LANGA ten kaba a de so taki sma di e anbegi a tru Gado e tyari ofrandi gi en. Den Israelsma ben e tyari meti leki ofrandi èn Kresten gwenti ’tyari ofrandi gi Gado nanga den mofo’ fu di na so den e prèise en. Ma tra ofrandi de tu di Gado lobi (Hebr. 13:15, 16). Sma e firi koloku te den e gi den ofrandi dati èn den e kisi blesi tu. Meki wi luku wan tu eksempre.

Hana, wan reti-ati uma di ben e anbegi Gado na ini owruten, ben e angri fu kisi wan manpikin, ma a no ben man kisi pikin. Na ini begi, a pramisi Gado taki efu a ben o kisi wan manpikin, dan a ben o ’gi en na Yehovah ala den dei fu en libi’ (1 Sam. 1:10, 11). Baka wan pisi ten, Hana kon de nanga bere èn a kisi wan manpikin di a kari Samuel. Baka di Samuel komoto na bobi, dan Hana tyari en go na a tabernakel, neleki fa a ben pramisi. Yehovah blesi Hana fu di a ben de klariklari fu du so wan bigi sani. Hana kisi ete feifi pikin èn Samuel tron wan profeiti èn wan skrifiman fu Bijbel.​—1 Sam. 2:21.

Neleki Hana nanga Samuel, Kresten na ini a ten disi abi a grani tu fu gebroiki den libi fu du diniwroko gi a Mekiman fu den. Yesus pramisi taki te wi e gi sani fu anbegi Yehovah, dan ala ten Yehovah o blesi wi bogobogo.​—Mark. 10:28-30.

Na ini a fosi yarihondro, sma ben sabi Dorkas leki wan uma di ben ’du furu bun sani èn di ben meki furu sani gi den pôti sma’. Ma „a kon siki èn a dede”, èn a heri gemeente ben e sari. Di den disipel yere taki Petrus ben de na ini a birti drape, dan den begi en fu kon esi-esi. Prakseri fa den ben breiti di Petrus kon èn a gi Dorkas wan opobaka. Dati na a fosi leisi di Bijbel e taki dati wan apostel gi wan sma wan opobaka! (Tori 9:36-41) Gado no ben frigiti den sani di Dorkas ben du fu horibaka gi a tru anbegi (Hebr. 6:10). Bijbel e taki fu a moi sani di a du gi trawan èn wi kan teki leri fu na eksempre fu en.

Na apostel Paulus na wan moi eksempre tu gi wi, fu di a ben lobi gebroiki en ten fu poti prakseri na tra sma. Na ini a brifi di Paulus ben skrifi gi den brada nanga sisa na ini Korente, a ben taki: „Nanga prisiri mi wani gi ala san mi abi èn mi wani gi misrefi dorodoro fu a bun fu unu” (2 Kor. 12:15). Den sani di Paulus ondrofeni, yepi en fu kon si taki te a ben de klariklari fu du sani fu a bun fu trawan, dan a ben e firi koloku, ma san moro prenspari, a ben abi wan bun matifasi nanga Yehovah èn a kisi blesi.​—Tori 20:24, 35.

A de krin taki Yehovah lobi te wi e gebroiki wi ten nanga wi krakti fu horibaka gi a Kownukondre èn fu yepi wi Kresten brada nanga sisa. Ma tra fasi de fa wi kan horibaka gi a Kownukondre preikiwroko? Iya! Boiti taki wi e gi wi ten nanga wi krakti, wi kan gi bijdrage tu fu gi grani na Gado. Den moni disi na fu horibaka gi a preikiwroko di e du na heri grontapu. A moni e yepi tu fu horibaka gi zendeling nanga tra futuboi di e du furuten diniwroko. Na organisâsi e gebroiki den moni disi tu fu meki èn fu vertaal buku nanga felem, fu yepi sma di kisi fu du nanga rampu, èn fu bow nyun Kownukondre zaal. Wi kan de seiker taki „sani o waka bun gi wan sma di lobi fu gi trawan sani”. Boiti dati, te wi e gi Yehovah den gudu di wi abi, dan wi e gi grani na en.​—Odo 3:9; 11:25.