Son Kresten e gebroiki den cel, tablet, noso computer fu seni boskopu gi den famiri nanga tra Kotoigi. A no de fu taki dati wan lepi Kresten o hori a rai disi na prakseri: „A koniwan di si taki ogri o miti en lon go kibri. Ma a sma sondro ondrofeni waka go doro èn dati meki a kisi en strafu.”​—Odo 27:12.

Wi e frustan taki Yehovah wani kibri wi. Dati meki wi no e moksi nanga sma di wani tyari prati kon, sma di den puru fu a gemeente, noso sma di e kon nanga falsi leri (Rom. 16:17; 1 Kor. 5:11; 2 Yoh. 10, 11). Kande son brada nanga sisa, noso tra sma di e kon na den konmakandra no e tyari densrefi na wan fasi di fiti (2 Tim. 2:20, 21). Wi e hori a sani disi na prakseri te wi e meki mati. A no makriki fu kon sabi sma trutru efu wi e taki nanga den soso nanga yepi fu telefon noso computer.

Wi musu luku bun nanga a sani disi, spesrutu te sma e aksi wi fu go na ini wan bigi chat-grupu. Son Kresten kisi furu problema di den du dati. Efu hondrohondro sma noso dusundusun sma de na ini wan chat-grupu, dan fa wi kan sabi nanga suma wi e bumui? Wi no o man sabi ala den sma disi èn wi no o sabi tu efu den de bun na ini waarheid. Psalm 26:4 e taki: „Mi no sidon nanga sma di lobi lei. Mi no e moksi nanga sma di e hoigri.” Dati meki a moro bun fu chat soso nanga sma di wi sabi, a no so?

Awinsi wan Kresten de na ini wan chat-grupu di no bigi so, toku a musu luku bun omeni ten a e gebroiki fu chat nanga trawan èn fu sortu sani den sma na ini a grupu e taki. Wi no musu abi a firi taki wi musu piki ala boskopu di sma e poti na ini a chat, awinsi san na a tori èn awinsi o langa sma e chat. Paulus ben warskow Timoteyus gi „konkruman” nanga sma di e ’bumui na ini tra sma tori’ (1 Tim. 5:13). Na ini a ten disi wi musu luku bun nanga den sma disi tu te wi e chat.

Wan lepi Kresten no o arki te sma e krutu Kotoigi noso te sma e fruteri den inibere tori fu Kotoigi (Ps. 15:3; Odo 20:19). Awinsi furu sma e taki fu wan tori, toku a no o de gaw fu bribi a tori efu a no sabi efu a tru (Ef. 4:25). Tapu a website fu wi, jw.org, èn na den JW Broadcasting^® programa fu ibri mun wi e kisi furu Bijbel leri nanga nyunsu di wi kan frutrow.

Son Kresten e gebroiki den app di meki fu seni boskopu fu seri sani, fu bai sani, fu meki reklame, noso fu suku sma fu wroko gi den. Den sani disi abi fu du nanga bisnis. Den no abi noti fu du nanga na anbegi fu wi. Tru Kresten no wani libi na wan fasi di e sori taki den lobi moni (Hebr. 13:5). Dati meki den e weigri fu gebroiki den brada nanga sisa fu den fu meki moni.

Ma kon meki wi taki dati wan sma wani gebroiki den app disi fu aksi brada nanga sisa moni gi sma di de na nowtu noso sma di kisi fu du nanga wan rampu. Fa a de nanga tori dati? A tru taki wi lobi wi brada nanga sisa èn taki wi wani yepi den. Dati meki wi gwenti yepi den wan di de na nowtu èn wi e gi den deki-ati (Yak. 2:15, 16). Ma te wi e gebroiki wan bigi chat-grupu fu du dati, dan disi kan bruya den sani di a bijkantoro noso den gemeente owruman seti fu yepi den sma disi (1 Tim. 5:3, 4, 9, 10, 16). Boiti dati, nowan fu wi ben o wani gi trawan a denki taki na den brada gi wi a frantwortu fu du a wroko dati.

Wi alamala wani du sani di e gi Gado glori (1 Kor. 10:31). Sobun, meki wi luku bun fa wi e gebroiki den app di meki fu seni boskopu gi sma.