1-2. Suma kan yepi wan Bijbelstudenti fu go na fesi fu man teki dopu?

AMY di e libi na ini Fidyi e taki: „Mi ben lobi san mi ben e leri fu Bijbel. Mi ben sabi taki disi na a waarheid. Ma na di mi bigin moksi nanga den brada nanga sisa, dan fosi mi bigin tyari kenki kon fu man teki dopu.” A sani disi e leri wi wan prenspari sani. Furu tron a sani di e yepi wan Bijbelstudenti fu go na fesi, na te a e kisi yepi fu trawan na ini a gemeente.

² Ibri preikiman kan yepi fu tyari nyun sma kon na ini a gemeente (Ef. 4:16). Leilani, wan pionier sisa di e libi na ini Vanuwatu, e taki: „Wan odo e taki dati wan heri dorpu de fanowdu fu kweki wan pikin. Mi denki taki na so a de tu te wi e meki disipel. Nofo tron a heri gemeente de fanowdu fu tyari wan sma kon na ini waarheid.” Papa nanga mama, famiriman, mati fu a famiri, nanga den leriman na skoro, den alamala de fanowdu fu yepi wan pikin fu tron wan bigisma. Den e gi a pikin deki-ati èn den e leri en prenspari sani. Na so a de tu nanga Bijbelstudenti. Wan preikiman kan gi en rai, a kan gi en deki-ati, èn a kan de wan bun eksempre gi en. Disi o yepi en fu go na fesi fu man teki dopu.​—Odo 15:22.

3. San yu e leri fu den sani di Ana, Daniel, nanga Leilani taki?

³ Fu san ede a preikiman di e studeri Bijbel nanga wan sma musu breiti te trawan na ini a gemeente wani yepi en nanga a studenti? Luku san Ana, wan spesrutu pionier na ini Moldafia, e taki: „Wan Bijbelstudenti abi furu yepi fanowdu èn wán sma nomo no o man yepi en.” Daniel, *  wan spesrutu pionier na ini a srefi kondre, e taki: „Furu tron tra preikiman e taki wan sani di mi no ben denki fu taki, ma na a sani dati e naki na ati fu a studenti.” Leilani e taki tu: „A lobi nanga a switifasi di wi e sori gi a studenti kan yepi en fu si taki wi na a pipel fu Yehovah.”​—Yoh. 13:35.

4. San wi o luku na ini na artikel disi?

⁴ Ma kande yu e aksi yusrefi: ’Efu wan Bijbelstudie a no fu mi, dan san mi kan du fu yepi en fu go na fesi?’ Meki wi go luku san wi kan du te wan brada noso wan sisa e aksi wi fu go nanga en na wan Bijbelstudie, èn wi o luku san wi kan du te a Bijbelstudenti e kon na den konmakandra. Wi o luku tu fa owruman kan yepi Bijbelstudenti fu go na fesi fu man teki dopu.

5. San yu musu du te wan sma e aksi yu fu go nanga en na wan Bijbelstudie?

⁵ Te wan sma e studeri Bijbel nanga wan trawan, dan na en abi a frantwortu fu yepi a sma fu frustan Gado Wortu. Efu wan sma e aksi yu fu go nanga en na wan Bijbelstudie, dan yu na en preikiwroko patna. Sobun, na yepi yu musu yepi en (Preik. 4:9, 10). Ma fa yu kan yepi en fu meki wan Bijbelstudie waka moro bun?

6. Te wan sma aksi yu fu go na wan Bijbelstudie nanga en, dan fa yu kan gebroiki a gronprakseri na Odo 20:18?

⁶ Sreka yusrefi gi a Bijbelstudie. Fosi yu go, aksi a brada noso a sisa fu fruteri yu pikinso fu a studenti. (Leisi Odo 20:18.) Yu kan aksi en: „Suma na a sma? San yu o studeri nanga en? San yu wani leri en nanga a studie disi? Wan sani de di mi musu taki noso du na a studie? Sortu sani mi no musu taki noso du? Fa mi kan gi a studenti deki-ati fu go na fesi?” A no de fu taki dati a brada noso a sisa no o fruteri yu ala inibere tori fu a sma, ma den sani di a e fruteri kan yepi yu. Na disi wan zendeling di nen Joy e du. Te a e tyari sma go na a studie fu en, dan na den sortu sani disi a e fruteri den. A e taki: „Den sortu sani disi e yepi a sma di e go nanga mi fu kon sabi a studenti moro bun èn fu sabi san a musu taki fu yepi a studie.”

7. Te wan sma aksi yu fu go nanga en na wan Bijbelstudie, dan fu san ede yu musu sreka yusrefi?

⁷ Efu wan sma e aksi yu fu go nanga en na wan Bijbelstudie, dan a ben o bun efu yu e teki ten fu sreka a pisi di unu o studeri (Esra 7:10). Daniel, a brada di ben kari kaba na ini na artikel disi, e taki: „Mi breiti te a sma di e go nanga mi na a Bijbelstudie e sreka ensrefi. Dan a kan taki sani di e yepi a studenti.” Wan tra sani, na taki a  studenti o man si taki un ala tu sreka bun èn disi o de wan bun eksempre gi en. Awinsi yu no man sreka ala sani finifini, toku a bun fu luku san na den moro prenspari sani na ini a pisi di unu o studeri.

8. Te yu musu begi na wan Bijbelstudie, dan san kan yepi yu fu taki sani di o naki na ati fu a studenti?

⁸ Begi prenspari te wi e studeri nanga wan sma. Dati meki yu musu denki bun san yu o taki efu a brada noso a sisa e aksi yu fu begi na a studie. Disi o yepi yu fu taki sani di e naki a sma ati (Ps. 141:2). Luku na ondrofenitori fu Hanae, di e libi na ini Yapan. A sma di ben e studeri Bijbel nanga en ben gwenti tyari wan sisa kon na a studie èn te now ete Hanae e memre den begi fu a sisa disi. A e taki: „Mi ben e firi taki a ben lobi Yehovah trutru èn mi ben wani de leki en. Mi ben firi tu taki a ben lobi mi te a ben e kari mi nen na ini den begi fu en.”

9. Te yu e luku Yakobus 1:19, dan fa yu kan yepi wan brada noso wan sisa di tyari yu go na wan Bijbelstudie?

⁹ Yepi a sma di e hori a studie. Wan spesrutu pionier na ini Nigeria e taki: „Efu yu wani yepi yu brada noso sisa, dan yu musu arki bun te a e studeri nanga a sma. Yu kan taki sani di e yepi a studenti, ma yu no musu taki tumusi furu, fu di yu e frustan taki a no yu abi a studie.” Fa yu kan sabi san yu musu taki èn o ten yu musu taki wan sani na a studie? (Odo 25:11) Arki bun te a brada noso a sisa e taki nanga a studenti. (Leisi Yakobus 1:19.) Soso te yu e du disi, yu o man yepi a brada noso a sisa na a yoisti fasi. A no de fu taki dati yu musu denki fosi yu taki wan sani. Yu no wani taki tumusi furu. Te a brada noso a sisa e taki, yu no wani koti en mofo, èn yu no wani bigin taki fu wan heri tra tori. Ma te yu e taki wan syatu sani, te yu e fruteri wan agersitori, noso te yu e poti wan aksi, dan yu kan yepi a sma fu kon frustan wan tori moro bun. Son leisi, yu kan feni taki yu no abi noti fu taki. Ma te yu e prèise a studenti èn te yu e sori en taki yu wani leri sabi en moro bun, dan dati o yepi en fu go na fesi.

10. Fa den sani di yu ondrofeni kan yepi wan Bijbelstudenti?

¹⁰ Fruteri a studenti fu den sani di yu ondrofeni. Te a fiti, dan yu kan fruteri a studenti syatu fa yu kon sabi a waarheid, fa yu pasa wan tesi, noso fa yu si taki Yehovah e yepi yu na ini yu libi (Ps. 78:4, 7). Kande na disi o yepi a studenti. A kan tranga a bribi fu en, noso a kan gi en deki-ati fu tan go na fesi teleki a dopu. Den ondrofenitori fu yu kan sori en san a kan du te tesi miti en (1 Petr. 5:9). Gabriel di e libi na Brasyonkondre èn di e dini leki pionier now, e memre ete san ben yepi en di  sma ben e studeri Bijbel nanga en. A taki: „Den ondrofenitori fu den brada ben leri mi taki Yehovah e si den problema di e miti wi. Èn efu den ben man pasa den problema, dan mi man du dati tu.”

11-12. Fu san ede wi musu gi Bijbelstudenti wan switikon te den kon na den konmakandra?

¹¹ Efu wan Bijbelstudenti wani go na fesi fu man teki dopu, dan a musu go na den konmakandra doronomo. Disi o yepi en fu go na fesi (Hebr. 10:24, 25). A no de fu taki dati a sma di e studeri nanga en o kari en kon na den konmakandra. Te a e kon, dan wi alamala musu gi en deki-ati fu tan kon na den konmakandra. Fa wi kan du dati?

¹² Gi a studenti wan switikon (Rom. 15:7). Efu wi e gi a studenti wan switikon, dan kande tra leisi a o wani kon baka na a Kownukondre zaal. Gi en odi èn meki a firi taki yu breiti taki a kon. Ma no du en na so wan fasi taki a sma e bigin firi syen. Tyari en fu miti den tra brada nanga sisa. No denki taki na soso a sma di e studeri nanga en kan yepi en fu du den sani disi. Kande a brada noso a sisa dati lati pikinso, noso kande a musu du tra sani. Arki bun san a studenti e taki èn sori en taki yu wani leri sabi en moro bun. Fa disi kan yepi a studenti? Luku na ondrofenitori fu Dimitri di dopu no so langa pasa èn di de wan dinari na ini a diniwroko now. A e fruteri san ben pasa a fosi leisi di a go na den konmakandra. A e taki: „Di mi ben e wakti na dorosei fu a Kownukondre zaal, dan wan brada ben si fa mi ben e senwe. A kon taki nanga mi na wan switi fasi, dan a tyari mi go na inisei. Furu sma kon taki mi odi. Mi no ben man bribi. Mi ben lobi a sani dati so te, taki mi ben winsi taki konmakandra ben de ibri dei fu a wiki. Noiti ete mi ben firi so.”

13. Fa a bun eksempre fu yu kan yepi wan Bijbelstudenti?

¹³ De wan bun eksempre. A fasi fa yu e tyari yusrefi kan yepi wan Bijbelstudenti fu kon si taki a feni a tru bribi (Mat. 5:16). Vitali di e dini leki pionier now na ini Moldafia e taki: „Mi kon sabi fa trawan na ini a gemeente e libi, fa den e denki, èn fa den e tyari densrefi. Disi yepi mi fu kon si taki Yehovah Kotoigi abi a tru bribi.”

14. Fa na eksempre fu yu kan yepi wan sma fu tan go na fesi?

¹⁴ Efu wan Bijbelstudenti wani teki dopu, dan a musu du san a e leri. A sani disi no makriki ala ten. Ma te a e si fa den Bijbel gronprakseri e yepi yu, dan dati kan gi en deki-ati fu teki na eksempre fu yu (1 Kor. 11:1). Luku na ondrofenitori fu Hanae di ben kari kaba na ini na artikel disi. A e taki: „Fu di den brada nanga sisa  ben e du den sani di mi ben e leri, meki mi ben man si fa mi musu gi trawan deki-ati, fa mi musu gi den pardon, èn fa mi musu sori lobi. Ala ten den ben e taki bun fu trawan, èn mi ben wani de leki den.”

15. Fa Odo 27:17 e yepi wi fu si fu san ede wi musu tron mati fu wan Bijbelstudenti te a e kon na den konmakandra?

¹⁵ Tron wan mati fu a studenti. Te a studenti e bigin kon na den konmakandra, dan tan poti prakseri na en (Fil. 2:4). Yu kan prèise en gi den bun kenki di a e tyari kon na ini en libi, èn yu kan aksi en fa a e go nanga a studie fu en, nanga en osofamiri, èn nanga a wroko fu en. Ma no gi en a firi taki yu wani bumui na ini en libi. Te yu e du muiti fu kon sabi en moro bun, dan unu o tron moro bun mati. Disi o yepi en fu go na fesi èn fu teki dopu. (Leisi Odo 27:17.) Now Hanae na wan gewoon pionier. A sabi ete fa a ben e firi di a bigin go na den konmakandra. A e taki: „Di mi bigin meki mati na ini a gemeente, dan a ben e gi mi prisiri fu go na den konmakandra èn mi ben e go srefi te mi ben weri. Mi ben lobi de makandra nanga den nyun mati fu mi èn disi yepi mi fu lusu den mati di no ben e dini Yehovah. Mi ben wani tron wan moro bun mati fu Yehovah èn fu den brada nanga sisa. Dati meki mi bosroiti fu teki dopu.”

16. Sortu tra sani yu kan du fu yepi wan Bijbelstudenti fu firi taki a de wan pisi fu a gemeente?

¹⁶ Te a studenti e go na fesi, dan yu musu yepi en fu firi taki a de wan pisi fu a gemeente. Wán fasi fa yu kan du disi, na te yu e sori switifasi gi en (Hebr. 13:2). Denis di e dini na ini Moldafia, e memre a ten di a ben e studeri Bijbel. A e taki: „Difrenti leisi den brada nanga sisa kari mi nanga mi wefi fu kon na den oso. Den fruteri wi fa Yehovah ben yepi den. A sani dati gi wi deki-ati. Disi ben meki taki wi ben wani dini Yehovah èn wi ben e bribi taki wan moi ten ben e wakti wi.” Te wan Bijbelstudenti tron preikiman, dan yu kan aksi en fu wroko nanga yu na ini a preikiwroko. Diego, wan preikiman fu Brasyonkondre e taki: „Furu brada nanga sisa aksi mi fu wroko nanga den na ini a preikiwroko. Na so mi kon sabi den moro bun. Mi leri furu fu den èn mi kon moro krosibei na Yehovah nanga Yesus.”

17. Fa owruman kan yepi Bijbelstudenti?

¹⁷ Meki ten gi Bijbelstudenti. Owruman, te unu e sori den Bijbelstudenti taki unu lobi den èn taki unu e broko unu ede nanga den, dan dati kan yepi den fu go na fesi èn fu teki dopu te fu kaba. Kande yu kan meki ten fu taki nanga den Bijbelstudenti  na den konmakandra. Den o firi taki yu e broko yu ede nanga den te yu e kari den na den nen, spesrutu te den e bigin gi piki. Kande yu kan seti sani, so taki ten na ten yu e go nanga wan preikiman na wan Bijbelstudie fu en. Yu no kan sabi fa a sani dati o yepi a Bijbelstudenti. Jackie, wan pionier di e libi na ini Nigeria e fruteri: „Furu Bijbelstudenti no man bribi te den kon sabi taki a brada di ben kon nanga mi na a studie fu den, na wan owruman.” Wan Bijbelstudenti ben taki: „A pastor fu mi noiti no ben o du dati. A e go soso na den gudusma èn soso te den e pai en!” Now a Bijbelstudenti dati e go na den konmakandra.

18. Fa owruman kan du san skrifi na Tori 20:28?

¹⁸ Gi den preikiman deki-ati èn yepi den fu de bun preikiman. Owruman unu abi a prenspari frantwortu fu yepi den brada nanga sisa fu de bun preikiman nanga leriman. (Leisi Tori 20:28.) Efu wan sma e syen fu hori a Bijbelstudie te yu de drape, dan aksi en efu yu kan hori a studie. Jackie, di wi ben kari kaba, e taki: „Den owruman gwenti aksi mi fa a e go nanga den Bijbelstudenti fu mi. Te mi no sabi fa mi musu yepi wan Bijbelstudenti, dan den owruman e gi mi bun rai.” Owruman kan du furu fu yepi den preikiman fu horidoro (1 Tes. 5:11). Jackie e taki moro fara: „Mi lobi te den owruman e gi mi deki-ati èn te den e taigi mi taki den breiti nanga a tranga wroko di mi e du. Den sani dati e gi mi deki-ati. A de neleki mi e dringi wan grasi kowru watra tapu wan waran dei. Den sani di den e taigi mi e meki mi firi taki mi e studeri bun nanga den Bijbelstudenti fu mi èn mi e du en nanga moro prisiri.”​—Odo 25:25.

19. Sortu sani e gi wi alamala prisiri?

¹⁹ Awinsi wi no abi wan Bijbelstudie now, toku wi kan yepi wan sma fu go na fesi teleki a dopu. Te yu de na wan Bijbelstudie, dan yu kan taki wan tu sani fu yepi a sma di abi a studie, ma yu no musu taki tumusi furu. Wi kan tron mati fu den Bijbelstudenti te den e kon na a Kownukondre zaal èn wi kan de bun eksempre gi den. Owruman kan meki ten gi den Bijbelstudenti fu gi den deki-ati. Den kan prèise den preikiman èn leri den fa fu du den wroko moro bun. A e gi wi furu prisiri te wi kan du wan sani fu yepi wan sma fu kon lobi èn dini wi Tata Yehovah, awinsi wi e du wan pikin sani nomo.