1. Sortu prenspari bosroiti ala libisma musu teki?

 SMA na ini a ten disi musu teki wan prenspari bosroiti. Den o horibaka gi Yehovah Gado di abi a reti fu tiri hemel nanga grontapu, noso den o horibaka gi na ogri feanti fu en Satan Didibri? Ala sma musu teki wan bosroiti, tra fasi no de. A bosroiti di den o teki o meki taki den kisi têgo libi noso taki den kisi pori (Mat. 25:31-33, 46). Na a ten fu „a bigi banawtu”, den o kisi a marki fu pasa Armagedon libilibi noso fu kisi pori.​—Openb. 7:14; 14:9-11; Esek. 9:4, 6.

2. (a) Sortu deki-ati Hebrewsma 10:35-39 e gi wi? (b) Fa a buku Openbaring kan yepi wi?

² Leisi Hebrewsma 10:35-39. Efu yu teki a bosroiti fu horibaka gi a tiri fu Yehovah, dan yu teki wan koni bosroiti. Now, yu o wani yepi trawan tu fu teki a yoisti bosroiti. Yu kan gebroiki den sani di skrifi na ini a buku Openbaring fu yepi den. A moi buku disi e sori san o pasa nanga den sma di e gens Yehovah, ma a e tyari kon na krin tu sortu blesi den sma di e horibaka gi a tiri fu en o kisi. Fu dati ede, a de tumusi prenspari fu studeri den sani disi. Te wi e du dati, dan dati o yepi wi fu no meki noti tapu wi fu dini Yehovah go doro. Boiti dati, wi kan gebroiki den sani di wi kon sabi fu yepi trawan fu teki a yoisti bosroiti èn fu hori densrefi na a bosroiti dati.

3. San wi o luku na ini na artikel disi?

³ Na ini na artikel disi wi o luku den aksi disi: San o pasa nanga den sma di e horibaka gi a tiri fu Gado? Ma san o pasa nanga den sma di teki a bosroiti fu horibaka gi a redi ogri meti di kari na ini a buku Openbaring?

4. Sortu grupu na apostel Yohanes e si makandra nanga Yesus na ini hemel?

⁴ Na ini wan fisyun, na apostel Yohanes e si tu grupu di e horibaka gi a tiri fu Yehovah èn di e kisi a blesi fu libi fu têgo. A fosi grupu abi 144.000 sma na ini (Openb. 7:4). Gado e teki den sma disi fu grontapu fu seti wan regering noso wan Kownukondre makandra nanga Yesus na ini hemel. Makandra nanga en den o tiri grontapu (Openb. 5:9, 10; 14:3, 4). Na ini a fisyun, Yohanes e si fa den e tanapu nanga Yesus tapu Sion-bergi na ini hemel.​—Openb. 14:1.

5. San o pasa heri esi nanga den wan di tan abra fu a grupu fu den 144.000 salfuwan?

⁵ Sensi a ten fu den apostel teleki now, Gado teki dusundusun sma na ini a grupu fu den 144.000 salfuwan (Luk. 12:32; Rom. 8:17). Ma Yohanes e kisi fu yere taki wan pikin grupu di tan abra ben o de na libi na grontapu na ten fu den lasti dei. Den wan disi di „tan abra” o kisi a lasti „marki” fu den fosi a bigi banawtu bigin èn disi o sori taki Yehovah feni den bun (Openb. 7:2, 3; 12:17). Na a ten fu a bigi banawtu, den wan disi di tan abra, o go na hemel fu de makandra nanga den trawan di de fu a grupu fu den 144.000 sma di dede kaba. Drape den o tiri makandra nanga Yesus na ini Gado Kownukondre.​—Mat. 24:31; Openb. 5:9, 10.

6-7. (a) Sortu tra grupu Yohanes e si baka dati èn san wi e kon sabi fu den? (b) Fu san ede den tu grupu musu fruwakti fu si fa Openbaring kapitel 7 e kon tru?

⁶ Baka te Yohanes si a grupu na ini hemel, a e si wan „bigi ipi sma”. Tra fasi leki a grupu fu den 144.000 sma, nowan sma man teri a bigi ipi disi (Openb. 7:9, 10). San wi e kon sabi fu den? Na engel e taigi Yohanes: „Den wan disi na den sma di komoto na ini a bigi banawtu. Den wasi den langa krosi fu den èn den meki den kon weti na ini a brudu fu a Pikin Skapu” (Openb. 7:14). Baka te a „bigi ipi” disi pasa a bigi banawtu libilibi, den o libi dyaso na grontapu èn den o kisi bun furu blesi.​—Ps. 37:9-11, 27-29; Odo 2:21, 22; Openb. 7:16, 17.

⁷ Wi e si wisrefi na ini a tori di skrifi na Openbaring kapitel 7? Wi alamala musu si wisrefi na ini a tori dati, awinsi wi abi a howpu fu go na hemel noso fu tan dyaso na grontapu. A ten dati o de wan prisiri ten gi den tu grupu disi di e dini Yehovah. Wi o prisiri srefisrefi fu di wi teki a bosroiti fu horibaka gi a tiri fu Yehovah. Sortu tra sani a buku Openbaring e taigi wi fu a bigi banawtu?​—Mat. 24:21.

8. Fa a bigi banawtu o bigin èn san furu sma o du?

⁸ Soleki fa wi si na ini na artikel na fesi, dan den regering o go feti heri esi nanga Babilon a Bigiwan noso ala den falsi kerki na heri grontapu (Openb. 17:16, 17). A sani disi o de a bigin fu a bigi banawtu. Ma disi wani taki dati bun furu sma o bigin anbegi Yehovah? Nôno. Na presi fu dati, Openbaring kapitel 6 e sori taki na ten dati, den sma di no e dini Yehovah o suku kibri na den tiriman èn na den bisnisman fu a grontapu disi di Bijbel e agersi nanga bergi. Fu di den sma disi no o horibaka gi Gado Kownukondre, meki Yehovah o si den leki sma di e gens en.​—Luk. 11:23; Openb. 6:15-17.

9. Fa a pipel fu Yehovah o de tra fasi leki den tra sma na a ten fu a bigi banawtu èn san o pasa nanga Yehovah en pipel?

 ⁹ A de krin taki na a muilek ten dati fu a bigi banawtu, den futuboi fu Yehovah di e tan gi yesi na en o de heri tra fasi leki den tra sma na grontapu. Den o de a wan-enkri grupu na grontapu di e tan dini Yehovah Gado èn di e weigri fu horibaka gi „na ogri meti” (Openb. 13:14-17). Fu di den e tan gi yesi na Yehovah, meki den sma di e gens Yehovah o atibron srefisrefi. Leki bakapisi fu dati, den kondre o span anu makandra èn den o kon feti nanga Gado pipel na heri grontapu. Bijbel e taki dati na Gok fu Magok o kon feti nanga Gado pipel.​—Esek. 38:14-16.

10. Soleki fa Openbaring 19:19-21 e sori, dan san Yehovah o du te sma o kon feti nanga en pipel?

¹⁰ San Yehovah o du te sma o kon feti nanga en pipel? A e taigi wi: „Mi o kisi so wan bigi atibron taki a o de fu si na mi fesi” (Esek. 38:18, 21-23). Openbaring kapitel 19 e fruteri wi san o pasa baka dati. Yehovah o seni en Manpikin fu kibri en pipel èn fu wini den feanti fu den. Yesus no e feti a feti disi en wawan. A o de makandra nanga „den legre na hemel”. Dati na den engel makandra nanga den 144.000 salfuwan (Openb. 17:14; 19:11-15). San o pasa baka a feti disi? Ala den sma èn ala den organisâsi di e gens Yehovah o kisi pori krinkrin!​—Leisi Openbaring 19:19-21.

11. San na a moro prenspari sani di kari na ini a buku Openbaring?

¹¹ Prakseri fa den sma na grontapu o firi di tan gi yesi na Yehovah. Den pasa a pori fu Gado feanti libilibi! Ala sma na grontapu o prisiri srefisrefi na a ten dati. Prisiri o de na hemel tu te Babilon a Bigiwan kisi pori, ma wan tra sani o meki den wan na hemel prisiri moro (Openb. 19:1-3). A sani dati, na wan tumusi prenspari sani di kari na ini a buku Openbaring. San na en? „A trowdei fu a Pikin Skapu.”​—Openb. 19:6-9.

12. Soleki fa a skrifi na Openbaring 21:1, 2, dan o ten a Pikin Skapu o trow?

¹² O ten a Pikin Skapu o trow? Ala den 144.000 salfuwan o de na hemel syatu fosi a feti fu Armagedon bigin, ma dati a no a trow dei fu a Pikin Skapu. (Leisi Openbaring 21:1, 2.) A Pikin Skapu o trow baka a feti fu Armagedon te ala den feanti fu Gado kisi pori.​—Ps. 45:3, 4, 13-17.

13. San o pasa na a trowdei fu a Pikin Skapu?

¹³ San o pasa na a trowdei fu a Pikin Skapu? We, neleki fa wan man nanga wan uma e tron wán te den trow, na so a de tu taki Kownu Yesus Krestes o tron wán nanga a „trowmisi” fu en, den 144.000 salfuwan. Te a prenspari sani dati pasa, dan den 144.000 salfuwan makandra nanga Yesus o tiri grontapu 1000 yari langa.​—Openb. 20:6.

14-15. Nanga san Openbaring kapitel 21 e agersi den 144.000 salfuwan? (Luku a fowtow na tapu a kafti.)

¹⁴ Baka dati, Openbaring 21 e agersi den 144.000 salfuwan nanga wan kefalek moi foto di Bijbel e kari „a Nyun Yerusalem” (Openb. 21:2, 9). A foto disi abi twarfu ston leki fondamenti èn „den twarfu nen fu den twarfu apostel fu a Pikin Skapu ben skrifi na tapu den ston”. Fu san ede a sani disi e hari a prakseri fu  Yohanes? Fu di a si en eigi nen tapu wan fu den ston dati. Dati na wan bigi grani trutru!​—Openb. 21:10-14; Ef. 2:20.

¹⁵ A foto disi di Yohanes si no de leki nowan tra foto. A bigi pasi fu en meki fu soifri gowtu, a abi twarfu portu di meki fu peri, a abi skotu nanga fondamenti di meki moi nanga diriston èn a bradi èn a langa a srefi (Openb. 21:15-21). Ma toku a ben gersi leki wan sani ben e misi! Luku san Yohanes e taki: „Mi no ben si wan tempel na ini a foto, bika Yehovah Gado na Almaktiwan nanga a Pikin Skapu, na a tempel fu a foto. A son noso a mun no ben abi fu skèin leti na tapu a foto, bika a glori fu Gado ben de a leti di ben e skèin na en tapu èn a lampu fu a foto ben de a Pikin Skapu” (Openb. 21:22, 23). Den 144.000 salfuwan o si Yehovah fesi (Hebr. 7:27; Openb. 22:3, 4). Sobun, Yehovah nanga Yesus na a tempel na ini a foto dati.

16. San o pasa nanga libisma na ten fu a Dusun Yari Tiri fu Gado Kownukondre?

¹⁶ Den salfuwan e prisiri srefisrefi te den e prakseri a foto disi. Ma a foto disi prenspari tu gi den wan di abi a howpu fu libi na grontapu. Na a ten fu a Dusun Yari Tiri fu Gado Kownukondre, a Nyun Yerusalem o tyari bogobogo blesi kon. Yohanes e si den blesi disi leki „wan liba di ben abi watra di e gi libi”. Na ala tu sei fu a liba disi yu ben abi „bon di e gi libi èn den wiwiri fu den bon ben de fu dresi den pipel” (Openb. 22:1, 2). Ala libisma di e libi na a ten dati o man kisi wini fu den moi seti dati. Safrisafri ala libisma di e gi yesi na Yehovah o tron sma di no abi sondu. Nowan siki no o de moro, nowan pen no o de moro èn nowan sma o krei fu di den e sari.​—Openb. 21:3-5.

17. Soleki fa Openbaring 20:11-13 e sori, dan suma o kisi wini fu a Dusun Yari Tiri?

¹⁷ Suma o kisi wini fu den moi seti disi? Na a fosi presi, na a bigi ipi di pasa Armagedon libilibi èn sosrefi den pikin di o gebore na ini a nyun grontapu. Ma Openbaring kapitel 20 e pramisi tu taki dedewan o kon na libi baka. (Leisi Openbaring 20:11-13.) „Den sma di du san reti” èn di dede kaba, nanga „den sma di no du san reti” èn di no ben abi  na okasi fu kon leri sabi sani fu Yehovah, o kon na libi baka dyaso na grontapu (Tori 24:15; Yoh. 5:28, 29). Disi wani taki dati ala sma o kisi wan opobaka fu libi na grontapu na a ten fu a Dusun Yari Tiri? Nôno. Den sma di e weigri fu dini Yehovah aladi den ben kisi na okasi dati fosi den dede, no o kisi libi baka. Den ben abi na okasi dati kaba èn den sori krin taki den no warti fu libi na ini a paradijs na grontapu.​—Mat. 25:46; 2 Tes. 1:9; Openb. 17:8; 20:15.

18. Fa a situwâsi na grontapu o de na a kaba fu den 1000 yari?

¹⁸ Na a kaba fu den 1000 yari, den sma di o libi na grontapu no o abi sondu moro. Nowan sma o abi a sondu moro di libisma ben kisi fu Adam (Rom. 5:12). A fluku fu a sondu fu Adam no o de noiti moro. Disi o meki taki den wan di e libi na grontapu o „kon na libi” na a kaba fu den 1000 yari èn dati wani taki dati den no o abi sondu moro.​—Openb. 20:5.

19. Fu san ede a de fanowdu taki libisma kisi wan lasti tesi?

¹⁹ Wi sabi taki Yesus no meki Satan kori en fu trangayesi Gado. A tan gi yesi na Gado aladi a ben kisi tesi. Ma disi wani taki dati ala sma di no abi sondu o du a srefi, te Satan o kisi na okasi fu tesi den? Ibri sma o abi fu sori taki a e tan gi yesi na Yehovah te den lusu Satan komoto fu na peti na a kaba fu den 1000 yari (Openb. 20:7). Den wan di e tai hori na Yehovah na a kaba fu a lasti tesi disi o kisi têgo libi èn te fu kaba den o de fri trutru (Rom. 8:21). Ma den wan di o opo densrefi teige Yehovah o kisi pori fu têgo makandra nanga Didibri nanga den ogri yeye fu en.​—Openb. 20:8-10.

20. Fa yu feni den moi profeititori di de fu feni na ini a buku Openbaring?

²⁰ Fa yu e firi now di yu luku a buku fu Openbaring syatu baka? Yu no breiti taki yu e si yusrefi na ini den moi profeititori disi? A no de fu taki dati yu wani gi trawan a kari fu kon na ini a tru anbegi fu a Gado fu wi (Openb. 22:17). Now di wi taki fu den sani disi di o pasa na ini a ten di e kon, dan wi breiti srefisrefi èn neleki na apostel Yohanes wi wani taki: „Amen! Kon, Masra Yesus.”​—Openb. 22:20.