1-2. Fu san ede na eksempre fu na apostel Paulus kan yepi owruman na ini a ten disi?

 NA APOSTEL Paulus ben lobi en brada nanga sisa. A ben wroko bun tranga fu yepi den (Tori 20:31). Dati meki den brada nanga sisa ben lobi Paulus srefisrefi. Fu eksempre, di den owruman fu Efeise kon sabi taki den no ben o si en moro, dan „den alamala bari krei” (Tori 20:37). Neleki Paulus, den owruman fu wi di e wroko tranga, lobi den brada nanga sisa fu den èn den e du ala san den man fu yepi den (Fil. 2:16, 17). Ma son leisi a e muilek gi den owruman fu tyari ala den frantwortu fu den. San kan yepi den na ini den situwâsi dati?

² Den owruman fu wi di e wroko tranga, kan luku na eksempre fu Paulus (1 Kor. 11:1). Paulus no ben de wan spesrutu sortu sma. A ben de wan sondu libisma di ben e feti fu du san bun (Rom. 7:18-20). Boiti dati, a ben abi difrenti problema. Ma Paulus no tapu nanga en diniwroko èn a no lasi prisiri. Te owruman e teki na eksempre fu Paulus, den o man tan dini Yehovah nanga prisiri awinsi den abi problema. Kow luku fa den kan du dati.

3. Fu san wi o taki na ini a artikel disi èn sortu tra sani wi o leri?

³ Na ini a artikel disi wi o taki fu fo sani di kan gi owruman broko-ede. Dati na: (1) fa den kan feni nofo ten gi a preikiwroko èn gi tra frantwortu, (2) fa den kan feni ten fu gi den brada nanga sisa deki-ati, (3) san den kan du fu no lasi-ati fu di den abi swakifasi, èn (4) fa den kan wroko makandra nanga trawan di abi swakifasi tu. Wi o leri san yepi Paulus na ini ibriwan fu den situwâsi disi èn fa owruman kan teki na eksempre fu en.

4. Fu san ede a kan muilek gi owruman fu feni nofo ten fu du a preikiwroko?

⁴ Fu san ede a kan muilek. Boiti taki owruman e teki fesi na ini a preikiwroko, den abi furu tra frantwortu. Nofo tron den musu de fesiman na a mindriwiki konmakandra èn na a Gemeente Bijbelstudie. A kan taki den musu hori tra lezing tu. Den e wroko tranga fu gi den dinari ini a diniwroko leri èn den e tan gi den brada nanga sisa deki-ati (1 Petr. 5:2). Son owruman e yepi fu bow èn ondrow Kownukondre zaal nanga tra presi pe wi e anbegi Yehovah. Ma neleki ala tra preikiman ini a gemeente, a moro prenspari wroko di den owruman e du na fu preiki a bun nyunsu.​—Mat. 28:19, 20.

5. Sortu eksempre Paulus gi na ini a preikiwroko?

⁵ Na eksempre fu Paulus. Na ini Filipisma 1:10 Paulus e taigi wi san ben yepi en fu de wan bun preikiman. Drape a e taki: „Kon sabi san na den moro prenspari sani.” Èn na dati Paulus ben du tu. A ben kisi wan wroko fu du èn someni tenti yari dati ben de a moro prenspari sani gi en. A ben preiki „na fesi ala sma èn oso fu oso” (Tori 20:20). A no ben preiki nomo na wan fasti yuru fu a dei noso na wán spesrutu dei ini a wiki. A ben preiki na ibri okasi di a ben feni. Fu eksempre, di a ben wakti den mati fu en na Ateine, dan a preiki a bun nyunsu gi wan grupu prenspari sma èn wan tu fu den sma dati tron bribiman (Tori 17:16, 17, 34). Srefi di a ben „de na strafu” Paulus preiki gi den sma di ben de drape.​—Fil. 1:13, 14; Tori 28:16-24.

6. San Paulus ben leri trawan?

⁶ Paulus ben gebroiki en ten na a moro bun fasi. Furu tron a ben aksi trawan fu go preiki nanga en. Fu eksempre, di a teki en fosi preikiwaka leki zendeling, dan a tyari Yohanes Markus go nanga en èn na a di fu tu waka a teki Timoteyus (Tori 12:25; 16:1-4). Paulus du muiti fu leri den man disi fa fu orga wan gemeente, fa fu gi den preikiman deki-ati èn fa fu tron bun leriman.​—1 Kor. 4:17.

7. Fa owruman kan teki a rai fu Paulus di skrifi na Efeisesma 6:14, 15?

⁷ San disi e leri owruman. Owruman kan teki na eksempre fu Paulus te den no e preiki oso fu oso nomo, ma te den de klariklari fu preiki na ibri okasi. (Leisi Efeisesma 6:14, 15.) Fu eksempre, den kan preiki gi sma te den e go bai sani, noso gi sma na wrokope. Te den e bow wan Kownukondre zaal den kan preiki gi den sma ini a birti èn gi sma di e kon seri sani. Neleki Paulus den owruman kan  gebroiki a ten di den e preiki fu gi tra brada nanga sisa leri èn den kan gebroiki den okasi disi tu fu yepi den dinari ini a diniwroko.

8. San wan owruman o abi fu du son leisi?

⁸ Owruman noiti no musu gebroiki so furu ten gi wroko na ini a gemeente noso na ini a kring, taki den no abi ten gi a preikiwroko. Efu den wani abi nofo ten gi ala den sani di den musu du, dan son leisi den no musu teki moro wroko na den tapu. A kan taki te den denki fu a tori èn te den begi fu en, dan den o si taki efu den teki a frantwortu na den tapu, den no o abi nofo ten fu du den moro prenspari sani. Dati na sani soleki fu hori na Osofamiri Anbegi ibri wiki, fu preiki fayafaya, noso fu leri den pikin fu preiki. Son owruman feni en muilek fu no teki moro frantwortu, ma den kan de seiker taki Yehovah e frustan taki den du disi fu di den wani abi nofo ten fu du ala den wroko bun.

9. San kan muilek gi den owruman di abi furu fu du?

⁹ Fu san ede a kan muilek. Yehovah en pipel e kisi fu du nanga furu muilek situwâsi. Na ini den lasti dei disi wi alamala abi deki-ati, yepi nanga trowstu fanowdu. Son brada nanga sisa abi yepi fanowdu, so taki den no go du sani di no fiti (1 Tes. 5:14). A no de fu taki dati den owruman no man puru ala den muilek situwâsi di e miti Yehovah en pipel. Ma toku Yehovah wani taki owruman musu du ala san den man fu gi en pipel deki-ati èn fu kibri den. Fa owruman di abi furu fu du kan feni ten fu yepi den brada nanga sisa?

10. Soleki fa 1 Tesalonikasma 2:7 e sori, dan san Paulus du fu sorgu gi Yehovah pipel?

¹⁰ Na eksempre fu Paulus. Paulus ben suku fasi fu prèise den brada nanga sisa èn fu gi den deki-ati. Den owruman musu teki a moi eksempre fu en èn sori switifasi gi Yehovah en pipel. (Leisi 1 Tesalonikasma 2:7.) Paulus ben taigi den brada nanga sisa fu en krin taki a ben lobi den èn taki Yehovah lobi den (2 Kor. 2:4; Ef. 2:4, 5). Paulus ben si den sma na ini a gemeente leki en mati èn a ben moksi nanga den. A ben sori taki a ben e frutrow den, a ben e fruteri den krin nanga san a ben broko en ede èn a ben taki fu den swakifasi fu en tu (2 Kor. 7:5; 1 Tim. 1:15). Ma Paulus no ben prakseri en eigi problema nomo. Na presi fu dati a ben wan yepi en brada nanga sisa.

11. Fu san ede Paulus ben gi den brada nanga sisa fu en rai?

¹¹ Son leisi Paulus ben musu gi den brada nanga sisa fu en rai. Ma a no ben du dati nanga atibron. A ben gi den rai fu di a ben lobi den èn fu di a ben wani kibri den gi problema. Dati meki a pruberi fu  meki en makelek gi den fu frustan a rai di a ben e gi den èn a ben wani taki den teki a rai dati. A ben skrifi wan brifi gi den Korentesma pe a ben gi den krakti rai. Baka di a skrifi a brifi, a seni Titus go na den. Paulus ben wani sabi fa den ben feni a brifi èn a ben breiti srefisrefi di a yere taki den ben teki a rai di a gi den!​—2 Kor. 7:6, 7.

12. San owruman kan du fu tranga den brada nanga sisa fu den?

¹² San disi e leri owruman. Owruman kan teki na eksempre fu Paulus te den e meki ten fu de makandra nanga den brada nanga sisa. Den kan du dati te den e kon fruku na den gemeente konmakandra so taki den kan taki nanga trawan èn tranga a bribi fu den. Nofo tron a e teki wan tu miniti nomo fu taki wan sani di e gi wan brada noso sisa deki-ati (Rom. 1:12; Ef. 5:16). Wan owruman di e teki na eksempre fu Paulus o gebroiki Bijbel fu tranga den brada nanga sisa fu en èn fu sori den taki Gado lobi den. Boiti dati, a e sorgu taki den brada nanga sisa fu en gemeente sabi taki a lobi den. A e bel den èn a e suku okasi fu prèise den. Te wan owruman musu gi rai, a e gebroiki Gado Wortu fu du dati. A e taki sani krin, ma a e taki na wan switifasi tu fu di a wani meki a brada noso sisa teki a rai.​—Gal. 6:1.

13. Fa den swakifasi fu wan owruman kan meki a firi?

¹³ Fu san ede a kan muilek. Owruman na sondu sma tu. Den e meki fowtu neleki ala tra sma (Rom. 3:23). Son owruman kan feni en muilek fu abi wan yoisti denki fu den swakifasi fu den. Son leisi den kan poti so furu prakseri na den swakifasi fu den taki den e lasi-ati. Trawan kan feni taki den fowtu fu den no bigi so èn taki a no de fanowdu fu kenki den fasi fu den.

14. Soleki fa Filipisma 4:13 e sori, dan fa sakafasi yepi Paulus fu abi wan yoisti denki fu den swakifasi fu en?

¹⁴ Na eksempre fu Paulus. Paulus ben abi sakafasi. Dati meki a ben frustan taki en wawan no ben man feti nanga den swakifasi fu en. A ben abi krakti fu Gado fanowdu. Fosi, Paulus ben teige den Kresten èn a ben frufolgu den hebi. Ma bakaten a kon si taki a ben fowtu èn a ben de klariklari fu kenki en denki nanga a fasi fa a ben tyari ensrefi (1 Tim. 1:12-16). Yehovah yepi Paulus fu kon tron wan lobi-ati skapuman di ben abi sari-ati nanga sakafasi. Paulus ben sabi taki a ben lai fowtu, ma a no ben sidon prakseri den heri dei. Na presi fu dati a ben abi a frutrow taki Yehovah ben gi en pardon (Rom. 7:21-25). A no ben  fruwakti taki a ben o man du ala sani sondro fu meki fowtu. Ma a ben meki furu muiti fu kon abi den fasi di wan Kresten musu abi èn a ben e bribi taki Yehovah ben o yepi en fu klari en wroko.​—1 Kor. 9:27; leisi Filipisma 4:13.

15. Fa owruman kan kon abi wan yoisti denki fu den swakifasi fu den?

¹⁵ San disi e leri owruman. Wan brada di poti leki owruman e meki fowtu. Ma Yehovah wani taki den musu erken te den meki wan fowtu èn taki den tan meki muiti fu sori den fasi di wan Kresten musu abi (Ef. 4:23, 24). Wan owruman musu gebroiki Gado Wortu fu ondrosuku ensrefi èn a musu tyari kenki kon te a si taki a musu wroko na wan sani. Te a du dati, dan Yehovah o yepi en fu de koloku èn a o man du en wroko bun.​—Yak. 1:25.

16. San ben o pasa efu wan owruman ben o tan luku den fowtu fu trawan?

¹⁶ Fu san ede a kan muilek. Fu di owruman e wroko makandra furu nanga den preikiman fu den gemeente, meki den o man si den fowtu fu den gaw. Ma efu den no luku bun, dan den kan atibron nanga den preikiman, taki grofu nanga den, noso den kan de gaw fu krutu den. Paulus ben warskow Kresten taki Satan ben o breiti te den ben o du dati.​—2 Kor. 2:10, 11.

17. Fa Paulus ben e denki fu en brada nanga sisa?

¹⁷ Na eksempre fu Paulus. A no ben e denki takru fu den brada nanga sisa fu en. A ben sabi heri bun sortu fowtu den ben e meki, bika son leisi den sani dati ben e hati en. Ma Paulus ben sabi taki te wan sma meki wan fowtu, dan dati no wani taki dati a sma ati takru. A ben lobi en brada nanga sisa èn a ben poti prakseri na den bun fasi fu den. Efu den brada nanga sisa fu en ben feni en muilek fu du san bun, dan a ben abi a frutrow taki den ben wani du san reti èn taki den ben abi yepi fanowdu.

18. San yu e leri fu a rai di Paulus gi Eyodia nanga Sentike? (Filipisma 4:1-3)

¹⁸ Luku fu eksempre fa Paulus du di tu sisa na ini a gemeente Filipi ben abi wan problema. (Leisi Filipisma 4:1-3.) A kan taki Eyodia nanga Sentike no ben agri nanga makandra èn taki a sani disi meki den kisi trobi. Paulus no ben krutu den, ma a poti prakseri na den moi fasi fu den. Den sisa disi ben tai hori na Yehovah èn den ben du furu ini a diniwroko. Paulus ben sabi taki Yehovah ben lobi den. Fu di Paulus ben lobi den sisa disi, meki a gi den a rai fu meki en bun baka nanga makandra. A fasi fa Paulus ben denki ben meki tu taki a ben man tan abi prisiri èn a ben man tan bun mati nanga den sma na ini a gemeente dati.

19. (a) Fa owruman kan tan abi wan bun denki fu den brada nanga sisa? (b) San yu kan leri fu a fowtow pe na owruman e krin a Kownukondre zaal?

 ¹⁹ San disi e leri owruman. Owruman, suku fu si den bun fasi fu den brada nanga sisa fu unu. Ibriwan fu den na sondu sma, ma ibriwan fu den abi moi fasi di e meki taki wi lobi den (Fil. 2:3). A tru taki owruman musu yepi brada nanga sisa fu kenki a denki fu den. Ma neleki Paulus, den owruman musu du muiti fu no poti prakseri nomo na den fruferi sani di wan sma taki noso du. Na presi fu dati den musu luku fa a sma lobi Yehovah, taki a sma e tan dini Gado èn taki a sma kan leri fu du bun. Owruman di e poti prakseri na den bun fasi fu trawan e yepi den brada nanga sisa fu firi a lobi na ini a gemeente.

20. Fa owruman kan tan kisi wini fu na eksempre fu Paulus?

²⁰ A o yepi unu leki owruman te unu e tan studeri na eksempre fu Paulus. * Fu eksempre, yu kan leisi kapitel 12, par. 17-20 fu a buku „Preiki finifini” fu Gado Kownukondre. Te yu e leisi sonwan fu den tori na ini a buku, dan aksi yusrefi: ’Fa na eksempre fu na apostel Paulus kan yepi mi fu tan abi prisiri, aladi mi e du mi wroko leki owruman?’

21. Fu sortu sani den owruman kan de seiker?

²¹ Owruman, hori na prakseri taki Yehovah no e fruwakti taki unu no o meki fowtu noiti. A e aksi unu nomo fu du un wroko bun (1 Kor. 4:2). Yehovah ben breiti nanga a tranga wroko di Paulus du someni yari langa. Unu kan de seiker taki Gado breiti tu nanga a wroko di unu e du gi en. Noiti Yehovah o „frigiti a wroko di unu du nanga a lobi di unu sori gi a nen fu en, fu di unu ben dini den santawan èn unu e tan dini den te now ete”.​—Hebr. 6:10.