1. Soleki fa Mateyus 24:9 e sori, dan fu san ede a no musu fruwondru wi taki grontapu e teige wi?

YEHOVAH meki wi na so wan fasi taki wi kan sori lobi gi trawan èn taki wi e prisiri te trawan e sori lobi gi wi. Dati meki a kan hati wi èn son leisi a kan frede wi srefi te wan sma e teige wi. Wan sisa di nen Georgina èn di e libi na ini Europa e taki: „Di mi ben abi 14 yari, dan mi mama bigin teige mi fu di mi ben e dini Yehovah. Mi ben e firi taki a no ben lobi mi, èn mi bigin aksi misrefi efu mi na wan bun sma.” * Wan brada di nen Danylo skrifi: „Di srudati naki mi, di den kosi mi, èn di den tapu skreki gi mi fu di mi na wan Yehovah Kotoigi, dan mi ben e frede èn mi ben e firi syen.” A e hati te sma e du den sortu sani disi nanga wi, ma a no e fruwondru wi. Yesus ben taki dati sma ben o teige wi.​—Leisi Mateyus 24:9.

2-3. Fu san ede sma e teige den bakaman fu Yesus?

² Grontapu e teige den bakaman fu Yesus. Fu san ede? Fu di wi no de „wan pisi fu grontapu” (Yoh. 15:17-19). Aladi wi e lespeki den regering, toku wi no e teki sei na ini politiek. Wi no e taki a fraga odi èn wi no e singi a singi fu a kondre. Wi e anbegi Yehovah wawan. Wi e bribi taki na Gado wawan abi a reti fu tiri libisma. Ma Satan nanga den bakaman fu en no feni taki Gado abi a reti dati (Gen. 3:1-5, 15). Wi e preiki taki na Gado Kownukondre wawan o lusu den problema fu libisma èn taki heri esi a Kownukondre o tyari wan kaba kon na ala sma di e gens en (Dan. 2:44; Openb. 19:19-21). A boskopu dati na bun nyunsu gi den safri-ati sma, ma na takru nyunsu gi den ogri sma.​—Ps. 37:10, 11.

 ³ Sma e teige wi tu fu di wi e hori wisrefi na den wet fu Gado. Den wet disi de heri tra fasi leki fa den sma fu a grontapu disi e denki now. Furu sma no feni taki a fowtu fu abi seks na ala sortu fasi. Ma na fu den sani dati ede Gado ben pori den sma fu Sodom nanga Gomora (Yud. 7). Fu di wi e hori wisrefi na den wet fu Bijbel di abi fu du nanga den sani dati, meki sma e spotu wi èn den e taki dati wi e desko trawan.​—1 Petr. 4:3, 4.

4. Sortu fasi kan yepi wi te sma e teige wi?

⁴ San kan yepi wi fu horidoro te sma e teige wi èn te den e kosi wi? Wi musu abi a tranga bribi taki Yehovah o yepi wi. A bribi fu wi de leki wan skelt di man „kiri a faya fu ala den peiri di na ogriwan e sutu kon na un tapu” (Ef. 6:16). Ma wi no musu abi bribi wawan. Wi musu abi lobi tu. Fu san ede? Fu di lobi „no e mandi esi”. A e frudrage ala sani èn a e yepi wi fu horidoro awinsi sma e du hati sani nanga wi (1 Kor. 13:4-7, 13). Meki wi go luku now fa lobi gi Yehovah, lobi gi wi brada nanga sisa, èn srefi lobi gi den feanti fu wi kan yepi wi fu horidoro te sma e teige wi.

5. Fa a lobi di Yesus ben abi gi en Tata yepi en?

⁵ A neti fosi den feanti fu Yesus kiri en, Yesus taigi den bakaman fu en: „Fu meki grontapu sabi taki mi lobi a Tata, meki mi e du san a Tata taigi mi fu du” (Yoh. 14:31). A lobi di Yesus abi gi Yehovah gi en krakti fu man horidoro di hebi tesi miti en. A lobi di wi abi gi Yehovah kan yepi wi fu horidoro tu.

6. Soleki fa Romesma 5:3-5 e sori, dan fa den futuboi fu Yehovah e firi te den e kisi frufolgu?

⁶ Ala ten lobi gi Gado yepi den futuboi fu en fu horidoro di sma ben e frufolgu den. Di a makti hei krutubangi fu den Dyu ben taigi den apostel fu tapu nanga a preikiwroko fu den, dan lobi gi Gado meki taki den „gi yesi na en moro leki na libisma” (Tori 5:29; 1 Yoh. 5:3). A tranga lobi disi e gi wi brada nanga sisa na ini a ten disi deki-ati tu èn furu fu den e tan horidoro aladi ogri-ati regering di abi furu makti e frufolgu den. Wi no e lasi-ati, ma wi e si en leki wan grani fu horidoro aladi a grontapu disi e teige wi.​—Tori 5:41; leisi Romesma 5:3-5.

7. San wi musu du te famiriman e gens wi?

⁷ Te wi eigi famiri e gens wi, dan dati kan de wan hebi tesi gi wi. Te wi wani kon sabi moro fu a waarheid, dan son famiriman kan denki taki sma o kori wi. Trawan kan denki taki na law wi e law. (Luku Markus 3:21.) Kande den e du ogri nanga wi srefi. Te den sani disi e pasa, dan dati no musu fruwondru wi. Yesus ben taki: „Wan sma sa abi feanti na ini en eigi osofamiri” (Mat. 10:36). Ma awinsi fa wi famiri e denki fu wi, wi no e si den leki feanti. Na presi fu dati, wi e kon abi moro lobi gi sma te a lobi di wi abi gi Yehovah e kon moro tranga (Mat. 22:37-39). Ma noiti wi o trangayesi den wet fu Bijbel, soso fu meki trawan firi bun.

8-9. San yepi wan sisa fu horidoro aladi a ben e kisi hebi tesi?

⁸ Georgina, di wi ben kari kaba na ini a artikel disi, ben man horidoro aladi en mama ben e gens en na wan ogri-ati fasi. Georgina e taki: „Mi nanga mi mama bigin studeri Bijbel nanga den Yehovah Kotoigi. Ma siksi mun baka dati di mi ben wani go na den konmakandra, dan mi mama bigin gens mi. Mi kon sabi taki a ben e leisi sani fu sma di ben drai baka gi  a tru bribi, èn a ben e gebroiki den falsi leri fu den te a ben e taki nanga mi. A ben e kosi mi tu, a ben e hari mi wiwiri, a ben tyokro mi, èn a trowe den buku fu mi gowe. Baka di mi tapu 15 yari, mi dopu. Fu di mi mama ben wani tapu mi fu dini Yehovah, meki a poti mi na ini wan internaat gi pikin di ben e du ogri. Sonwan fu den pikin drape ben e gebroiki drugs èn den ben e du ogri-ati sani. A muilek srefisrefi fu horidoro te wan sma di musu lobi yu èn di musu sorgu gi yu e gens yu.”

⁹ San yepi Georgina fu horidoro? A e taki: „A no langa baka di mi kaba leisi a heri Bijbel, mi mama bigin gens mi. Now mi ben de seiker taki mi ben feni a tru bribi, èn mi ben e firi taki Yehovah de krosibei fu mi trutru. Mi ben gwenti begi Yehovah èn a ben e arki mi. Di mi ben e libi nanga mi mama, dan wan sisa kari mi kon na en oso èn wi bigin studeri Bijbel makandra. Na a srefi ten, den brada nanga sisa ben e gi mi deki-ati. Den ben meki mi firi taki den ben de mi famiri. Mi si nanga mi eigi ai taki Yehovah tranga moro ala den gensman fu wi.”

10. San Yehovah o du gi wi ala ten?

¹⁰ Na apostel Paulus ben skrifi taki noti „man prati wi fu a lobi fu Gado, di wi Masra Krestes Yesus abi tu” (Rom. 8:38, 39). A kan taki wi o pina fu wan pisi ten, ma ala ten Yehovah o de na wi sei fu trowstu wi èn fu gi wi krakti. Èn soleki fa na ondrofenitori fu Georgina e sori, Yehovah e meki brada nanga sisa na ini a gemeente yepi wi tu.

11. Soleki fa Yohanes 15:12, 13 e sori, dan fa a lobi fu Yesus yepi den disipel fu en? Gi wan eksempre.

¹¹ A neti fosi Yesus dede, a memre den disipel fu en fu lobi makandra. (Leisi Yohanes 15:12, 13.) A ben sabi taki a lobi disi ben o yepi den fu abi wánfasi èn fu horidoro aladi grontapu ben e teige den. Luku na eksempre fu a gemeente na ini Tesalonika. Sensi di a gemeente disi seti, den brada nanga sisa dati kisi frufolgu. Toku den tan du san Gado ben aksi den èn den tan sori lobi gi makandra (1 Tes. 1:3, 6, 7). Paulus ben gi den deki-ati fu lobi makandra. A ben taigi den fu lobi makandra moro srefi (1 Tes. 4:9, 10).  Lobi ben o gi den deki-ati fu trowstu den wan di ben lasi-ati èn fu yepi den wan di ben abi problema (1 Tes. 5:14). A de krin taki den du san Paulus taigi den, fu di na ini a di fu tu brifi di a ben skrifi pikinmoro wán yari baka dati, Paulus taigi den: „A lobi di ibriwan fu unu abi gi makandra, e kon tranga moro nanga moro” (2 Tes. 1:3-5). A lobi fu den yepi den fu horidoro aladi den ben e kisi tesi nanga frufolgu.

12. Fa brada nanga sisa na ini wan kondre sori lobi gi makandra di feti ben de?

¹² Luku na ondrofenitori fu Danylo di ben kari kaba na ini a artikel disi. Di feti broko na ini a foto fu en, dan en nanga a wefi fu en tan go na den konmakandra, den tan du muiti fu go na ini a preikiwroko èn den prati a pikinso nyanyan di den ben abi nanga den brada nanga sisa fu den. Ne wan dei, srudati nanga gon, go na Danylo. Danylo e fruteri: „Den ben wani taki mi drai baka gi a bribi fu mi. Di mi weigri fu du dati, dan den fon mi èn den sutu abra mi ede fu meki mi denki taki den ben o kiri mi. Fosi den gowe, den taigi mi taki den ben o drai kon baka fu verkracht a frow fu mi. Ma den brada fu a gemeente fu wi tyari wi gowe esi-esi so taki wi ben kan teki loko go na wan tra foto. Noiti mi o frigiti a lobi di den brada dati sori wi. Di wi doro na a ini a nyun foto, dan den brada drape gi wi nyanyan èn den yepi mi fu feni wan wroko nanga wan oso. Na so tra Kotoigi di ben lowe gi a feti ben kan kon tan nanga unu.” Den ondrofenitori dati e sori taki a lobi di Kresten abi gi makandra kan yepi wi fu horidoro aladi sma e teige wi.

13. Fa santa yeye e yepi wi fu horidoro, srefi te sma e teige wi?

¹³ Yesus ben taigi den bakaman fu en fu lobi den feanti fu den (Mat. 5:44, 45). A san dati makriki fu du? Kwetikweti! Ma a santa yeye fu Gado e yepi wi fu du dati. Den fasi di a yeye fu Gado e meki sma kisi na lobi, pasensi, switifasi, safri-ati, èn a dwengi di wan sma man dwengi ensrefi (Gal. 5:22, 23). Den fasi disi e yepi wi fu horidoro te sma e teige wi. Furu gensman kenki prakseri fu di wan masra, wan wefi, wan pikin, noso wan birtisma di e dini Yehovah sori den moi fasi disi. Furu  gensman tron wi brada nanga sisa srefi. Sobun, efu yu feni en muilek fu lobi sma di e teige yu fu di yu e dini Yehovah, dan begi fu kisi santa yeye (Luk. 11:13). Yu kan de seiker taki ala ten a moro bun fu gi yesi na Gado.​—Odo 3:5-7.

14-15. Fa Romesma 12:17-21 yepi Yasmeen fu sori lobi gi en masra aladi a ben gens en na wan ogri-ati fasi?

¹⁴ Luku na eksempre fu wan sisa di nen Yasmeen. Di a tron wan Yehovah Kotoigi, dan en masra ben feni taki sma ben kori en èn a pruberi fu tapu en fu dini Gado. A ben kosi en èn a ben gi famiriman, wan kerki fesiman, nanga wan bonuman a deki-ati fu tapu skreki gi en èn fu taigi en taki a e tyari prati kon na ini en osofamiri. En masra go kosi den brada srefi na wan fu den konmakandra. Furu tron Yasmeen ben e krei fu di en masra ben e libi so takru nanga en.

¹⁵ Den brada nanga sisa na a Kownukondre zaal trowstu Yasmeen èn den gi en deki-ati. Den owruman taigi en fu du san skrifi na Romesma 12:17-21. (Leisi en.) Yasmeen e taki: „A ben muilek. Ma mi aksi Yehovah fu yepi mi èn mi du ala san mi man fu gi yesi na san Bijbel e taki. Di mi masra fringi santi kon na ini a kukru fu espresi, dan mi krin en. Di a kosi mi, mi no taki grofu nanga en. Èn di a ben siki, mi sorgu gi en.”

16-17. San yu leri fu na eksempre fu Yasmeen?

¹⁶ A muiti di Yasmeen du fu sori lobi gi en masra, no ben de fu soso. A e taki: „Mi masra bigin frutrow mi moro fu di a ben sabi taki noiti mi ben o lei gi en. A bigin arki mi na wan lespeki fasi te wi ben e taki fu Gado èn a pramisi mi taki a ben o libi moro bun nanga mi. Now a e gi mi deki-ati fu go na den konmakandra. Na osofamiri-libi fu wi e waka moro bun èn freide de na ini wi oso now. Mi howpu taki wan dei mi masra o opo en ati gi a waarheid èn taki a o dini Yehovah makandra nanga mi.”

¹⁷ Na eksempre fu Yasmeen e sori taki lobi „e frudrage ala sani, . . . a e howpu ala sani, èn a e horidoro awansi san e pasa” (1 Kor. 13:4, 7). Te sma e teige wi, dan dati kan hati srefisrefi, ma lobi abi moro krakti. A kan kenki sma èn a e meki Yehovah prisiri. Ma awinsi gensman e teige wi, toku wi kan de koloku. Fa so?

18. Fu san ede wi kan de koloku awinsi sma e teige wi?

¹⁸ Yesus ben taki: „Koloku fu unu te sma no lobi unu kwetikweti” (Luk. 6:22). Nowan sma lobi te sma e teige den noso te sma e frufolgu den fu a bribi fu den ede. Ma fu san ede wi kan de koloku te den sani disi e pasa nanga wi? Dri reide de. A fosiwan, na taki Gado o breiti nanga wi te wi e horidoro (1 Petr. 4:13, 14). A di fu tu, na taki a bribi fu wi e kon moro tranga (1 Petr. 1:7). A di fu dri, na taki wi o kisi wan bigi blesi, têgo libi.​—Rom. 2:6, 7.

19. Fu san ede den apostel ben e firi koloku baka di sma wipi den?

¹⁹ Syatu baka di Yesus kisi wan opobaka, den apostel ben e firi koloku, soleki fa Yesus ben taki. Baka di sma ben wipi den èn ben taigi den fu tapu nanga a preikiwroko fu den, den ben e prisiri. Fu san ede? Fu di den ben e si en leki wan grani fu kisi syen fu Yesus nen ede (Tori 5:40-42). A lobi di den ben abi gi a Masra fu den ben bigi moro a frede di den ben frede den feanti fu den. Den sori a lobi fu den di den tan preiki a bun nyunsu „doronomo”. Furu fu wi brada nanga sisa na ini a ten disi e tan dini Gado, awinsi den e kisi problema. Den sabi taki Yehovah no o frigiti a wroko di den du èn a lobi di den abi gi a nen fu en.​—Hebr. 6:10.

20. San wi o luku na ini a tra artikel?

²⁰ Solanga na ogri grontapu disi de, sma o teige wi (Yoh. 15:19). Ma wi no abi fu frede. Soleki fa wi o si na ini a tra artikel, Yehovah ’o gi wi deki-ati èn a o kibri’ den sma di e tai hori na en (2 Tes. 3:3). Sobun, meki wi tan sori lobi gi Yehovah, gi wi brada nanga sisa, èn srefi gi den feanti fu wi. Te wi e teki a rai disi, dan wi o tan abi wánfasi èn a bribi fu wi o tranga. Wi o gi grani na Yehovah èn wi o sori taki lobi tranga moro bita-ati.