1-2. (a) Na ini sortu situwâsi Paulus ben de di a skrifi a brifi gi den Efeisesma, èn fu san ede a skrifi a brifi dati? (b) Sortu aksi wi o luku?

 DI NA apostel Paulus ben de na strafu na ini wan oso na ini Rome, dan a ben wani gi den Kresten brada nanga sisa fu en dek’ati. Ma fu di a no ben man go na den, meki a ben e skrifi brifi gi den. A skrifi wan fu den brifi disi gi den Efeisesma na a ten fu a yari 60 noso 61.​—Ef. 1:1; 4:1.

² Sowan tin yari na fesi, Paulus ben tan wan heri pisi ten na ini Efeise. A ben e preiki a bun nyunsu drape èn a ben e gi sma leri (Tori 19:1, 8-10; 20:20, 21). A ben lobi den brada nanga sisa fu en trutru èn a ben wani yepi den fu tan gi yesi na Yehovah. Ma fu san ede a ben taki fu dungru nanga leti na ini a brifi di a ben skrifi gi salfu Kresten? Èn san ala Kresten kan leri fu den sani di a skrifi? Kow go luku den piki tapu den aksi disi.

DEN KMOTO NA DUNGRU ÈN DEN GO NA INI NA LETI

3. Fu san Paulus ben taki na ini a brifi di a skrifi gi den Efeisesma?

³ Paulus ben skrifi den Kresten na ini Efeise: „Fosi, unu ben de na ini a dungru, ma now unu de na ini a leti” (Ef. 5:8). Dyaso Paulus e gebroiki den wortu „dungru” nanga „leti” fu taki fu tu situwâsi di e difrenti fu makandra. Kow go luku fu san ede Paulus ben kan taki dati den Efeisesma „ben de na ini a dungru” fosi.

4. Na sortu fasi den Efeisesma ben de na ini dungru te a abi fu du nanga na anbegi fu den?

⁴ Den ben de na ini dungru fu di den ben e anbegi falsi gado. Fosi den Efeisesma ben leri sabi a waarheid èn tron  Kresten, den ben e bribi falsi leri èn den ben e du towfruwroko. A pôpi tempel fu Artemis di den sma fu owruten ben e si leki wan fu den moro kfalek gebow di sma meki oiti, ben de na ini a foto Efeise. Sma ben e go drape fu anbegi falsi gado. Sma ben e meki pkinwan fu a tempel disi fu seri èn den ben meki furu moni nanga a bisnis disi (Tori 19:23-27). Boiti dati, furu sma na ini Efeise ben e du towfruwroko.​—Tori 19:19.

5. Na sortu fasi den Efeisesma ben de na ini dungru te a abi fu du nanga a fasi fa den ben e tyari densrefi?

⁵ Den ben de na dungru fu di den ben e tyari densrefi na wan fasi di no fiti kwetkweti. Den sma na ini Efeise ben e du wan lo morsu sani èn den ben e du ogri sondro fu syen. Sma ben gwenti taki dot’taki te den ben de na ini den theater fu a foto, sosrefi te den ben de na kerkifesa (Ef. 5:3). Furu fu den sma na ini a foto no ben „sabi moro san bun noso san ogri”. Den wortu disi wani taki trutru ’den ati ben kon tranga’ (Ef. 4:17-19). Fosi den Efeisesma ben kon leri sabi san bun èn san ogri trutru, a konsensi fu den no ben e trobi den moro te den ben e du wan ogri. Boiti dati, den no ben e broko den ede efu den sani di den ben e du ben e meki Yehovah firi sari. Dati meki Paulus ben kan taki dati den ben de na ini „dungru èn [taki] den de fara fu a libi di e kon fu Gado”.

6. Fu san ede Paulus ben kan taki dati den Efeisesma ben de „na ini a leti” now?

⁶ Ma sonwan fu den Efeisesma no ben tan na ini dungru. Paulus ben skrifi taki now den ben de na ini a leti bika den ben e du san Masra taki (Ef. 5:8). Now den ben e meki a leti fu Gado Wortu sori den a pasi (Ps. 119:105). Den Efeisesma disi ben tapu nanga den falsi kerki gwenti di den ben abi èn den no ben e du hurudu moro. Den ben „teki na eksempre fu Gado” èn den ben e du ala san den man fu anbegi Yehovah èn fu du san a feni bun.​—Ef. 5:1.

7. Fu san ede wi kan agersi a situwâsi fu wi nanga a di fu furu Kresten na ini Efeise?

 ⁷ Fosi wi leri sabi a waarheid, wi ben de na ini dungru tu fu di wi no ben e anbegi Gado na a yoisti fasi èn wi ben e tyari wisrefi na wan fasi di no fiti kwetkweti. Sonwan fu wi ben e teki prati na fesa di abi fu du nanga falsi anbegi, trawan fu wi ben e libi wan yayolibi. Ma di wi kon sabi san Yehovah feni bun èn san a no feni bun, dan wi tyari kenki kon na ini wi libi. Wi bigin libi na a fasi di a feni bun. Èn a sani dati tyari furu wini kon gi wi (Yes. 48:17). Ma now difrenti sani de di kan de wan tesi gi wi. Wi musu wai pasi gi a dungru di wi libi na baka èn wi musu ’tan tyari wisrefi leki pikin fu a leti’ (Ef. 5:8). Fa wi kan du dati?

WAI PASI GI A DUNGRU

8. Gi san den Efeisesma ben musu wai pasi soleki fa Efeisesma 5:3-5 e sori?

⁸ Leisi Efeisesma 5:3-5. Fu man tan fara fu a dungru fu a grontapu disi, dan den Kresten na ini Efeise ben musu tapu nanga sani di Yehovah no feni bun. Disi wani taki dati den no ben musu du hurudu moro èn den no ben musu taki dot’taki moro tu. Paulus memre den Efeisesma taki den ben musu libi den sani dati na baka efu den ben wani „kon na ini a Kownukondre fu Krestes èn fu Gado”.

9. Fu san ede wi musu luku bun nanga sani di kan meki taki wi go du hurudu?

⁹ Wi musu tan luku bun tu taki wi no e du „den soso sani di sma e du na ini a dungru” (Ef. 5:11). Ibri leisi baka a kon na krin taki te wan sma e luku, e arki, noso e taki fu sani di no krin èn di no fiti, dan a kan psa makelek taki a e bigin du sani di no bun (Gen. 3:6; Yak. 1:14, 15). Na ini wan kondre wan bigi grupu Kotoigi ben bigin chat nanga makandra tapu social media. Na a bigin, furu fu den ben e taki fu Yehovah èn fu waarheid. Ma baka wan pisi ten, den bigin taki fu sani di Yehovah no feni bun. Den ben e taki moro furu fu seks. Bakaten furu fu den Kotoigi disi taki dati den tori di den ben e gi meki taki den go du hurudu.

10. Fa Satan wani taki wi musu denki? (Efeisesma 5:6)

¹⁰ A grontapu fu Satan wani wi fu bribi taki san Yehovah e si leki wan sani di no fiti noso leki wan sani di no krin no fowtu kwetkweti (2 Petr. 2:19). A sani disi no e ferwondru wi. Ala ten Didibri e pruberi fu bruya sma so taki den no man si san bun èn san no bun (Yes. 5:20; 2 Kor. 4:4). Dati meki wi kan ferstan fu san ede furu felem, telefisi programa, nanga website lai nanga sani di Yehovah no feni bun. Satan wani meki wi denki taki a e gi prisiri fu du sani di no krin noso fu libi wan yayolibi èn taki den sani dati no o tyari takru bakapisi kon gi wi.​—Leisi Efeisesma 5:6.

11. Fa na ondrofenitori fu Angela e sori taki a bun fu fiti a koni rai na Efeisesma 5:7? (Luku a prenki.)

¹¹ Satan wani taki wi musu moksi nanga sma di e meki en muilek gi wi fu du san Yehovah feni bun. Dati meki Paulus gi den Efeisesma a rai disi: „Un no musu abi noti fu du nanga den.” Fu taki en leti, Paulus e taigi wi taki wi no musu abi noti fu du nanga den sma di e du sani di Gado no feni bun (Ef. 5:7). Ma na ini a ten disi, wi abi wan problema di den Efeisesma no ben abi. Boiti taki wi musu luku bun nanga suma wi e moksi na ini wi ala dei libi, wi musu luku bun tu nanga sma di wi e  miti tapu social media. Angela a di e libi na ini Asia ondrofeni sortu problema social media kan tyari kon. A e taki: „Safsafri mi bigin denki tra fasi fu sani. Fosi yu denki mi no ben e si en leki wan problema moro fu moksi nanga sma di no ben e lespeki Bijbel gronprakseri. Te fu kba mi bigin denki taki a no fowtu fu libi na wan fasi di Yehovah no feni bun.” Ma wan tu owruman yepi Angela na wan lob’ati fasi fu tyari kenki kon. Angela e taki: „Now mi no de so furu moro tapu social media, ma mi e poti moro prakseri na sani di abi fu du nanga na anbegi.”

12. San o yepi wi fu tan hori wisrefi na den wet fu Yehovah di e sori san bun èn san no bun?

¹² Wi musu kakafutu gi a denki di a grontapu disi abi taki a no fowtu fu libi wan yayolibi. Wi sabi taki a sani dati no bun (Ef. 4:19, 20). Dati meki a bun te wi e aksi wisrefi: ’Mi e luku bun fu no moksi tumsi furu nanga sma na mi wrokope, nanga pkin na skoro, noso nanga tra sma di no e lespeki den wet fu Yehovah di reti ala ten? Mi e tan du san Yehovah feni bun, awinsi son sma feni taki mi e desko trawan?’ Soleki fa 2 Timoteyus 2:20-22 e sori, dan kande wi musu luku bun tu nanga suma wi e moksi na ini a Kresten gemeente. Wi musu tan hori na prakseri taki kande son sma no o yepi wi fu tan dini Yehovah na wan getrow fasi.

TYARI UNSREFI „LEKI PIKIN FU A LETI”

13. San den wortu „tan tyari unsrefi leki pikin fu a leti” wani taki? (Efeisesma 5:7-9)

¹³ Boiti taki Paulus ben gi den Kresten na ini Efeise dek’ati fu tan wai pasi gi a dungru, a ben taigi den tu: „Tan tyari unsrefi leki pikin fu a leti.” (Leisi Efeisesma 5:7-9.) San dati wani taki? Disi wani taki dati wi musu tyari wisrefi leki tru Kresten ala ten. Wan fasi fa wi kan du dati, na te wi abi a gwenti fu leisi èn studeri Bijbel nanga yepi fu den buku fu wi di e ferklari Bijbel. A prenspari srefsrefi taki wi e luku na eksempre fu Yesus Krestes èn taki wi e poti prakseri na den leri  fu en, fu di en na „a leti fu grontapu”.​—Yoh. 8:12; Odo 6:23.

14. Fa santa yeye kan yepi wi?

¹⁴ Wi abi a yepi fanowdu tu fu Gado en santa yeye so taki wi kan tan tyari wisrefi leki „pikin fu a leti”. Fu san ede? Fu di a no makelek srefsrefi fu tan krin na ini a grontapu disi pe furu sma e tyari densrefi na wan fasi di no fiti kwetkweti (1 Tes. 4:3-5, 7, 8). Santa yeye kan yepi wi fu kakafutu gi a denki fu den sma na ini a grontapu disi di no e si sani soleki fa Yehovah e si sani. Santa yeye kan yepi wi tu fu tan waka na ini a leti fu di „a bakapisi fu a leti na ala sortu bun, retidu, nanga sani di tru”.​—Ef. 5:9.

15. Na sortu fasi wi kan kisi santa yeye? (Efeisesma 5:19, 20)

¹⁵ Wan fasi fa wi kan kisi santa yeye, na te wi e begi fu kisi en. Yesus ben taki dati Yehovah o „gi santa yeye na den sma di e aksi en” (Luk. 11:13). Èn te wi e prèise Yehovah na den Kresten konmakandra, dan wi e kisi santa yeye tu. (Leisi Efeisesma 5:19, 20.) A bun krakti di Gado en santa yeye abi na wi tapu o yepi wi fu libi na wan fasi di Gado feni bun.

16. San o yepi wi fu teki bun besroiti? (Efeisesma 5:10, 17)

¹⁶ Te wi musu teki prenspari besroiti, dan wi musu kon sabi „san na a wani fu Yehovah” èn baka dati wi musu du dati tu. (Leisi Efeisesma 5:10, 17.) Te wi feni Bijbel gronprakseri di abi fu du nanga a situwâsi fu wi, dan dati e sori taki wi wani kon sabi fa Gado e denki fu a tori. Èn te wi e fiti den gronprakseri fu Gado, dan wi o man teki bun besroiti.

17. Fa wi kan gebroiki wi ten na wan koni fasi? (Efeisesma 5:15, 16) (Luku a prenki.)

¹⁷ Paulus ben gi den Kresten na ini Efeise a rai tu fu gebroiki den ten na wan koni fasi. (Leisi Efeisesma 5:15, 16.) „Na ogriwan”, noso wi feanti Satan, wani  taki wi gebroiki ala wi ten fu feti baka grontapu sani, so taki wi no abi ten moro fu dini Gado (1 Yoh. 5:19). A kan psa makelek taki wan Kresten e bigin poti moro prakseri na gudu, heiskoro-leri, noso na a wroko fu en, na presi fu gebroiki den someni okasi di de fu du moro gi Yehovah. Efu a ben o du dati, dan a ben o sori taki a e bigin denki leki den sma di no e dini Yehovah. A no de fu taki dati den sani disi no fowtu fu du, ma noiti wi musu poti den na a fosi presi na ini wi libi. Efu wi wani tyari wisrefi „leki pikin fu a leti”, dan wi musu „gebroiki a ten fu [wi] na wan koni fasi”, èn disi wani taki dati wi musu tan poti prakseri na den sani di prenspari trutru.

18. San Donald du fu man gebroiki en ten moro bun?

¹⁸ Luku efu okasi de fu du moro gi Yehovah. Na dati Donald du. A brada disi di e libi na ini Zuid-Afrika e taki: „Mi luku a situwâsi fu mi èn mi begi Yehovah fayafaya fu yepi mi fu du moro na ini a diniwroko. Mi begi en fu yepi mi fu feni wan wroko di ben o gi mi na okasi fu abi moro ten fu preiki. Yehovah yepi mi fu feni a yoisti wroko. Na so mi nanga mi wefi bigin dini leki furuten preikiman.”

19. Fa wi kan tan tyari wisrefi „leki pikin fu a leti”?

¹⁹ A brifi di Paulus ben skrifi gi den Efeisesma yepi den trutru fu tan dini Yehovah getrow. Èn den rai dati di e kmoto fu Yehovah kan yepi wi tu. Soleki fa wi si, den rai disi kan yepi wi fu luku bun sortu sani wi e du fu abi prisiri noso sortu sma wi e teki leki mati. Den rai dati kan gi wi dek’ati fu tan studeri Bijbel ibri tron baka so taki ala ten a leti fu waarheid kan yepi wi fu si moro krin san Gado feni bun èn san a no feni bun. Boiti dati, den rai disi e sori krin taki a santa yeye prenspari trutru fu di a kan yepi wi fu kon abi moi fasi. Te wi e fiti den rai di Paulus ben skrifi na ini a brifi, dan dati kan yepi wi fu teki koni besroiti di e kruderi nanga a fasi fa Yehovah e si sani. Te wi e du den sani disi, dan wi o man wai pasi gi a dungru fu a grontapu disi èn tan na ini a leti.