1. Sortu tesi noso problema a pipel fu Yehovah e kisi?

YU E kisi tesi noso problema nownow? Kande wan sma na ini a gemeente du yu wan hati sani (Yak. 3:2). Noso kande sma na wrokope noso na skoro e spotu yu fu di yu e dini Yehovah (1 Petr. 4:3, 4). A kan tu taki famiriman wani tapu yu fu go na den konmakandra, noso kande den no wani taki yu e taki nanga tra sma fu a bribi fu yu (Mat. 10:35, 36). Efu wan tesi hebi gi yu trutru, dan kande yu e firi leki yu wani gi abra. Ma yu kan de seiker taki awinsi sortu tesi yu e kisi, Yehovah o gi yu a koni nanga a krakti fu horidoro.

2. Soleki fa Romesma 15:4 e sori, dan san o pasa te wi e leisi Bijbel?

² Yehovah meki sma skrifi finifini na ini en Wortu san sondu libisma leki wi du di den kisi hebi tesi. Fu san ede a du dati? So taki wi kan leri fu den eksempre disi. Na dati Yehovah meki na apostel Paulus skrifi na Romesma 15:4. (Leisi en.) Te wi e leisi den tori disi na ini Bijbel, dan wi kan kisi trowstu nanga howpu. Ma efu wi wani leri wan sani fu den tori disi, dan wi no musu leisi Bijbel nomo. Wi musu meki den sani di wi leisi abi krakti tapu wi frustan nanga wi ati. Ma san yu kan du te yu abi wan problema èn yu e suku rai? Fo sani de di wi kan du: (1) Begi, (2) pruberi fu si a tori na yu fesi, (3) denki dipi fu san yu leisi, èn (4) du san yu leri. Meki wi luku fa wi kan du den fo sani disi. * Baka dati wi o gebroiki den fo sani disi fu luku san wi kan leri fu sani di pasa na ini a libi fu Kownu David nanga na apostel Paulus.

3. San yu musu du fosi yu bigin leisi Bijbel èn fu san ede yu musu du dati?

 ³ (1) Begi. Fosi yu bigin leisi Bijbel, dan aksi Yehovah fu yepi yu fu si san yu kan leri fu den sani di yu o leisi. Fu eksempre, efu yu e suku rai fu lusu wan problema, dan aksi Yehovah fu yepi yu fu feni gronprakseri na ini a Wortu fu en di kan yepi yu nanga a problema disi.​—Fil. 4:6, 7; Yak. 1:5.

4. San yu musu du te yu e leisi wan tori na ini Bijbel?

⁴ (2) Pruberi fu si a tori na yu fesi. Yehovah meki wi na so wan fasi, taki wi man prakseri wan sani èn si a sani dati na wi fesi leki wan felem. Sobun, te yu e leisi wan tori na ini Bijbel, dan pruberi fu si a sani na yu fesi èn prakseri fa a ben o de efu yu na a sma na ini a tori. Pruberi fu si den sani di a sma ben e si èn fu firi fa a sma ben e firi na a ten dati.

5. San a wani taki fu denki dipi fu wan tori èn fa yu kan du dati?

⁵ (3) Denki dipi fu san yu leisi. Disi wani taki dati yu musu teki ten fu denki fu den sani di yu leisi èn fu luku san den sani dati abi fu du nanga yu. Disi o yepi yu fu si san a tori di yu leisi abi fu du nanga den sani di yu sabi kaba. Na so yu o man frustan a tori moro bun. Te yu e leisi Bijbel sondro fu denki dipi fu en, dan a de leki te yu ben o koti den pisi fu wan moi trowyapon, ma yu no e nai den kon na wán. Efu yu no nai den kon na wán, dan yu no o si a moi fu a yapon. Efu yu wani denki dipi fu wan tori, dan yu kan poti aksi soleki: ’San a sma na ini a tori du fu lusu a problema fu en? Fa Yehovah yepi en? Fa mi kan gebroiki den sani di mi leri fu lusu den problema fu mi?’

6. Fu san ede wi musu du san wi leri?

⁶ (4) Du san yu leri. Yesus taki dati efu wi no e du san wi leri, dan wi de leki wan man di bow en oso na tapu santi. Na fu soso a wroko so tranga fu bow na oso. Fu san ede wi kan taki dati? Te bigi winti nanga frudu e naki en oso, dan a heri oso e broko fadon (Mat. 7:24-27). Na so a de tu taki efu wi begi fosi wi leisi wan tori na ini Bijbel, efu wi man si a tori na wi fesi èn efu wi denki dipi fu en, ma wi no e du san wi e leri, dan na fu soso wi du ala den sani dati. Èn te wi e kisi tesi noso frufolgu, dan a bribi fu wi no o tranga. Ma te wi e studeri Bijbel èn wi e du san wi e leri, dan wi o teki bun bosroiti, wi no o bruya esi èn wi bribi o kon moro tranga (Yes. 48:17, 18). Now di wi taki fu den fo sani disi, dan meki wi luku san wi kan leri fu wan sani di pasa na ini a libi fu Kownu David.

7. Sortu Bijbeltori wi o luku now?

⁷ Kande wan mati noso wan famiri du yu wan hati sani. Efu disi de so, dan a ben o bun fu luku a tori fu Kownu David nanga en manpikin Absalom di ben bedrigi en èn di ben pruberi fu puru en leki kownu.​—2 Sam. 15:5-14, 31; 18:6-14.

8. Efu yu wani taki Yehovah yepi yu, dan san yu musu du?

⁸ (1) Begi. Prakseri a Bijbeltori èn fruteri Yehovah fa a hati sani di a sma du e meki yu firi (Ps. 6:6-9). Fruteri en ala san de tapu yu ati. Baka dati aksi Yehovah fu yepi yu fu si den gronprakseri di kan yepi yu na ini a situwâsi disi.

9. Fruteri syatu san Absalom du nanga David.

⁹ (2) Pruberi fu si a tori na yu fesi. Prakseri san ben pasa èn fa Kownu David  ben e firi. Omeni yari langa David en manpikin Absalom du ala sortu sani fu meki a pipel lobi en (2 Sam. 15:7). Di Absalom si leki a pipel o teki a sei fu en, a seni sma go na ala sei fu a kondre fu korikori a pipel meki den teki en leki kownu. A ben man kori Akitofel srefi di ben de wan bun mati fu David èn wan raiman fu en. Baka dati Absalom poti ensrefi leki kownu èn a ben de nomonomo fu kiri David di ben e siki na a ten dati kande (Ps. 41:1-9). Di David yere san Absalom wani du, dan a lowe komoto fu Yerusalem. Te fu kaba a legre fu Absalom go feti nanga den sma di tan horibaka gi David. A legre fu Absalom lasi èn sma kiri en.

10. San Kownu David ben kan du na ini a situwâsi fu en?

¹⁰ Prakseri now fa David ben e firi kande di den sani disi ben e miti en. A ben lobi Absalom èn a ben e frutrow Akitofel. Toku den ala tu du wan hati sani nanga en. Den meki David firi sari. Den ben wani kiri en srefi. David ben kan prakseri taki a no ben o frutrow nowan mati fu en moro. A ben kan denki taki den ben e horibaka gi Absalom tu. A ben kan prakseri ensrefi nomo èn a ben kan lowe komoto na ini a kondre en wawan. Noso a ben kan firi brokosaka èn gi abra. Ma David no du nowan fu den sani disi. Na presi fu dati, a horidoro èn a pasa a tesi disi. Fa a ben man du dati?

11. San David du fu yepi ensrefi?

¹¹ (3) Denki dipi fu san yu leisi. Sortu gronprakseri wi kan puru na ini a tori disi? Piki na aksi disi gi yusrefi: „San David du fu yepi ensrefi?” David no bruya èn a no bigin teki ala sortu dondon bosroiti sondro fu denki fosi. A no ben kon frede so te, taki a no ben sabi san fu du. Na presi fu dati, a begi Yehovah fu yepi en. A go suku yepi na den mati fu en tu. A no ben draidrai tu fu du san a ben bosroiti fu du. Aladi wan tu sma du hati sani nanga en, toku David no ben e sari so te, taki a ben kon abi bita-ati noso taki a no ben e frutrow nowan sma moro. A tan frutrow tapu Yehovah èn a tan frutrow den mati fu en tu.

12. San Yehovah du fu yepi David?

¹² Fa Yehovah yepi David? Te yu e ondrosuku sani moro fini, dan yu o kon si taki Yehovah gi David a krakti di a ben abi fanowdu fu pasa a tesi disi (Ps. 3:1-8; luku san skrifi na loktusei fu a psalm). Yehovah blesi den bosroiti fu David. Èn a horibaka gi den mati fu David di ben e du ala muiti fu kibri a libi fu a kownu fu den.

13. Fa na eksempre fu David kan yepi yu te wan sma du wan hati sani nanga yu? (Mateyus 18:15-17)

¹³ (4) Du san yu leri. Aksi yusrefi: ’Fa mi kan de leki David?’ Efu yu wani de leki en, dan yu o abi fu du wan sani wantewante fu lusu a problema fu yu. Efu a kan, dan yu musu du san Yesus taki na ini Mateyus kapitel 18. (Leisi Mateyus 18:15-17.) Ma yu no musu teki bosroiti bruyabruya, soso fu di yu e frede noso fu di yu ati e bron. Begi Yehovah fu yepi yu fu de nanga krin frustan èn fu gi yu a koni fu yepi yu fu si san yu musu du na ini a situwâsi fu yu. No lasi a frutrow di yu ben abi na ini den mati fu yu, ma gi den na okasi fu yepi yu (Odo 17:17). Èn san moro prenspari, du san Yehovah taigi yu na ini a Wortu fu en.​—Odo 3:5, 6.

14. Na ini sortu situwâsi 2 Timoteyus 1:12-16; 4:6-11, 17-22 kan yepi yu?

¹⁴ A de so taki sma na ini yu osofamiri e gens yu? Noso yu e libi na ini wan kondre pe a wroko fu a pipel fu Yehovah tapu noso pe wi no man preiki so fri? Efu dati de so, dan yu kan kisi deki-ati te yu e leisi 2 Timoteyus 1:12-16 nanga 4:6-11, 17-22. * Paulus ben skrifi a pisi disi fu Bijbel di a ben de na strafu-oso.

15. San yu kan aksi Yehovah?

¹⁵ (1) Begi. Fosi yu leisi den tori disi, fruteri Yehovah san na a problema fu yu èn fa a e meki yu firi. Fruteri en ala san de na tapu yu ati. Baka dati yu kan aksi Yehovah fu yepi yu fu si sortu gronprakseri na ini den tori fu Paulus kan yepi yu nanga a problema fu yu.

16. San ben pasa nanga Paulus?

¹⁶ (2) Pruberi fu si a tori na yu fesi. Kon meki wi taki dati yu ben de Paulus. Den keti yu poti na ini wan strafu-oso na Rome. Yu ben de na ini strafu-oso wan tu leisi kaba, ma disi leisi yu de seiker taki den o kiri yu. Wan tu fu den mati fu yu gowe libi yu èn yu weri srefisrefi.​—2 Tim. 1:15.

17. Fa Paulus ben kan denki?

¹⁷ Na ini a situwâsi dati Paulus ben kan prakseri fa en libi ben de fosi. A ben kan prakseri tu taki efu a ben teki tra bosroiti den no ben o tyari en go sroto. En ati ben kan bron nanga den man di ben gowe libi en di a ben de na Asia èn a ben kan lasi a frutrow di a ben abi na ini den tra mati fu en. Toku dati no pasa. Fu san ede Paulus ben de seiker taki den mati fu en no ben o gowe libi en èn taki Yehovah ben o blesi en?

18. San Paulus du na ini a situwâsi fu en?

¹⁸ (3) Denki dipi fu san yu leisi. Pruberi fu piki na aksi disi: ’San Paulus du na ini a situwâsi fu en?’ Paulus ben sabi taki den ben o kiri en, ma noiti a no frigiti san ben de moro prenspari. A ben sabi taki a moro prenspari fu gi glori na Yehovah. Dati meki ala ten a ben e prakseri fa a ben kan gi sma deki-ati. A ben lobi begi Yehovah fu di a ben e frutrow na en tapu (2 Tim. 1:3). Na presi fu poti prakseri nomo na den sma di ben gowe libi en, Paulus ben sori warderi gi den mati fu en di ben e horibaka gi en ala ten. Boiti dati, Paulus tan studeri Gado Wortu doronomo (2 Tim. 3:16, 17; 4:13). San moro prenspari, na taki a ben de seiker taki Yehovah nanga Yesus ben lobi en. Den no gowe libi en èn a ben sabi taki den ben o blesi en fu a wroko di a ben du.

19. Fa Yehovah yepi Paulus?

¹⁹ Yehovah ben warskow Paulus taki a ben o kisi frufolgu fu di a ben de wan Kresten (Tori 21:11-13). Fa Yehovah yepi Paulus? A piki den begi fu Paulus èn a gi en krakti fu horidoro (2 Tim. 4:17). Yehovah ben pramisi en taki a ben o kisi a blesi di a ben wroko so tranga fu kisi. Boiti dati, Yehovah ben meki den mati fu Paulus yepi en tu.

20. Te yu e luku Romesma 8:38, 39, dan san yepi Paulus fu horidoro di a kisi tesi? Fa wi kan de leki en?

²⁰ (4) Du san yu leri. Aksi yusrefi: ’Fa mi kan de leki Paulus?’ Neleki Paulus, wi musu fruwakti taki wi o kisi frufolgu fu di wi e dini Yehovah (Mark. 10:29, 30). Efu wi wani tan horidoro aladi wi e kisi tesi, dan wi musu tan begi Yehovah fu di wi  e frutrow na en tapu èn wi musu abi a gwenti fu studeri Bijbel. Wi musu memre ala ten taki wan fu den moro prenspari sani di wi kan du, na fu gi Yehovah glori. Wi kan de seiker taki Yehovah noiti no o gowe libi wi èn nowan sma o man tapu Yehovah fu lobi wi.​—Leisi Romesma 8:38, 39; Hebr. 13:5, 6.

21. San yepi Aya nanga Hector fu pasa den problema fu den?

²¹ Awinsi na ini sortu situwâsi wi de, wi kan kisi deki-ati fu den eksempre fu sma na ini Bijbel. Aya, wan pionier sisa na ini Yapan, taki dati a tori fu Yona yepi en fu no frede fu preiki na presi pe furu sma de. Hector na wan yongu preikiman na ini Indonesia. En papa nanga mama no e dini Yehovah, ma a taki dati na eksempre fu Rut gi en deki-ati fu leri moro fu Yehovah èn fu dini en.

22. Fa yu kan leri moro fu den span Bijbeltori nanga den artikel „Teki na eksempre fu sma di ben abi bribi”?

²² Pe yu kan feni moro fu den Bijbel eksempre di e gi yu deki-ati? Den felem, den span Bijbeltori, nanga den artikel di nen „Teki na eksempre fu sma di ben abi bribi” e leri wi moro fu den sma na ini Bijbel. * Fosi yu luku, arki noso leisi den sani disi, dan aksi Yehovah fu yepi yu fu feni prenspari les na ini den di kan yepi yu. Prakseri fa a ben o de efu yu ben de a sma na ini a tori. Denki dipi fu den sani di den futuboi fu Yehovah du èn fa a yepi den fu pasa den problema fu den. Baka dati gebroiki den sani di yu leri na ini yu eigi libi. Taigi Yehovah tangi fu di a e yepi yu nownow kaba. Suku fasi fu yepi trawan èn fu gi den deki-ati. Na so yu e sori taki yu breiti taki Yehovah yepi yu.

23. San Yehovah pramisi fu du gi wi, soleki fa Yesaya 41:10, 13 e sori?

²³ Fu di Satan e tiri a grontapu disi, meki a libi kan hebi gi wi èn son leisi wi no sabi san fu du srefi (2 Tim. 3:1). Ma wi no abi fu bruya èn wi no abi fu frede. Yehovah sabi san e miti wi. Te wi fadon, dan a e pramisi wi taki a o hori wi nanga en tranga reti-anu. (Leisi Yesaya 41:10, 13.) Wi de seiker taki Yehovah o yepi wi èn Bijbel o gi wi a krakti di wi abi fanowdu fu pasa iniwan problema.