1-2. Soleki fa Psalm 40:5 e taki, dan sortu kado Yehovah gi wi èn fu san ede wi o taki fu den na ini na artikel disi?

YEHOVAH na wan Gado di lobi gi sani. Prakseri wan tu fu den kado di a gi wi: A gi wi wan moi grontapu, wi edetonton nanga en Wortu, Bijbel. Fu di Yehovah gi wi den dri kado disi, meki wi abi wan presi fu tan, wi man denki, wi man taki èn wi kan feni piki tapu den moro prenspari aksi fu a libi.​—Leisi Psalm 40:5.

² Na ini na artikel disi wi o taki syatu fu den dri kado dati. O moro wi e denki dipi fu den, o moro wi o warderi den. Boiti dati, wi o wani prisiri na ati fu wi lobi Mekiman, Yehovah (Openb. 4:11). Na artikel disi o yepi wi tu fu taki moro bun nanga sma di e bribi a lei taki ala sani kon fu den srefi.

3. Fu san ede grontapu de heri tra fasi leki ala tra planeiti?

³ Wi kan si o furu koni Gado abi te wi e luku fa a meki grontapu (Rom. 1:20; Hebr. 3:4). A grontapu a no a wan-enkri planeiti di e drai lontu a son, ma na tapu a planeiti disi wawan sma man libi.

4. Te wi e luku fa Gado meki grontapu, dan fa dati e sori taki a koni? Gi wan eksempre.

⁴ Wi kan agersi a grontapu nanga wan boto di de tapu se. Ma bigi difrenti de na mindri grontapu nanga wan  boto di furu nanga sma. Fu eksempre, o langa den sma na ini a boto ben o man tan na libi efu den srefi ben musu meki zuurstof, nyanyan nanga watra èn efu den no ben man trowe a doti fu den na ini a se? Te fu kaba den sma na ini a boto ben o dede. Ma milyardmilyard libisma nanga meti man libi na grontapu fu di a abi ala zuurstof, nyanyan nanga watra di wi abi fanowdu èn noiti den sani disi e kaba. Wi no man trowe a doti fu grontapu na wan tra planeiti, ma toku grontapu e tan moi èn wi man libi ete na en tapu. Fa dati kan? Yehovah meki grontapu na son wan fasi taki sani soleki zuurstof nanga watra no e kaba. Wi o luku syatu fu san ede disi de so.

5. Fu san ede a zuurstof na grontapu no e kaba èn san disi e sori?

⁵ Zuurstof na wan gas di libisma nanga meti abi fanowdu fu kan tan na libi. Ondrosuku sori taki libisma nanga meti e gebroiki bun furu zuurstof ibri yari. Te libisma nanga meti e hari zuurstof, dan den e bro koolzuurgas puru. Toku noiti a zuurstof e kaba èn noiti tumusi furu koolzuurgas de na ini a loktu. Fu san ede? Yehovah meki difrenti sortu bon di e gebroiki a koolzuurgas, dan den e meki zuurstof. Dati meki Bijbel abi leti te a e taki dati ’Gado e gi ala sma libi èn a e meki den bro’.​—Tori 17:24, 25.

6. Fu san ede a watra na grontapu no e kaba èn san disi e sori? (Luku sosrefi a faki „ Watra na wan kado fu Yehovah”.)

⁶ Watra de na grontapu fu di grontapu de na a yoisti presi. A no fara tumusi fu a son èn a no krosibei tumusi. Efu a ben de pikinso moro krosibei, dan ala a watra ben o faya so te, taki a ben o tron dampu. Grontapu ben o drei srefisrefi èn nowan sma ben o man libi na en tapu. Efu grontapu ben de pikinso moro fara, dan ala a watra ben o tron ijs. Grontapu ben o tapu nanga snew nanga ijs. Ma fu di Yehovah poti grontapu na a yoisti presi, meki wi abi watra di e hori wi na libi. Te a son e skèin tapu den se èn tapu tra presi fu grontapu pe watra de, dan furu fu a watra dati e tron dampu di e opo go na loktu. A dampu dati e tron wolku. Ibri yari milyunmilyun liter watra e tron dampu. A dampu disi e tan na loktu sowan tin dei langa èn baka dati a e fadon kon baka na grontapu leki alen noso snew. Te fu kaba a watra e drai go baka na den se, liba nanga kriki. Dan a srefi sani e pasa baka. Yehovah seti sani na so wan fasi taki ala ten watra de na grontapu. Disi e sori taki Yehovah abi furu koni nanga makti.​—Yob 36:27, 28; Preik. 1:7.

7. San na wan tu fasi fa wi kan sori warderi gi a kado di kari na Psalm 115:16?

⁷ Fa wi kan kon abi moro warderi gi a moi grontapu fu wi èn gi ala den bun sani di de na en tapu? (Leisi Psalm 115:16.) Wi musu denki dipi fu den sani di Yehovah meki. Te wi e du dati, dan wi o taki Yehovah tangi ibri dei fu den bun sani di a e gi wi. Èn wi kan sori taki wi de nanga tangi gi grontapu te wi e hori a presi pe wi e tan krin.

8. Fu san ede wi kan taki dati na edetonton meki na wan kefalek koni fasi?

⁸ Yehovah meki na edetonton fu libisma na wan kefalek koni fasi. Di yu  ben de na ini yu mamabere, na edetonton fu yu ben e gro precies leki fa Gado ben wani. Ibri miniti nyun cel ben meki! Ondrosukuman taki dati na edetonton fu wan bigisma abi sowan 100 milyard senwe-cel. Toku na edetonton e wegi sowan 1.5 kilo nomo. Meki wi luku wan tu sani di na edetonton e meki wi du.

9. Fu san ede wi kan taki dati a taki di wi man taki na wan kado fu Gado?

⁹ Wi man taki. Disi na trutru wan wondru. Prakseri ala den sani di e pasa na ini wi edetonton te wi e taki. Fu man taki wan wortu, wi edetonton musu seni boskopu go na sowan 100 titei fu wi tongo, wi gorogoro, wi mofobuba, wi kakumbe nanga wi borsu. Ala den titei disi musu wroko na a yoisti ten fu sorgu taki wi kan taki wortu di sma kan frustan. Wan ondrosuku di du na ini 2019 e sori taki wan beibi di gebore pas kan frustan san son wortu wani taki. Disi e horibaka gi san furu ondrosukuman e bribi. Den e bribi taki ala libisma man leri taki difrenti tongo. Disi na trutru wan kado fu Gado.​—Eks. 4:11.

10. Fa wi kan sori taki wi de nanga tangi taki wi man taki?

¹⁰ Wan fasi fa wi kan sori taki wi de nanga tangi taki wi man taki, na fu sori sma di e bribi na evolutie-leri fu san ede wi e bribi taki na Gado meki ala sani (Ps. 9:1; 1 Petr. 3:15). Den sma di e panya a leri disi wani taki wi bribi taki grontapu nanga ala sani di de na en tapu kon fu densrefi. Wi kan gebroiki Bijbel nanga wan tu sani di wi taki fu den na ini na artikel disi, fu opo taki gi wi hemel Papa èn fu sori reti-ati sma fu san ede wi de seiker taki na Yehovah meki hemel nanga grontapu.​—Ps. 102:25; Yes. 40:25, 26.

11. San na edetonton man du?

¹¹ Wi man memre sani. Fosi, wan skrifiman ben taki dati efu wan libisma ben o leisi 20 milyun buku, a ben o man memre ala sani di skrifi na ini den buku dati. Ma now sabiman e bribi taki libisma man memre moro leki dati. San libisma man du fu di den man memre sani?

12. Fa libisma e difrenti fu meti?

¹² Fu ala den libisani na grontapu, na libisma wawan kan leri fu den sani di pasa nanga den. Dati meki wi kan kenki a fasi fa wi e denki èn a fasi fa wi e libi, so taki wi e tron moro bun sma (1 Kor. 6:9-11; Kol. 3:9, 10). Boiti dati, a konsensi fu wi kan yepi wi fu sabi san bun èn san no bun (Hebr. 5:14). Wi kan leri fu sori lobi nanga sari-ati èn wi kan firi gi sma. Wi kan leri tu fu sori retidu neleki Yehovah.

13. Te wi e luku san Psalm 77:11, 12 e taki, dan san wi musu tan prakseri?

 ¹³ Wan fasi fa wi kan sori taki wi de nanga tangi taki wi man memre sani, na te wi no e frigiti noiti fa Yehovah yepi wi èn fa a trowstu wi na ini a ten di pasa. Disi o tranga wi bribi taki a o yepi wi tu na ini a ten di e kon (leisi Psalm 77:11, 12; 78:4, 7). Wan tra sani di wi kan du na fu memre den bun sani di tra sma du gi wi èn fu sori warderi gi dati. Ondrosukuman kon si taki sma di de nanga tangi gi san trawan du gi den de moro koloku. A bun tu fu teki na eksempre fu Yehovah di no e tan prakseri son sani. Fu eksempre, Yehovah man memre ala sani, ma efu wi abi berow fu den sondu fu wi, dan a e gi wi pardon èn a e bosroiti fu frigiti den fowtu di wi meki (Ps. 25:7; 130:3, 4). A wani taki wi du a srefi gi trawan te den du sani di e hati wi.​—Mat. 6:14; Luk. 17:3, 4.

14. Fa wi kan sori taki wi de nanga tangi taki Yehovah gi wi wan edetonton?

¹⁴ Wi kan sori taki wi de nanga tangi taki Yehovah gi wi wan edetonton te wi e gebroiki en fu gi en grani. Son sma e bosroiti gi densrefi san bun èn san no bun. Ma fu di Yehovah na wi Mekiman, meki en na a moro bun sma di kan sori wi fa wi musu libi (Rom. 12:1, 2). Te wi e libi soleki fa en wani, dan wi o abi freide (Yes. 48:17, 18). Boiti dati, wi o du wan bun sani nanga wi libi. Dati na fu gi grani na wi Mekiman nanga wi Papa èn fu meki en ati prisiri.​—Odo 27:11.

15. Sortu kado Yehovah gi wi èn fa dati e sori taki a lobi wi?

¹⁵ Bijbel na wan kado fu Gado. Wi hemel Papa gi wi Bijbel fu di a lobi wi. Na ini Bijbel Yehovah e piki den moro prenspari aksi fu wi. Aksi soleki: Pe wi komoto? Fu san ede wi de na libi? San o  pasa na ini a ten di e kon? Yehovah wani taki ala den pikin fu en kon sabi den piki fu den aksi disi. Fu dati ede a meki sma vertaal Bijbel na ini furu tongo na ini den hondrohondro yari di pasa. Na ini a ten disi Bijbel noso pisi fu en de fu feni na ini moro leki 3000 tongo! Bijbel na a wan-enkri buku di vertaal na ini so furu tongo èn di prati na heri grontapu. Awinsi pe sma e libi noso awinsi sortu tongo den e taki, furu fu den kan leisi Bijbel na ini den eigi tongo.​—Luku a faki „ Den vertaal Bijbel na ini den Afrikan tongo”.

16. Soleki fa Mateyus 28:19, 20 e sori, dan fa wi kan sori taki wi de nanga tangi taki wi abi Bijbel?

¹⁶ Wi kan sori taki wi de nanga tangi taki wi abi Bijbel te wi e leisi en ala dei, te wi e denki dipi fu den sani di wi e leisi èn te wi e meki muiti fu du san wi leri. Wan tra fasi fa wi kan sori taki wi de nanga tangi, na fu fruteri so furu sma leki wi man san Bijbel e leri.​—Ps. 1:1-3; Mat. 24:14; leisi Mateyus 28:19, 20.

17. Fu sortu kado wi taki na ini na artikel disi èn san wi o luku na ini a tra artikel?

¹⁷ Na ini na artikel disi wi taki fu wan tu moi kado di Yehovah gi wi. Dati na a grontapu, wi edetonton nanga en Wortu Bijbel. Ma Yehovah gi wi tra kado di wi no man si. Na ini a tra artikel wi o taki fu den kado dati.