1, 2. (a) San na a moro warti sani di wi abi? (b) Sortu sani Yehovah leri wi èn fu san ede wi lobi den? (Luku den prenki na a bigin fu na artikel.)

SAN na a moro warti sani gi yu? Yu ben o kenki en gi wan sani di no abi so furu waarde? A moro warti sani gi wi, na a matifasi di wi abi nanga Yehovah. Wi no ben o kenki en gi nowan tra sani. Den tru leri na ini Bijbel warti gi wi tu fu di den e yepi wi fu kon abi wan bun matifasi nanga wi hemel Papa.​—Kol. 1:9, 10.

² Prakseri ala den sani di wi Gran Leriman leri wi na ini en Wortu, Bijbel! A leri wi san a nen fu en wani taki èn a meki wi kon sabi sortu moi fasi a abi. A fruteri wi taki a lobi wi so te, taki a seni en Manpikin Yesus fu kon dede gi wi. Yehovah leri wi tu san na a Mesias Kownukondre èn a gi wi wan moi howpu gi a ten di e kon. Den salfuwan abi a howpu fu libi na hemel èn den „tra skapu” o libi na ini a paradijs na grontapu (Yoh. 10:16). Yehovah e leri wi tu fa wi musu tyari wisrefi. Wi lobi den leri disi fu di den e yepi wi  fu kon moro krosibei na wi Mekiman èn fu abi wan koloku libi.

3. A de so taki Yehovah e aksi wi moni gi den tru leri fu Bijbel?

³ Yehovah na wan Gado di lobi gi sani. Efu sma wani kon sabi san tru, dan ala ten a o leri den san tru. A ben de klariklari fu meki en eigi Manpikin dede gi wi sondro taki wi abi fu pai gi dati. Dati meki wi kan de seiker taki Gado no o aksi wi moni gi den tru leri fu Bijbel. Di wan man di nen Simon ben si taki sma ben e kisi santa yeye te Petrus ben poti en anu na den tapu, dan a ben wani gi Petrus moni so taki a ben kan kisi a makti dati tu. Ma Petrus taigi en: „Meki yu nanga yu moni lasi gowe, bika yu ben denki taki yu ben o man bai a sani disi di Gado e gi sma fu soso” (Tori 8:18-20). Ma san den wortu „bai san tru” wani taki?

4. San na artikel disi o leri wi fu den tru leri fu Bijbel?

⁴ Leisi Odo 23:23. Wi musu meki muiti fu kon sabi den tru tori na ini Gado Wortu. Wi musu de klariklari fu libi wan tu sani na baka fu kan feni den. Neleki fa na odo taki, dan baka te wi „bai san tru” noso kon sabi san tru, wi musu luku bun taki wi no „seri en”, noso lasi en. San a wani taki fu „bai” san tru? San wi o abi fu pai, noso san wi o abi fu du fu kan feni en? Den piki fu den aksi disi o yepi wi fu kon abi moro warderi gi den leri fu Bijbel èn den o meki taki noiti wi o wani seri den. Wi o frustan tu fu san ede den tru leri fu Bijbel warti moro iniwan tra sani.

5, 6. (a) Fa wi kan bai san tru sondro moni? Gi wan eksempre. (b) Fa wi e kisi wini fu den tru leri fu Bijbel?

⁵ Srefi efu yu no abi fu pai moni gi wan sani, toku dati no wani taki dati yu no musu meki muiti fu kisi en. A Hebrew wortu di vertaal nanga „bai” na ini Odo 23:23 wani taki tu dati yu musu de klariklari fu libi wan tu sani na baka èn yu musu meki muiti fu kisi wan sani di abi furu waarde. Fu eksempre, kande yu yere taki yu kan go teki bakba gratis na wowoyo. Yu denki taki den bakba srefi o waka kon miti yu? Nôno. Yu musu meki muiti fu go na a wowoyo fu go teki den. Yu no pai moni gi den bakba, ma yu du muiti fu kisi den. Na so a de tu taki wi no abi fu pai moni gi den tru leri fu Bijbel. Ma wi musu meki muiti fu kon sabi den.

⁶ Leisi Yesaya 55:1-3. Na ini a tekst disi Yehovah e yepi wi fu frustan san a wani taki fu „bai san tru”. Yehovah e agersi en wortu nanga watra, merki nanga win. Neleki fa wan grasi kowru watra kan meki wan sma di weri firi bun baka, na so den tru leri e meki wi firi bun. Neleki fa merki e meki wan pikin kon tranga, na so den leri fu Bijbel e yepi wi fu tranga a bribi fu wi èn fu kon abi wan bun matifasi nanga Yehovah. Yehovah e taki tu dati en wortu de leki win. Fu san ede? Bijbel e taki dati win e meki sma prisiri (Ps. 104:15). Sobun, te Yehovah e taigi wi fu „teki win”, dan a e sori wi taki te wi e teki den rai fu en, dan wi o de koloku (Ps. 19:8). Disi na wan moi fasi fa Yehovah e sori sortu wini wi e kisi te wi kon sabi den leri fu Bijbel èn te wi e du san wi leri! A muiti di wi e meki fu kisi den sani disi, de leki a moni di wi e pai fu kisi wan sani. Meki wi poti prakseri now  na feifi sani di wi musu du fu kan bai san tru.

7, 8. (a) Fu san ede wi musu meki ten fu bai san tru? (b) O furu muiti wan yongu uma meki fu kon sabi den tru leri fu Bijbel èn san ben de a bakapisi?

⁷ Ten. Ala sma di wani kon sabi den tru leri fu Bijbel musu meki ten gi dati. Wi musu meki ten fu arki a Kownukondre boskopu, fu leisi Bijbel nanga den buku di e taki fu Bijbel, fu studeri nanga Yehovah Kotoigi, fu sreka gi den gemeente konmakandra èn fu go na den. Fu man du den sani disi, dan wi no musu gebroiki tumusi furu ten gi tra sani di no de so prenspari. (Leisi Efeisesma 5:15, 16.) O furu ten a e teki fu kon sabi den prenspari tru leri fu Bijbel? Nanga ala sma a de tra fasi. Fu di Yehovah abi bun furu koni, meki noiti wi o kaba leri sani fu en èn fu den sani di a du (Rom. 11:33). A fosi Waktitoren di kon na doro ben taki dati den tru tori fu Bijbel de leki „wan pikin bromki”. A tijdschrift taki: „No breiti nanga wán bromki nomo. Efu wán bromki ben nofo kaba, dan Gado no ben o gi wi so furu bromki. Suku fu feni moro nanga moro fu den tru leri disi di de leki bromki.” Wi musu aksi wisrefi: ’O furu bromki mi feni kaba?’ Srefi te wi o libi fu têgo, wi no o kaba leri sani fu Yehovah. Na ini a ten disi a prenspari fu gebroiki a ten di wi abi na wan koni fasi, so taki wi kan leri moro fu Yehovah. Luku na ondrofenitori fu wan sma di du disi.

⁸ Mariko, * wan yongu uma fu Yapan, froisi go na New York City fu go na wan skoro. Na a ten dati a ben go na wan kerki kaba. Wan pionier sisa miti Mariko na ini na oso-fu-oso preikiwroko èn a bigin studeri Bijbel nanga en. Mariko ben lobi san a ben leri so te, taki a aksi a sisa fu studeri nanga en tu leisi na ini a wiki. Aladi a ben e go na skoro èn a ben e wroko wan tu dei na ini a wiki, toku a bigin kon na den konmakandra wantewante. Boiti dati, a no ben e gebroiki tumusi furu ten moro gi prisiri sani fu di a ben wani meki moro ten fu studeri Bijbel. Ala den sani disi meki taki a go na fesi esi-esi. A no teki wan yari fosi a dopu. Siksi mun baka dati, na ini 2006 a bigin pionier tu èn te nanga now a e dini leki pionier.

9, 10. (a) Fa wi o si gudu te wi kon sabi den tru leri fu Bijbel? (b) San wan yongu uma libi na baka èn fa a feni a sani di a du?

⁹ Den gudu fu wi. Fu man bai san tru, dan kande wi abi fu libi wan wroko pe wi ben e meki furu moni. Di Yesus aksi Petrus nanga Andreas di ben de fisiman, fu tron „fisiman di e fanga libisma”, dan wantewante den „libi den fisinèt” (Mat. 4:18-20). Disi no wani taki dati ala sma di e kon sabi den tru leri fu Bijbel musu libi den wroko. Wan sma musu wroko fu man sorgu ensrefi nanga en osofamiri (1 Tim. 5:8). Ma di wi kon sabi den tru leri fu Bijbel, dan furu fu wi ben musu kenki a fasi fa wi e si gudu èn wi ben musu kon sabi san na den moro prenspari sani na ini a libi. Yesus ben taki: „No kibri yu gudu moro na grontapu . . . Ma kibri yu gudu na ini hemel” (Mat. 6:19, 20). Luku fa wan yongu uma du disi.

¹⁰ Sensi di Maria ben de wan pikin meisje a ben e prei golf. Di a ben de na middelbaar skoro, a ben man prei golf  heri bun. A ben man prei so bun, taki a skoro ben o pai gi en fu go na universiteit. Maria ben lobi prei golf èn dati meki a ben wani du en leki en wroko. Ma Maria bigin studeri Bijbel baka di a komoto fu universiteit èn a ben lobi den sani di a ben leri. A ben breiti taki den tru leri fu Bijbel ben yepi en fu kenki en libi. A e taki: „O moro mi ben e tyari kenki kon na ini mi libi èn o moro mi ben e du san Bijbel leri mi, o moro mi ben kon de koloku.” Maria kon si taki a no ben o man dini Yehovah nanga en heri ati efu a ben e tan prei golf so furu (Mat. 6:24). Dati meki a tapu fu prei golf aladi a ben kan kon gudu èn pôpi. Now Maria e pionier èn a taki dati a de „moro koloku èn a e du a moro bun sani nanga en libi”.

11. Fa mati nanga famiri kan denki fu wi te wi bigin du san wi leri fu Bijbel?

¹¹ Mati nanga famiri. Te wi bigin du san wi leri na ini Bijbel, dan a kan taki son mati nanga famiri no o lobi dati. Fu san ede? Luku san Yesus ben aksi Gado na ini begi: „Meki den kon santa nanga yepi fu san tru. Yu wortu e taki san tru” (Yoh. 17:17). Den wortu „meki den kon santa” wani taki dati den disipel fu Yesus ben o „de aparti”. Te wi bigin du san wi leri na ini Bijbel, dan wi no e tyari wisrefi moro leki den sma fu grontapu. Dati meki sma e si taki wi kenki. Aladi wi wani libi bun nanga wi mati nanga famiri, toku sonwan fu den no o wani bumui nanga wi moro èn den kan bigin gens wi fu di den no lobi a bribi fu wi. Disi no e fruwondru wi, fu di Yesus ben taki: „Wan sma sa abi feanti na ini en eigi osofamiri” (Mat. 10:36). A ben pramisi wi tu taki awinsi o furu sani wi libi na baka, den blesi di wi o kisi o moro furu srefi.​—Leisi Markus 10:28-30.

12. San wan Dyu man ben de klariklari fu du fu kan leri moro fu Yehovah?

¹² Aaron, wan Dyu bisnisman ben leri taki a no ben mag kari Gado nen. Sensi di a ben yongu a ben e bribi a sani disi. Ma Aaron ben wani kon sabi moro fu Gado. A ben breiti di wan Kotoigi sori en taki efu a poti den letter „e”, „o”, „a” na den Hebrew letter gi YHWH, dan a kan leisi a nen leki „Yehovah”. Aaron ben breiti so te di a leri a sani disi, taki a go na a snoga fu fruteri den rabbi san a leri. A ben denki taki den ben o breiti tu, ma dati no ben de so. Na presi fu dati, den spiti na en tapu èn den yagi en komoto na ini a snoga. En famiri no ben lobi a tori tu. Ma a no meki a sani disi tapu en fu leri moro fu Yehovah. Aaron tron wan Kotoigi èn a tan dini Yehovah en heri libi langa. Neleki Aaron, wi musu tan meki muiti fu leri moro fu Yehovah awinsi famiri nanga mati no wani bumui moro nanga wi.

13, 14. Sortu kenki sma e tyari kon te den kon sabi san Bijbel e leri? Fruteri wan ondrofenitori.

¹³ Takru denki nanga wan libi di no krin. Efu wi kon sabi den tru leri fu Bijbel èn efu wi wani du san wi leri, dan wi musu de klariklari fu kenki wi denki èn a fasi fa wi e libi. Na apostel Petrus skrifi: „Un musu de leki pikin di e gi yesi. Den lostu di unu ben abi na a ten di unu no ben sabi noti fu Gado, no musu basi unu moro. . . . Un musu kon santa tu na ini ala san unu e du” (1 Petr. 1:14, 15). Na ini a foto Korente furu sma ben e libi wan morsu libi. Efu wan sma ben wani taki Yehovah feni en bun, dan a ben musu tyari bigi kenki kon (1 Kor. 6:9-11). Na ini a ten disi tu furu sma e kenki a fasi fa den e libi te den kon sabi den tru leri fu Bijbel. Petrus ben taigi den Kresten na ini a ten fu en: „Na ini a ten di pasa, unu  libi langa nofo leki fa grontapusma wani. Unu ben e du ogri sondro fu syen, unu ben abi tranga lostu, unu ben e dringi win pasa marki, unu ben e hori bradyari fesa, unu ben e strei dringi sopi èn unu ben e anbegi kruktugado, aladi Gado no feni dati bun kwetikweti.”​—1 Petr. 4:3.

¹⁴ Furu yari langa Devynn nanga Jasmine ben gwenti dringi sopi teleki den drungu. Aladi Devynn ben sabi du boekhouding bun, a no ben man hori wan wroko fu di a ben lobi dringi sopi. Ala sma ben sabi Jasmine leki wan sma di ben e ati bron esi èn di ben lobi du ogri. Wan dei, di a ben waka drungudrungu na strati, a miti tu zendeling di ben de Kotoigi. Den zendeling seti sani fu studeri Bijbel nanga en a tra wiki. Ma di den doro na den oso Jasmine nanga Devynn ben drungu. Den no ben fruwakti taki den zendeling ben o broko den ede nanga den èn taki den ben o kon trutru. Ma a tra leisi di den zendeling go, den no ben drungu. Jasmine nanga Devynn ben lobi san den ben e leri na ini Bijbel èn esi-esi den bigin du san den leri. A no teki dri mun srefi fosi den tapu fu dringi sopi èn bakaten den trow. Furu sma na ini a dorpu fu den bigin studeri Bijbel tu fu di den ben si fa Jasmine nanga Devynn kenki.

15. San na wan fu den moro muilek sani fu du efu wan sma wani dini Yehovah, èn fu san ede?

¹⁵ Gwenti di Gado no feni bun. Gi son sma a no muilek fu tapu nanga son gwenti te den kon sabi taki Yehovah no lobi den gwenti disi. Ma gi tra sma a muilek srefisrefi. Den e frede san den famiri, sma na wrokope noso mati o denki fu den. Den sabi taki sma lobi son gwenti, soleki a gwenti fu gi grani na famiri di dede (Deut. 14:1). San kan yepi wi fu tapu nanga gwenti di Gado no lobi? Wi kan leri furu fu a bun eksempre fu trawan di tyari bigi kenki kon fu kan plisi Yehovah. Meki wi luku na eksempre fu den Kresten na ini Efeise.

16. Sortu bigi kenki son sma fu Efeise tyari kon?

¹⁶ Furu sma na ini a foto Efeise ben e bonu. San den sma di ben e du bonuwroko du di den tron Kresten? Bijbel e taki: „Bun furu fu den sma di ben e du bonuwroko tyari den buku fu den kon na wán èn den bron den na fesi ala sma. Di den teri ala den sani disi, dan den kon si taki den ben warti feifitenti dusun pisi solfru moni. Sobun, a wortu fu Yehovah panya na ala sei èn a ben abi moro krakti” (Tori 19:19, 20). Den Kresten dati ben de klariklari fu bron den diridiri buku fu den èn Yehovah blesi den fu dati.

17. (a) Sortu sani wi ben musu du fu kan bai san tru? (b) Sortu aksi wi o luku na ini a tra artikel?

¹⁷ Sortu bigi kenki yu tyari kon fu kan bai san tru? Wi alamala meki ten fu studeri Bijbel. Sonwan fu wi ben abi na okasi fu kon gudu, ma wi libi dati na baka. Trawan tan dini Yehovah aladi den kisi gens fu famiri nanga mati. Furu fu wi kenki wi libi èn a fasi fa wi e denki. Wi tapu nanga gwenti di Yehovah no feni bun. Awinsi san wi libi na baka, wi sabi taki den tru leri fu Bijbel warti moro iniwan fu den sani dati. Bijbel yepi wi fu tron bun mati fu Yehovah, èn dati na a moro warti sani gi wi. Te wi e prakseri ala den blesi di wi e kisi fu di wi kon sabi den tru leri fu Bijbel, dan wi no ben o wani „seri” den gi nowan tra sani. Ma toku son sma e du dati. Fa dati kan pasa èn fa wi kan sorgu taki wi no e meki a bigi fowtu dati? Wi o piki den aksi disi na ini a tra artikel.