1. Fa Gado Wortu e yepi wi?

WI KAN pasa iniwan tesi fu di Yehovah wi Gran Leriman e gi wi koni rai (Yes. 30:20, 21). Gado Wortu e gi wi ala san wi abi fanowdu fu kon „bun dorodoro” èn fu de „srekasreka fu du ibri bun wroko” (2 Tim. 3:17). Te wi e libi soleki fa Bijbel e leri wi, dan wi o kon koni moro den sma di abi a denki fu grontapu.​—1 Kor. 3:19; Ps. 119:97-100.

2. San wi o luku na ini na artikel disi?

² Wi o si taki a koni fu grontapu e gi sma deki-ati fu du san a sondu skin wani. Dati meki a kan muilek gi wi fu no denki leki sma fu grontapu èn fu no tyari wisrefi leki den. Bijbel e taki: „Sorgu taki nowan sma kisi unu nanga a koni fu grontapu èn nanga soso takitaki di e bedrigi sma. Den sani disi no abi noti fu du nanga den leri fu Krestes, ma nanga den gwenti fu libisma” (Kol. 2:8). Na ini na artikel disi wi o luku tu fowtu denki di sma fu grontapu abi èn wi o luku o ten den bigin denki so. Wi o si fu san ede a de wan don sani fu wroko nanga a koni fu grontapu èn wi o si tu fu san ede a koni fu Gado Wortu moro bun.

3-4. Fa sma na ini Amerkankondre bigin denki fu seks na ini den yari baka 1900?

³ Na ini den yari baka 1900, sma na ini Amerkankondre bigin denki tra fasi fu seks. Fosi a ten dati, furu sma ben bribi taki sma ben mag abi seks soso te den trow èn den ben feni tu taki a no ben fiti fu taki seks tori nanga tra  sma. Ma a denki disi bigin kenki. Moro nanga moro sma bigin feni taki sma kan abi seks sondro taki den trow.

⁴ Na ini den yari baka 1920 sma bigin poti moro prakseri na moni nanga prisiri, spesrutu baka a Fosi Grontapufeti. Wan sabiman taki dati furu felem, toneel, singi, buku nanga reklame ben abi seks tori na ini. Na ini a pisi ten dati sma bigin dansi na wan morsu fasi èn den bigin weri krosi di e sori den skin. Soleki fa Bijbel ben taki, dan na ini den lasti dei furu sma ben o „lobi prisiri”.​—2 Tim. 3:4.

5. Fa grontapu bigin denki fu seks na ini den yari baka 1960?

⁵ Na ini den yari baka 1960 moro nanga moro sma ben libi nanga makandra sondro taki den ben trow. Sma ben e si en leki wan gewoon sani tu taki sma e broko trow èn taki tu man noso tu uma e hori nanga makandra. Moro felem ben sori fa sma e bosi noso fa den abi seks. A sani disi tyari furu takru bakapisi kon. Wan man di e skrifi buku taki dati furu trowpaar broko trow, furu mama noso papa musu kweki den pikin den wawan, furu sma e firi brokosaka èn sma abi a gwenti fu luku porno. Furu sma abi takru siki soleki AIDS. Ala den sani disi e sori krin taki a de wan don sani fu libi leki den sma fu grontapu.​—2 Petr. 2:19.

6. Fa Satan feni a denki di grontapu abi fu seks?

⁶ Satan lobi taki grontapu e denki so fu seks. A no de fu taki dati a lobi en te sma abi seks na wan fasi di Gado no feni bun èn te den no e lespeki a trowlibi di de wan kado fu Gado (Ef. 2:2). Te sma abi seks sondro fu trow, dan den e sori taki den no abi warderi gi a grani di Gado gi den fu meki pikin. Boiti dati, a sani disi kan meki taki den no kisi têgo libi.​—1 Kor. 6:9, 10.

7-8. Fa Bijbel e yepi wi fu si seks na a yoisti fasi?

⁷ Sma di abi a denki fu grontapu e spotu den rai fu Bijbel èn den feni taki Bijbel no de gi a ten disi. Kande den sortu sma disi e aksi: ’Efu Gado meki wi nanga den seksfiri disi, dan fu san ede a wani taki wi basi den?’ Den e aksi disi fu di den feni taki wan sma kan du san a firi. Ma Bijbel e taki wan heri tra sani. A e leri wi fu tyari wisrefi na wan lespeki fasi. A e sori taki  wi no abi fu du ala san wi firi, ma taki wi man dwengi wisrefi fu no du sani di no bun (Kol. 3:5). Boiti dati, Yehovah seti a trowlibi so taki man nanga uma kan abi seks na wan fasi di fiti (1 Kor. 7:8, 9). A trowlibi e sorgu taki masra nanga wefi kan abi seks sondro fu abi konsensi fonfon èn sondro fu abi den broko ede di sma abi te den abi seks sondro fu trow.

⁸ Bijbel e yepi wi fu abi a yoisti denki fu seks. A e leri taki seks na wan sani di e gi masra nanga wefi prisiri (Odo 5:18, 19). Ma Bijbel e taki tu: „Ibriwan fu unu musu sabi fa fu basi en eigi skin so taki unu de santa èn so taki Gado feni unu bun. Te unu e du disi, dan un no musu meki gridi sekslostu basi unu, neleki fa den grontapusma e du di no sabi Gado.”​—1 Tes. 4:4, 5.

9. (a) San yepi a pipel fu Yehovah fu tan gi yesi na den koni rai fu Bijbel na ini den yari baka 1900? (b) Sortu koni rai skrifi na 1 Yohanes 2:15, 16? (c) Soleki fa Romesma 1:24-27 e sori, dan sortu sani wi no musu du?

⁹ Na ini den yari syatu baka 1900 a pipel fu Yehovah no teki a denki abra fu den sma di „no sabi moro san bun noso san ogri” (Ef. 4:19). Den tan hori densrefi na den wet fu Yehovah. Na Ingrisitongo Waktitoren fu 15 mei 1926 ben taki dati „wan man musu luku bun fa a e tyari ensrefi te a de nanga umasma èn wan umasma musu du a srefi tu te a de nanga mansma. Den musu luku bun tu nanga den sani di den e prakseri.” Awinsi fa sma na grontapu ben e tyari densrefi, a pipel fu Yehovah ben e gi yesi na den koni rai fu Bijbel. (Leisi 1 Yohanes 2:15, 16.) Wi de nanga tangi taki wi abi Gado Wortu! Wi breiti tu taki Yehovah e gi wi leri na a yoisti ten. A leri disi e yepi wi fu no teki a don denki fu grontapu abra. *​—Leisi Romesma 1:24-27.

10-11. San ben o pasa na ini den lasti dei, soleki fa Bijbel ben taki?

¹⁰ Bijbel taki dati na ini den lasti dei sma ben o „lobi densrefi nomo” (2 Tim. 3:1, 2). A no e fruwondru wi taki grontapu e gi sma deki-ati fu denki tumusi furu fu densrefi. Wan buku e taki dati na ini den yari baka 1970 sma bigin skrifi furu buku di e sori fa sma kan abi wan bun libi. Sonwan fu den buku dati ben taki dati sma no abi fu kenki èn taki den bun leki fa den de. Luku san wan fu den buku disi taki: „Yu musu lobi yusrefi fu di yu na a moro moi èn a moro bun sma di de.” A buku disi e taki dati ibri sma musu bosroiti srefi fa a wani tyari ensrefi, den kan du san den feni bun èn san makelek gi den.

¹¹ Yu yere den wortu disi wan leisi kaba? Satan ben gi Eva a deki-ati fu du a srefi sani. A taigi en taki a ben kan ’de leki Gado èn taki a ben o sabi san bun èn san ogri’ (Gen. 3:5). Fu di furu sma na ini a ten disi e denki furu fu densrefi, meki den no wani taki nowan sma kon taigi den san bun èn san no bun. Srefi Gado no man taigi den dati. Yu e si dati krin te yu e luku fa sma e denki fu a trowlibi.

12. Fa grontapu e si a trowlibi?

¹² Bijbel e taki dati masra nanga wefi musu lespeki makandra èn taki den musu hori densrefi na a pramisi di den  meki di den trow. A e gi trowpaar deki-ati fu tan na makandra den heri libi langa. Bijbel e taki: „Wan man o gowe libi en papa nanga en mama. A o tai hori na en wefi èn den o tron wán skin” (Gen. 2:24). Ma grontapu e leri sma wan heri tra sani. A e gi masra nanga wefi deki-ati fu du san den lobi. Wan buku e taki dati na ini son kondre sma di e trow no e taki moro taki den o tan nanga makandra teleki den dede, ma now den e taki dati den o tan nanga makandra solanga den lobi makandra ete. Fu di sma feni taki trowpaar no abi fu tan na makandra, meki now yu abi osofamiri pe papa nanga mama no de nanga makandra moro. A sani disi meki taki furu sma e sari. A de krin taki a denki di grontapu abi fu a trowlibi don.

13. Fu san ede Yehovah no lobi sma di abi bigimemre?

¹³ Bijbel e taki: „Yehovah e tegu gi ala sma di abi bigimemre” (Odo 16:5). Fu san ede Yehovah no lobi sma di abi bigimemre? Fu di sma di e denki tumusi furu fu densrefi de leki Satan di abi heimemre. Hori na prakseri taki Satan ben wani taki Yesus, a sma di Yehovah gebroiki fu meki ala sani, ben musu boigi gi en èn anbegi en (Mat. 4:8, 9; Kol. 1:15, 16). A de krin fu san ede Gado e si en leki wan don sani te sma e denki tumusi furu fu densrefi.

14. Fa Romesma 12:3 e yepi wi fu abi wan yoisti denki fu wisrefi?

¹⁴ Bijbel e yepi wi fu si wisrefi na a yoisti fasi. A e leri wi taki a no fowtu fu lobi wisrefi. Yesus ben taki: „Yu musu lobi tra sma leki fa yu lobi yusrefi” (Mat. 19:19). Disi e sori taki wi musu sorgu wi srefi tu. Ma Bijbel no e leri taki wi musu denki taki wi prenspari moro trawan. Na presi fu dati a e taki: „No strei nanga makandra èn no prakseri tumusi furu fu unsrefi,  ma abi sakafasi èn si trawan moro hei leki unsrefi.”​—Fil. 2:3; leisi Romesma 12:3.

15. Fu san ede yu feni taki Bijbel abi den moro bun rai di e sori fa wi musu si wisrefi?

¹⁵ Na ini a ten disi furu sma di trawan e si leki konisma feni taki den rai fu Bijbel don. Den e taki dati te yu e denki taki tra sma prenspari moro yu, dan sma o du san den wani nanga yu. Ma a e tyari bun bakapisi kon te sma abi a denki fu grontapu? San yu e si? Sma di e denki densrefi nomo, de koloku? Den abi wan koloku osofamiri-libi? Den abi mati di lobi den trutru? Den de mati fu Gado? San yu denki moro bun, a koni fu grontapu noso den koni rai fu Bijbel?

16-17. Gi sortu sani wi de nanga tangi èn fu san ede?

¹⁶ Efu yu ben o de na ini wan tra kondre èn yu lasi pasi, yu ben o go suku rai na wan sma di no sabi a kondre dati? Nôno. Ma te sma e teki den rai fu grontapusma di feni taki den koni, den e du wan srefi sortu sani. Luku san Yesus ben taki fu den man fu en ten di sma ben e si leki koniman. A taki: „Den sma disi e sori trawan a pasi, ma den srefi breni. Fu dati ede efu wan breniman musu sori wan tra breniman a pasi, dan den ala tu o fadon go na ini wan peti” (Mat. 15:14). A de krin taki a koni fu grontapu na wan don sani gi Gado.

¹⁷ Ala ten den rai fu Bijbel „bun fu gi leri, fu gi rai, fu poti sani kon reti èn fu gi piri-ai na wan reti fasi” (2 Tim. 3:16). Wi de nanga tangi trutru taki Yehovah gebroiki en organisâsi fu yepi wi fu no teki a denki fu grontapu abra! (Ef. 4:14) Den leri di wi e kisi e gi wi a krakti fu gi yesi na Gado Wortu. A de wan bigi grani taki wi sabi den koni rai fu Bijbel!