1-2. Fu san ede wi musu poti prakseri na a buku Openbaring?

 OITI yu kisi na okasi fu luku wan fowtow album fu wan sma di yu sabi? Te yu e luku den fowtow, dan moro furu yu e si sma di yu no sabi. Ma wan fu den fowtow e hari yu prakseri. Fu san ede? Fu di yu de na tapu a fowtow dati. Now yu e bigin denki o ten yu ben meki a fowtow dati èn pe yu ben de. Yu e pruberi fu kon sabi tu suma na den tra sma tapu a fowtow. Na a fowtow dati prenspari gi yu fu di yu e si yusrefi na tapu.

² A buku Openbaring de leki a fowtow dati. Fu san ede? Wi o taki fu tu reide. A fosi reide, na taki a Bijbel buku disi ben skrifi gi wi. Na ini a fosi vers kaba, wi e leisi: „Wan boskopu di Yesus Krestes tyari kon na krin èn di Gado gi en fu sori den srafu fu Gado den sani di musu pasa dyonsro” (Openb. 1:1). Sobun, den sani di skrifi na ini a buku disi a no gi ala sma, ma na gi wi di e anbegi Gado. Fu di wi na a pipel fu Gado, meki a no musu fruwondru wi taki wi e yepi fu meki den span profeititori na ini a buku disi kon tru. Fu taki en leti, wi e si wisrefi „na tapu a fowtow”.

3-4. Soleki fa a buku Openbaring e sori, dan o ten den profeititori fu en o kon tru, èn san ibriwan fu wi musu du?

³ A di fu tu reide abi fu du nanga a ten te a profeititori disi o kon tru. Na owru apostel Yohanes ben sori o ten dati ben o pasa. A ben skrifi: „Ne santa yeye tyari mi go na a dei fu Masra” (Openb. 1:10). Di Yohanes skrifi den wortu dati na a ten fu a yari 96, dan „a dei fu Masra” ben fara ete (Mat. 25:14, 19; Luk. 19:12). Ma soleki fa Bijbel  profeititori e sori, a dei dati bigin na ini 1914 di Yesus tron Kownu na hemel. Sensi a yari dati, den profeititori fu a buku Openbaring di abi fu du nanga a pipel fu Gado, bigin kon tru. Iya, wi e libi now na ini „a dei fu Masra”.

⁴ Fu di wi e libi na ini a span ten disi, meki wi musu poti spesrutu prakseri na a moi rai di skrifi na Openbaring 1:3. A e taki: „Koloku fu a sma di e leisi den wortu fu a profeititori disi nanga wan tranga sten. Koloku fu den sma di e yere a profeititori disi èn di e du den sani di skrifi na ini, bika a reti ten de krosibei.” Iya, wi musu ’leisi nanga wan tranga sten’ fu man „yere a profeititori disi” èn fu man „du den sani di skrifi na ini”. San na wan tu fu den sani di wi musu du?

5. Fa a buku Openbaring e gi wi deki-ati fu sorgu taki Yehovah feni na anbegi fu wi bun?

⁵ A fosi kapitel fu a buku Openbaring e bigin sori kaba taki Yesus sabi heri bun san e pasa na ini den gemeente fu a pipel fu en (Openb. 1:12-16, 20; 2:1). Wi kan si dati tu te wi e luku den boskopu di a seni gi den seibi gemeente na ini Pikin Asia. A du dati fu gi den fosi Kresten krinkrin rai fu sori den fa den kan sorgu taki Yehovah feni na anbegi fu den bun. Boiti dati, a boskopu disi abi fu du nanga ala den anbegiman fu Gado na ini a ten disi. San disi e leri wi? Wi Fesiman, Krestes Yesus, sabi heri bun efu wi abi wan bun matifasi nanga Yehovah. Yesus e tiri wi, a e kibri wi èn a e si ala sani. A sabi san wi abi fanowdu fu sorgu taki Yehovah tan feni wi bun. Sortu rai a gi wi na ini a ten disi?

6. (a) Te wi e luku san Yesus taki na Openbaring 2:3, 4, dan sortu problema a gemeente na ini Efeise ben abi? (b) San disi e leri wi?

⁶ Leisi Openbaring 2:3, 4. Wi no musu lasi a lobi di wi ben abi gi Yehovah biginbigin. A boskopu di Yesus ben seni gi den Kresten na ini a gemeente Efeise e sori taki den ben horidoro èn taki den ben tan dini Yehovah aladi difrenti problema ben miti den. Ma den ben lasi a lobi di den ben abi biginbigin. Efu den no ben o kon abi a lobi dati baka, dan Yehovah no ben o feni na anbegi fu den bun. Na so a de tu taki wi na ini a ten disi musu du moro leki fu horidoro nomo. Wi musu sabi fu san ede wi e horidoro. A Gado fu wi no wani sabi nomo san wi e du, ma a wani sabi tu fu san ede wi e du den sani dati. A sani dati prenspari gi en, fu di a wani taki wi anbegi en fu di wi lobi en nanga wi heri ati èn fu di wi e warderi den sani di a du gi wi.​—Odo 16:2; Mark. 12:29, 30.

7. (a) Soleki fa Openbaring 3:1-3 e sori, dan sortu problema a gemeente na ini Sardes ben abi? (b) San wi musu du?

⁷ Leisi Openbaring 3:1-3. Wi musu tan na ai. Den Kresten fu a gemeente na ini Sardes ben abi wan tra sortu problema. Den ben e dini Gado fayafaya na ini a ten di pasa, ma now den no ben du dati moro. Dati meki Yesus taigi den fu „wiki”. San disi e leri wi? A no de fu taki dati Yehovah no o frigiti a wroko di wi du gi en (Hebr. 6:10). Ma toku wi no musu denki taki wi no abi fu dini Yehovah fayafaya moro, soso fu di wi ben du dati kaba na ini a ten di pasa. Aladi wi no man du so furu moro leki fosi, toku wi musu abi furu fu du „na ini a wroko fu Masra” èn wi musu tan na ai te na a  kaba.​—1 Kor. 15:58; Mat. 24:13; Mark. 13:33.

8. San wi e leri fu den sani di Yesus ben taigi den Kresten na ini Laodisea, soleki fa Openbaring 3:15-17 e sori?

⁸ Leisi Openbaring 3:15-17. Wi musu anbegi Gado fayafaya èn nanga wi heri ati. A boskopu di Yesus ben seni go gi a gemeente na ini Laodisea, ben sori taki den Kresten drape ben abi wan tra problema. Den no ben kowru èn den no ben faya na ini na anbegi fu den. Fu di den no ben e anbegi Gado nanga den heri ati, meki Yesus taigi den taki den ben de leki „mofina sma” èn taki a ben e „firi sari” gi den. Den ben musu kon de nanga faya baka gi Yehovah èn gi na anbegi fu en (Openb. 3:19). San disi e leri wi? Efu wi no de so fayafaya moro leki fosi, dan wi musu kon abi moro warderi gi ala den sani di Yehovah nanga en organisâsi e du gi wi (Openb. 3:18). Noiti wi wani feti baka gudu, fu di wi wani taki na anbegi fu Yehovah tan na a fosi presi na ini wi libi.

9. Gi sortu sani wi musu wai pasi te wi e luku den boskopu di Yesus ben seni gi den Kresten na ini Pergamum nanga Tiatira?

⁹ Wi no musu bribi den leri fu sma di e lei gi Yehovah nanga en organisâsi. Yesus ben piri-ai gi son Kresten na ini Pergamum fu di den ben e tyari pratifasi kon na ini a gemeente (Openb. 2:14-16). A ben prèise den Kresten na ini Tiatira di ben wai pasi gi „’den dipi sani’ fu Satan” èn a gi den deki-ati fu „tan hori steifi” na a waarheid (Openb. 2:24-26). Den swaki Kresten na ini a gemeente drape di ben gi pasi taki falsi leri kori den, ben musu sori berow. Fa a de nanga wi na ini a ten disi? Wi no musu bribi nowan enkri leri di no e kruderi nanga a fasi fa Yehovah e denki. Den sma di e kon nanga den sortu leri disi „gersi leki den e dini Gado fayafaya”, ma a libi fu den e sori taki dati no de so (2 Tim. 3:5). Te wi e studeri Gado Wortu fayafaya, dan a moro makelek fu kon sabi san na falsi leri èn a o moro makelek tu fu no bribi den sani dati.​—2 Tim. 3:14-17; Yud. 3, 4.

10. Sortu tra sani wi kan leri fu den boskopu di Yesus ben seni gi den gemeente na ini Pergamum nanga Tiatira?

¹⁰ Wi no musu du nowan sani di Gado no feni bun èn wi no musu tapu wi ai gi den sani dati. Ma ete wan problema ben  de na ini Pergamum nanga Tiatira. Yesus ben krutu wan tu fu den Kresten na ini den gemeente dati fu di den ben tapu den ai gi sani di Gado no feni bun (Openb. 2:14, 20). San disi e leri wi? Awinsi wi dini Yehovah omeni yari langa èn awinsi wi abi wan tu frantwortu, toku wi no kan fruwakti taki Yehovah o feni na anbegi fu wi bun te wi e du sani di no fiti (1 Sam. 15:22; 1 Petr. 2:16). Yehovah e fruwakti taki wi e tan libi soleki fa a wani awinsi fa den sma fu a grontapu disi e tyari densrefi.​—Ef. 6:11-13.

11. San wi leri te nanga now? (Luku sosrefi a faki „ Sani di wi kan leri na ini a ten disi”.)

¹¹ San wi leri te nanga now? Wi si taki wi musu sorgu taki Yehovah feni na anbegi fu wi bun. Efu wi e du wan sani di kan meki taki Yehovah no feni na anbegi fu wi bun, dan wi musu tyari kenki kon wantewante (Openb. 2:5, 16; 3:3, 16). Ma den boskopu di Yesus ben seni gi den gemeente ben poti prakseri na ete wan sani. San na dati?

12. San wi kan leri fu den boskopu di Yesus ben seni go gi den Kresten na ini Smirna nanga Filadelfia? (Openbaring 2:10)

¹² Now wi o luku den boskopu di Yesus ben seni gi den gemeente na ini Smirna nanga Filadelfia. A ben taigi den Kresten drape taki den no ben musu frede fu kisi frufolgu fu di Yehovah ben o blesi den efu den ben tan gi yesi na en (Leisi Openbaring 2:10; 3:10). San disi e leri wi? Wi musu fruwakti taki sma o frufolgu wi èn wi musu de klariklari fu horidoro (Mat. 24:9, 13; 2 Kor. 12:10). Fu san ede a prenspari taki wi e hori a sani disi na prakseri?

13-14. San pasa nanga a pipel fu Gado baka di den fringi Satan kon na grontapu, soleki fa Openbaring kapitel 12 e sori?

¹³ A buku Openbaring e sori taki a pipel fu Gado ben o kisi frufolgu na „a dei fu Masra”, dati wani taki na ini a ten fu wi. Openbaring kapitel 12 e taki dati wantewante baka di Yesus tron Kownu fu Gado Kownukondre, wan feti bigin na hemel. Mikael, noso Yesus Krestes di kisi glori, makandra nanga a legre fu en, feti teige Satan nanga den ogri yeye (Openb. 12:7, 8). Den wini den feanti fu Gado, den fringi den kon na grontapu èn na so furu ogri miti libisma (Openb. 12:9, 12). Ma san pasa nanga a pipel fu Gado?

¹⁴ A buku Openbaring e fruteri moro fara san Satan du. Fu di a no man go moro na hemel, meki a e feti nanga den salfu futuboi fu Yehovah di de ete na grontapu. Den salfuwan disi e teki presi gi a Kownukondre fu Gado èn „den kisi a wroko fu kotoigi fu Yesus” (Openb.  12:17; 2 Kor. 5:20; Ef. 6:19, 20). Fa a profeititori disi kon tru?

15. Suma na „den tu kotoigi” di kari na ini Openbaring kapitel 11, èn san pasa nanga den?

¹⁵ Satan meki den feanti fu Gado go feti nanga den salfu brada di ben e teki fesi na ini a Kownukondre preikiwroko. Den brada disi ben de „den tu kotoigi” di Bijbel e taki dati sma kiri den * (Openb. 11:3, 7-11). Na ini 1918, sma ben tyari aiti fu den brada di ben e teki fesi go na krutu. Aladi den no ben du nowan ogri, toku den kisi langa strafu. Fu di den brada ben de na strafu-oso, meki a ben gersi leki a wroko fu den ben tapu, fu taki en leti a ben de neleki den ben „kiri” den tu kotoigi disi.

16. San pasa na ini 1919 èn san Satan tan du sensi a ten dati?

¹⁶ A profeititori na ini Openbaring kapitel 11 ben taki tu dati baka wan syatu pisi ten „den tu kotoigi” ben o kon na libi baka. A no teki wán yari baka dati, di a profeititori disi kon tru na wan fasi di sma no ben fruwakti. Na ini maart 1919, den salfu brada disi komoto na strafu-oso èn den no ben abi fu kon na fesi krutu moro. Wantewante den brada teki fesi baka na ini a Kownukondre preikiwroko. Ma dati no ben tapu Satan fu feti nanga a pipel fu Gado. Sensi a ten dati, Satan meki wan agersi „liba” fu frufolgu wasi kon tapu a pipel fu Gado (Openb. 12:15). A de krin taki ibriwan fu wi musu horidoro èn taki wi musu sori bribi.​—Openb. 13:10.

17. Fa a pipel fu Gado kisi yepi na wan fasi di den no fruwakti, aladi Satan de nomonomo fu feti nanga den?

¹⁷ Openbaring kapitel 12 e sori moro fara taki a pipel fu Gado ben o kisi yepi di den no ben fruwakti. A ben o de neleki „grontapu” swari „a liba” fu frufolgu (Openb. 12:16). Èn na dati pasa tu. Son leisi, pisi fu a grontapu fu Satan soleki son krutubangi, yepi a pipel fu Gado. Furu leisi den futuboi fu Yehovah wini krutu-afersi di meki taki den ben man anbegi Gado moro fri. San den du baka dati? Den gebroiki ibri okasi di den ben  abi fu du a wroko di Yehovah gi den (1 Kor. 16:9). San na a wroko disi?

18. San na a moro prenspari wroko di wi musu du na ini den lasti dei disi?

¹⁸ Yesus ben taki dati a pipel fu en ben o preiki a „bun nyunsu fu [Gado] Kownukondre” na heri grontapu fosi a kaba ben o kon (Mat. 24:14). Te den ben o du a wroko disi, dan engel ben o yepi den. Bijbel e taki dati den engel disi abi ’têgo bun nyunsu di den musu fruteri den sma di e libi na grontapu, iya, sma fu ala kondre, lo, tongo, nanga pipel’.​—Openb. 14:6.

19. San na wan tra boskopu di den futuboi fu Yehovah musu preiki?

¹⁹ A bun nyunsu fu a Kownukondre a no a wan-enkri boskopu di Gado en pipel musu preiki. Den musu horibaka tu gi a wroko fu den engel di kari na ini Openbaring kapitel 8 te go miti 10. Den engel disi e tyari difrenti krutuboskopu gi den wan di no wani saka densrefi na ondro a Kownukondre fu Gado. Dati meki te now ete Yehovah Kotoigi e preiki wan krutuboskopu di Bijbel e agersi nanga „pisipisi ijs nanga faya”. A boskopu dati e sori fa Gado o strafu den difrenti pisi fu na ogri grontapu fu Satan (Openb. 8:7, 13). Sma musu kon sabi taki a kaba de krosibei èn taki den kan tyari kenki kon na ini den libi fu man pasa a dei fu Yehovah en atibron libilibi (Sef. 2:2, 3). Ma sma no lobi a boskopu disi. Dati meki wi musu abi deki-ati fu man preiki a boskopu disi. Na a ten fu a bigi banawtu a lasti krutuboskopu o meki taki sma kisi moro atibron.​—Openb. 16:21.

20. San wi o luku na ini den tu artikel di e kon?

²⁰ A prenspari srefisrefi taki wi e gi yesi na den wortu fu „a profeititori disi” fu di wi e yepi fu meki den sani di wi e leisi na ini a buku Openbaring, kon tru (Openb. 1:3). Ma fa wi kan tan horidoro te wi e kisi frufolgu èn fa wi kan tan yepi fu preiki den boskopu disi sondro fu frede? Tu sani de di o gi wi deki-ati: A fosi sani, na taki wi o kon sabi san o pasa nanga den feanti fu Gado soleki fa a buku Openbaring e sori. A di fu tu sani, na taki wi o kon sabi sortu blesi wi o kisi te wi e tan gi yesi na Gado. Wi o luku den sani disi na ini den tu artikel di e kon.