1, 2. (a) Fu san ede na eksempre fu den brada nanga sisa di e preiki na ini kontren pe furu sma no e arki e gi wi deki-ati? (Luku a prenki na a bigin fu na artikel.) (b) San Yesus ben taki di a ben e preiki na ini en „eigi kontren”? (Luku a futuwortu.)

SERGIO NANGA OLINDA na wan trowpaar di pasa 80 yari. Den e pionier èn den e libi na ini Amerkankondre. Den no man waka so bun moro fu di den futu e hati den. Ma soleki fa den gwenti du omeni yari kaba, den e waka go na wan druk presi na ini a foto èn seibi yuru mamanten den drape kaba. Den e go tanapu na sei wan bushalte fu prati den buku fu wi gi sma. Furu sma no e luku den srefisrefi, ma den e tan tanapu drape èn den e lafu nanga den sma di e luku den. Te twarfu yuru doro, den e waka go baka na oso. A tra dei den de drape baka seibi yuru mamanten. Den e du a wroko disi siksi dei na ini a wiki, a heri yari langa.

² Neleki Sergio nanga Olinda, furu brada nanga sisa na heri grontapu e preiki furu yari langa na ini kontren pe sma  no e arki den. Efu yu e preiki na ini so wan kontren, dan wi e prèise yu fu di yu e horidoro na ini a wroko fu Yehovah. * Na eksempre fu yu e gi furu brada nanga sisa deki-ati, srefi den wan di e du a preikiwroko furu yari kaba. Luku san wan tu kring-opziener taki: „Te mi e wroko nanga den sortu brada nanga sisa disi na ini a preikiwroko, dan na eksempre fu den e gi mi deki-ati.” „Fu di den e horidoro, meki dati e gi mi deki-ati fu horidoro tu èn fu du a preikiwroko sondro frede.” „Na eksempre fu den e naki mi ati.”

3. Sortu dri aksi wi o luku èn fu san ede?

³ Na ini na artikel disi wi o piki dri aksi: Fu san ede wi kan lasi-ati son leisi? San a wani taki fu meki froktu? San o yepi wi fu tan meki froktu? A piki tapu den aksi disi o gi wi deki-ati fu tan du a preikiwroko di Yesus gi wi fu du.

4. (a) Fa Paulus ben e firi di furu Dyu no ben wani arki en? (b) Fu san ede Paulus ben e firi so?

⁴ Efu yu e lasi-ati son leisi fu di yu e preiki na ini wan kontren pe sma no e arki, dan yu kan frustan fa na apostel Paulus ben firi. A preiki sowan 30 yari langa èn a yepi furu sma fu tron Kresten (Tori 14:21; 2 Kor. 3:2, 3). Toku a no ben man yepi furu Dyu fu tron Kresten. Furu fu den no ben e arki Paulus èn sonwan fu den ben e frufolgu en (Tori 14:19; 17:1, 4, 5, 13). Fa a sani disi ben meki Paulus firi? A taki: „Na ini mi ati mi e firi bigi sari nanga wan pen di no wani gowe” (Rom. 9:1-3). Fu san ede a ben e firi so? Fu di a ben lobi a preikiwroko èn a ben lobi sma. Paulus ben e broko en ede trutru nanga den Dyu èn a ben sari taki den no ben wani teki a yepi di Gado ben wani gi den.

5. (a) Fu san ede wi e preiki gi sma? (b) Fu san ede wi kan firi brokosaka son leisi?

⁵ Neleki Paulus, wi e preiki gi sma fu di wi e broko wi ede nanga den (Mat. 22:39; 1 Kor. 11:1). Fu san ede? Fu di wi sabi o furu blesi wan sma o kisi te a bosroiti fu dini Yehovah. Te wi e prakseri den sma na ini a kontren fu wi, dan kande wi e denki: ’Mi winsi taki mi ben kan yepi den fu si sortu moi blesi den kan kisi!’ Dati meki wi e tan gi den deki-ati fu kon sabi moro fu Yehovah èn fu den sani di a o du gi libisma. A de neleki wi e tyari wan moi kado gi den èn wi e taigi den: ’Grantangi, teki en.’ A no de fu taki dati wi e sari srefisrefi te sma no wani teki a kado disi. Te wi e firi so, dan dati no wani taki dati wi bribi swaki, ma taki wi lobi sma trutru. Sobun, awinsi wi e firi brokosaka son leisi, toku wi e tan preiki. Elena di e pionier moro leki 25 yari, e taki: „A no makelek gi mi fu du a preikiwroko. Toku mi no ben o wani du nowan tra wroko.”

6. Sortu aksi wi o piki now?

⁶ Fu san ede wi kan de seiker taki wi kan tan meki froktu awinsi pe wi e preiki? Fu piki na aksi disi, meki wi poti prakseri na tu agersitori fu Yesus pe a taki dati a prenspari fu meki  froktu (Mat. 13:23). A fosiwan e taki fu wan droifibon.

7. (a) Suma na „a gronman”, „a droifibon” nanga „den taki”? (b) Sortu aksi musu kisi piki ete?

⁷ Leisi Yohanes 15:1-5, 8. Na ini na agersitori disi Yesus taigi den apostel: „Te unu e tan meki furu froktu èn e sori taki unu na mi disipel, dan dati o gi mi Tata glori.” Yesus taki dati Yehovah na „a gronman”, en na „a trutru droifibon” èn den disipel na „den taki”. * Ma san na a froktu di den bakaman fu Krestes musu meki? Na ini na agersitori disi Yesus no taki krin san na a froktu, ma a taki wan sani di kan yepi wi fu sabi san na en.

8. (a) Fu san ede den froktu na ini na agersitori disi no kan de nyun disipel? (b) San Yehovah noiti o aksi fu wi?

⁸ Yesus ben taki san en Papa o du: „A o puru ibri taki fu mi di no e meki froktu.” Fu taki en leti Yehovah e si wi leki en futuboi, soso te wi e meki froktu (Mat. 13:23; 21:43). Sobun, na ini na agersitori disi, a froktu di wan Kresten musu meki no kan de nyun disipel (Mat. 28:19). Efu dati ben de so, dan den Kotoigi di no man meki disipel fu di den e preiki na ini kontren pe sma no e arki, ben o de leki den taki di no e gi froktu. Ma a sani disi no tru! Fu san ede wi kan taki dati? Fu di wi no kan dwengi sma fu tron disipel. Sobun, Yehovah no o si wi leki sma di no e meki froktu, soso fu di wi no e meki disipel. Fu di a lobi wi, meki noiti a o aksi wi fu du wan sani di a sabi taki wi no man.​—Deut. 30:11-14.

9. (a) Sortu wroko wi musu du fu man meki froktu? (b) Sortu agersitori wi o luku now èn fu san ede?

⁹ Dan san na a froktu di wi musu meki? A musu fu de wan sani di wi alamala man du. Sortu wroko Yehovah gi ala den futuboi fu en? Wi alamala musu preiki a bun nyunsu fu Gado Kownukondre (Mat. 24:14). * Na agersitori di Yesus fruteri fu wan saiman e sori taki disi tru. Meki wi go luku na agersitori disi.

10. (a) San a siri nanga a doti na ini na agersitori fu Yesus e prenki? (b) Sortu froktu wan aleisi pransun e meki?

¹⁰ Leisi Lukas 8:5-8, 11-15. Na ini na agersitori disi, a siri na „a wortu fu Gado” noso a Kownukondre boskopu. A doti na a ati fu den sma. A siri di e fadon na tapu a bun doti e teki rutu, a e sproiti èn a e tron wan aleisi pransun. Baka dati a e „meki froktu wán hondro tron so furu”. Ma san na a froktu dati? Na pikin aleisi pransun? Nôno, na nyun aleisi siri di o gro kon tron aleisi pransun te fu kaba. Na ini na agersitori disi, wan aleisi siri meki 100 siri. San disi e leri wi fu a preikiwroko di wi e du?

11. (a) San na agersitori fu a saiman e leri wi fu a preikiwroko di wi e du? (b) Fa wi e meki nyun Kownukondre siri?

¹¹ Kon meki wi taki dati omeni yari pasa wan tu Kotoigi noso wi papa nanga mama sai a Kownukondre boskopu na ini wi ati. Den ben prisiri di den si taki wi arki a boskopu disi. Wi ati ben de neleki a bun doti na ini na agersitori fu Yesus. Dati meki a siri fu a Kownukondre boskopu teki rutu na ini wi  ati èn a bigin gro teleki a tron wan aleisi pransun di kan meki froktu. Ma soleki fa wi si, dan wan aleisi pransun no e meki nyun pransun, ma a e meki nyun siri. Na so den froktu di wi e meki a no nyun disipel, ma nyun Kownukondre siri. * Fa wi e meki nyun Kownukondre siri? Ibri leisi te wi e preiki a Kownukondre boskopu, a de neleki wi e sai a siri di ben prani na ini wi ati (Luk. 6:45; 8:1). Sobun, na agersitori disi e leri wi taki solanga wi e tan preiki a Kownukondre boskopu, wi e meki froktu.

12. (a) San wi kan leri fu na agersitori fu a droifibon nanga a di fu a saiman? (b) Fa disi e meki yu firi?

¹² San na agersitori fu a droifibon nanga a di fu a saiman e leri wi? Den e yepi wi fu frustan taki a no te sma e arki a boskopu fu wi, dan fosi wi e meki froktu. Ma solanga wi e tan du a preikiwroko, wi e meki froktu. Paulus ben taki so wan sani tu. A ben skrifi: „Ibriwan fu den o kisi en eigi pai fu a wroko di a du” (1 Kor. 3:8). Sobun, wi e kisi pai fu di wi wroko, wi no e kisi pai fu di wi abi bun bakapisi. Matilda, wan sisa di e pionier moro leki 20 yari e taki: „Mi e firi bun fu di mi sabi taki Yehovah e luku a muiti di mi e du.”

13, 14. Soleki fa Romesma 10:1, 2 e sori, dan fu san ede Paulus tan preiki gi den Dyu aladi den no ben wani arki?

¹³ San o yepi wi fu tan meki froktu? Soleki fa wi ben si, dan Paulus ben lasi-ati fu di den Dyu no ben wani arki a Kownukondre boskopu. Toku a no tapu fu preiki gi den. Na ini a brifi di a ben skrifi gi den Kresten na ini Rome, a fruteri fa a ben e denki fu den Dyu dati. A taki: „Nanga mi heri ati mi e winsi èn mi e begi Gado taki den kisi frulusu trutru. Bika mi kan taki fu den taki den de fayafaya fu dini Gado, ma  den no abi soifri sabi” (Rom. 10:1, 2). Sobun, fu san ede Paulus ben tan preiki gi den?

¹⁴ Wan reide fu san ede Paulus tan preiki gi den, na taki a ben winsi nanga en heri ati taki den Dyu kisi frulusu (Rom. 11:13, 14). A di fu tu sani di yepi Paulus, na taki a ben „begi Gado” gi den. A ben e aksi Gado spesrutu fu opo na ati fu reti-ati Dyu so taki den kan arki a Kownukondre boskopu. Leki lasti sani Paulus e taki: „Den de fayafaya fu dini Gado.” Paulus ben e si den bun sani fu den sma. A ben e si taki den ben kan dini Yehovah èn taki den ben kan tron fayafaya disipel fu Krestes, neleki en.

15. Fa wi kan de neleki Paulus? Gi wan tu eksempre.

¹⁵ Fa wi e teki na eksempre fu Paulus? A fosi sani na taki wi e winsi nanga wi heri ati taki wi kan feni sma di „abi a yoisti denki fu man kisi têgo libi”. A di fu tu sani na taki wi e begi Yehovah fu opo na ati fu reti-ati sma fu arki te wi e preiki gi den (Tori 13:48; 16:14). Silvana, wan sisa di e pionier bijna 30 yari kaba, e taki: „Fosi mi go preiki na wan oso na ini a kontren fu mi, mi e begi Yehovah fu yepi mi so taki mi kan denki bun fu den sma.” Wi e begi Gado tu fu meki den engel yepi wi fu feni reti-ati sma (Mat. 10:11-13; Openb. 14:6). Robert di e pionier moro leki 30 yari kaba, e taki: „A moi fu sabi taki wi e wroko nanga engel di sabi san e pasa na ini a libi fu den ososma.” A di fu dri sani na taki wi e pruberi fu si den bun sani na ini sma. Carl, wan owruman di dopu moro leki 50 yari, e taki: „Mi e pruberi fu si iniwan sani di kan sori taki a sma wani sabi moro. Kande a e lafu, a no e span en fesi noso a e poti aksi fu di a wani sabi moro.” Iya, neleki Paulus wi kan tan meki froktu.

16, 17. (a) San wi e leri fu Preikiman 11:6? (b) San a preikiwroko fu wi kan du nanga den sma di e luku san wi e du?

¹⁶ Awinsi a gersi leki a Kownukondre boskopu di wi e preiki no e doro na ati fu sma, toku a e du wan sani nanga den. (Leisi Preikiman 11:6.) Awinsi furu sma no e arki wi, toku den e luku san wi e du. Den e si taki wi e weri bun krosi, wi e tyari wisrefi bun èn wi abi switifasi. Disi kan meki taki son sma kon si taki na somaar den ben e denki takru fu wi. Na dati Sergio nanga Olinda ondrofeni.

¹⁷ Sergio e fruteri: „Fu di wi ben siki, meki wan heri pisi ten wi no ben go tanapu preiki na a bushalte. Di wi go baka, den sma di ben e waka pasa ben aksi wi: ’San pasa? Wi no si unu langa.’” Nanga wan lafu fesi Olinda e taki: „Den bus chauffeur ben e wai anu gi wi èn den ben e bari gi wi: ’Unu e du wan bun wroko!’ Den ben e aksi wi tijdschrift srefi.” Sergio nanga Olinda ben breiti di wan man stop na a preikiwroko wagi fu den, dan a gi den wan bosu bromki èn a taigi den tangi gi a wroko di den e du.

18. Fu san ede yu wani tan meki froktu?

¹⁸ Solanga wi e sai a Kownukondre boskopu èn wi ’no e meki wi anu rostu’, dan wi e yepi ’sma fu ala kondre fu yere’ a bun nyunsu (Mat. 24:14). Ma san e gi wi moro prisiri na taki wi sabi taki Yehovah breiti nanga wi fu di a lobi den wan di e tan meki froktu.