1, 2. (a) Fa Yesus ben e si a Wet fu Gado? (b) Fa den leriman fu wet nanga den Fariseiman ben e sori taki den no ben e fiti a Wet fu Gado na a yoisti fasi?

YESUS ben lobi a Wet di Gado ben gi Moses. A sani dati no e fruwondru wi fu di a Wet ben komoto fu en Papa, Yehovah, a moro prenspari sma na ini en libi. Psalm 40:8 ben sori na fesi taki Yesus ben o lobi a wet fu Gado. Drape skrifi: „Gado, mi prisiri fu du yu wani. A wèt fu yu de na ini mi ati.” Den sani di Yesus ben taki èn ben du ben e sori taki a Wet fu Gado bun dorodoro, taki a e tyari wini kon gi sma, èn taki den sani na ini o kon tru seiker.​—Mat. 5:17-19.

² Dati meki Yesus ben musu fu firi sari di a si taki den leriman fu wet nanga den Fariseiman no ben e fiti a wet na a yoisti fasi. Den ben e hori densrefi finifini na son pikinpikin sani fu a wet èn fu dati ede Yesus ben taki: „Unu e gi a di fu tin pisi fu a menti-wiwiri nanga a dille-wiwiri nanga a dyira.” Sobun, san ben de a problema? Yesus ben taki moro fara: „Ma unu e frigiti den moro prenspari sani fu a Wèt di e taki dati un musu krutu sani na wan reti fasi, un musu abi sari-ati èn un musu tai hori na Gado” (Mat. 23:23). Ma Yesus ben de tra fasi fu di a ben e frustan san a Wet ben e leri trutru èn fa ibriwan fu den wet ben e sori fa Yehovah e denki.

3. San wi o luku na ini na artikel disi?

 ³ Wi leki Kresten no abi fu hori wisrefi na a Wet di Gado ben gi Moses (Rom. 7:6). Sobun, fu san ede Yehovah ben poti a Wet dati na ini a Wortu fu en, Bijbel? A wani taki wi musu frustan den „moro prenspari sani” fu a Wet, sobun, den sani di a wani leri wi nanga yepi fu a Wet. Fu eksempre, san wi e leri fu a seti fu den loweman-foto? Na ini na artikel na fesi, wi si san wi kan leri fu den sani di a loweman ben musu du. Ma na ini na artikel disi wi o si san den loweman-foto e leri wi fu Yehovah èn fa wi kan sori den fasi fu en. Dati meki wi o luku den dri aksi disi: Fa den loweman-foto e sori taki Yehovah abi sari-ati? San den e leri wi fu a fasi fa Yehovah e si a libi? Fa den e sori taki Yehovah e krutu sani na wan reti fasi? Te wi e luku den aksi disi, dan luku fa yu kan teki na eksempre fu yu hemel Tata.​—Leisi Efeisesma 5:1.

4, 5. (a) Fa Yehovah ben sorgu taki wan loweman ben man doro wan loweman-foto makriki èn fu san ede a du dati? (b) San a sani disi e leri wi fu Yehovah?

⁴ A no ben muilek gi wan loweman fu doro den siksi loweman-foto. Yehovah ben taigi den Israelsma fu teki dri foto na a wan sei fu Yordan-liba èn dri foto na a tra sei. Na so ibri loweman ben o man lon go drape makriki èn esi-esi (Num. 35:11-14). Den Israelsma ben musu sorgu tu taki den pasi di ben e go na den loweman-foto ben bun (Deut. 19:3). Owruten tori fu den Dyu e sori taki bord ben de di ben e sori sma a pasi go na den foto. Fu di den foto disi ben de, meki wan sma di ben kiri wan trawan sondro taki a ben wani dati, no ben abi fu lowe go na wan tra kondre pe sma ben e anbegi falsi gado.

⁵ Denki a tori: Yehovah na a sma di ben taki dati wan sma di kiri wan trawan fu espresi musu kisi dedestrafu. Ma a sorgu tu taki wan sma di ben kiri wan trawan sondro taki a ben wani dati ben kan kisi pardon èn taki a ben kan feni kibri. Wan sabiman fu Bijbel e taki: „Ala sani ben seti na so wan fasi taki noti no ben e tapu pasi gi a loweman fu feni kibri. Na so Gado ben e sori sari-ati gi loweman.” Yehovah a no wan krutuman di e suku nomo fu strafu den futuboi fu en. Na presi fu dati, a abi „bun furu sari-ati”.​—Ef. 2:4.

6. Fa den Fariseiman ben de tra fasi leki Gado?

⁶ Ma tra fasi leki Yehovah, den Fariseiman no ben wani sori sari-ati gi sma. Fu eksempre, den owruten tori fu den Dyu e taki dati den no ben wani gi wan sma pardon moro leki dri leisi te a sma ben e tan meki a srefi fowtu. Yesus ben sori fa den ben e si sma di ben meki fowtu. A fruteri wan agersitori fu wan Fariseiman di ben e begi: „Ke, mi Gado, mi e taki yu tangi taki mi no de leki den tra sma, den sma di e kwinsi trawan, den sma di no bun, den sutaman, noso srefi leki a man disi di e teki belasting-moni gi lanti.” A man di ben e teki belasting-moni gi lanti ben e tanapu drape e begi  Gado nanga sakafasi. Fu san ede den Fariseiman ben weigri fu sori sari-ati gi sma? Bijbel e taki dati den „ben e si tra sma leki noti”.​—Luk. 18:9-14.

7, 8. (a) Fa yu kan teki na eksempre fu Yehovah te wan sma e du wan hati sani nanga yu? (b) Fu san ede wan sma musu abi sakafasi fu man gi trawan pardon?

⁷ Wi musu de leki Yehovah, wi no musu de leki den Fariseiman. Dati meki wi musu sori sari-ati gi trawan. (Leisi Kolosesma 3:13.) Wan fasi fa wi kan du dati, na te wi e meki en makriki gi sma fu aksi wi pardon (Luk. 17:3, 4). Aksi yusrefi: ’Mi de klariklari fu gi sma pardon te den du wan hati sani nanga mi, srefi te den e meki a srefi fowtu wan tu leisi? Mi e du ala muiti fu meki sani bun baka nanga wan sma di du wan hati sani nanga mi?’

⁸ Wan sma musu abi sakafasi fu man gi wan trawan pardon. A de krin taki den Fariseiman no ben abi sakafasi, fu di den ben e wisiwasi trawan. Ma wi leki Kresten musu ’si trawan moro hei leki wisrefi’ èn wi musu de klariklari fu gi den pardon (Fil. 2:3). Yu o de leki Yehovah èn sori taki yu abi sakafasi? Neleki fa a ben makriki gi wan loweman fu doro na a loweman-foto, na so wi musu meki en makriki gi trawan fu aksi wi pardon. Dati meki wi musu de gaw fu gi sma pardon èn wi no musu atibron esi-esi.​—Preik. 7:8, 9.

9. Fa Yehovah sori den Israelsma taki a libi fu sma santa?

⁹ Wan prenspari reide fu san ede Yehovah ben sorgu taki loweman-foto de, na fu di a no ben wani taki den Israelsma kisi brudu-paiman (Deut. 19:10). Yehovah e si a libi leki wan warti sani èn a no lobi „sma di e kiri trawan di no du nowan ogri” (Odo 6:16, 17). Gado santa èn a lobi retidu. Dati meki te wan sma ben kiri wan trawan sondro taki a ben wani dati, dan a no ben man tapu ai gi dati. A tru taki a ben e sori sari-ati gi a sma disi. Toku a sma ben musu go taki nanga den owruman, èn efu den ben si taki a no ben kiri a sma fu espresi, dan a ben musu tan na ini a loweman-foto teleki a granpriester dede. Son leisi disi ben wani taki dati a ben o abi fu tan drape en heri libi langa. Den sani disi ben e yepi den Israelsma fu frustan krin taki a libi santa. Efu den ben wani gi grani na a sma di e gi libi, dan den ben musu du ala san den man fu sorgu taki nowan ogri ben e miti wan trawan.

10. Fa den leriman fu wet nanga den Fariseiman ben sori taki den no ben e lespeki a libi fu trawan?

¹⁰ Tra fasi leki Yehovah, den leriman fu wet nanga den Fariseiman no ben abi nowan lespeki gi a libi fu trawan. Fa so? Yesus ben taigi den: „Unu puru a sroto di e opo a doro fu kon sabi Gado. Unu srefi no e go na inisei èn unu e pruberi fu tapu a pasi gi den sma di wani go na inisei!” (Luk. 11:52) Den ben musu yepi sma fu kon frustan Gado Wortu èn fu waka na tapu a pasi di e tyari sma go na têgo libi. Na presi fu dati, den no ben e sori sma a pasi go na Yesus, „a Moro Prenspari Fesiman di e gi libi”, ma den ben e tyari den fu go feni têgo pori (Tori 3:15). Fu di den leriman fu wet nanga den Fariseiman ben abi bigifasi èn fu di den ben e denki densrefi nomo, meki den no  ben e broko den ede nanga a libi fu tra sma. A de krin taki den ben abi ogri-ati èn taki den no ben sori sari-ati gi sma.

11. (a) Fa na apostel Paulus sori taki a ben e si a libi neleki fa Gado e si en? (b) San o yepi wi fu kon abi a srefi denki fu a preikiwroko leki Paulus?

¹¹ Fa wi kan sorgu taki wi no de leki den leriman fu wet nanga den Fariseiman, èn fa wi kan de leki Yehovah? Wi musu abi lespeki nanga warderi gi a libi di Gado gi wi leki kado. Na apostel Paulus ben sori taki a ben lespeki a libi fu trawan, fu di a ben e preiki a boskopu fu Gado finifini. Dati meki a ben kan taki: „Mi no abi nowan brudu-paiman.” (Leisi Tori fu den apostel 20:26, 27.) Ma a de so taki Paulus ben e preiki a boskopu soso fu di a no ben wani kisi konsensi fonfon? Noso a ben e preiki soso fu di Yehovah ben taigi en fu du dati? Nôno. Paulus ben lobi libisma. A ben si a libi fu den leki wan warti sani, èn a ben wani taki den kisi têgo libi (1 Kor. 9:19-23). Wi musu du muiti tu fu si a libi soleki fa Gado e si en. Yehovah „wani taki ala sma musu kisi na okasi fu sori berow” (2 Petr. 3:9). Yu wani dati tu? Kande yu o si taki te yu abi sari-ati nanga trawan, dan dati o gi yu moro deki-ati fu preiki fayafaya èn yu o du dati nanga moro prisiri.

12. Fu san ede a pipel fu Gado no musu du sani di kan meki taki sma kisi mankeri?

¹² Efu wi e si a libi soleki fa Yehovah e si en, dan wi o sorgu tu taki wi noso tra sma no kisi mankeri. Wi musu hori a sani disi na prakseri te wi e rèi oto, te wi e wroko, te wi e yepi fu bow noso ondrow presi fu anbegi èn te wi de na pasi fu go na den sortu presi dati. Kande wi wani doro na wan presi biten noso kande wi no wani lasi moni. Ma wi no musu frigiti taki a libi fu sma moro prenspari leki den sani dati. Boiti dati, wi no wani kisi mankeri èn wi no wani kon siki. A Gado fu wi di lobi retidu ala ten e du san reti èn san fiti. Wi wani de leki en. Spesrutu owruman musu luku bun taki den srefi noso tra sma di e wroko nanga den no e kisi mankeri (Odo 22:3). Efu wan owruman e memre yu fu no du sani di kan meki taki yu kisi mankeri, dan a bun fu gi yesi na a rai fu en (Gal. 6:1). Si a libi soleki fa Gado e si en, dan yu „no o kisi brudu-paiman”.

13, 14. Fa den owruman fu Israel ben kan koti krutu na wan reti fasi neleki Yehovah?

¹³ Yehovah ben taigi den owruman fu Israel fu hori densrefi na den wet fu en te den ben e koti krutu. Na a fosi presi, den owruman ben musu kon sabi finifini san ben pasa. Baka dati, den ben musu kon sabi tu fu san ede wan sma ben kiri wan trawan, sortu denki a ben abi èn fa a ben e tyari ensrefi fosi. Na so den ben o kon sabi efu a ben fiti fu sori sari-ati gi en. Den owruman ben musu kon sabi efu a loweman ben abi „bita-ati” gi a sma di a kiri èn efu „a ben e luru fu kiri en”. (Leisi Numeri 35:20-24.) Efu kotoigi ben de di ben si san pasa, dan tu noso moro ben de fanowdu fu man bosroiti efu a sma ben musu kisi dedestrafu.​—Num. 35:30.

¹⁴ Sobun, baka te den owruman ben kon sabi fa sani ben waka trutru, dan den ben musu poti prakseri na a sma srefi, den no ben musu luku nomo san a du. Den owruman ben musu pruberi fu frustan fu san ede a sma ben kiri a trawan. Èn san moro prenspari, na taki den ben abi a santa yeye fu Yehovah fanowdu di ben o yepi den fu si sani krin, fu sori sari-ati èn fu krutu sani na wan reti fasi.​—Eks. 34:6, 7.

15. Fa a fasi fa Yesus ben si sma di ben du sondu ben de heri tra fasi leki a fasi fa den Fariseiman ben e si sma?

¹⁵ Den Fariseiman ben e luku soso na ogri di wan sma ben du. Den no ben e luku san de na ini na ati fu a sma dati. Di den Fariseiman ben si taki Yesus ben go nyan na a oso fu Mateyus, dan den aksi den disipel fu en: „Fu san ede a leriman fu unu e nyan nanga den sma di e teki belasting-moni gi lanti èn nanga den sondari?” Yesus piki den: „Gosontu sma no abi datra fanowdu, ma na siki sma abi datra fanowdu. Fu dati ede, go leri san disi wani taki: ’Mi wani sari-ati, mi no wani srakti-ofrandi.’ Bika mi no kon fu kari sma di e du san reti, ma mi kon fu  kari sondari” (Mat. 9:9-13). A de so taki Yesus ben e tapu ai gi seryusu sondu? Kwetikweti. Fu taki en leti, a moro prenspari boskopu di Yesus ben meki bekènti, na taki sma ben musu abi berow fu den sondu fu den (Mat. 4:17). Toku Yesus ben si taki sonwan fu den „sondari nanga sma di e teki belasting-moni gi lanti” ben wani kenki. Den no ben kon na Mateyus en oso soso fu nyan. Na presi fu dati „furu fu den tron bakaman fu [Yesus]” (Mark. 2:15). Ma a sari taki den Fariseiman no ben si sma leki fa Yesus ben e si den. Den ben feni taki sma no ben man kenki èn taki howpu no ben de gi den. Den ben de heri tra fasi leki Yehovah di ben abi sari-ati nanga sma èn di ben e krutu sani na wan reti fasi.

16. San den owruman na ini wan krutu komte musu pruberi fu kon sabi?

¹⁶ Na ini a ten disi owruman musu teki na eksempre fu Yehovah di „lobi retidu” (Ps. 37:28). Na a fosi presi, den „musu ondrosuku èn aksi finifini” efu wan sma du wan ogri trutru. Efu dati de so, dan den musu hori densrefi na den wet fu Bijbel te den e krutu a tori (Deut. 13:12-14). Te owruman de na ini wan krutu komte, dan den musu kon sabi seiker efu wan Kresten di du wan seryusu sondu abi berow. A no ala ten a sani disi makriki. Fu kon sabi efu wan sma abi berow, dan a bun fu luku fa a sma e denki fu a sondu di a du èn pruberi fu kon sabi san de na ini en ati (Openb. 3:3). Wan sma di sondu, musu abi berow efu a wani taki Gado sori sari-ati gi en. *

17, 18. Fa owruman kan kon sabi efu wan Kresten abi berow trutru? (Luku a prenki na a bigin fu na artikel.)

¹⁷ Tra fasi leki Yehovah nanga Yesus, owruman no man si san de na ini wan sma ati. Efu yu na wan owruman, dan san o yepi yu fu kon sabi efu wan sma abi berow trutru? A fosi sani, na taki yu musu begi Gado fu gi yu koni (1 Kow. 3:9). A di fu tu sani, na taki yu musu ondrosuku Gado Wortu nanga den buku fu a koni srafu fu kon sabi efu wan sma e sari soleki „fa grontapusma e sari”, noso efu a e „sari na a fasi di Gado feni bun”. Na so yu o kon sabi efu a sma abi berow trutru (2 Kor. 7:10, 11). Luku Bijbel eksempre fu sma di ben abi berow èn fu sma di no ben abi berow. Fa den sma disi ben e firi, fa den ben e denki èn fa den ben e tyari densrefi?

¹⁸ A di fu dri sani, na taki yu musu poti prakseri na a sma srefi, no luku nomo san a du. Hori na prakseri fa a sma kweki, san meki taki a du a sondu èn sortu problema a abi. Bijbel ben taki fu Yesus, na edeman fu a gemeente: „Te a o koti krutu, a no o poti prakseri nomo na san en ai si. Te a o piri-ai gi sma, a no o poti prakseri nomo na san en yesi yere. Na wan reti fasi a o koti krutu gi den mofinawan. Nanga wan krin ati a o piri-ai gi sma, so taki den safri-ati sma na grontapu feni bun” (Yes. 11:3, 4). Owruman, Yesus gi unu a frantwortu fu luku den skapu fu en èn a o yepi unu fu koti krutu neleki fa en e du dati (Mat. 18:18-20). A no de fu taki dati wi de nanga tangi taki wi abi lobi-ati owruman di e meki muiti fu teki na eksempre fu Yesus. Wi e warderi a tranga muiti di den e du fu sori sari-ati gi den brada nanga sisa èn fu koti krutu na wan reti fasi na ini a gemeente!

19. San yu leri fu den loweman-foto?

¹⁹ A Wet di Gado ben gi Moses e yepi wi fu kon ’sabi san na den moro prenspari sani nanga den tru tori’ di abi fu du nanga Yehovah èn nanga den leri fu en (Rom. 2:20). Fu eksempre, den loweman-foto e leri owruman fa fu „koti krutu na wan reti fasi” èn den e leri wi alamala fa fu „sori bun-ati nanga sari-ati” gi makandra (Sak. 7:9). Wi no de moro na ondro a Wet di Gado ben gi Moses. Ma Yehovah no kenki èn a prenspari ete gi en taki sma e koti krutu na wan reti fasi èn taki den e sori sari-ati. A de wan grani fu anbegi so wan Gado. Meki wi sori den moi fasi fu en, so taki sani waka bun nanga wi!