1. Te wi e luku san skrifi na 1 Petrus 3:8, dan fu san ede wi lobi te sma e hori den firi fu wi na prakseri èn te den wani taki sani go bun nanga wi?

WI LOBI te sma e hori den firi fu wi na prakseri èn te den wani taki sani waka bun nanga wi. Den sortu sma disi e pruberi fu frustan fa wi e denki èn fa wi e firi. Den e luku san wi abi fanowdu èn den e suku fu yepi wi. Son leisi den e du dati sondro taki wi aksi den. Wi lobi sma di „e firi gi” wi.​—Leisi 1 Petrus 3:8.

2. Fu san ede wi musu meki muiti fu sori taki wi e firi gi sma?

² Leki Kresten, wi alamala wani sori taki wi e firi gi sma. Ma a no ala ten a makriki. Fu san ede? Fu di wi na sondusma (Rom. 3:23). Dati meki wi musu feti nanga a firi fu denki wisrefi nomo. Boiti dati, a fasi fa sonwan fu wi kweki noso den sani di miti wi kan meki en muilek gi wi fu firi gi tra sma. Wan tra sani na taki den sma na wi lontu kan abi krakti na wi tapu. Na ini den lasti dei disi furu sma no e broko den ede nanga den firi fu trawan. Na presi fu dati sma „lobi densrefi nomo” (2 Tim. 3:1, 2). Fa wi kan sorgu taki den sani disi no tapu wi fu firi gi sma?

3. (a) San o yepi wi fu sori taki wi e firi gi sma? (b) San wi o luku na ini na artikel disi?

³ Te wi e teki na eksempre fu Yehovah Gado nanga en Manpikin Yesus Krestes, dan wi o man sori taki wi e firi gi sma. Yehovah na wan Gado fu lobi èn en na a moro bun eksempre fu wan sma di e firi gi trawan (1 Yoh. 4:8). Yesus abi den srefi fasi fu en Papa (Yoh. 14:9). Di Yesus ben  de na grontapu a sori taki wan libisma man firi gi trawan. Na ini na artikel disi wi o luku fosi fa Yehovah nanga Yesus sori taki den e firi gi sma. Baka dati wi o luku fa wi kan teki na eksempre fu den.

4. Fa Yesaya 63:7-9 e sori taki Yehovah e broko en ede nanga den firi fu den futuboi fu en?

⁴ Bijbel e leri wi taki Yehovah e firi gi den futuboi fu en. Luku fa Yehovah ben firi te den Israelsma ben e pina. Gado Wortu e taki: „Te den ben de na ini banawtu, ensrefi ben de na ini banawtu tu.” (Leisi Yesaya 63:7-9.) Bakaten a meki a profeiti Sakaria skrifi taki te sma e du ogri nanga en pipel, a de neleki den e du ogri nanga en. Yehovah taigi den futuboi fu en: „A sma di e fasi unu e fasi a popki fu mi ai” (Sak. 2:8). Dati na wan heri moi fasi fa Yehovah e sori taki a e broko en ede nanga a pipel fu en!

5. Gi wan eksempre di e sori fa Yehovah yepi den futuboi fu en te sma ben e pina den.

⁵ Yehovah no e sori nomo taki a e firi gi den futuboi fu en. A e du wan sani tu fu yepi den. Fu eksempre, di den Israelsma ben e pina leki srafu na ini Egepte, Yehovah ben frustan san ben e miti den èn a ben wani du wan sani fu yepi den. Yehovah taigi Moses: „Mi si fa mi pipel e pina . . . èn mi yere fa den e bari e suku yepi. . . . Iya, mi sabi heri bun fa den e pina. Mi o saka go fu frulusu den fu den Egeptesma” (Eks. 3:7, 8). Fu di Yehovah ben e firi gi en pipel, meki a puru den na ini katibo. Hondrohondro yari baka dati, di den Israelsma ben de na ini a Pramisi Kondre, den feanti fu den ben kon feti nanga den. San Yehovah du? „Te a pipel ben e geme fu di sma ben e kwinsi den èn te den ben e du den ogri, dan Gado ben e sari den.” Fu di Yehovah ben firi gi en pipel, meki a yepi den. A seni krutuman fu frulusu den Israelsma ibri tron baka te den feanti ben kon feti nanga den.​—Krut. 2:16, 18.

6. Fruteri fa Yehovah sori taki a ben e broko en ede nanga Yona di no ben si sani na a yoisti fasi.

⁶ Yehovah e sori taki a e broko en ede  nanga den firi fu en pipel, srefi te son leisi den no e si sani na a yoisti fasi. Luku a tori fu Yona. Gado seni a profeiti disi fu tyari wan krutuboskopu gi den sma fu Ninefei. Di den sori berow, Gado bosroiti fu no pori a foto. Ma Yona no ben breiti taki sani waka so. En „ati bron srefisrefi” fu di Ninefei no kisi pori soleki fa a ben taki. Ma Yehovah ben abi pasensi nanga Yona èn a yepi en fu kenki en denki (Yona 3:10–4:11). Te fu kaba Yona frustan san Yehovah ben wani leri en èn Yehovah gebroiki en fu skrifi a tori disi so taki wi kan leri fu en.​—Rom. 15:4. *

7. Te wi e luku a fasi fa Yehovah e sorgu gi den futuboi fu en, dan fa dati e gi wi deki-ati?

⁷ A fasi fa Yehovah e sorgu en pipel e gi wi a dyaranti taki a e firi gi den futuboi fu en. A sabi te ibriwan fu den e sari èn te den e pina. Yehovah „wawan sabi na ati fu libisma” (2 Kron. 6:30). A sabi fa wi alamala e denki, fa wi e firi èn san wi man du. ’A no o meki wi kisi tesi di hebi moro leki san wi man tyari’ (1 Kor. 10:13). A sani disi di Yehovah pramisi e gi wi furu deki-ati!

8-10. Fa a du kon taki Yesus ben man firi gi sma?

⁸ Di Yesus ben de wan libisma na grontapu, a ben e broko en ede trutru nanga trawan. Dri sani ben de di meki taki Yesus ben e broko en ede nanga sma. A fosi sani, na taki Yesus ben de soifri leki en Papa. Neleki en Papa, Yesus ben lobi sma. A ben prisiri nanga ala den sani di en nanga Yehovah meki. Ma a sani di ben gi en moro prisiri, na „den libisma” (Odo 8:31). Fu di Yesus abi lobi, meki a ben man firi gi sma.

⁹ A di fu tu sani, na taki neleki Yehovah, Yesus sabi san de na ini sma ati. A ben sabi fa sma ben e firi èn fu san ede den ben e du sani (Mat. 9:4; Yoh. 13:10, 11). Dati meki te Yesus ben e si taki sma ben brokosaka, a ben e broko en ede nanga den èn a ben e du wan sani fu trowstu den.​—Yes. 61:1, 2; Luk. 4:17-21.

¹⁰ A di fu dri sani, na taki Yesus srefi ben e kisi son problema di den sma fu en ten ben e kisi. Soleki fa a sori, dan Yesus en papa nanga mama ben pôti. Fu di Yesus ben e wroko makandra nanga en kwekipapa Yosef, a leri fu wroko tranga (Mat. 13:55; Mark. 6:3). A kan taki Yosef dede fosi Yesus bigin nanga a diniwroko fu en. Sobun, Yesus ben sabi fa a e hati te wan sma di yu lobi dede. Èn Yesus ben sabi fa a de fu de na ini wan osofamiri pe sma no e bribi a srefi sani (Yoh. 7:5). Den sani dati nanga tra sani ben yepi Yesus fu frustan sortu problema nanga tesi e miti sma èn fa den e firi.

11. O ten a ben de krin fu si taki Yesus ben e broko en ede nanga sma? Fruklari disi. (Luku a fowtow tapu a kafti.)

¹¹ Spesrutu te Yesus ben e du wondru, a ben de krin fu si taki a ben e broko en ede nanga sma. Yesus no ben e du wondru fu di a ben musu fu du den. Ma a ben e „sari” den sma di ben e pina (Mat. 20:29-34; Mark. 1:40-42). Prakseri fa Yesus ben e firi di a puru wan dofuman na mindri wan bigi grupu sma èn a tyari en  go na seisei fu dresi en. Noso prakseri fa a ben e firi di a tyari a wan-enkri manpikin fu wan uma kon na libi baka. Na uma disi en masra ben dede kaba (Mark. 7:32-35; Luk. 7:12-15). Yesus ben firi gi den sma dati èn dati meki a ben wani yepi den.

12. Fa Yohanes 11:32-35 e sori taki Yesus ben e firi gi Marta nanga Maria?

¹² Yesus ben sori taki a ben e firi gi Marta nanga Maria. Di a si fa den ben e sari taki den brada Lasarus dede, a „bigin krei”. (Leisi Yohanes 11:32-35.) A no ben krei fu di en bun mati ben dede. A ben sabi taki a ben o gi Lasarus wan opobaka. Ma Yesus ben krei fu di a ben sabi fa Marta nanga Maria ben e firi.

13. Fu san ede a e gi wi deki-ati fu sabi taki Yesus e firi gi sma?

¹³ A e gi wi furu deki-ati taki Yesus e firi gi sma. Wi lobi Yesus fu di a ben e sori sari-ati gi sma (1 Petr. 1:8). Wi breiti taki a e tiri now leki Kownu fu Gado Kownukondre. Heri esi a o tyari wan kaba kon na ala pina. Fu di Yesus ben de wan libisma na grontapu, meki en na a moro bun sma di kan puru ala den problema di Satan tyari kon gi libisma. Iya, a de wan blesi fu abi wan Tiriman di „man frustan den swakifasi fu wi”.​—Hebr. 2:17, 18; 4:15, 16.

14. Te wi e luku san Efeisesma 5:1, 2 e taki, dan san wi o du te wi e prakseri na eksempre fu Yehovah nanga Yesus?

¹⁴ Te wi e prakseri na eksempre fu Yehovah nanga Yesus, dan wi srefi o wani du moro muiti fu sori taki wi e firi gi sma. (Leisi Efeisesma 5:1, 2.) Wi no man sabi san de na ini sma ati, ma wi kan pruberi fu frustan fa den e firi èn san den abi fanowdu (2 Kor. 11:29). Tra fasi leki den sma na ini grontapu di e denki densrefi nomo, wi ’no e poti prakseri na wi eigi afersi nomo, ma wi e poti prakseri na den afersi fu trawan tu’.​—Fil. 2:4.

15. Suma musu sori taki den e firi gi sma?

¹⁵ A prenspari taki gemeente owruman e sori taki den e firi gi sma. Den sabi taki den musu sorgu bun gi den skapu fu Yehovah fu di den musu gi frantwortu na en (Hebr. 13:17). Fu man yepi den brada nanga sisa, owruman musu frustan fa den e firi. Fa owruman kan sori taki den e firi gi sma?

16. San wan owruman di e firi gi sma e du èn fu san ede dati prenspari?

¹⁶ Wan owruman di e firi gi sma e meki ten gi den Kresten brada nanga sisa fu en. Te a e aksi den wan sani, a e arki bun èn a abi pasensi. Disi prenspari te wan fu den skapu disi wani fruteri en fa a e denki noso firi, ma a no sabi fa a musu du dati (Odo 20:5). Te wan owruman e meki ten gi den brada nanga sisa, dan den o frutrow en moro, den o si en leki den mati èn den o lobi en.​—Tori 20:37.

17. Sortu fasi fu owruman furu brada nanga sisa lobi moro? Gi wan eksempre.

¹⁷ Furu brada nanga sisa e taki dati a fasi di den lobi moro fu gemeente owruman, na taki den e broko den ede nanga den firi fu trawan. Fu san ede? Adelaide taki: „A moro makriki fu taki nanga den fu di yu sabi taki den o frustan fa yu e firi.” A taki tu: „A fasi fa den e taki nanga yu e sori taki den e firi gi yu.” Wan brada di de nanga tangi gi a fasi fa wan owruman yepi en, taki: „Di mi fruteri  wan owruman a situwâsi fu mi, mi si fa en ai ben furu nanga watra. Noiti mi o frigiti a sani dati.”​—Rom. 12:15.

18. Fa wi kan sori taki wi e firi gi sma?

¹⁸ Ma a no owruman wawan musu sori taki den e firi gi sma. Wi alamala kan kon abi a fasi disi. San kan yepi wi? Pruberi fu frustan sortu problema yu famiri nanga den brada nanga sisa fu a gemeente abi. Meki ten gi den yonguwan na ini a gemeente. Poti prakseri tu na den sikiwan, den owruwan nanga den sma di e sari fu di wan lobiwan fu den dede. Aksi den fa a e go nanga den. Arki bun te den e fruteri yu fa den e firi. Meki den si taki yu e frustan a situwâsi fu den. Pruberi fu yepi den. Te wi e du disi, dan wi e sori taki wi lobi den trutru.​—1 Yoh. 3:18.

19. Fu san ede wi musu luku san wan sma abi fanowdu te wi wani yepi en?

¹⁹ Wi musu luku san wan sma abi fanowdu te wi wani yepi en. Fu san ede? Fu di a no ala sma na a srefi. Son sma di abi problema no man wakti fu taki nanga wan sma fu a problema fu den. Ma tra sma no lobi taki. Sobun, wi wani yepi den, ma wi no musu poti aksi di o meki den firi fruferi (1 Tes. 4:11). Ma a no ala ten te wan sma e fruteri wi fa a e firi wi o agri nanga san a e taki. Toku wi musu hori na prakseri taki na so den e firi. Wi musu de gaw fu arki, ma wi no musu de gaw fu taki.​—Mat. 7:1; Yak. 1:19.

20. San wi o luku na ini a tra artikel?

²⁰ Wi wani sori taki wi e firi gi den brada nanga sisa fu wi na ini a gemeente. Ma wi wani sori tu taki wi e firi gi den sma di wi e miti na ini a preikiwroko. Fa wi kan sori taki wi e firi gi den sma disi? Wi o luku a tori disi na ini a tra artikel.