1-2. Fruklari fu san ede Bijbel gronprakseri kan kon moro prenspari gi wi te a situwâsi fu wi kenki.

 TE WAN man nanga wan uma e trow, dan nofo tron wan owruman e hori wan Bijbel lezing gi den di e taki fu a trowlibi. Den sabi den gronprakseri kaba di den e yere na ini a lezing. Ma now den sani dati o kon moro prenspari gi den. Fu san ede? Fu di now den o fiti den leki trowpaar.

² Na so a de tu te wan Kresten trowpaar e kisi pikin. A kan taki na ini den yari di pasa, den yere difrenti lezing di sori fa fu kweki pikin. Ma now, den gronprakseri dati o kon moro prenspari gi den. Now den o abi fu kweki den eigi pikin. Dati na wan bigi frantwortu. A no de fu taki dati te a situwâsi fu wi e kenki, dan spesrutu Bijbeltekst e kon moro prenspari gi wi. Disi na wán reide fu san ede den anbegiman fu Yehovah e leisi Bijbel èn e denki dipi fu en „solanga den de na libi”.​—Deut. 17:19.

3. San wi o luku na ini na artikel disi?

³ Papa nanga mama, un abi wan fu den moro moi grani di wan Kresten kan abi. Un kan leri unu pikin fu kon sabi Yehovah. Ma yu no wan leri den nomo fu kon sabi sani fu a Gado fu wi. Na presi fu dati, yu wani yepi yu pikin fu kon lobi Yehovah nanga den heri ati. San yu kan du fu yepi yu pikin fu kon lobi Yehovah? Na ini na artikel disi wi o taki fu fo Bijbel gronprakseri di kan yepi unu leki papa nanga mama (2 Tim. 3:16). Wi o luku tu fa son Kresten papa nanga mama kisi wini di den fiti den rai fu Bijbel.

4. San na wan gronprakseri di kan yepi papa nanga mama fu leri den pikin fu den fu kon lobi Yehovah? (Yakobus 1:5)

⁴ Gronprakseri 1: Suku rai na Yehovah. Aksi Yehovah fu gi yu a koni di yu abi fanowdu fu yepi yu pikin fu kon lobi en. (Leisi Yakobus 1:5.) Yehovah na a moro bun sma di kan gi wi rai. Wan tu reide de fu san ede dati de so. Wi o luku tu fu den. A fosiwan, na taki Yehovah sabi moro leki iniwan sma san a wani taki fu de wan papa (Ps. 36:9). A di fu tu sani, na taki a koni rai di a e gi wi e yepi wi ala ten.​—Yes. 48:17.

5. (a) Sortu sani Yehovah en organisâsi e gi papa nanga mama fu yepi den? (b) Soleki fa a felem di kari na ini a futuwortu e sori, dan san yu leri fu a fasi fa Brada nanga Sisa Amorim kweki den pikin fu den?

⁵ Nanga yepi fu en Wortu nanga en organisâsi, Yehovah e leri wi furu sani fu Bijbel di kan yepi yu fu kweki yu pikin fu kon lobi en (Mat. 24:45). Fu eksempre, yu kan feni furu bun rai na ini den artikel di nen „Hulp voor het gezin”, di ben kon na doro wan tu yari na ini na Ontwaakt! èn now den artikel disi de fu feni tu tapu a website fu wi. Boiti dati, furu interview nanga felem na jw.org kan yepi papa nanga mama fu fiti den rai fu Yehovah te den e kweki den pikin fu den. *​—Odo 2:4-6.

6. Fa wan papa e si den rai di en nanga en wefi e kisi fu Yehovah en organisâsi?

⁶ Furu papa nanga mama taki dati den breiti srefisrefi nanga a yepi di den e kisi fu Yehovah en organisâsi. Wan papa di nen Joe e taki: „A no makelek fu kweki den dri pikin fu wi na ini waarheid. Ala ten mi nanga mi wefi e begi Yehovah fu yepi wi. Èn nofo tron wi si taki wan artikel noso wan felem kon na doro precies na a ten di wi ben abi en fanowdu fu yepi wi nanga wan spesrutu situwâsi. Ala ten wi frutrow tapu den rai fu Yehovah.” Joe nanga en wefi kon si taki den artikel nanga den felem disi yepi  den pikin fu den fu kon moro krosibei na Yehovah.

7. Fu san ede papa nanga mama musu du ala san den man fu de wan eksempre gi den pikin fu den? (Romesma 2:21)

⁷ Gronprakseri 2: De wan bun eksempre gi den pikin fu yu. Pikin e luku bun san den papa nanga mama e du èn nofo tron den e du den srefi sani dati. A no de fu taki dati ala papa nanga mama abi den fowtu (Rom. 3:23). Ma toku koni papa nanga mama e du ala san den man fu de wan bun eksempre gi den pikin fu den. (Leisi Romesma 2:21.) Wan papa e taki fu den pikin fu en: „Neleki fa wan sponsu e soigi watra, na so pikin e teki ala sani abra di den e si.” A e taki moro fara: „Den pikin fu wi e taigi wi te wi srefi no e du san wi e pruberi fu leri den.” Sobun, efu wi wani taki den pikin fu wi lobi Yehovah, dan wi srefi musu sori krin taki wi lobi Yehovah nanga wi heri ati.

8-9. San yu leri fu den sani di Andrew nanga Emma taki?

⁸ Furu fasi de fa papa nanga mama kan leri den pikin fu den fu kon lobi Yehovah. Luku san Andrew, wan brada di abi 17 yari, e taki: „Ala ten mi papa nanga mama leri mi taki a prenspari fu begi. Ibri neti mi papa ben e begi nanga mi, awinsi mi ben begi kaba gi misrefi. Mi papa nanga mama ben gwenti taigi wi: ’Yu kan taki nanga Yehovah so furu leki yu wani.’ A sani disi meki taki begi tron wan prenspari sani gi mi. Now a makelek gi mi fu begi èn mi e firi taki Yehovah lobi mi leki wan Papa.” Papa nanga mama, ala ten hori na prakseri taki a lobi di unu abi gi Yehovah, kan yepi den pikin fu unu fu kon lobi en tu.

⁹ Luku sosrefi na eksempre fu Emma. Di en papa gwe libi na osofamiri, dan a libi bigi paiman gi en mama. Emma e taki: „Furu leisi mi mama ben abi moni problema, ma ala ten a ben e fruteri wi fa Yehovah e broko en ede nanga den futuboi fu en èn fa a e sorgu gi den. Te mi ben e luku a fasi fa a ben e libi, dan mi ben kan si krin taki a ben e bribi san a ben taki. Mi mama ben e du san a ben e pruberi fu leri wi.” San disi e leri wi? Papa nanga mama kan de wan bun eksempre gi den pikin fu den, awinsi a situwâsi fu den muilek.​—Gal. 6:9.

10. Sortu okasi furu papa nanga mama na ini Israel ben abi fu taki nanga den pikin fu den? (Deuteronomium 6:6, 7)

¹⁰ Gronprakseri 3: Abi a gwenti fu taki nanga den pikin fu yu. Yehovah ben taigi den Israelsma fu owruten taki den ben musu abi a gwenti fu leri den pikin fu den sani fu en. (Leisi Deuteronomium 6:6, 7.) Den papa nanga mama dati ben abi furu okasi te dei opo fu taki nanga den pikin fu den èn fu yepi den fu kon lobi Yehovah. Fu eksempre, wan yongu boi fu Israel kande ben e yepi en papa omeni yuru langa fu prani sani, noso fu du a kotiwroko. En sisa kande ben e yepi en mama omeni yuru wan dei fu nai noso fu brei krosi, èn fu du tra oso wroko. Te papa nanga mama ben e wroko makandra nanga den pikin fu den, dan den ben kan taki fu furu prenspari sani. Fu eksempre, den ben kan taki fu a bun-ati fu Yehovah èn fa a ben e yepi na osofamiri.

11. San na wan okasi di Kresten papa nanga mama kan gebroiki fu taki nanga den pikin fu den?

¹¹ Ma a ten kon kenki. Na ini furu kondre, papa nanga mama no man de so furu moro nanga den pikin fu den te dei opo. Kande den papa nanga mama de na  wroko èn kande den pikin de na skoro. Dati meki papa nanga mama musu suku okasi fu man taki nanga den pikin fu den (Ef. 5:15, 16; Fil. 1:10). Wan fu den okasi dati, na te den e hori na Osofamiri Anbegi. Wan yongu brada di nen Alexander e taki: „Mi papa ala ten e seti sani fu hori na Osofamiri Anbegi èn a no e meki noti tapu en fu du dati. Baka a studie, dan wi e taki nanga makandra fu den sani di prenspari gi wi.”

12. San osofamiri-edeman musu hori na prakseri te den e hori na Osofamiri Anbegi?

¹² Efu yu na wan osofamiri-edeman, dan san yu kan du fu sorgu taki den pikin fu yu lobi na Osofamiri Anbegi? Kande yu kan studeri a buku Yu kan de koloku fu têgo! nanga den. A buku disi o yepi yu fu abi bun takimakandra nanga den pikin fu yu. Yu wani taki den pikin fu yu e fruteri yu san den e denki, fa den e firi, èn sortu sani e gi den broko-ede. Sobun, no gebroiki na Osofamiri Anbegi fu krutu den noso fu piri-ai gi den. Èn efu den e taki wan sani di no e kruderi nanga san Bijbel e leri, dan yu no musu mandi. Na presi fu dati, yu musu breiti taki den e taigi yu krin fa den e firi, èn gi den deki-ati fu tan du dati. A wan-enkri fasi fa yu kan yepi den pikin fu, na te yu sabi fa den e firi trutru.

13. Sortu tra okasi papa nanga mama abi fu yepi den pikin fu den fu kon moro krosibei na Yehovah?

¹³ Papa nanga mama, suku okasi te dei opo fu yepi den pikin fu yu fu kon moro krosibei na Yehovah. Yu no abi fu wakti teleki unu e studeri Bijbel, fu leri den sani fu a lobi-ati Gado fu wi. Luku san wan mama di nen Lisa, e taki: „Wi gebroiki den sani di Yehovah meki fu leri den pikin fu wi sortu fasi a abi. Fu eksempre, te a dagu fu wi ben e du wan sani di ben e meki den pikin lafu, dan wi ben e fruteri den taki a sani disi ben e sori taki Yehovah na wan koloku Gado, èn taki a wani taki den sortu sani disi e gi wi prisiri.”

14. Fu san ede a prenspari taki papa nanga mama yepi den pikin fu den fu meki bun mati? (Odo 13:20)

¹⁴ Gronprakseri 4: Yepi yu pikin fu meki  bun mati. Gado Wortu e sori wi krin taki den mati fu wi abi krakti na wi tapu. Den kan meki wi du bun noso ogri. (Leisi Odo 13:20.) Papa nanga mama, un sabi den mati fu un pikin? Un teki ten fu leri sabi den mati dati? San yu kan du fu yepi yu pikin fu tron mati fu sma di lobi Yehovah? (1 Kor. 15:33) Yu kan yepi yu pikin fu du dati te yu e kari sma di abi wan bun matifasi nanga Yehovah kon na yu oso, so taki unu kan du sani makandra.​—Ps. 119:63.

15. San papa nanga mama kan du fu yepi den pikin fu den fu kon abi bun mati?

¹⁵ Wan papa di nen Tony, e fruteri san en nanga en wefi du fu yepi den pikin fu den fu feni bun mati. A e taki: „Na ini den yari di pasa, mi nanga mi wefi kari difrenti brada nanga sisa, owruwan nanga yonguwan, kon na wi oso. Den nyan nanga wi èn den teki prati na a Osofamiri Anbegi fu wi. Disi na wan moi fasi fu kon sabi den wan di lobi Yehovah èn di e dini en nanga prisiri. Kring-owruman, zendeling, nanga tra brada nanga sisa kon tan wan tu dei na wi oso. Den pikin fu wi leri furu fu den ondrofenitori di den brada nanga sisa disi fruteri, den kisi deki-ati fu a faya di den ben abi, èn fu a tranga wroko di den du gi Yehovah. Ala den sani disi yepi den pikin fu wi fu kon moro krosibei na Yehovah.” Papa nanga mama, un musu du ala san un man fu yepi den pikin fu unu fu kon abi bun mati.

16. San yu kan du efu wan pikin fu yu e taki dati a no wani dini Yehovah?

¹⁶ Ma san yu kan du efu wan fu den pikin fu yu e taki dati a no wani dini Yehovah, aladi yu du furu muiti fu kweki en na ini waarheid? No denki taki yu no de wan bun papa noso mama. Yehovah gi ibriwan fu wi, sosrefi a pikin fu yu, a grani fu bosroiti gi ensrefi efu a o dini en. Efu yu pikin bosroiti fu drai baka gi Yehovah, dan no lasi howpu taki wan dei a o drai kon baka. Prakseri na agersitori fu a lasi manpikin (Luk. 15:11-19, 22-24).  A yonguman dati ben du so furu ogri, ma te fu kaba a drai kon baka. Toku son sma ben kan taki: „Dati ben de wan agersitori. A sani disi kan pasa trutru?” Iya, a kan! Fu taki en leti, na dati ben pasa nanga wan yonguman di nen Elie.

17. Fa na ondrofenitori fu Elie gi yu deki-ati?

¹⁷ Elie e taki fu en papa nanga mama: „Den du tranga muiti fu yepi mi fu kon abi lobi gi Yehovah èn gi en Wortu, Bijbel. Ma di mi ben de wan tini, mi bigin opo misrefi teige den.” Elie bigin du sani di no bun èn en papa nanga mama pruberi fu yepi en fu tan krosibei na Yehovah, ma a no arki den. Di a gwe libi oso, a bigin du ogri. Toku a ben e taki fu Bijbel son leisi nanga wan fu den mati fu en. Elie e taki: „O moro mi ben e fruteri mi mati fu Yehovah, o moro mi ben e prakseri Yehovah. Mi papa nanga mama ben du tranga muiti fu prani den siri fu den tru tori fu Bijbel na ini mi ati, ma den siri dati no ben gro. Safrisafri dati ben e pasa now.” Te fu kaba, Elie kon baka na ini waarheid. * Prakseri fa en papa nanga mama ben breiti taki den ben pruberi fu leri en fu kon lobi Yehovah yonguyongu kaba.​—2 Tim. 3:14, 15.

18. Fa yu e denki fu den papa nanga mama di e wroko tranga fu leri den pikin fu den fu kon lobi Yehovah?

¹⁸ Papa nanga mama, unu kisi a tumusi moi grani fu kweki den pikin fu unu fu tron anbegiman fu Yehovah (Ps. 78:4-6). Disi a no wan makelek wroko, èn wi e prèise unu taki unu e tan meki muiti fu yepi unu pikin. Efu unu e tan du ala san un man fu yepi unu pikin fu kon lobi Yehovah, èn efu unu e leri den fu gi yesi na en, dan un kan de seiker taki wi lobi-ati Papa o breiti nanga unu.​—Ef. 6:4.