1. San wi kan taki fu den yongu brada na ini wi gemeente?

YONGU brada, furu sani de di unu man du. Furu fu unu yongu èn un tranga (Odo 20:29). Unu de wan bigi yepi gi a gemeente. Kande yu wani tron wan dinari ini a diniwroko. Ma kande yu feni taki trawan e taki dati yu yongu tumusi èn taki yu no abi nofo ondrofeni fu du so wan prenspari wroko. Toku a de so, taki awinsi yu yongu, sani de di yu kan du nownow kaba fu meki trawan na ini a gemeente frutrow yu èn lespeki yu.

2. San wi o luku na ini na artikel disi?

² Na ini na artikel disi wi o luku a libi fu Kownu David. Ma wi o luku wan tu sani tu di pasa na ini a libi fu tu kownu fu Yuda, Asa nanga Yosafat. Wi o luku sortu problema ben miti den dri man disi, san den du na ini den situwâsi dati, èn san yongu brada kan leri fu na eksempre fu den.

3. San na wan fasi fa yonguwan kan yepi den owruwan na ini a gemeente?

³ Di David ben de wan yongu man, a ben leri wan tu moi sani. A de krin taki a ben de wan bun mati fu Yehovah. Boiti dati, a leri fu prei poku bun. Èn a gebroiki a koni dati fu yepi Saul, a salfu kownu fu Gado (1 Sam. 16:16, 23). Yu na wan yongu brada di sabi du wan sani bun? Yu kan gebroiki a sani dati fu yepi trawan na ini a  gemeente? Furu yongu brada e du dati. Fu eksempre, kande yu e si taki son owruwan na ini a gemeente breiti te yu e sori den fa den kan gebroiki den tablet noso computer gi den konmakandra noso fu studeri. Yu kan gebroiki a koni fu yu fu yepi den owruwan dati.

4. Sortu moi fasi fu David yongu brada musu kon abi? (Luku a fowtow na tapu a kafti.)

⁴ Sma ben sabi David leki wan yongu man di ben man tyari frantwortu èn di den ben man frutrow. Fu eksempre, di a ben yongu a ben wroko tranga fu luku den skapu fu en papa. Son leisi a ben kan lasi en libi srefi. David ben taigi Kownu Saul: „Mi masra, wan leisi di mi ben e luku den skapu fu mi papa, wan lew kon. Wan tra leisi wan beer kon. Ala tu leisi den meti disi teki wan skapu fu na ipi tyari gowe. Ne mi lon na baka a lew èn mi naki en kiri, dan mi puru a skapu na en mofo” (1 Sam. 17:34, 35). David ben sabi taki na en ben abi a frantwortu fu luku den skapu èn nanga deki-ati a feti fu kibri den. Yongu brada kan de leki David te den de fayafaya fu du iniwan wroko di den kisi.

5. San na a moro prenspari sani di yongu brada kan du, soleki fa Psalm 25:14 e sori?

⁵ David ben yongu ete di a tron wan bun mati fu Yehovah. Gi en a sani dati ben prenspari moro leki a deki-ati fu en èn a koni di a ben abi fu man prei harpu. Yehovah no ben de David en Gado wawan, ma a ben de wan Mati fu en tu​—wan bun Mati. (Leisi Psalm 25:14.) Yongu brada, a moro prenspari sani di un kan du, na fu tron moro bun mati fu un hemel Tata. Dati kan meki taki un kisi moro frantwortu.

6. San son sma ben denki fu David?

⁶ Wan problema di David ben abi, na taki son sma ben feni taki a yongu tumusi èn taki a no ben man tyari frantwortu. Fu eksempre, di David ben wani go feti nanga Goliat, dan Kownu Saul ben wani tapu en fu go. A taigi en: „Yu na wan boi ete” (1 Sam. 17:31-33). Wan pisi ten na fesi David en eigi brada taigi en taki sma no ben man frutrow en (1 Sam. 17:26-30). Ma Yehovah no ben feni taki David ben yongu tumusi èn taki a no ben man tyari frantwortu. A ben sabi David heri bun. Èn fu di David ben e frutrow tapu  en Mati Yehovah, meki a ben man kiri Goliat.​—1 Sam. 17:45, 48-51.

7. San yu kan leri fu den sani di pasa nanga David?

⁷ San yu kan leri fu den sani di pasa nanga David? Wi musu leri fu abi pasensi. Son leisi den sma di ben sabi yu sensi di yu ben pikin no man si taki yu kon bigi now. Ma yu kan de seiker taki Yehovah no e denki so. A sabi suma na yu èn a sabi san yu man du (1 Sam. 16:7). Pruberi fu tron wan moro bun mati fu Gado. Na dati David ben du. A ben poti prakseri na den sani di Yehovah meki èn a ben luku san den sani dati ben e leri en fu a Mekiman (Ps. 8:3, 4; 139:14; Rom. 1:20). Wan tra sani di yu kan du, na fu aksi Yehovah fu gi yu a krakti di yu abi fanowdu. Kande wan tu pikin na skoro e lafu yu fu di yu na wan Yehovah Kotoigi. Efu dati de so, dan begi Yehovah fu yepi yu nanga a problema disi. Gebroiki den rai di yu e feni na ini a Wortu fu en èn na ini den buku nanga felem fu wi di abi fu du nanga Bijbel. Ibri leisi te yu si taki Yehovah yepi yu nanga wan problema, yu o frutrow en moro. Èn te trawan e si taki yu e frutrow tapu Yehovah, dan den o frutrow yu tu.

8-9. San yepi David fu wakti nanga pasensi teleki a tron kownu, èn san yongu brada kan leri fu na eksempre fu en?

⁸ Luku wan tra problema di ben miti David. Baka di den salfu David leki kownu, a ben musu wakti omeni yari fosi a bigin tiri leki kownu fu Yuda (1 Sam. 16:13; 2 Sam. 2:3, 4). San yepi David na a ten dati fu wakti nanga pasensi? David no lasi-ati. Na presi fu dati a luku san a ben kan du na ini a situwâsi fu en. Di David ben e libi leki loweman na ini a kontren fu den Filisteasma, dan a gebroiki a ten dati fu feti nanga den feanti fu Israel. Na so a tapu pasi gi den fu broko kon na ini a kontren fu Yuda.​—1 Sam. 27:1-12.

⁹ San yongu brada kan leri fu na eksempre fu David? Du san yu man fu yepi yu brada nanga sisa. Luku na eksempre fu wan brada di nen Ricardo. * Sensi di a ben de wan yongu boi, a ben wani tron wan gewoon pionier. Ma den owruman ben taki dati a ben musu wakti pikinso. Na presi fu gi abra noso fu atibron, Ricardo bigin du moro na ini a preikiwroko. A taki: „Now mi e si taki mi ben musu du ete wan tu sani. Mi bigin du moro muiti fu go baka na ala den sma di ben wani sabi moro èn mi ben e sreka misrefi ibri leisi fosi mi ben go. Mi bigin hori mi fosi Bijbelstudie srefi. Fu di mi ben e du moro na ini a preikiwroko, meki mi no ben e senwe so leki fosi.” Now Ricardo na wan fayafaya pionier èn wan dinari ini a diniwroko.

10. San David du wan leisi fosi a teki wan prenspari bosroiti?

¹⁰ Luku wan tra sani di ben pasa nanga David. Wan leisi di David nanga den man fu en ben de loweman, den ben libi den frow nanga pikin fu go na feti. Di den gowe, wan tu feanti kon fufuru ala den sani fu den èn den teki den frow nanga pikin tyari gowe. Fu di David ben de wan bun fetiman, meki a ben kan denki taki a ben kan feni wan fasi fu go frulusu den sma fu en. Ma a no du dati. Na presi fu du dati, David aksi Yehovah fu yepi en. David meki wan priester di nen Abiatar aksi Yehovah gi en:  „Mi musu hari go na baka den ogri-ati fufuruman?” Yehovah piki David taki a ben musu go èn taki a ben o frulusu den sma fu en (1 Sam. 30:7-10). San yu kan leri fu a tori disi?

11. San yu kan du fosi yu teki bosroiti?

¹¹ Suku rai na trawan fosi yu teki wan bosroiti. Taki nanga yu papa nanga mama. Yu kan kisi bun rai tu te yu e taki nanga den owruman di abi ondrofeni. Yehovah e frutrow den man disi di a poti fu teki fesi na ini a gemeente èn yu kan frutrow den tu. Yehovah e si den leki „mansma di abi spesrutu koni” (Ef. 4:8). Yu o teki bun bosroiti te yu e sori a srefi bribi leki den èn te yu e teki den koni rai di den e gi yu. Kon meki wi luku now san wi kan leri fu Kownu Asa.

12. Sortu fasi Asa ben abi di a bigin tiri leki kownu?

¹² Di Kownu Asa ben de wan yongu man, a ben abi sakafasi nanga deki-ati. Di a tron kownu baka en papa Abia, a bigin puru falsi anbegi na ini a kondre. „A taigi den sma fu Yuda fu anbegi Yehovah, a Gado fu den afo fu den èn fu hori den wèt nanga den komando fu en” (2 Kron. 14:1-7). Èn di na Etiopiaman Sera kon nanga wan legre fu 1.000.000 srudati fu feti nanga Yuda, dan Asa du wan koni sani. A begi Yehovah fu yepi en. A taki: „Ke Yehovah, te yu wani yepi sma, dan a no abi trobi efu furu sma de, noso efu na wan tu sma nomo de. Yehovah wi Gado, mi e begi yu, yepi wi fu di na ini yu wi poti bribi.” Den moi wortu disi e sori taki Asa ben e bribi trutru taki Yehovah ben o man frulusu en nanga en pipel. Asa ben e frutrow na ini en hemel Tata èn „Yehovah meki Asa nanga den srudati fu Yuda wini den Etiopiasma”.​—2 Kron. 14:8-12.

13. San pasa nanga Asa bakaten èn fu san ede?

¹³ A musu de so, taki Asa ben e frede di wan legre fu 1.000.000 srudati kon feti nanga en. Ma fu di a ben frutrow tapu Yehovah, meki a ben man wini a feti dati. A sari taki Asa no ben frutrow tapu Yehovah di wan tra problema miti en di no ben bigi so. Di na ogri-ati kownu Bayesa fu Israel ben wani kon feti nanga en, dan  Asa go suku yepi na a kownu fu Siria. A bosroiti dati tyari bigi problema kon gi en. Yehovah meki a profeiti Hanani taigi Asa: „Fu di yu no suku yepi na Yehovah yu Gado, ma yu go suku yepi na a kownu fu Siria, meki yu no o wini a legre fu a kownu fu Siria.” Sensi a ten dati Asa ben de na ini feti doronomo (2 Kron. 16:7, 9; 1 Kow. 15:32). San wi e leri fu a tori disi?

14. Fa yu kan sori taki yu e frutrow tapu Yehovah? San o pasa te yu e du dati, soleki fa 1 Timoteyus 4:12 e sori?

¹⁴ Tan sori sakafasi èn tan frutrow tapu Yehovah. Di yu dopu, yu sori taki yu abi wan tranga bribi èn taki yu e frutrow tapu Yehovah. Yehovah ben breiti fu teki yu na ini en famiri. Ma now, yu musu tan frutrow tapu Yehovah. Kande yu feni taki a no muilek fu frutrow tapu Yehovah te yu musu teki prenspari bosroiti na ini yu libi. Ma san yu o du te yu musu teki tra sortu bosroiti? A prenspari srefisrefi taki yu e frutrow tapu Yehovah, awinsi sortu bosroiti yu e teki, a no abi trobi efu yu musu bosroiti sortu prisiri sani yu o du, sortu wroko yu o teki, noso san yu o du nanga yu libi. No frutrow tapu yu eigi koni. Fosi yu teki wan bosroiti, luku sortu Bijbel gronprakseri kan yepi yu na ini a situwâsi dati (Odo 3:5, 6). Te yu e du dati, dan Yehovah o breiti nanga yu èn den sma na ini a gemeente o lespeki yu.​—Leisi 1 Timoteyus 4:12.

15. Sortu fowtu Kownu Yosafat ben meki, soleki fa 2 Kroniki 18:1-3; 19:2 e sori?

¹⁵ A no de fu taki dati wi alamala e meki fowtu èn yu srefi o meki fowtu son leisi. Ma disi no musu tapu yu fu du ala san yu man gi Yehovah. Luku na eksempre fu Kownu Yosafat. A ben abi furu moi fasi. Di a ben de wan yongu man „a ben e suku yepi na a Gado fu en papa èn a ben e gi yesi na den komando fu en”. Boiti dati, a seni granman go na ala foto fu Yuda fu gi a pipel leri fu Yehovah (2 Kron. 17:4, 7). Ma aladi Yosafat ben wani dini Yehovah fayafaya, toku a ben teki don bosroiti son leisi. Wan leisi di Yosafat teki so wan don bosroiti, Yehovah meki  wan sma piri-ai gi en. (Leisi 2 Kroniki 18:1-3; 19:2.) San yu kan leri fu a tori disi?

16. San yu kan leri fu na eksempre fu Rajeev?

¹⁶ Teki den rai di yu e kisi. Furu yonguwan e feni en muilek fu poti na anbegi fu Yehovah na a fosi presi na ini den libi. Ma no lasi-ati. Luku na eksempre fu wan yongu brada di nen Rajeev. Disi na san a taki fu a ten di a ben de wan yongu boi: „Son leisi mi no ben sabi san mi ben o du nanga mi libi. Mi ben de leki furu tra yonguwan. Sport nanga prisiri ben de moro prenspari gi mi. Mi no ben e broko mi ede so furu nanga den konmakandra nanga a preikiwroko.” San yepi Rajeev? Wan owruman di ben e broko en ede nanga en gi en rai. Rajeev fruteri: „A yepi mi fu prakseri san skrifi na 1 Timoteyus 4:8.” Rajeev sori sakafasi èn a teki a rai fu a brada. A go prakseri san ben de a moro prenspari sani na ini en libi. A taki: „Mi bosroiti fu poti na anbegi na a fosi presi na ini mi libi.” Fa sani waka gi en? Rajeev taki: „Wan tu yari baka di mi kisi a rai, mi tron wan dinari ini a diniwroko.”

17. Fa den bigisma na ini a gemeente e si den yongu man di e dini Yehovah?

¹⁷ Den bigisma na ini a gemeente lobi te unu leki yongu man e dini Yehovah makandra nanga den „leki wán man” (Sef. 3:9). Den lobi fa unu e du un wroko nanga prisiri èn fa unu de so fayafaya. Dati meki den breiti nanga unu.​—1 Yoh. 2:14.

18. Soleki fa Odo 27:11 e sori, dan fa Yehovah e si den yongu man di e dini en?

¹⁸ Yongu brada, no frigiti noiti taki Yehovah lobi unu èn taki a e frutrow unu. A ben taki dati na ini den lasti dei wan bigi grupu fu yongu man ben o de klariklari fu dini en (Ps. 110:1-3). A sabi taki yu lobi en èn a wani taki yu dini en nanga yu heri ati. Dati meki yu musu abi pasensi nanga trawan èn yu musu abi pasensi nanga yusrefi tu. Te yu e meki fowtu, dan teki a rai nanga a piri-ai di yu e kisi èn si en leki a e komoto fu Yehovah (Hebr. 12:6). Du den wroko di yu kisi nanga yu heri ati. Èn awinsi san yu musu du, du en na so wan fasi taki yu hemel Tata breiti nanga yu.​—Leisi Odo 27:11.