Sonwan fu den Leifisma di no ben de priester, ben e du tra wroko. Wan fu den wroko di den ben e du, na taki den ben e wroko leki skowtu na ini a tempel. A tempel-edeman ben de a fesiman fu den. A Dyu skrifiman Filo ben taki sortu wroko den man disi ben du. A ben taki: „Sonwan fu den [Leifisma] ben hori wakti na den doro fu a tempel. Trawan ben hori wakti na fesi a santapresi [na inisei fu a tempel] fu sorgu taki sma di no ben abi a reti fu go na inisei no ben du dati. Sonwan fu den ben e waka lontu a tempel fu hori wakti. Son man ben wroko deiten èn trawan ben wroko neti.”

A Sanhedrin ben kan aksi den skowtu disi fu yepi den. Soso den Dyu di ben wroko leki skowtu na a tempel ben kisi primisi fu den tiriman fu Rome fu abi fetisani.

A Bijbel sabiman Joachim Jeremias e taki dati di wan tu man kon fu grabu „Yesus, a taigi den taki ibri dei a ben gi leri na ini a tempel, ma toku den no tyari en go sroto (Mat. 26:55). Efu na den skowtu fu a tempel ben kon fu sroto Yesus, dan wi kan frustan fu san ede a taigi den a sani disi.” A srefi sabiman disi e bribi taki na den skowtu fu a tempel ben go fu grabu Yesus na wan tra okasi (Yoh. 7:32, 45, 46). Bakaten a tempel-edeman nanga wan tu skowtu tyari den disipel fu Yesus kon na a Sanhedrin. A sori tu leki na den man disi srepi na apostel Paulus puru na ini a tempel.​—Tori 4:1-3; 5:17-27; 21:27-30.