1-2. San wan skrifiman ben taki èn san wi o luku na ini na artikel disi?

NA INI a ten disi milyunmilyun sma e taki dati den e bribi na ini Yesus, ma den no e du san a ben leri sma (2 Tim. 4:3, 4). Wan leisi wan skrifiman ben aksi san ben o pasa efu wan tra Yesus ben de na ini a ten fu wi di ben o taki den srefi sani di a fosi Yesus ben taki. A ben aksi efu sma ben o drai baka gi en neleki fa den du dati tu dusun yari pasa. Te yu luku a fasi fa furu sma e tyari densrefi now, dan a sori leki den ben o du a srefi.

² Na ini a ten fu Yesus furu sma yere san Yesus ben taki èn den si den wondru di a ben du. Ma toku den no ben wani bribi na ini en. Fu san ede? Na ini na artikel fosi a wan disi wi si fo sani fu san ede sma no ben wani bribi na ini Yesus. Na ini na artikel disi wi o luku ete fo sani. Wi o luku tu fu san ede den sma na ini a ten disi no wani arki den bakaman fu Yesus èn san wi kan du fu no lasi bribi. Soleki fa fosi artikel sori, den sani di wi o leri na ini na artikel disi o yepi den wan di draidrai fu tron Yehovah Kotoigi.

3. Sortu sani di Yesus ben e du ben meki taki sma no ben wani arki en?

³ Di Yesus ben de na grontapu a ben e bumui nanga ala sortu sma. A ben e nyan nanga gudusma èn sma di abi furu makti, ma a ben e bumui furu tu nanga den pôtiwan èn den mofinawan. Boiti dati, a ben e sori sari-ati gi den wan di sma ben e si leki „sondari”. Son sma di ben denki taki den bun moro trawan no ben wani arki Yesus fu di a ben e bumui nanga den sortu sma dati. Den ben aksi den disipel fu en: „Fu san ede unu e nyan èn dringi nanga den sma di e teki belasting-moni gi lanti èn nanga den sondari?” Yesus piki den: „Gosontu sma no abi datra fanowdu, ma siki  sma abi datra fanowdu. Mi no kon fu kari sma di e du san reti, ma mi kon fu gi sondari deki-ati fu abi berow.”​—Luk. 5:29-32.

4. San den Dyu ben musu sabi fu a Mesias efu den ben poti prakseri na a profeititori fu Yesaya?

⁴ San Bijbel e taki? Langa ten fosi a Mesias kon na grontapu, a profeiti Yesaya ben taki dati grontapu no ben o lobi en. A ben taki: „Sma wisiwasi en èn den wai pasi gi en. . . . A de neleki a tapu en fesi, so taki wi no man si en. Sma spotu en èn wi si en leki wan soso sani” (Yes. 53:3). A profeititori e sori taki sma ben o „wai pasi gi” a Mesias. Sobun, den Dyu na ini a ten fu Yesus ben musu sabi taki sma no ben o wani arki en.

5. Fa furu sma na ini a ten disi e si den bakaman fu Yesus?

⁵ Wi e si a srefi sani na ini a ten disi? Iya. Furu kerki fesiman lobi te prenspari sma, gudusma, nanga den koniman fu grontapu e kon na ini a kerki fu den, awinsi den sma disi e libi na wan fasi di Gado no feni bun. Na a tra sei, den srefi kerki fesiman disi e wisiwasi den fayafaya futuboi fu Yehovah di e du muiti fu tyari densrefi na wan krin fasi. Den e du disi fu di furu sma no e si den futuboi fu Yehovah leki prenspari sma. Ma Paulus taki dati Gado teki den sma „di no prenspari na ini grontapu” leki anbegiman fu en (1 Kor. 1:26-29). Yehovah lobi ala futuboi fu en di e tan gi yesi na en.

6. San Yesus taki na Mateyus 11:25, 26 èn fa wi kan de leki en?

⁶ San wi kan du fu no lasi bribi? (Leisi Mateyus 11:25, 26.) No meki a fasi fa grontapu e si Gado pipel abi krakti na yu tapu. No frigiti taki Yehovah e gebroiki soso den sma di abi sakafasi fu du a wani fu en (Ps. 138:6). Prakseri tu omeni a ben man du fu di a gebroiki sma di grontapu no e si leki koniman nanga sabiman fu du a wroko fu en.

7. Fu san ede Yesus kari den Fariseiman hoigriman èn fa den ben feni a sani dati?

⁷ Yesus no ben frede fu kari den kerki fesiman na ini a ten fu en hoigriman. Fu eksempre, gi den Fariseiman a fasi fa wan sma ben e wasi en anu ben prenspari moro leki a fasi fa wan sma ben e sorgu en papa nanga mama (Mat. 15:1-11). Kande den disipel fu Yesus ben skreki di den yere san a taki. Dati meki den aksi en: „Yu sabi taki den Fariseiman ati bron di den yere san yu taki?” A piki den: „Ibri bon di mi hemel Tata no prani, a o hari puru. Libi den. Den sma disi e sori trawan a pasi, ma den srefi breni. Fu dati ede efu wan breniman musu sori wan tra breniman a pasi, dan den ala tu o fadon go na ini wan peti” (Mat. 15:12-14). Den Fariseiman ati ben e bron srefisrefi, ma dati no ben tapu Yesus fu fruteri sma san tru.

8. Fa Yesus sori taki Gado no feni ala bribi bun?

⁸ Yesus ben sori tu taki son kerkileri na falsi leri. A no ben taki dati Gado feni ala bribi bun. Na presi fu dati, a taki dati furu sma ben o de na tapu a bradi pasi di e tyari den go na dede, ma soso wan tu sma nomo ben o de na tapu a smara pasi di e tyari den go na libi (Mat. 7:13, 14). A ben sori krin taki son sma ben o du nomo leki den e anbegi Gado. Dati meki a warskow: „Luku bun nanga den falsi profeiti. Den e kon na unu leki skapu, ma na ini den ati den na ogri busidagu. Na den froktu fu den, unu o si suma na den.”​—Mat. 7:15-20.

9. Sortu falsi leri Yesus ben tyari kon na krin?

 ⁹ San Bijbel e taki? Bijbel profeititori ben taki na fesi dati a Mesias ben o abi furu lobi gi na oso fu Yehovah (Ps. 69:9; Yoh. 2:14-17). A lobi disi di Yesus ben abi ben meki taki a ben e sori sma taki son kerkileri nanga gwenti no bun. Fu eksempre, den Fariseiman ben e bribi taki libisma abi wan sili di no e dede. Ma Yesus ben e leri taki den dedewan e sribi (Yoh. 11:11). Den Saduseiman no ben e bribi na ini wan opobaka. Ma Yesus ben gi en mati Lasarus wan opobaka (Yoh. 11:43, 44; Tori 23:8). Den Fariseiman ben e taki dati na Gado e bosroiti fa wan sma libi o waka. Ma Yesus ben leri taki libisma srefi kan bosroiti efu den wani dini Gado.​—Mat. 11:28.

10. Fu san ede furu sma no wani arki den sani di wi e leri sma fu Bijbel?

¹⁰ Wi e si a srefi sani na ini a ten disi? Iya. Furu sma na ini a ten disi no wani arki wi fu di den sani di wi e leri sma fu Bijbel e tyari kon na krin taki son kerkileri na falsi leri. Fu eksempre, den kerki fesiman e leri sma taki Gado e pina ogrisma na ini hel. Den e gebroiki a falsi leri disi fu tapu skreki gi den sma fu meki den sma gi yesi na den. Leki futuboi fu Yehovah, wi sabi taki wi e anbegi wan Gado fu lobi. Dati meki wi e sori sma taki a leri fu helfaya na wan falsi leri. Den kerki fesiman e leri sma tu taki libisma abi wan sili di no e dede. Ma wi e sori taki a sani disi e kon fu falsi bribi. Efu a leri disi ben tru, dan wan opobaka no ben o de fanowdu. Furu kerki e leri sma tu taki na Gado e bosroiti fa wan sma libi o waka. Ma wi e sori sma taki libisma man bosroiti gi densrefi san den o du noso efu den wani dini Gado. Fa den kerki fesiman feni a sani disi? Nofo tron den ati e bron nanga wi.

11. Soleki fa Yesus taki na Yohanes 8:45-47, dan san Gado wani taki en pipel du?

¹¹ San wi kan du fu no lasi bribi? Efu wi lobi san tru, dan wi musu bribi den sani di Gado e taki èn wi musu gi yesi na en. (Leisi Yohanes 8:45-47.) Tra fasi leki  Satan Didibri, wi noiti no o drai baka gi a tru anbegi. Noiti wi o du wan sani di de teige a bribi fu wi (Yoh. 8:44). Gado wani taki a pipel fu en „tegu gi ogri” èn taki den e „tan du bun” neleki fa Yesus ben du dati.​—Rom. 12:9; Hebr. 1:9.

12. Fu san ede a fasi fa Yesus dede meki taki someni Dyu drai baka gi en?

¹² San na wan tra sani di ben meki taki den Dyu no ben wani arki Yesus? Paulus ben taki: „Wi e preiki fu Krestes di sma spikri na wan postu. Disi na wan sani di e meki den Dyu fadon” (1 Kor. 1:23). Fu san ede someni fu den Dyu drai baka gi Yesus baka di den spikri en na wan pinapostu? Gi den, Yesus no ben kan de a Mesias fu di a dede leki wan ogriman èn wan sondari.​—Deut. 21:22, 23.

13. San den sma di ben drai baka gi Yesus no ben man si?

¹³ Den Dyu di ben drai baka gi Yesus no ben man si taki Yesus no ben du nowan ogri, taki sma ben e lei gi en, èn taki na somaar sma ben e du ogri nanga en. Den sma di ben hori a krutu fu Yesus no ben e broko den ede nanga san reti. A Grankrutu fu den Dyu ben kari wan krutu kon na wán esi-esi èn den no ben hori a krutu na a fasi fa a wet ben taki (Luk. 22:54; Yoh. 18:24). Na presi taki den krutuman krutu Yesus na wan reti fasi, den srefi „suku kotoigi fu fruteri lei fu Yesus, so taki den ben kan kiri en”. Di dati no yepi, dan a granpriester pruberi fu meki Yesus taki wan sani di den ben kan gebroiki fu krutu en. A sani disi ben de krinkrin teige a wet (Mat. 26:59; Mark. 14:55-64). Baka di Yesus kisi wan opobaka, den kruka krutuman disi go na den srudati fu Rome di ben e hori wakti na a grebi fu Yesus. Den pai den srudati „wan heri ipi solfru moni” fu lei gi sma taki a grebi ben leigi fu di den bakaman fu Yesus ben kon fufuru a dedeskin fu en.​—Mat. 28:11-15.

14. San den Bijbel profeititori ben taki fu a fasi fa a Mesias ben o dede?

¹⁴ San Bijbel e taki? Aladi furu Dyu na  ini a ten fu Yesus no ben fruwakti taki a Mesias ben o abi fu dede, toku Bijbel profeititori ben taki na fesi: „A dede gi sma èn den ben si en leki wan sondari. A tyari den sondu fu furu sma èn a tron wan sma di o opo taki gi sondu sma” (Yes. 53:12). Sobun, den Dyu no ben abi fu drai baka gi Yesus, soso fu di sma ben kiri en leki wan ogriman.

15. Sortu sani di sma taki fu Yehovah Kotoigi meki taki son sma no wani arki den?

¹⁵ Wi e si a srefi sani na ini a ten disi? Iya, seiker! Den ben krutu Yesus, aladi a no ben du nowan ogri. Na ini a ten disi den e du a srefi sani nanga Yehovah Kotoigi. Luku wan tu eksempre: Na ini den yari na mindri 1930 nanga 1950, Kotoigi na ini Amerkankondre ben musu go na fesi krutu difrenti leisi fu opo taki gi a reti di wi abi fu anbegi Gado. A ben de krin fu si taki son krutuman ben e gens wi. Na ini Kibek na Kanada, Lomsu Kerki nanga lanti ben e wroko makandra fu tapu a wroko fu wi. Den ben poti furu preikiman na strafu-oso, soso fu di den ben e fruteri sma fu Gado Kownukondre. Na ini Doisrikondre, na ogri-ati Nazi-regering kiri furu yongu brada fu wi. Na ini den lasti yari di pasa Rosiakondre sroto furu fu den brada nanga sisa fu wi fu di den ben e taki fu Bijbel. Lanti du dati fu di den feni taki a sani disi de teige den wet fu a kondre. Sma na ini a kondre dati no mag abi a Rosiatongo Nyun-Grontapuvertaling srefi. Den feni taki a buku disi de teige lantiwet fu di a nen Yehovah skrifi na ini.

16. Soleki fa 1 Yohanes 4:1 e sori, dan fu san ede wi musu luku bun nanga den lei di sma e fruteri fu Yehovah en pipel?

¹⁶ San wi kan du fu no lasi bribi? Kon sabi fa sani de trutru. Na ini a prenspari lezing di Yesus ben hori na tapu wan bergi, a warskow den arkiman taki son sma ben o ’lei èn den ben o taki ala sortu ogri fu den’ (Mat. 5:11). Den lei disi e komoto fu Satan. A e gi sma deki-ati fu fruteri ala sortu ogri-ati lei fu den wan di lobi a waarheid (Openb. 12:9, 10). Wi no musu arki den lei di den gensman fu wi e fruteri fu wi. Noiti wi musu gi pasi taki den lei dati e meki wi lasi bribi.​—Leisi 1 Yohanes 4:1.

17. Fa den sani di pasa syatu fosi Yesus dede meki taki son sma drai baka gi en?

¹⁷ Syatu fosi Yesus dede, wan fu den 12 apostel fu en tori en. Wan tra apostel ben taki dri leisi taki a no sabi Yesus èn ala den apostel fu en gowe libi en a neti fosi a dede (Mat. 26:14-16, 47, 56, 75). A sani disi no ben fruwondru Yesus. A ben taki na fesi srefi dati disi ben o pasa (Yoh. 6:64; 13:21, 26, 38; 16:32). A kan taki di den sani disi pasa, son sma drai baka gi Yesus fu di den ben prakseri: ’Efu na so den apostel fu Yesus e tyari densrefi, dan mi no wani de wan bakaman fu en!’

18. Sortu profeititori kon tru te yu e luku den sani di pasa syatu fosi Yesus dede?

¹⁸ San Bijbel e taki? Hondrohondro yari na fesi Yehovah ben taki kaba na ini en Wortu taki sma ben o tori a Mesias gi 30 pisi solfru moni (Sak. 11:12, 13). A sma di ben o tori Yesus ben o de wan fu den bun mati fu en (Ps. 41:9). A profeiti Sakaria ben skrifi tu: „Naki a skapuman, dan den skapu o panya go na ala sei” (Sak. 13:7). Reti-ati sma no ben o drai baka gi Yesus fu den sani disi ede. A bribi fu den ben o kon moro tranga te den ben si taki Yesus ben meki den profeititori disi kon tru.

19. San reti-ati sma sabi?

 ¹⁹ Wi e si a srefi sani na ini a ten disi? Iya. Na ini a ten disi wan tu Kotoigi di furu sma sabi gowe libi a waarheid, den bigin panya falsi leri èn den pruberi fu hari sma puru fu a tru anbegi. Den fruteri sani fu pori wi nen èn den fruteri krinkrin lei fu Yehovah Kotoigi na ini koranti, na radio, na telefisi èn tapu Internet. Ma den sani disi no e kori reti-ati sma. Na presi fu dati den sabi taki Bijbel ben taki na fesi dati den sani disi ben o pasa.​—Mat. 24:24; 2 Petr. 2:18-22.

20. Fa wi kan sorgu taki wi no lasi bribi te sma di gowe libi a waarheid wani kori wi? (2 Timoteyus 4:4, 5)

²⁰ San wi kan du fu no lasi bribi? Efu wi wani abi wan tranga bribi, dan wi musu abi a gwenti fu studeri Bijbel, fu begi, èn fu du a wroko di Yehovah gi wi fu du. (Leisi 2 Timoteyus 4:4, 5.) Efu wi abi bribi, dan wi no o bruya te sma e taki ogri fu Yehovah Kotoigi (Yes. 28:16). A lobi di wi abi gi Yehovah, gi a Wortu fu en, èn gi wi brada nanga sisa o yepi wi fu no lasi bribi te sma di gowe libi a waarheid wani kori wi.

21. Furu sma na ini a ten disi no wani arki a boskopu fu wi, ma san wi sabi seiker?

²¹ Na ini a ten fu Yesus furu sma no ben wani arki en èn den drai baka gi en. Ma furu sma ben de tu di tron bakaman fu en. Bijbel e taki fu wan memre fu a Dyu Grankrutu di tron wan bakaman fu en èn a e taki tu fu ’bun furu priester di tron bribiman’ (Tori 6:7; Mat. 27:57-60; Mark. 15:43). Na ini a ten disi milyunmilyun sma no drai baka gi Yesus tu. Fu san ede? Fu di den sabi den tru tori na ini Gado Wortu èn fu di den lobi den tu. Gado Wortu e taki: „Den wan di lobi yu wèt o abi freide pasa marki. Noti o meki den naki futu.”​—Ps. 119:165.