1. Sortu kari Yehovah e gi den anbegiman fu en? (Luku a fowtow.)

 SUMA wi kan aksi fu yepi wi te wi abi trowstu nanga rai fanowdu? Wi sabi a piki tapu na aksi disi kaba. Wi kan aksi Yehovah Gado na ini begi. Yehovah e gi wi a kari srefi fu du dati. Bijbel e taki dati wi musu „begi doronomo”. Na so wi sabi taki a wani taki wi musu begi furu tron (1 Tes. 5:17). Wi kan taki fri nanga en na ini begi èn wi kan aksi en rai gi ala sortu afersi na ini wi libi (Odo 3:5, 6). Fu di Yehovah lobi fu yepi sma, meki a no e tapu sma fu begi en. A e taigi wi taki wi kan begi en so furu leki wi man.

2. San wi o luku na ini na artikel disi?

² Wi e si en leki wan kado trutru taki wi man taki nanga Yehovah na ini begi. Ma fu di wi abi furu sani fu du meki kande a muilek gi wi fu feni ten fu begi. Kande wi feni tu taki wi musu begi na wan moro bun fasi. Wi breiti taki Bijbel e gi wi furu deki-ati nanga rai fu den tori disi. Na ini na artikel disi wi o luku fa na eksempre fu Yesus e leri wi fu poti ten na wan sei fu begi. Wi o taki tu fu feifi sani di o yepi wi fu begi na wan moro bun fasi.

3. San Yesus ben frustan fu begi?

³ Yesus ben frustan taki den begi fu wi prenspari gi Yehovah. Langa ten fosi a kon na grontapu, a si fa en Papa piki den begi fu getrow man nanga uma. Fu  eksempre, Yesus ben de nanga en Papa di a piki den begi fu reti-ati sma leki Hana, David, Elia, nanga furu tra getrow sma (1 Sam. 1:10, 11, 20; 1 Kow. 19:4-6; Ps. 32:5). Dati meki Yesus ben leri den disipel fu en fu begi furu èn fu du dati nanga overtoigi!​—Mat. 7:7-11.

4. San wi kan leri fu den begi fu Yesus?

⁴ Di Yesus srefi ben e begi Jehovah, a ben seti wan eksempre gi den disipel fu en. Na a ten di Yesus ben e du en diniwroko, a ben begi furu. A ben musu poti ten na wan sei fu begi, fu di nofo tron a ben abi furu fu du èn furu sma ben kon na en (Mark. 6:31, 45, 46). A ben opo fruku mamanten so taki a ben kan abi ten gi ensrefi fu begi (Mark. 1:35). Wan leisi a ben begi heri neti fosi a teki wan prenspari bosroiti (Luk. 6:12, 13). Èn a neti fosi a dede, Yesus begi ibri tron baka, leti fosi a klari a moro muilek pisi fu en wroko na grontapu.​—Mat. 26:39, 42, 44.

5. Fa wi kan waka baka na eksempre fu Yesus te wi e begi?

⁵ Na eksempre fu Yesus e leri wi taki awinsi o druk wi abi en, wi musu poti ten na wan sei fu begi. Neleki Yesus, a kan taki wi musu seti wan yuru fu begi. Kande wi kan opo fruku mamanten noso wi kan go sribi pikinso moro lati. Na so fasi wi e sori Yehovah taki wi e warderi a spesrutu kado disi. Wan sisa di nen Lynne e memre ete fa a ben de nanga tangi di a kon sabi fu a grani fu begi. A e taki: „Di mi kon sabi taki mi ben man taki nanga Yehovah na iniwan yuru fu a dei, dan disi yepi mi fu si en leki wan bun mati èn fu begi na wan moro bun fasi.” A no de fu taki dati furu fu wi e denki so tu. Fu dati ede, meki wi luku feifi sani fu san wi kan taki na ini den begi fu wi.

6. San Yehovah warti fu kisi soleki fa Openbaring 4:10, 11 e taki?

⁶ Prèise Yehovah. Na ini wan fisyun di ben fruwondru na apostel Yohanes, a ben si 24 owruman na ini hemel di ben e anbegi Yehovah. Den ben prèise Gado èn den ben taki dati a warti fu  kisi ’ glori, grani nanga makti’. (Leisi Openbaring 4:10, 11.) Getrow engel abi furu reide tu fu gi Yehovah grani. Den de na ini hemel nanga en èn den kon sabi en bun. Na ini den sani di a e du, den man si fa a de. Te den e si den sani di Yehovah e du, dan dati e naki den ati fu prèise en.​—Yob 38:4-7.

7. Fu san wi kan prèise Yehovah?

⁷ Wi musu prèise Yehovah tu na ini den begi fu wi. Wi kan fruteri en san wi lobi fu en èn fu san ede wi e lespeki en. Te yu e leisi èn e studeri Bijbel, pruberi fu si den fasi fu Yehovah di yu feni moi (Yob 37:23; Rom. 11:33). Dan fruteri Yehovah san yu feni fu den fasi dati. Wi kan prèise Yehovah tu fu di a e yepi wi nanga ala wi Kresten brada nanga sisa. Ala ten baka a e sorgu wi èn a e kibri wi.​—1 Sam. 1:27; 2:1, 2.

8. San na wan tu reide fu san ede wi e taki Yehovah tangi? (1 Tesalonikasma 5:18)

⁸ Taki Yehovah tangi. Wi abi furu reide fu taki Yehovah tangi na ini begi. (Leisi 1 Tesalonikasma 5:18.) Wi kan taki en tangi gi iniwan bun sani di wi abi, bika te yu luku en bun dan ibri bun kado e kon fu en (Yak. 1:17). Fu eksempre, wi kan taki en tangi fu a moi grontapu èn fu den kefalek moi sani di a meki. Wi kan taki en tangi tu fu a libi di a gi wi, wi famiri, wi mati, èn a howpu fu wi. Èn wi wani taki Yehovah tangi fu na okasi di a gi wi fu de mati fu en, wan sani di warti srefsrefi.

9. Fu san ede wi musu leri fu warderi Jehovah?

⁹ Kande wi abi fu meki spesrutu muiti fu prakseri sortu reide wi abi fu taki Yehovah tangi. Na ini a ten disi furu sma no de nanga tangi. Nofo tron sma e poti prakseri nomo na fa den o kisi san den wani, na presi fu prakseri san den kan du fu sori warderi gi san den abi. Efu wi bigin denki leki den sma disi, dan den begi fu wi kan kon de leki brifi pe wi e aksi sani nomo fu Gado. Fu no meki dati pasa nanga wi, wi musu tan prakseri ala san Yehovah e du gi wi, èn wi musu fruteri en tu taki wi e warderi dati.​—Luk. 6:45.

10. Fa wan sisa ben man horidoro fu di a ben de nanga tangi? (Luku a fowtow.)

¹⁰ Te wi de nanga tangi, dan dati kan yepi wi fu horidoro te wi abi problema. Luku na ondrofenitori fu Kyung-sook na ini A Waktitoren fu 15 yanuari 2015. Datra ben taigi en taki a abi longkanker. A sisa taki: „A tesi disi ben hebi trutru. Mi ben firi leki mi lasi ala sani èn mi ben e frede.” San yepi en fu horidoro? A ben taki dati ibri neti fosi a go sribi, a ben e go na tapu a daki fu en oso, dan a ben e begi Yehovah. Nanga tranga sten a ben e taki fu feifi blesi di  a kisi a dei dati. Disi ben meki a firi korostu èn a ben e taigi Yehovah fa a lobi en. A kon si taki Yehovah e gi den getrow dinari fu en krakti te den de na ini muilek situwâsi èn taki den blesi di wi e kisi furu omeni tron moro den tesi di wi e kisi. Neleki Kyung-sook wi abi furu reide fu taki Yehovah tangi, srefi te wi e kisi tesi. Te wi e fruteri en na ini begi taki wi e warderi san a e du, dan dati kan yepi wi fu horidoro èn fu no bruya.

11. Fu san ede den disipel fu Yesus ben abi deki-ati fanowdu baka di a drai go baka na hemel?

¹¹ Aksi Yehovah fu abi deki-ati na ini a preikiwroko. Leti fosi a drai go baka na hemel, Yesus memre den disipel fu en taki den ben abi a wroko fu gi kotoigi fu en „na ini Yerusalem, na ini heri Yudea nanga Samaria, èn te na den moro farawe presi fu grontapu” (Tori 1:8; Luk. 24:46-48). Wan syatu pisi ten baka dati, den Dyu fesiman grabu apostel Petrus nanga Yohanes èn den tyari den go na fesi a Sanhedrin. Den Dyu fesiman ben wani dwengi den getrow man disi fu tapu nanga a preikiwroko, èn den pruberi srefi fu tapu skreki gi den (Tori 4:18, 21) San Petrus nanga Yohanes du?

12. San den disipel du soleki fa Tori fu den Apostel 4:29, 31 e taki?

¹² Di den Dyu fesiman pruberi fu tapu skreki gi den, Petrus nanga Yohanes taki: „Na unu srefi musu sabi efu Gado feni en bun taki wi e arki unu na presi fu en. Ma wi no man tapu fu taki fu den sani di wi si èn di wi yere” (Tori 4:19, 20). Di den lusu Petrus nanga Yohanes, dan den disipel opo den sten fu begi Yehovah fu yepi den fu du a wani fu en. Den ben begi: „Meki den srafu fu yu tan taki a wortu fu yu sondro frede.” Yehovah piki a begi fu den reti-ati sma dati.​—Leisi Tori fu den Apostel 4:29, 31.

13. San wi kan leri fu na eksempre fu Jin-hyuk?

¹³ Wi kan waka baka na eksempre fu den disipel èn tan preiki, srefi te tiriman e taigi wi fu no preiki moro. Luku na eksempre fu Jin-hyuk, wan brada di den ben poti na strafu fu di a no ben wani bumui na ini politiek. Na strafu-oso den ben meki a sorgu gi wan tu strafuman. A brada ben mag taki soso fu sani di ben abi fu du nanga a wroko fu en èn a no ben mag taki fu Bijbel tu. A begi fu kisi koni nanga deki-ati fu ben kan preiki na ibri okasi (Tori 5:29). A e taki: „Yehovah piki den begi fu mi. A gi mi deki-ati nanga koni fu bigin furu Bijbelstudie fu feifi miniti, leti na a doro fu den cel. Èn na neti mi ben e skrifi brifi di mi ben gi den strafuman a dei baka dati. Wi kan de seiker tu taki Yehovah o yepi wi fu du wi preikiwroko bun. Neleki Jin-hyuk wi kan begi tu fu abi deki-ati nanga koni.

14. San kan yepi wi te wi abi problema? (Psalm 37:3, 5)

¹⁴ Aksi Yehovah fu yepi yu fu horidoro te yu abi problema. Furu fu wi abi broko-ede, kande wi abi problema nanga wi gosontu, kande wi e stress, kande wan lobiwan fu wi dede, wi abi problema na ini wi osofamiri, sma e frufolgu wi, noso wi abi tra problema. Èn siki di e panya na heri grontapu  nanga orloku e meki en moro muilek gi wi fu horidoro. Fruteri Yehovah ala san de tapu yu ati. Fruteri en fu a situwâsi fu yu neleki fa yu ben o fruteri wan bun mati. Yu kan frutrow taki Yehovah „o yepi yu”.​—Leisi Psalm 37:3, 5.

15. Fa begi kan yepi wi fu ’horidoro te wi de na ini banawtu’? Gi wan eksempre.

¹⁵ Te wi e horidoro na ini begi, dan dati o yepi wi fu ’horidoro te wi de na ini banawtu’ (Rom. 12:12). Yehovah sabi san den anbegiman fu en e ondrofeni. A e yere den „te den e bari suku yepi na en” (Ps. 145:18, 19). Wan pionier fu 29 yari di nen Kristie sabi taki disi de so trutru. Wantronso a ben kisi bigi problema nanga en gosontu. A sani dati meki a fadon na ini wan bigi depressie, a ben e firi sari doronomo. Bakaten a yere taki en mama ben abi wan siki di ben o kiri en. Kristie e taki: „Mi begi Yehovah fayafaya fu gi mi a krakti fu pasa ibri dei. Mi ben e pruberi fu go na konmakandra ibri wiki èn fu studeri nanga misrefi.” A e taki moro fara: „Na begi yepi mi fu horidoro na ini den dungru dei dati. Mi ben sabi taki Yehovah ben drape ala ten, èn dati ben gi mi bun furu trowstu. Den siki fu mi no gwe wantewante, ma Yehovah piki den begi fu mi. A ben yepi mi fu firi korostu èn fu no broko mi ede tumusi.” Meki wi no frigiti noiti taki „te tesi miti den sma di e dini Gado fayafaya, dan Yehovah sabi fa fu frulusu den”.​—2 Petr. 2:9.

16. Fu san ede wi abi yepi fanowdu fu Yehovah fu kakafutu gi tesi?

¹⁶ Aksi Yehovah fu yepi yu fu kakafutu gi tesi. Wi leki sondu sma e feti doronomo teige a firi fu du ogri. Satan e du ala san a man fu meki a feti disi moro muilek gi wi. Wan fasi fa a e pruberi fu pori a denki fu wi, na fu meki wi luku noso arki sani di no fiti. Den sani dati kan  meki wi go denki sani di no krin, so taki wi no krin moro na ini Gado ai èn den kan meki wi go du seryusu sondu.​—Mark. 7:21-23; Yak. 1:14, 15.

17. San wi musu du baka te wi begi? (Luku a fowtow.)

¹⁷ Wi abi yepi fu Yehovah fanowdu efu wi no wani du ogri. Yesus ben aksi wan sani di a ben leri sma fu begi: „No meki wi kisi tesi, ma frulusu wi fu na ogriwan” (Mat. 6:13). Yehovah wani yepi wi, ma wi musu aksi en fu yepi wi. Wi musu meki muiti tu fu tan fara fu sani di kan de wan tesi gi wi. Wi kan tyari wan tu kenki kon so taki wi no go luku noso arki fowtu sani di pôpi na ini a grontapu fu Satan (Ps. 97:10). Wi kan furu wi prakseri nanga bun sani te wi e leisi èn e studeri Bijbel. Te wi e go na den konmakandra èn te wi e du a preikiwroko, dan dati o yepi wi tu fu kibri a denki fu wi. Yehovah fu en sei e pramisi taki a no o meki wi kisi tesi di hebi moro leki san wi man tyari”.​—1 Kor. 10:12, 13.

18. San wi alamala musu du?

¹⁸ Ibriwan fu wi musu begi moro leki san wi ben gwenti, fu man tan getrow na Yehovah na ini den muilek lasti dei disi. Poti ten na wan sei ibri dei fu begi komoto fu yu ati. Yehovah wani taki te wi e begi en taki wi musu ’fruteri en ala san de na tapu wi ati’ (Ps. 62:8). Prèise Yehovah èn taki en tangi fu ala san a e du. Aksi en fu gi yu deki-ati na ini a preikiwroko. Begi en fu yepi yu te yu abi problema èn te yu e kisi tesi. No meki noti nanga nowan sma tapu yu fu begi Yehovah doronomo. Ma fa Yehovah e piki den begi fu wi? Wi o luku a prenspari aksi dati na ini na artikel di e kon.