1. Di yu bigin fruteri sma san yu leri fu Bijbel, dan fa furu fu den ben feni en?

YU E memre a fosi leisi di yu kon frustan taki yu feni a waarheid? Den sani di yu ben e leri fu Bijbel ben de so krin èn yu ben lobi den so te, taki yu ben denki taki ala sma ben o lobi den tu. Yu ben de seiker taki a boskopu fu Bijbel ben o meki den abi wan moro bun libi èn a ben o gi den howpu gi a ten di e kon (Ps. 119:105). Dati meki yu ben de fayafaya fu fruteri ala mati nanga famiriman fu den moi tori di yu ben e leri. Ma san pasa di yu du dati? Kande yu ben fruwondru fu si taki furu fu den no ben wani sabi noti fu den sani di yu ben e taigi den.

2-3. Fa furu sma na ini a ten fu Yesus ben e denki fu en èn fu a boskopu fu en?

² Nowan fu wi musu fruwondru te sma no wani arki a boskopu di wi e preiki. Na ini a ten fu Yesus, furu sma no ben wani arki en tu, aladi a ben e du wondru di ben e sori taki Gado ben e horibaka gi en. Fu eksempre, Yesus ben gi Lasarus wan opobaka. Srefi den gensman fu en no ben kan taki dati a sani disi no pasa. Toku den Dyu kerki fesiman no ben e si Yesus leki a Mesias. Den ben wani kiri Yesus nanga Lasarus srefi.​—Yoh. 11:47, 48, 53; 12:9-11.

³ Yesus ben sabi taki furu sma no ben o teki en leki a Mesias (Yoh. 5:39-44). A ben taigi wan tu disipel fu Yohanes a Dopuman: „Koloku fu a sma di no e feni wan sani na mi tapu di o meki en fadon” * (Mat. 11:2, 3, 6). Fu san ede so furu sma no ben wani teki Yesus leki a Mesias?

4. San wi o luku na ini na artikel disi?

 ⁴ Na ini na artikel disi èn na ini a tra artikel, wi o luku fu san ede den sma na ini a ten fu Yesus no ben e bribi na ini en. Wi o luku tu fu san ede furu sma na ini a ten disi no wani arki a boskopu fu wi. Ma wan moro prenspari sani di wi o luku, na fu san ede wi musu abi wan tranga bribi na ini Yesus. Na so wawan wi o man tan waka na en baka.

5. Fu san ede son sma ben feni taki Yesus no ben kan de a Mesias?

⁵ Furu sma no ben wani arki Yesus fu di den ben sabi en. Den ben sabi taki Yesus ben de wan heri bun leriman èn taki a ben e du wondru, ma gi den a ben de gewoon a manpikin fu wan pôti temreman. Boiti dati, a ben e libi na ini Nasaret, wan foto di no ben prenspari na a ten dati. Srefi Natanael di tron wan disipel fu Yesus te fu kaba, ben taki fosi: „Wan bun sani kan komopo fu Nasaret?” (Yoh. 1:46) A kan taki Natanael no ben lobi a foto pe Yesus ben e libi. Noso kande a ben e prakseri a profeititori fu Mika 5:2, di ben taki dati a Mesias no ben o gebore na ini Nasaret, ma na ini Betlehem.

6. Fa den sma na ini a ten fu Yesus ben kan sabi taki en na a Mesias?

⁶ San Bijbel e taki? A profeiti Yesaya ben taki dati den feanti fu Yesus no ben o prakseri srefi „fu sortu famiri a [Mesias] komoto” (Yes. 53:8). Den profeititori ben e taki furu sani fu a Mesias. Efu den sma ben teki a ten nomo fu ondrosuku sani moro fini, dan den ben o kon sabi taki Yesus ben gebore na ini Betlehem èn taki a ben de wan bakapikin fu Kownu David (Luk. 2:4-7). Sobun, Yesus ben gebore na a presi di Mika 5:2 ben taki. Ma fu san ede den sma no ben wani arki en? Fu di den ben de gaw fu krutu Yesus, aladi den no ben sabi ala sani.

7. Fu san ede furu sma no wani tron Yehovah Kotoigi?

⁷ Wi e si a srefi sani na ini a ten disi? Iya. Furu Yehovah Kotoigi a no gudu sma noso sma di abi hei posisi. Furu sma e taki dati den de „neleki ala tra sma” èn taki den no kisi furu skoro (Tori 4:13). Son sma feni taki Gado pipel no man gi trawan Bijbel leri fu di den no kisi kerkileri na wan heiskoro. Tra sma e taki dati Yehovah Kotoigi na wan „Amerkan kerki”. Ma na soso wán fu ibri seibi Kotoigi e libi na Amerkankondre. Dan yu abi trawan di e taki dati Yehovah Kotoigi no e bribi na ini Yesus. Na ini den yari di pasa, sma taki dati Kotoigi na wan wetiman kerki, taki den strak tumusi, èn taki den e prati osofamiri. Fu di sma e bribi ala den sortu tori disi, meki den no wani tron Yehovah Kotoigi.

8. Soleki fa Tori 17:11 e sori, dan san sma musu du efu den wani sabi suma na den futuboi fu Gado na ini a ten disi?

⁸ San wan sma kan du fu no lasi bribi? Sma musu ondrosuku sani finifini. Dati na san na Evangelie skrifiman Lukas ben pruberi fu du. A ben e du muiti fu ondrosuku „ala sani finifini sensi a bigin”. A ben wani taki den sma di ben o leisi a buku fu en ben o sabi seiker taki den sani di den leri fu Yesus de so trutru (Luk. 1:1-4). A Dyu pipel na ini owruten Berea ben de leki Lukas. Di den yere a bun nyunsu fu Yesus, den ondrosuku den Hebrew buku fu Bijbel fu de seiker taki den sani di den yere tru. (Leisi Tori 17:11.) Sma na ini a ten disi musu ondrosuku  sani finifini tu. Den musu luku efu den sani di Gado pipel e leri sma de soleki fa Bijbel e taki. Den musu ondrosuku tu san Yehovah pipel du na ini a ten disi. Efu den ondrosuku sani finifini, dan den no o bribi ala san sma e taki fu Kotoigi.

9. San pasa di Yesus no ben wani du wan wondru gi den sma?

⁹ Den moi leri fu Yesus no ben nofo gi son sma na ini a ten fu en. Den ben wani moro. Den ben wani taki a sori den „wan marki fu Gado” fu buweisi taki en na a Mesias (Mat. 16:1). Kande den ben wani a sani disi fu di den no ben e frustan a profeititori fu Danièl 7:13, 14. Ma a ten no ben doro ete fu a profeititori disi kon tru. Den sani di Yesus ben leri sma, ben musu sori kaba taki en na a Mesias. Ma di Yesus no ben wani du wan wondru gi den sma disi, den drai baka gi en.​—Mat. 16:4.

10. Fa Yesus meki a profeititori fu a Mesias na Yesaya 42:1, 2, kon tru?

¹⁰ San Bijbel e taki? Disi na san a profeiti Yesaya ben taki fu a Mesias: „A no o bari noso opo en sten èn nowan sma o yere en sten na strati” (Yes. 42:1, 2). Di Yesus ben e du a wroko fu Yehovah na grontapu, a no ben e du sma-ai sani. A no ben meki den bow bigi tempel gi en, a no ben e weri spesrutu krosi, èn a no ben e taigi sma fu kari en na a fasi fa den ben e kari kerki fesiman. Srefi di Yesus ben de na fesi krutu fu di den ben wani kiri en, a weigri fu du wan wondru gi Kownu Herodes di a aksi en fu du dati (Luk. 23:8-11). A tru taki Yesus ben du wan tu wondru, ma a moro prenspari wroko fu en ben de fu preiki a bun nyunsu. A taigi den disipel: „Na fu dati ede mi kon”.​—Mark. 1:38.

11. Sortu fowtu denki sma abi na ini a ten disi?

¹¹ Wi e si a srefi sani na ini a ten disi? Iya. A sani di e hari furu sma, na te wan kerki abi ala sortu kefalek sani. Kande na  wan bigi kerki di abi ala sortu diridiri sani na ini, kande den e kari den kerki fesiman pastor noso ala sortu tra nen fu gi den grani, noso den abi kerki gwenti di den srefi no sabi pe den komoto. Den sma di e go na den kerki disi no e leri furu fu Gado èn san a abi na prakseri fu du. Ma den sma di e go na den Kresten konmakandra e leri san Yehovah e aksi fu wi èn fa wi kan libi soleki fa a wani. Den Kownukondre zaal fu wi krin èn den moi, ma den no abi ala sortu pranpran. Den sma di e teki fesi no e weri spesrutu sortu krosi, èn sma no e gebroiki ala sortu nen fu gi den grani. Den sani di wi e leri èn e bribi e komoto fu Gado Wortu. Toku furu sma na ini a ten disi no wani arki wi fu di wi no abi ala sortu kefalek kerki gwenti na ini na anbegi fu wi èn den sani di wi e leri sma a no sani di den wani yere.

12. Te wi e luku Hebrewsma 11:1, 6, dan san musu meki taki wi abi bribi?

¹² San wi kan du fu no lasi bribi? Na apostel Paulus ben taigi den Kresten di ben e libi na ini Rome: „Bribi e kon baka te wan sma yere a boskopu. Wan sma e yere a boskopu te wan trawan e taki fu Krestes” (Rom. 10:17). Sobun, wi bribi e kon tranga te wi e studeri Bijbel. A no te wi e hori wisrefi na kerki gwenti di no e komoto fu Bijbel, awinsi fa den e hari wi. Wi musu studeri Bijbel finifini fu tranga wi bribi, bika „sondro bribi wan sma no kan prisiri Gado” (Leisi Hebrewsma 11:1, 6.) Sobun, wi no abi wan wondru fu Gado fanowdu fu de seiker taki wi abi a waarheid. Te wi e ondrosuku Bijbel finifini, dan dati o yepi wi fu no tweifri.

13. Fu san ede furu sma drai baka gi Yesus?

¹³ Na ini a ten fu Yesus, den disipel fu Yohanes a Dopuman no ben man bribi taki den disipel fu Yesus no ben e faste. Yesus ben sori den taki den no ben abi fu faste fu di a ben de na libi ete (Mat. 9:14-17). Den Fariseiman nanga den gensman  fu Yesus ben e krutu en fu di a no ben e hori ensrefi na den gwenti fu den Dyu. Den ati bron di a ben e dresi siki sma tapu Sabat-dei (Mark. 3:1-6; Yoh. 9:16). Na a wán sei, den ben e meki bigi taki den ben e hori densrefi na den wet fu Sabat-dei. Ma na a tra sei, den no ben e krutu den sma di ben e du bisnis na ini a tempel. Den ati bron srefisrefi di Yesus sori den taki a sani disi no bun (Mat. 21:12, 13, 15). Di Yesus ben e preiki gi sma na ini wan snoga fu Nasaret, dan den sma ati bron di a sori den taki den no abi bribi èn taki den e denki densrefi nomo (Luk. 4:16, 25-30). Fu di den no ben fruwakti taki Yesus ben o taki a sani disi, meki den drai baka gi en.​—Mat. 11:16-19.

14. Fu san ede Yesus ben krutu den gwenti fu den Dyu di no ben e kruderi nanga Bijbel?

¹⁴ San Bijbel e taki? Yehovah ben meki a profeiti Yesaya taki: „Nanga den mofo nomo a pipel disi e taki dati den de krosibei fu mi. Den e gi mi glori nanga den mofo nomo, ma den ati de farawe fu mi. Den feni taki den e frede mi, ma den e gi yesi soso na den komando di libisma e leri den” (Yes. 29:13). Yesus ben abi leti fu krutu den gwenti di no ben e kruderi nanga Bijbel. Na libisma ben poti den gwenti dati leki wet. Te yu luku en bun, dan den sma di ben feni taki den gwenti disi prenspari moro san skrifi na ini Bijbel, ben drai baka gi Yehovah nanga a sma di a ben seni kon leki Mesias.

15. San furu sma na ini a ten disi no lobi fu Yehovah Kotoigi?

¹⁵ Wi e si a srefi sani na ini a ten disi? Iya. Yehovah Kotoigi no e hori son fesa, fu di den fesa disi no e kruderi nanga Bijbel. Dati meki furu sma e mandi nanga den te den no e hori friyari-oso nanga Kresneti. Trawan ati e bron te Yehovah Kotoigi no e hori den fesa di e gi grani na a kondre, noso te den no e du den sani di sma gwenti du te wan sma dede. Den sma di e atibron fu den sani disi ede, e bribi kande taki den e anbegi Gado na a yoisti fasi. Ma den no o man plisi en efu den feni taki den gwenti fu grontapu prenspari moro den leri fu Bijbel di e sori krin fa wi musu anbegi en.​—Mark 7:7-9.

16. Soleki fa Psalm 119:97, 113, 163-165 e sori, dan san wi musu du èn san wi no musu du?

¹⁶ San wi kan du fu no lasi bribi? Wi musu leri fu lobi den wet nanga gronprakseri fu Yehovah moro nanga moro. (Leisi Psalm 119:97, 113, 163-165.) Te wi lobi Yehovah, dan wi o weigri fu hori wisrefi na iniwan gwenti di a no feni bun. Wi no o meki nowan sani tapu wi fu lobi Yehovah.

17. San furu sma na ini a ten fu Yesus ben e fruwakti taki a Mesias ben o du?

¹⁷ Son sma na ini a ten fu Yesus ben e fruwakti taki a Mesias ben o fri den fu a tiri fu den Romesma. Ma di den pruberi fu poti Yesus leki kownu, dan a no ben wani (Yoh. 6:14, 15). Son sma, soleki den priester, ben e frede taki Yesus ben o kenki a regering. Dan den Romesma ati ben o bron èn den ben o puru a makti di den ben gi den priester. Dati meki den Dyu disi no ben wani arki Yesus.

18. Na sortu profeititori fu a Mesias den sma no ben poti prakseri?

¹⁸ San Bijbel e taki? Furu profeititori ben e taki dati te fu kaba a Mesias ben o de wan Kownu di ben o wini den feanti fu en. Ma tra profeititori ben e sori taki a ben o abi fu dede fosi gi den sondu fu wi  (Yes. 53:9, 12). Ma fu san ede den sma fu a ten fu Yesus ben e fruwakti taki Yesus ben o kenki sani na a ten dati? Furu fu den no ben poti prakseri na den profeititori di ben e sori taki den problema fu den no ben o lusu na a ten dati.​—Yoh. 6:26, 27.

19. Fu san ede furu sma na ini a ten disi no wani arki a boskopu fu wi?

¹⁹ Wi e si a srefi sani na ini a ten disi? Iya. Furu sma na ini a ten disi no wani arki wi fu di wi no e bumui nanga politiek. Den wani taki wi go stem te verkiezing e hori. Ma te wi e prakseri fa Yehovah e si sani, dan wi no kan horibaka gi wan libisma tiriman. Fu taki en leti, na drai wi ben o drai baka gi Yehovah efu wi ben o du dati (1 Sam. 8:4-7). Kande sma feni taki wi musu yepi bow skoro nanga ati-oso èn taki wi musu du tra sani fu yepi sma na ini a libimakandra. Den sma disi no wani arki wi fu di den e feni taki wi e poti prakseri soso na a preikiwroko, na presi fu lusu den problema di libisma abi nownow.

20. Te yu e luku san Yesus taki na Mateyus 7:21-23, dan san na a moro prenspari wroko di wi musu du?

²⁰ San wi kan du fu no lasi bribi? (Leisi Mateyus 7:21-23.) A moro prenspari sani gi wi, na fu du a wroko di Yesus gi wi fu du (Mat. 28:19, 20). Noiti wi musu meki politiek, den problema fu grontapu, noso tra sani puru wi prakseri na a wroko disi. Wi lobi sma èn wi e broko wi ede nanga den problema fu den, ma wi sabi taki a moro bun fasi fu yepi den, na fu leri den fu Gado Kownukondre èn fu yepi den fu tron mati fu Yehovah.

21. Sortu sani wi musu meki muiti fu du?

²¹ Na ini na artikel disi wi si fo sani di meki taki sma no ben wani arki Yesus na ini a ten fu en èn di kan meki taki sma na ini a ten disi no wani arki den bakaman fu Yesus tu. Ma na soso nanga den fo sani disi wi musu luku bun? Nôno. Na ini a tra artikel wi o luku ete fo sani. Meki a de so taki wi tan du muiti fu waka baka Yesus èn fu meki wi bribi kon tranga.