1. San Bijbel e taki fu trutru lobi?

 „A FAYA fu [lobi] de leki a faya fu Yah. Bigi watra srefi no man kiri lobi èn liba srefi no man wasi en gowe” b (Singi 8:6, 7). Dati na wan moi fasi fa bijbel e taki fu trutru lobi! Den wortu disi e gi trowpaar a deki-ati disi: Tu sma di trow man abi trutru lobi gi makandra.

2. San wan trowpaar musu du fu sorgu taki a lobi fu den no e kon kowru?

² Tu sma di trow musu meki muiti fu tan lobi makandra solanga den de na libi. Fu gi wan eksempre, wan faya man tan bron efu sma e tan poti udu gi en. Efu nowan sma e du dati, dan a faya o dede te fu kaba. Na so a de tu taki a lobi di masra nanga wefi abi gi makandra kan tan tranga efu den e tan du muiti fu tron moro bun mati fu makandra. Son leisi wan trowpaar kan feni taki a lobi di den abi gi makandra e kon kowru. Dati de so spesrutu te den abi moni problema, gosontu problema, noso te den pikin fu den e gi den broko-ede. Sobun, efu yu trow, fa yu kan sorgu taki „a faya fu Yah” e tan bron na ini yu trowlibi? Na ini na artikel disi wi o luku dri fasi fa yu kan tranga yu matifasi nanga yu trowpatna èn fa yu kan abi wan koloku trowlibi. c

3. Te tu sma di trow de bun mati fu Yehovah, dan fa dati e yepi den fu tan lobi makandra? (Preikiman 4:12) (Luku a fowtow.)

³ Efu wan masra nanga en wefi wani taki „a faya fu Yah” tan bron na ini a trowlibi fu den, dan den ala tu musu de  bun mati fu Yehovah. Fa dati kan yepi a trowlibi fu den? Te wan trowpaar e si en leki wan prenspari sani fu de wan bun mati fu a hemel Papa fu den, dan den o de klariklari fu fiti den rai fu en. Disi o yepi den fu wai pasi gi problema di kan meki taki a lobi fu den kon kowru èn den o man horidoro tu te den kisi den problema. (Leisi Preikiman 4:12.) Sma di de bun mati fu Yehovah e du tranga muiti tu fu sori switifasi, fu abi pasensi, èn fu gi trawan pardon, neleki fa Yehovah e du dati (Ef. 4:32–5:1). Te wan trowpaar e sori den fasi disi, dan a moro makelek gi den fu lobi makandra. Wan sisa di nen Lena èn di trow moro leki 25 yari e taki: „Te wan sma de wan bun mati fu Yehovah, dan a makelek fu lobi a sma dati èn fu sori lespeki gi en.”

4. Fu san ede Yehovah teki Yosef nanga Maria fu tron a papa nanga a mama fu a Mesias?

⁴ Luku wan tra Bijbel eksempre. Di Yehovah ben musu luku sortu man nanga uma ben o tron a papa nanga a mama fu a Mesias, dan fu ala den bakapikin fu David, a teki Yosef nanga Maria. Fu san ede? Den ala tu ben de bun mati fu Yehovah èn Yehovah ben sabi taki den ben o poti en na a fosi presi na ini a trowlibi fu den. Masra nanga wefi, san un kan leri fu Yosef nanga Maria?

5. San masra kan leri fu Yosef?

⁵ Yosef ben de klariklari fu fiti den rai fu Yehovah èn dati yepi en fu tron wan moro bun masra. Awinsi dri leisi Gado gi en rai di ben abi fu du nanga en osofamiri. Ibri leisi a gi yesi wantewante, srefi di a ben musu tyari bigi kenki kon (Mat. 1:20, 24; 2:13-15, 19-21). Fu di Yosef du san Gado ben taigi en, meki a kibri Maria gi ogri, a horibaka gi en, èn a sorgu gi en. Yu kan frustan taki den sani di Yosef du meki taki Maria kisi moro lobi nanga lespeki gi en. Un masra, neleki Yosef un kan suku Bijbel rai di e sori fa un kan sorgu gi un osofamiri. d Te yu e du disi, srefi efu yu musu tyari wan tu kenki kon, dan yu e sori taki yu lobi yu wefi èn yu e tranga a trowlibi fu yu. Wan sisa na ini Vanuwatu di trow moro leki 20 yari, e taki: „Te mi masra e suku rai na Yehovah èn a e fiti a rai dati, dan mi e kisi moro lespeki gi en. Mi sabi taki sani o go bun nanga mi èn mi e frutrow den bosroiti di a e teki.”

6. San wefi kan leri fu Maria?

⁶ Maria ben abi wan bun matifasi nanga Yehovah. A ben e tranga en eigi bribi. A ben sabi Gado Wortu bun. e A ben e meki ten tu fu denki dipi fu san a ben leri (Luk. 2:19, 51). Wi kan de seiker taki  Maria ben de wan bun wefi fu di a ben de wan mati fu Gado. Na ini a ten disi, furu wefi e du muiti fu teki na eksempre fu Maria. Wan sisa di nen Emiko e taki: „Di mi no ben trow ete, dan mi srefi ben e luku o ten mi ben e du sani fu tranga mi bribi. Baka di mi trow, mi masra ben e begi gi wi èn a ben e teki fesi na a Osofamiri Anbegi. Ma mi kon si taki mi no ben e du den sani dati moro, ma mi ben e libi en gi en fu du dati gi mi. Mi kon frustan taki mi srefi ben musu meki muiti fu abi wan bun matifasi nanga Yehovah. Dati meki now mi e poti ten na wan sei fu begi, fu leisi Bijbel èn fu denki dipi fu den sani di Gado e leri mi” (Gal. 6:5). Un wefi, te unu e tan tranga a matifasi di un abi nanga Yehovah, dan a masra fu unu o abi moro reide fu lobi unu èn fu prèise unu.​—Odo 31:30.

7. San trowpaar kan leri fu Yosef nanga Maria te a abi fu du nanga na anbegi?

⁷ Yosef nanga Maria ben e wroko makandra fu tan abi wan bun matifasi nanga Yehovah. Den ben e frustan fu san ede a prenspari fu anbegi Yehovah leki osofamiri (Luk. 2:22-24, 41; 4:16). Kande a ben e muilek fu du dati, spesrutu di den ben e kisi moro pikin, ma toku den ben du en. Disi na wan heri moi eksempre gi trowpaar na ini a ten disi! Efu yu abi pikin neleki Yosef nanga Maria, dan a kan muilek fu go na den konmakandra noso fu poti ten na wan sei fu hori na Osofamiri Anbegi. Kande a moro muilek srefi fu feni ten fu studeri leki trowpaar noso fu begi makandra. Toku a bun fu hori na prakseri taki te unu e anbegi Yehovah makandra, dan unu e kon moro krosibei na en èn na makandra. Sobun, meki na anbegi de na a fosi presi na ini un libi.

8. San wan trowpaar di abi problema na ini a trowlibi kan du fu kisi moro wini fu na Osofamiri Anbegi?

⁸ Ma san unu kan du efu unu abi problema na ini a trowlibi? Disi kan meki taki unu no e firi fu de makandra fu hori na Osofamiri Anbegi. Efu dati de so, dan kande un kan studeri wan syatu sani di un ala tu feni bun èn di un lobi. Disi kan yepi unu fu kon abi moro lobi gi makandra èn a o gi unu deki-ati fu anbegi Yehovah leki trowpaar.

9. Fu san ede wan masra nanga en wefi musu meki ten gi makandra?

⁹ Masra nanga wefi, un kan tranga a lobi di un abi gi makandra te unu e meki ten gi makandra. Disi o yepi yu fu sabi fa yu patna e denki èn fa a e firi (Gen. 2:24). Lilia nanga Ruslan trow moro leki 15 yari. Luku san den kon si syatu baka di den trow. Lilia e taki: „Wi kon si taki wi no ben o abi so furu ten gi makandra leki san wi ben denki. Wi ben musu go na wroko, wi ben musu du osowroko èn bakaten wi kisi pikin. Wi kon frustan taki efu wi no ben o meki ten gi makandra, dan kande a lobi fu wi ben o kon kowru.”

10. Fa trowpaar kan fiti a gronprakseri na Efeisesma 5:15, 16?

¹⁰ San trowpaar kan du fu meki ten gi makandra? Kande un musu poti wan spesrutu ten fu de nanga makandra. (Leisi Efeisesma 5:15, 16.) Wan brada na ini Nigeria di nen Uzondu e taki: „Te mi e meki wan schema fu den sani di mi o du, dan mi e poti wan ten tu fu de makandra nanga mi wefi èn a ten dati prenspari gi mi” (Fil. 1:10). Luku fa Anastasia, a wefi fu wan kring-owruman na ini Moldafia e gebroiki en ten bun. A e taki: „Mi e pruberi  fu du den sani di mi musu du na a ten te mi masra e du a wroko fu en. Na so wi kan abi moro ten gi makandra bakaten.” Ma fa a de efu a schema fu unu e meki en muilek gi unu fu meki ten gi makandra?

11. Sortu sani Akwila nanga Preskela ben e du makandra?

¹¹ Trowpaar kan leri fu na eksempre fu Akwila nanga Preskela, wan trowpaar di furu fosi Kresten ben lobi (Rom. 16:3, 4). Aladi Bijbel no e taki finifini fa sani ben e waka na ini a trowlibi fu den, toku a e sori taki den ben e du ala sani makandra. Den ben e wroko makandra, den ben e preiki makandra èn den ben e yepi trawan makandra (Tori 18:2, 3, 24-26). Fu taki en leti, te Bijbel e taki fu Akwila nanga Preskela, dan ala ten a e kari den tu sma dati makandra.

12. Sortu sani wan masra nanga en wefi kan du makandra? (Luku a fowtow.)

¹² Fa trowpaar kan teki na eksempre fu Akwila nanga Preskela? Prakseri den someni sani di yu nanga yu trowpatna musu du. Yu kan du wan tu fu den sani disi leki trowpaar na presi fu du den yu wawan? Fu eksempre, Akwila nanga Preskela ben e preiki makandra. Un gwenti seti sani tu fu preiki makandra? Akwila nanga Preskela ben e wroko makandra tu. Kande yu nanga yu trowpatna no abi a srefi wroko, ma kande un kan du osowroko makandra (Preik. 4:9). Te unu e yepi makandra fu du wan wroko, dan un de leki wan team èn un abi na okasi fu taki nanga makandra. Robert nanga Linda trow moro leki 50 yari. Robert e taki: „Fu taki en leti, wi no abi furu ten fu du prisiri sani makandra. Ma te mi e wasi dotisani èn mi wefi e drei den sani dati, dan mi e firi bun. Na so mi e firi tu te mi de na dorosei e wroko na ini a dyari èn mi wefi e kon yepi mi. Mi e firi so prisiri te wi e du den sortu sani disi makandra. Na so wi e tron moro bun mati èn a lobi fu wi e tan gro.”

13. San wan masra nanga en wefi musu du fu man feni en bun nanga makandra?

¹³ Ma no frigiti taki awinsi wan masra nanga en wefi de makandra, toku dati no wani taki ete dati den man feni en bun nanga makandra. Wan wefi na ini Brasyonkondre e taki: „Fu di so furu sani de di kan puru wi prakseri na ini a ten disi, meki a kan pasa makelek taki wi denki taki wi e du sani kaba nanga makandra fu di wi e libi na ini a srefi oso. Mi kon si taki a no nofo te wi de nomo nanga makandra, ma mi musu du moro. Mi musu poti prakseri tu na mi masra.” Luku fa Bruno nanga en wefi Tays e sorgu taki den e poti prakseri na makandra. Bruno e taki: „Te wi e meki ten gi makandra, dan wi e poti wi telefon na wan sei èn wi abi wan switi demakandra.”

14. Efu wan trowpaar no lobi du sani makandra, dan san den kan du?

 ¹⁴ Ma fa a de efu yu nanga yu trowpatna no lobi du sani makandra? Kande unu no lobi du den srefi sani, noso unu e fruferi fu makandra. Efu dati de so, dan san unu kan du? Poti prakseri na a eksempre fu a faya di wi ben taki fu en kaba. Te a e a faya leti a no e bigi wantewante. Yu e bigin poti pikinpikin tiki fosi èn bakaten yu e poti moro bigi udu gi en so taki a e kon moro bigi. Na so a ben o bun tu te yu nanga yu trowpatna e du pikinpikin sani makandra ibri dei. Sorgu taki unu e du wan sani di un ala tu lobi, no du wan sani di kan tyari trobi kon (Yak. 3:18). Te unu e bigin du pikinpikin sani makandra, dan kande unu o kon abi moro lobi gi makandra.

15. Fu san ede masra nanga wefi musu lespeki makandra efu den wani taki a lobi fu den tan?

¹⁵ Lespeki na wan prenspari sani na ini a trowlibi. A de leki a zuurstof di e meki taki wan faya bron bun. Sondro a zuurstof dati a faya e dede esi-esi. Na so a de tu taki te tu sma di trow no abi lespeki gi makandra, dan den o si taki a lobi fu den o kon kowru esi-esi. Na a tra sei, wan masra nanga wan wefi di e du muiti fu sori lespeki gi makandra e du ala san den man fu meki a lobi tan. Toku a bun fu hori na prakseri taki a no te yu denki taki yu e sori lespeki gi yu trowpatna, dan dati de so trutru, ma na te yu trowpatna e firi taki yu e lespeki en. Penny nanga Aret trow moro leki 25 yari. Penny e taki: „A lespeki di wi abi gi makandra e meki taki lobi de na ini wi osofamiri. Wi man taki fri nanga makandra fu di wi e lespeki a fasi fa wi e denki fu sani.” Sobun, san yu kan du fu yepi yu trowpatna fu firi taki yu e lespeki en? Luku na eksempre fu Abraham nanga Sara.

16. San masra kan leri fu Abraham? (1 Petrus 3:7) (Luku a fowtow.)

¹⁶ Abraham ben e lespeki Sara. A ben e lespeki a fasi fa Sara ben e denki fu sani èn fa a ben e firi. Wan leisi di Sara ben e atibron fu wan sani, dan a taigi Abraham fa a ben e firi èn a taigi en srefi taki na en ben meki a sani dati pasa. San Abraham du? A atibron èn a taigi en wan hati sani? Nôno. A ben sabi taki Sara ben de wan wefi di ben abi sakafasi èn taki ben e horibaka gi en. Dati meki Abraham arki en èn a pruberi fu lusu a problema (Gen. 16:5, 6). San disi e leri wi? Un masra, na unu abi a frantwortu fu teki bosroiti gi un osofamiri (1 Kor. 11:3). Toku a ben o bun fu luku fa yu wefi e denki fu wan tori fosi yu e teki wan bosroiti, spesrutu te a bosroiti o abi krakti na en tapu (1 Kor. 13:4, 5). Son leisi a kan taki yu wefi e  stress èn kande a wani taigi yu fa a e firi. Yu e arki en bun fu sori en taki yu e lespeki den firi fu en? (Leisi 1 Petrus 3:7.) Angela nanga Dmitry trow sowan 30 yari. A e taki fa en masra e sori lespeki gi en: „Ala ten Dmitry e arki mi te mi e broko mi ede nanga wan sani noso te mi wani taki nanga en. A abi pasensi nanga mi, srefi te mi no e taki na wan switi fasi.”

17. San wefi kan leri fu Sara? (1 Petrus 3:5, 6)

¹⁷ Fu di Sara ben e lespeki Abraham, meki a ben e horibaka gi den bosroiti fu en (Gen. 12:5). Wan leisi wan tu fisitiman kon na Abraham sondro taki a ben fruwakti dati. Fu di a ben wani gi den man disi wan switikon, meki a aksi Sara fu libi san a ben e du èn fu sreka furu brede (Gen. 18:6). Sara no draidrai fu du san Abraham ben aksi en. Un wefi, un kan horibaka tu gi den bosroiti fu un masra neleki Sara. Te yu e du dati, dan yu e tranga a trowlibi fu yu. (Leisi 1 Petrus 3:5, 6.) Dmitry di wi ben kari kaba na ini a paragraaf na fesi, e fruteri fa en wefi e sori lespeki gi en. A e taki: „Mi e warderi a muiti di Angela e du fu horibaka gi den bosroiti fu mi, srefi te a no e agri nanga mi. Èn efu sani no e waka bun, dan a no e krutu mi.” A makelek fu lobi wan sma di e lespeki yu!

18. San o de a bakapisi te trowpaar e du muiti fu tan lobi makandra?

¹⁸ Na ini a ten disi, Satan wani taki a lobi di Kresten trowpatna abi gi makandra musu dede. A sabi taki efu trowpatna no lobi makandra moro, dan den kan gowe libi Yehovah. Ma trutru lobi e tan fu ala ten! Sobun, meki a lobi di un abi gi makandra leki masra nanga wefi de leki a lobi na ini a Singi fu Salomo. Du ala san un man fu poti Yehovah na a fosi presi na ini unu trowlibi, meki ten gi makandra èn poti prakseri na den firi fu makandra èn na san un abi fanowdu. Te unu e du dati, dan a trowlibi fu unu o gi grani na Yehovah, a sma pe trutru lobi e komoto. A lobi fu unu o de leki wan bigi faya di o tan fu ala ten.