1-2. (a) San Kresten musu prakseri bun fosi den go suku wan trowpatna? (b) San a wani taki te tu sma abi verkering? (Luku „San a wortu disi wani taki”.)

 YU WANI trow? Aladi koloku no e kon nomo fu di yu trow, tòg furu Kresten yonguwan nanga owruwan wani wan trowpatna. A no de fu taki dati fosi yu abi verkering, dan yu musu abi wan bun matifasi nanga Yehovah, yu musu sabi yusrefi bun, yu no musu denki moro leki wan pkin ma leki wan bigisma, èn yu musu man tyari yu frantwortu na moni sei te yu trow a (1 Kor. 7:36). Efu den sani dati sreka bun, dan yu o man abi wan koloku trowlibi.

² Ma a no makelek ala ten fu feni wan bun trowpatna (Odo 31:10). Èn srefi te yu feni wan sma di yu wani kon sabi moro bun, tòg a no makelek fu ferteri a sma taki yu wani abi verkering b nanga en. Na ini na artikel disi wi o taki san kan yepi Kresten fu feni wan sma di kan de wan bun trowpatna gi den èn fa den kan bigin nanga verkering. Wi o kon sabi tu fa trawan na ini a gemeente kan yepi den wan di wani trow.

 SAN KAN YEPI YU FU FENI WAN BUN TROWPATNA?

3. Sortu sani wan Kresten musu luku te a e suku wan trowpatna?

³ Efu yu wani trow, dan yu musu sabi kba san yu e suku na ini wan trowpatna, fosi yu bigin abi verkering. Bika efu yu no sabi dati, dan srefi efu wan sma di ben o de wan bun trowpatna gi yu de leti na yu fesi, tòg yu no ben o man si dati, noso a kan psa taki yu o abi verkering nanga wan sma di no bun gi yu. A no de fu taki dati a sma di yu o suku musu de wan dopu Kresten (1 Kor. 7:39). Ma a no ibri sma di dopu o de wan bun trowpatna gi yu. Sobun, yu kan aksi yusrefi: ’San mi wani du na ini mi libi? Sortu fasi mi feni taki mi trowpatna musu abi? Mi no e ferwakti tumsi furu?’

4. San son sma aksi na ini begi?

⁴ Efu yu e suku wan trowpatna, dan seiker yu begi fu dati (Fil. 4:6). Soleki fa wi kan ferstan, Yehovah no e pramisi nowan sma taki a o gi en wan trowpatna. Ma a e broko en ede nanga san yu abi fanowdu èn fa yu e firi, èn a kan yepi yu te yu e suku wan patna. Sobun, tan ferteri Yehovah san yu wani èn fa yu e firi (Ps. 62:8). Begi en fu yepi yu fu abi pasensi èn fu gi yu koni (Yak. 1:5). John, c wan brada na Amerkankondre, e ferteri san a e taki na ini den begi fu en: „Mi e ferteri Yehovah sortu fasi mi ben o wani taki mi patna musu abi. Mi e begi fu feni okasi pe mi kan miti wan sma di ben o man de wan bun trowpatna gi mi. Mi e aksi Yehovah tu fu yepi mi fu kon abi fasi di o meki mi tron wan bun masra.” Tanya, wan sisa fu Sri Lanka, e taki: „Aladi mi e suku wan bun trowpatna, mi e aksi Yehovah fu yepi  mi fu tan getrow, fu tan poti prakseri na bun sani, èn fu tan de koloku.” Awinsi a e teki pkinso moro langa fu feni wan trowpatna, Yehovah e pramisi taki a o sorgu gi yu èn a o sorgu taki yu kisi a lobi di yu abi fanowdu.​—Ps. 55:22.

5. Fa Kresten di no trow kan miti wan sma di lobi Yehovah? (1 Korentesma 15:58) (Luku a prenki.)

⁵ Bijbel e gi wi a rai disi: „Ala ten abi furu fu du na ini a wroko fu Masra.” (Leisi 1 Korentesma 15:58.) Efu yu abi furu fu du na ini a diniwroko fu Yehovah èn yu e moksi nanga difrenti brada nanga sisa, dan yu o kisi dek’ati, ma yu o feni okasi tu fu miti tra sma di no trow èn di e feni en prenspari tu neleki yu fu dini Yehovah. Èn te yu e du ala san yu man fu plisi Yehovah, dan yu o de koloku trutru.

6. San wan Kresten musu hori na prakseri te a e suku wan trowpatna?

⁶ Ma luku bun taki a suku di yu e suku wan trowpatna, no tron a moro prenspari sani na ini yu libi (Fil. 1:10). Trutru koloku no e kon fu di yu trow noso fu di yu no trow, ma fu di yu abi wan bun matifasi nanga Yehovah (Mat. 5:3). Èn te yu no trow ete, yu kan abi moro ten fu du moro na ini a diniwroko (1 Kor. 7:32, 33). Gebroiki a ten disi bun. Jessica, wan sisa na Amerkankondre di trow di a ben abi bijna 40 yari, e taki: „Mi ben abi furu fu du na ini a diniwroko èn dati yepi mi fu de koloku aladi mi ben wani trow.”

TEKI TEN FU LUKU FA A SMA DE

7. Fu san ede a de wan koni sani fu luku fa wan sma de, fosi yu go taigi en fa yu e firi? (Odo 13:16)

⁷ San yu musu du efu yu denki taki wan sma kan de wan bun trowpatna gi yu? Yu musu taigi a sma wantewante fa yu e firi? Bijbel e taki dati wan koni sma o suku fu kon sabi sani, fosi a du wan sani. (Leisi Odo 13:16.) Sobun, a ben o de wan koni sani efu yu e luku fu wan pisi ten fa a sma de fosi yu ferteri en fa yu e firi. Aschwin fu Bakrakondre, e taki: „Yu kan kisi firi gi wan sma heri esi, ma den firi dati kan gwe heri esi tu. Dus efu yu e teki ten fu luku fa wan sma de, dan yu no o bigin abi verkering nanga a sma soso fu di yu abi firi gi en tapu a momenti dati.” Boiti dati, efu yu e luku fu wan pisi ten fa a sma de, dan dati kan yepi yu fu kon si taki a sma no o de wan bun trowpatna gi yu.

8. San wan sma di no trow kan du fu luku efu wan trawan o de wan bun trowpatna gi en? (Luku a prenki.)

⁸ San yu kan du fu luku fa wan sma de? Te yu de na den gemeente konmakandra noso te yu e meki prisiri nanga trawan, yu kan si efu a sma lobi Yehovah, yu kan si fa a de nanga tra sma èn fa a e tyari ensrefi. Suma na den mati fu en èn fu sortu sani a e taki? (Luk. 6:45) Den sani di a wani du na ini en libi o fiti nanga san yu wani du? Yu kan taki nanga den gemeente owruman noso tra lepi Kresten di sabi en bun (Odo 20:18). Yu kan aksi efu tra sma e taki bun fu en èn sortu moi fasi a abi (Rut 2:11). Na ini a pisi ten te yu e luku fa a sma de, dan sorgu taki yu no e meki a firi ferferi. Lespeki den firi fu en, no de ini a sma birti ala ten èn no suku fu kon sabi ala sani fu en libi.

9. San yu musu sabi seiker fosi yu ferteri wan sma fa yu e firi?

⁹ O langa yu musu luku a sma fosi yu ferteri en fa yu e firi? Efu yu go taki nanga en tumsi gaw, dan a kan denki taki yu e teki besroiti sondro fu denki (Odo 29:20). Na a tra sei, efu a sma sabi taki yu abi firi gi en, ma yu e teki tumsi langa fu go taki nanga en, dan a  sma kan denki taki yu e draidrai tumsi fosi yu e teki besroiti (Preik. 11:4). Hori na prakseri taki te yu e go taki nanga a sma, dan yu no abi fu de seiker taki yu o trow nanga a sma dati. Ma san yu musu sabi seiker, na taki yu de klarklari fu trow èn taki a sma kan de wan bun trowpatna gi yu.

10. San yu musu du efu yu firi taki wan sma wani kon leri sabi yu moro bun ma yu no wani?

¹⁰ Ma san yu musu du efu yu firi taki wan sma wani kon leri sabi yu moro bun? Efu yu no wani de nanga a sma, dan pruberi fu du sani fu sori en taki yu no wani. A no ben o de wan lob’ati sani efu yu meki a sma denki taki yu wani de nanga en, aladi dati no de so.​—1 Kor. 10:24; Ef. 4:25.

11. Efu yu e libi na ini wan kondre pe sma abi a gwenti taki famiri noso mati e seti sani gi wan sma fu feni wan trowpatna, dan sortu sani yu musu hori na prakseri?

¹¹ Na ini son kondre, sma abi a gwenti taki papa nanga mama noso tra bigiwan fu a famiri suku wan trowpatna gi wan famiriman fu den di no trow. Na ini tra kondre, famiri noso mati e suku wan patna gi a sma èn den e seti sani so taki a man nanga na uma kan miti makandra fu luku efu den wani bigin wan sani. Efu den aksi yu fu suku wan trowpatna gi wan sma, dan luku san a man nanga na uma wani, san den lobi èn san den abi fanowdu. Efu yu si wan sma di ben o de wan bun trowpatna gi a famiriman noso a mati fu yu, dan kon leri sabi a sma dati bun. Luku fa a sma dati de èn sortu fasi a abi. Ma a moro prenspari sani na fu kon sabi efu a sma abi wan bun matifasi nanga Yehovah. Wan bun matifasi nanga Yehovah prenspari moro leki omeni moni wan sma abi, omeni skoroleri a kisi, noso fu sortu famiri a de. Ma hori na prakseri taki na a brada nanga a sisa srefi musu teki a besroiti te fu kba efu den o trow.​—Gal. 6:5.

FA YU KAN FERTERI WAN SMA TAKI YU WANI DE NANGA EN?

12. Fa yu kan ferteri wan sma taki yu wani de nanga en?

¹² San yu kan du te yu wani ferteri wan sma taki yu wani de nanga en? d Yu kan  seti sani fu taki nanga a sma na wan presi pe furu sma de, noso yu kan bel en. Taigi a sma krin taki yu wani de nanga en fu kon leri sabi en moro bun (1 Kor. 14:9). Efu a sma abi ten fanowdu fu prakseri a sani disi, dan gi en a ten dati (Odo 15:28). Èn efu a sma no wani de nanga yu, dan lespeki a besroiti fu en.

13. San yu kan du te wan sma e ferteri yu taki a wani de nanga yu? (Kolosesma 4:6)

¹³ San yu musu du te wan sma e ferteri yu taki a wani de nanga yu? A sma teki dek’ati fu ferteri yu fa a e firi. Sobun, sori switifasi nanga lespeki gi en. (Leisi Kolosesma 4:6.) Efu yu abi ten fanowdu fu prakseri efu yu wani de nanga en, dan taigi en dati. Ma pruberi fu piki en so esi leki yu man (Odo 13:12). Efu yu no wani de nanga a sma, dan taigi en dati krin èn du dati na wan switi fasi. Luku fa Hans, wan brada fu Oostenrijk, piki wan sisa di kon aksi fu de nanga en: „Na wan switi fasi mi taigi en krin san mi besroiti. Mi du dati wantewante fu di mi no ben wani meki a denki taki kande wan dei wi o de nanga makandra. Baka dati, mi ben e luku bun tu fu no taki noso du wan sani di ben kan meki a denki taki mi kenki prakseri.” Ma na a tra sei, efu yu wani kon leri sabi a sma moro bun tu, dan taigi en dati, èn taki nanga makandra fa unu wani taki sani musu waka na ini a verkering fu unu. Den sani di yu e ferwakti kan difrenti fu san a sma e ferwakti, kande fu di yu abi wan tra kulturu noso fu wan tra reide ede.

FA TRAWAN KAN YEPI KRESTEN DI NO TROW?

14. Fa wi kan yepi Kresten di no trow èn fa wi kan gi den dek’ati nanga san wi e taki?

¹⁴ Fa wi kan yepi Kresten di wani trow? Wan fasi fa wi kan du dati na fu luku bun san wi e taki (Ef. 4:29). Wi kan aksi wisrefi: ’Mi e ferferi den sma di wani trow? Te mi e si taki wan brada nanga wan sisa di no trow, e taki nanga makandra, dan mi e denki wantron taki den abi wan sani nanga makandra?’ (1 Tim. 5:13) Boiti dati, noiti wi musu gi den Kresten disi a firi taki den no warti, noso taki wan sani no bun nanga den fu di den no trow. Hans, di wi ben taki fu en kba, e ferteri: „Son brada nanga sisa e taki: ’Fu san ede yu no e trow? Yu no de so yongu moro.’ Te sma e taki den sortu sani disi, dan sma di no trow kan firi leki den no warti èn  leki den musu hasti densrefi fu trow.” A moro betre fu suku okasi pe wi kan prèise den Kresten brada nanga sisa di no trow!​—1 Tes. 5:11.

15. (a) San wi musu prakseri bun fosi wi yepi wan sma fu feni wan trowpatna? (Romesma 15:2) (Luku a prenki.) (b) Sortu prenspari sani yu leri fu a felem?

¹⁵ Fa a de efu wi denki taki wan brada nanga wan sisa ben o bun gi makandra? Bijbel e ferteri wi taki wi musu hori den firi fu trawan na prakseri. (Leisi Romesma 15:2.) Furu sma di no trow no wani taki trawan tyari den fu go meki kennis nanga wan sma di ben o bun gi den. Wi musu lespeki a sani dati (2 Tes. 3:11). Trawan kan aksi wi fu yepi den pkinso, ma wi no musu suku fu yepi den efu den no aksi wi fu du dati e (Odo 3:27). Sonwan fu den sma di no trow wani du sani pkinso tra fasi na presi fu meki trawan tyari den go langalanga na a sma fu meki kennis. Lydia, wan sisa di no trow èn di e libi na Doisrikondre, e taki: „Te yu e gi wan bigi grupu sma wan kari fu kon makandra, dan yu kan aksi a brada nanga a sisa fu kon tu. Sorgu nomo gi wan okasi pe a brada nanga a sisa kan taki nanga makandra, èn meki densrefi besroiti san den wani du moro fara.”

16. San Kresten di no trow musu hori na prakseri?

¹⁶ Awinsi wi trow noso wi no trow, wi alamala kan abi wan koloku libi! (Ps. 128:1) Sobun, efu yu wani trow ma yu no feni wan sma ete, dan tan poti prakseri na a wroko di yu e du gi Yehovah. Wan sisa fu Makaw di nen Sin Yi e taki: „Efu yu luku a pisi ten taki yu no trow, dan a ten disi syatu te yu e agersi dati nanga a ten di yu kan abi nanga yu patna na ini Paradijs. Prisiri fu a ten di yu abi now èn gebroiki en bun.” Ma fa a de efu yu feni wan sma èn yu bigin abi verkering nanga en? Na ini na artikel di e kon, wi o taki fa yu kan du dati na wan bun fasi so taki yu kan teki wan bun besroiti.