1-2. Sortu problema e miti furu Kotoigi?

NA APOSTEL Paulus ben gi Timoteyus nanga ala tra Kresten a deki-ati fu tan du a wroko fu den finifini (2 Tim. 4:5). Dati meki wi e gi yesi na a rai fu Paulus èn wi e du a diniwroko fayafaya. Toku dati no makriki ala ten. Furu fu wi brada nanga sisa abi deki-ati fanowdu fu teki prati na a preikiwroko (2 Tim. 4:2). Prakseri wi brada nanga sisa di e libi na ini kondre pe den no man preiki fri noso pe a wroko fu wi tapu srefi. Den e du a preikiwroko aladi sma kan poti den na strafu-oso.

² A pipel fu Yehovah e kisi fu du nanga so furu difrenti problema di kan meki den lasi-ati. Fu eksempre, furu fu den musu wroko omeni yuru langa fu sorgu gi den osofamiri. Den ben o wani du moro na ini a preikiwroko, ma den no abi furu krakti na a kaba fu a wiki. Trawan no man du furu srefisrefi fu di den e siki noso fu di den kon owru. Kande den no man gowe libi den oso srefi. Ma yu abi Kotoigi tu di e firi doronomo leki den no warti noti. Wan sisa di nen Mary, * e taki: „Mi musu du so furu muiti fu basi den firi fu mi, taki mi e weri. Dan mi e firi fruferi taki mi no abi ten nanga krakti moro fu du a preikiwroko.”

3. San wi o luku na ini a artikel disi?

³ Awinsi sortu problema e miti wi, Yehovah kan gi wi a krakti di wi abi fanowdu fu du ala san wi man fu dini en. Ma fosi wi o luku fa Yehovah kan yepi wi, meki wi go luku fa a gi Paulus nanga Timoteyus krakti fu man du a diniwroko fu den, aladi den ben abi problema.

4. Sortu problema Paulus ben abi?

⁴ Paulus ben abi furu problema. A ben abi krakti fanowdu spesrutu di sma fon en, ston en, èn poti en na strafu (2 Kor. 11:23-25). Paulus no ben e syen fu taki dati son leisi a ben musu du tranga muiti fu no lasi-ati (Rom. 7:18, 19, 24). Paulus ben abi wan siki tu di ben de leki wan ’maka na ini en skin’. A begi Gado omeni leisi srefi fu puru en.​—2 Kor. 12:7, 8.

5. San Paulus ben man du, aladi a ben kisi furu problema?

⁵ Yehovah gi Paulus krakti fu du a diniwroko fu en, awinsi sortu problema a ben kisi. Luku san Paulus ben man du. Di a ben de leki strafuman na ini wan oso na Rome, dan a no ben frede fu opo taki gi a bun nyunsu na fesi den Dyu fesiman èn kande na fesi heihei lantiman (Tori 28:17; Fil. 4:21, 22). A preiki tu gi furu waktiman fu Grankownu èn gi ala sma di ben kon luku en (Tori 28:30, 31; Fil. 1:13). Na a srefi ten dati, a santa yeye meki Paulus skrifi brifi di e yepi tru Kresten te na ini a ten disi. Boiti dati, na eksempre fu Paulus tranga a gemeente na ini Rome. A sani disi meki taki den brada nanga sisa fu en „kon abi moro deki-ati fu taki fu a wortu fu Gado sondro frede” (Fil. 1:14). Aladi Paulus no ben man du so furu son leisi, toku a du ala san a man na ini a situwâsi fu en èn disi „ben meki a bun nyunsu go na fesi”.​—Fil. 1:12.

6. Soleki fa 2 Korentesma 12:9, 10 e sori, dan san yepi Paulus fu du a diniwroko fu en?

⁶ Paulus ben sabi taki na Yehovah ben gi en a krakti fu du ala den sani di a ben du na ini a diniwroko fu en. A no ben du den sani dati nanga en eigi krakti. A ben frustan tu taki te a ben swaki, dan na Gado ben e gi en krakti. (Leisi 2 Korentesma 12:9, 10.) Nanga yepi fu en santa yeye, Yehovah gi Paulus a krakti di a ben abi fanowdu fu du a diniwroko fu en finifini, awinsi a ben kisi frufolgu, awinsi sma ben poti en na strafu, èn awinsi a ben kisi tra problema.

7. Sortu problema ben kan meki en muilek gi Timoteyus fu du a diniwroko fu en?

⁷ Timoteyus, wan yongu brada di ben e wroko makandra nanga Paulus, ben  musu abi a frutrow tu taki na Gado ben o gi en a krakti fu man du a diniwroko fu en. Te Paulus ben e go na farawe kondre leki zendeling, dan Timoteyus ben e go nanga en. Boiti dati, Paulus seni en go tu na tra presi fu go luku den gemeente èn fu gi den deki-ati (1 Kor. 4:17). A kan taki Timoteyus ben e firi taki a no ben bun nofo fu du a wroko disi. Kande na fu dati ede Paulus gi en a rai disi: „No meki nowan sma wisiwasi yu fu di yu yongu” (1 Tim. 4:12). Boiti dati, Timoteyus ben abi en eigi problema na a ten dati. A ben e „siki ala yuru” (1 Tim. 5:23). Ma Timoteyus ben sabi taki a makti santa yeye fu Yehovah ben o gi en a krakti di a ben abi fanowdu fu preiki a bun nyunsu èn fu dini den brada nanga sisa fu en.​—2 Tim. 1:7.

8. Fa Yehovah e gi en pipel krakti na ini a ten disi?

⁸ Na ini a ten disi Yehovah e gi en pipel „krakti di bigi pasa marki”, so taki den kan tan dini en awinsi den kisi problema (2 Kor. 4:7). Meki wi luku fo fasi fa Yehovah e gi wi krakti èn fa a e yepi wi fu tan dini en: Begi, Bijbel, wi Kresten brada nanga sisa, nanga a preikiwroko.

9. Fa begi kan yepi wi?

⁹ Begi e gi wi krakti. Na Efeisesma 6:18, Paulus e gi wi a deki-ati fu begi Gado „na ibri okasi”. Te wi e du dati, dan Gado o gi wi krakti. Jonnie, di e libi na ini Bolifia, firi taki Gado gi en krakti di a ben kisi wan tu hebi tesi. En wefi, en papa, nanga en mama, ben kon siki seryusu na a srefi ten. A ben hebi gi Jonnie fu sorgu den ala dri. Bakaten en mama kon dede èn a teki wan heri pisi ten fosi en wefi nanga en papa kon betre baka. Jonnie e fruteri fu a ten dati. A e taki: „Te sani ben e kon hebi gi mi, dan mi ben e begi Yehovah èn mi ben e fruteri en fa mi ben e firi. Yehovah ben gi Jonnie a krakti di a ben abi fanowdu fu horidoro. Ronald, wan owruman na ini Bolifia, ben yere taki en mama ben abi kanker. Wán mun baka dati en mama dede. San yepi en fu horidoro? A e taki: „Te mi e begi Yehovah, dan mi man fruteri en ala san mi e firi èn ala san de tapu mi ati. Mi sabi taki a e frustan mi moro bun leki iniwan tra sma. Mi srefi no sabi misrefi so bun leki fa en sabi mi.” Son leisi wi e firi leki a libi hebi tumusi èn kande wi no sabi fu san wi musu begi. Ma toku Yehovah wani taki wi taki nanga en, awinsi wi no man feni den wortu fu fruteri en soifri fa wi e firi.​—Rom. 8:26, 27.

10. Soleki fa Hebrewsma 4:12 e sori, dan fu san ede a prenspari fu leisi Bijbel èn fu denki dipi fu en?

¹⁰ Bijbel e gi wi krakti. Paulus ben e leisi Bijbel fu kisi krakti nanga trowstu. Wi musu du dati tu (Rom. 15:4). Te wi e leisi Gado Wortu èn te wi e denki dipi fu en, dan Yehovah kan gebroiki en santa yeye fu yepi wi fu kon frustan moro bun fa Bijbel kan yepi wi na ini a situwâsi fu wi. (Leisi Hebrewsma 4:12.) Ronald di wi ben kari kaba na ini a artikel disi taki: „Mi breiti taki mi kon abi a gwenti fu leisi wan pisi fu Bijbel ibri neti. Mi lobi denki fu den fasi fu Yehovah èn fu den moi fasi fa a e sorgu gi a pipel fu en. Disi e yepi mi fu kisi krakti.”

11. Fa Bijbel yepi wan sisa di ben e sari?

¹¹ Te wi e denki dipi fu Gado Wortu, dan disi e yepi wi fu si den problema fu  wi na a yoisti fasi. Luku fa Bijbel yepi wan uma di ben e sari fu di en masra ben kon dede. Wan owruman taigi en taki a ben o bun efu a leisi a buku Yob. Di a bigin leisi a buku, dan wantewante a bigin krutu Yob fu di a ben feni taki Yob no ben e denki bun. A ben taki na ensrefi: „Yob, yu no musu denki so!” Ne a kon si taki en srefi ben e denki neleki Yob. Disi yepi en fu kenki a fasi fa a ben e denki èn a no ben e sari so furu moro taki en masra dede.

12. Fa Yehovah e gebroiki wi brada nanga sisa fu gi wi krakti?

¹² Wi brada nanga sisa e gi wi krakti. Wan tra sani di Yehovah e gebroiki fu gi wi krakti, na wi Kresten brada nanga sisa. Paulus ben skrifi taki a ben wani si den brada nanga sisa fu en, so taki den ben kan „gi makandra deki-ati” (Rom. 1:11, 12). Mary, di wi ben kari kaba na ini a artikel disi, lobi fu de nanga den brada nanga sisa fu en. A e taki: „Yehovah gebroiki brada nanga sisa di no ben sabi srefi sortu problema mi ben abi. Den taigi mi wan sani fu gi mi deki-ati noso den seni wan karta gi mi, èn dati ben de soifri san mi ben abi fanowdu. San e yepi tu, na te mi e taki nanga sisa di ben abi den srefi sortu problema leki mi. Mi e leri furu fu den. Ala ten den owruman e meki mi firi taki a gemeente abi mi fanowdu.”

13. Fa wi kan gi makandra deki-ati na den gemeente konmakandra?

¹³ Wan fu den moro bun okasi di wi abi fu gi makandra deki-ati, na te wi de na den gemeente konmakandra. Te yu e go na den konmakandra, dan a bun fu gi trawan deki-ati. Taigi den taki yu lobi den èn taki yu e warderi den. Fu eksempre, fosi a konmakandra wan owruman di nen Peter, ben taigi wan sisa di abi wan masra di no de wan Kotoigi: „Yu no sabi fa a e gi mi deki-ati fu si yu dyaso. Ala ten den siksi pikin fu yu de srekasreka fu gi piki.” A sisa en ai furu nanga watra fu di a ben breiti nanga a sani di a brada taigi en. A piki en: „A sani di yu taigi mi, na dati mi ben abi fanowdu tide.”

14. Fa a preikiwroko e gi wi krakti?

¹⁴ A preikiwroko e gi wi krakti. Te wi e fruteri trawan den tru tori fu Bijbel, dan dati e gi wi krakti nanga deki-ati, awinsi den sma no wani arki (Odo 11:25). Wan sisa di nen Stacy, ondrofeni fa a preikiwroko gi en krakti. Di den ben puru wan famiriman fu en fu a gemeente, dan a ben e sari srefisrefi. En ala yuru a ben e denki: „Kande mi ben musu du moro muiti fu yepi en.” Heri dei a ben e prakseri a sani disi. San yepi en fu firi moro bun? A preikiwroko! Te a ben de na ini a preikiwroko, dan a ben e poti prakseri na sma na ini a kontren di ben abi yepi fanowdu. A e taki: „Na a ten dati Yehovah gi mi wan Bijbelstudie di ben e go na fesi esi-esi. A sani dati gi mi furu deki-ati. A preikiwroko e yepi mi trutru.”

15. San yu e leri fu den sani di Mary taki?

¹⁵ A situwâsi fu son brada nanga sisa, e meki den firi leki den no man du so furu na ini a preikiwroko. Efu na so yu e firi, dan hori na prakseri taki Yehovah breiti te yu e meki muiti. Luku na eksempre fu Mary baka. Di a go dini na ini wan gemeente di e taki wan tra tongo, dan a ben e firi leki a no ben man du so furu. A e taki: „Wan pisi ten, ala san mi ben man  du, na fu taki wan pikin sani nomo, leisi wan Bijbeltekst, noso fu gi sma wan traktaat na ini a preikiwroko.” Mary ben e firi leki a no ben man du so furu leki den tra sma di ben man taki a tongo bun. Te fu kaba a kenki a fasi fa a ben e denki. A kon si taki Yehovah ben kan gebroiki en, awinsi a no ben man taki a tongo bun. A e taki: „Den leri fu Bijbel no muilek fu frustan èn na den sani dati e kenki sma libi.”

16. San kan yepi den wan di no man komoto na oso fu kisi krakti?

¹⁶ Yehovah sabi taki sonwan fu wi wani preiki, ma wi no man komoto na oso. A kan yepi wi fu preiki gi datra, verpleegster, nanga den wan di e kon fu sorgu gi wi. Efu wi e prakseri soso san wi ben man du fosi, dan wi kan lasi-ati. Ma efu wi e luku fa Yehovah e yepi wi now, dan dati o gi wi a krakti di wi abi fanowdu fu pasa iniwan tesi nanga prisiri.

17. Soleki fa Preikiman 11:6 e sori, dan fu san ede wi musu tan preiki, awinsi wi no sabi fa sani o waka?

¹⁷ Te wi e sai siri fu a waarheid, dan wi no sabi pe den o teki rutu fu gro. (Leisi Preikiman 11:6.) Barbara, wan sisa di pasa 80 yari, gwenti preiki gi sma nanga yepi fu telefon èn a e skrifi brifi tu. Na ini wan fu den brifi fu en, a poti A Waktitoren fu 1 maart 2014, di abi na artikel „San Gado du gi yu?” Sondro fu a sabi, a ben seni a brifi gi wan trowpaar di no ben de Yehovah Kotoigi moro. Den leisi a tijdschrift omeni leisi. A masra ben e firi leki na Yehovah srefi ben e taki nanga en. Te fu kaba a trowpaar disi bigin kon na den konmakandra èn baka moro leki 27 yari den tron Kotoigi baka. Prakseri fa a ben musu gi Barbara deki-ati fu si san a wán brifi di a ben skrifi du.

18. San wi kan du fu kisi krakti fu Gado?

¹⁸ Yehovah e gi wi furu sani di kan gi wi krakti. Dati na sani soleki, begi, Bijbel, wi brada nanga sisa, nanga a preikiwroko. Te wi e gebroiki den sani disi, dan wi e sori en taki wi e bribi taki a kan yepi wi èn taki a wani yepi wi tu. Sobun, meki wi frutrow ala ten tapu wi Hemel Tata di de klariklari fu „sori a krakti fu en fu yepi den wan di e dini en nanga den heri-ati”.​—2 Kron. 16:9.