na Yehovah. Ma den ben o kori densrefi efu den e denki taki a pikin no abi fu gi frantwortu na Yehovah te a no dopu. Fu san ede wi kan taki dati? Awinsi wan sma dopu noso efu a no dopu, a musu gi frantwortu na Yehovah. Solanga wan pikin sabi san Yehovah feni bun èn san a no feni bun, a o abi fu gi frantwortu na en. (Leisi Yakobus 4:17.) Na presi fu tapu den pikin fu teki dopu, koni papa nanga mama e meki tranga muiti fu gi den pikin a bun eksempre. Awinsi a pikin yongu, den e leri en fu lobi den sani di Yehovah feni bun èn fu no lobi den sani di a no feni bun (Luk. 6:40). Te yu pikin lobi Yehovah, dan dati o tapu en fu du wan seryusu sondu, fu di a o wani du sani di Yehovah feni bun.​—Yes. 35:8.

14. Fa owruman kan yepi papa nanga mama?

¹⁴ Owruman kan yepi papa nanga mama te den e gi den yonguwan deki-ati fu du moro gi Yehovah. Wan sisa di ben dini leki pionier moro leki 70 yari langa, e memre san Brada Charles T. Russell taigi en di a ben abi siksi yari. A sisa fruteri: „A taki 15 miniti nanga mi fu sori mi san mi kan du gi Yehovah.” Te wi e gi wan sma deki-ati, dan dati kan yepi en fu teki koni bosroiti na ini en libi (Odo 25:11). Owruman kan aksi papa, mama nanga den pikin fu yepi du wan tu wroko na a Kownukondre zaal. Den kan gi den pikin wroko di den man du.

15. Fa tra sma na ini a gemeente kan yepi yonguwan?

¹⁵ Fa tra brada nanga sisa fu a gemeente kan yepi? Den kan meki ten gi yonguwan. Den kan luku efu a pikin e go na fesi na ini a tru anbegi. Kande wan yonguwan gi wan bun piki na a konmakandra, noso a hori wan moi lezing na a mindriwiki konmakandra. Kande a preiki gi wan sma na skoro,  noso a du san bun aladi a kisi tesi fu du wan sani di Yehovah no lobi. Efu dati de so, dan no draidrai fu prèise en. Wi kan teki en leki wan gwenti fu taki nanga yonguwan fosi a konmakandra bigin èn baka a konmakandra. Te wi e du dati, dan yonguwan kan kisi a firi taki den de wan pisi fu a gemeente.​—Ps. 35:18.

16, 17. (a) Fu san ede a prenspari taki pikin e teki dopu? (b) San kan meki Kresten papa nanga mama prisiri? (Luku a prenki na a bigin fu na artikel.)

¹⁶ Wan fu den moro bigi grani di Kresten papa nanga mama abi na fu kweki den pikin „nanga a leri èn nanga den rai fu Yehovah” (Ef. 6:4; Ps. 127:3). Den pikin fu den Israelsma fu owruten no ben abi fu gi densrefi abra na Yehovah moro fu di a pipel ben de fu Yehovah kaba. Ma dati no de so nanga pikin fu Kresten papa nanga mama. Èn a no te papa nanga mama lobi Yehovah nanga a tru anbegi, dan den pikin o lobi Yehovah tu. Solanga a pikin gebore, papa nanga mama musu yepi a pikin fu tron wan disipel, fu gi ensrefi abra na Yehovah èn fu teki dopu. Nowan tra sani moro prenspari. Fu taki en leti, na soso te wan sma gi ensrefi abra na Yehovah, a dopu èn a tan dini en, a o kisi frulusu te a bigi banawtu doro.​—Mat. 24:13.

¹⁷ Di Blossom Brandt ben wani dopu, dan en papa nanga mama ben wani de seiker taki a ben lepi nofo fu teki a prenspari bosroiti disi. Di den si taki a ben lepi nofo, den horibaka gi a bosroiti fu en. A neti fosi a dopu, en papa du wan moi sani. Blossom taki: „A meki wi alamala saka kindi, dan a begi. A taigi Yehovah taki a ben breiti taki en pikin meisje bosroiti fu gi en libi abra na en.” Moro leki 60 yari baka dati, Blossom taki: „Yu kan de seiker taki noiti mi o frigiti a neti dati!” Papa nanga mama, wi e winsi taki yu ondrofeni a srefi prisiri te yu e si taki yu pikin gi ensrefi abra na Yehovah èn teki dopu.