1, 2. Te wi kon sabi Yehovah moro bun, dan san wi o leri fu du? Gi wan eksempre.

KON meki wi taki dati wan pikin-nengre e kisi wan kado. En papa nanga mama e taigi en taki a musu taki: „Grantangi.” A pikin o du dati fu di en papa nanga mama taigi en. Ma te a kon moro bigi a e bigin frustan fu san ede en papa nanga mama feni taki a prenspari fu de nanga tangi te sma e du bun gi en. Te fu kaba nowan sma o abi fu taigi en fu taki „grantangi”. Fu san ede? Fu di ensrefi leri fu de nanga tangi.

² Na so a de tu nanga wi. Di wi kon sabi Yehovah, wi leri o prenspari a de fu gi yesi na den wet fu en. Ma di wi kon sabi Yehovah moro bun, wi kon sabi fa a e denki. Wi sabi now san a lobi, san a no lobi èn fa a e denki fu difrenti tori. Te wi e bigin denki leki Yehovah, dan dati o de fu si na ini den bosroiti di wi e teki èn den sani di wi e du.

3. Fu san ede a kan muilek gi wi fu denki leki Yehovah?

³ Wi lobi en taki wi e leri fu denki leki Yehovah. Ma toku son leisi a no makelek gi wi fu di wi na sondusma. Fu eksempre, kande wi sabi fa Yehovah e si hurudu, a lobi di sma lobi gudu, a preikiwroko, a teki di sma e teki brudu èn fa a e  denki fu tra sani. Ma kande a muilek gi wi fu frustan fu san ede Yehovah e denki so. Sobun, san o yepi wi fu denki moro leki Yehovah? Èn fa a sani disi o yepi wi fu teki bun bosroiti now èn na ini a ten di e kon?

4. San wi musu du efu wi wani ’kenki wi denki’?

⁴ Leisi Romesma 12:2. Na ini a tekst disi na apostel Paulus e taki san wi musu du efu wi wani leri fu denki neleki Yehovah. Na ini na artikel fosi a wan disi wi leri taki efu wi ’no wani libi leki den sma fu a grontapu disi’, dan wi no musu teki a denki fu grontapu abra. Ma Paulus taki tu dati wi musu ’kenki wi denki’. Fu man du disi, dan wi musu studeri Gado Wortu, wi musu pruberi fu frustan fa Gado e denki, wi musu denki dipi fu san wi leri èn wi musu meki tranga muiti fu si sani soleki fa Gado e si sani.

5. Tyari kon na krin fa wi musu studeri.

⁵ Studeri no wani taki dati wi e leisi sani nomo noso taki wi e hari strepi ondro den piki fu den aksi. Te wi e studeri, dan wi musu prakseri san a tori e leri wi fu Yehovah, fu den sani di a du èn fu a fasi fa a e denki. Wi musu pruberi fu frustan fu san ede Yehovah e taigi wi fu du son sani èn fu san ede a no wani taki wi du son sani. Wi musu prakseri tu sortu kenki wi musu tyari kon na ini wi libi èn na ini a fasi fa wi e denki. Kande wi no man poti prakseri na ala den sani disi ibri leisi te wi e studeri. Toku a bun fu gebroiki afu fu a ten di wi poti fu studeri, fu denki dipi fu san wi leisi.​—Ps. 119:97; 1 Tim. 4:15.

6. San e pasa te wi e denki dipi fu Gado Wortu?

⁶ Te wi abi a gwenti fu denki dipi fu san wi leri na ini Gado Wortu, dan wan moi sani e pasa. Wi e ’kon sabi’, noso wi e kon abi na overtoigi taki a denki fu Yehovah bun dorodoro. Wi e bigin si sani soleki fa en e si en èn wi e bigin agri nanga a denki fu en. A denki fu wi e bigin „kenki” èn wi e bigin denki tra fasi. Safrisafri wi e bigin denki neleki Yehovah.

7, 8. (a) Fa Yehovah e denki fu gudu? (Luku den prenki na a bigin fu na artikel.) (b) Efu wi e denki neleki Yehovah, dan san o de a moro prenspari sani gi wi?

⁷ Den sani di wan sma e du e sori fa a e denki (Mark. 7:21-23; Yak. 2:17). Meki wi go luku wan tu eksempre di kan yepi wi fu frustan a tori disi moro bun. Den Evangelietori e sori wi fa Yehovah e denki fu gudu. Yehovah srefi bosroiti suma ben o tron a papa nanga mama fu en Manpikin dyaso na grontapu. A gi Yosef nanga Maria a frantwortu disi aladi den no ben gudu (Lef. 12:8; Luk. 2:24). Di Yesus gebore, Maria „poti en na ini wan nyanyan-baki fu meti, bika presi no ben de gi den na a oso pe sma e yuru kamra” (Luk. 2:7). Efu Yehovah ben wani, a ben kan sorgu taki Yesus gebore na wan moro bun presi. Ma dati no ben de a moro prenspari sani gi en. A ben wani taki Yesus ben musu kweki na ini wan osofamiri di e poti na anbegi fu Gado na a fosi presi.

⁸ A Bijbel tori disi e sori wi fa Yehovah e denki fu gudu. Son papa nanga mama wani nomonomo taki den pikin fu den abi ala sani, awinsi dati e meki taki a matifasi fu den nanga Yehovah e pori. Ma a de krin taki Yehovah e si a matifasi di wi abi nanga en leki a moro prenspari sani. Yu abi a srefi denki disi fu  Yehovah? San den sani di yu e du e sori?​—Leisi Hebrewsma 13:5.

9, 10. Fa wi kan sori taki wi e si en leki wan seryusu sani fu no meki tra sma fadon?

⁹ Meki wi luku wan tra eksempre. Bijbel e sori fa Yehovah e denki fu sma di e meki trawan sondu noso di e meki taki den tapu fu dini Yehovah. Yesus ben taki: „Efu wan sma e meki taki wan fu den pikinwan disi di abi bribi, fadon, dan a moro bun taki den e anga wan bun bigi miriston na en neki èn tyari en go trowe na se” (Mark. 9:42). Den wortu disi e sori taki Yesus e si en leki wan seryusu sani te sma e meki trawan fadon! Wi sabi taki Yesus e denki neleki en Papa. Sobun, wi kan de seiker taki Yehovah srefi e si en leki wan seryusu sani te sma ben o meki wan tra bakaman fu Yesus fadon.​—Yoh. 14:9.

¹⁰ Wi abi a srefi denki fu Yehovah nanga Yesus? San den sani di wi e du e sori? Fu eksempre, kande wi lobi weri krosi noso wi e moi wisrefi na wan fasi di kan meki tra sma na ini a gemeente skreki noso di kan wiki seksfiri na den. Efu yu lobi yu brada nanga sisa, dan san yu o du? Yu o de klariklari fu no weri den krosi dati moro?​—1 Tim. 2:9, 10.

11, 12. San wi no o du te wi e leri fu dwengi wisrefi èn fu no lobi sani di Yehovah no lobi?

¹¹ Luku wan tra eksempre. Yehovah no lobi ogridu kwetikweti (Yes. 61:8). Yehovah sabi taki son leisi a muilek gi wi fu du san bun fu di wi na sondusma. Toku a wani taki wi e tegu gi san ogri, neleki en. (Leisi Psalm 97:10.) Te wi e denki fu san ede Yehovah no lobi ogridu, dan dati o yepi wi fu denki neleki en. Disi o gi wi moro krakti fu no du ogri kwetikweti.

¹² Efu wi leri fu tegu gi san ogri, dan wi o frustan taki son sani no bun, aladi Bijbel no e taki finifini fu en. Fu eksempre, son sma e go na wan club, dan den e meki wan sma di no weri furu krosi kon sidon na tapu den bowtu aladi a e dansi na wan morsu fasi. Son sma feni taki disi a no a srefi leki te yu abi seks èn dati meki den denki taki a no fowtu fu du en. * Ma na so Yehovah e denki fu a tori? Hori na prakseri taki Yehovah e tegu gi ala sortu ogri. Sobun, te wi e leri fu dwengi wisrefi èn fu no lobi sani di Yehovah no lobi, dan wi no o du nowan ogri tu.​—Rom. 12:9.

13. Te wi e prakseri now fa Yehovah e denki fu sani, dan fa dati kan yepi wi fu teki koni bosroiti na ini a ten di e kon?

¹³ Te wi e studeri, dan wi musu prakseri fa Yehovah e denki fu sani, fu di dati kan yepi wi fu teki koni bosroiti na ini a ten di e kon. Na so fasi wi no o bruya te wi kon na ini wan situwâsi pe wi musu teki wan bosroiti wantewante, ma wi o sabi san wi musu du (Odo 22:3). Luku wan tu eksempre fu Bijbel.

14. San Yosef du di a wefi fu Potifar ben wani taki a didon nanga en èn san wi e leri fu dati?

¹⁴ Di a wefi fu Potifar ben wani kori Yosef fu didon nanga en, dan wantewante Yosef weigri. Soleki fa a sori, dan Yosef ben prakseri na fesi fa Yehovah e denki fu a trowlibi. (Leisi Genesis 39:8, 9.) Yosef taigi a wefi fu Potifar:  „Fa mi kan du so wan bigi ogri èn sondu teige Gado?” Disi e sori taki a ben e denki neleki Yehovah. Fa a de nanga wi? Kon meki wi taki dati wan sma na wrokope e bigin skèin yu? Noso san yu o du te wan sma seni wan sososkin fowtow gi yu na tapu yu telefon, noso te a seni wan boskopu gi yu pe a e taki fu sekstori? * A o moro makelek fu du san Yehovah feni bun, efu wi kon sabi na fesi fa Yehovah e denki fu a tori èn efu wi bosroiti kaba san wi o du efu wi ben o kon na ini so wan situwâsi.

15. San o yepi wi fu tan gi yesi na Yehovah, neleki den dri Hebrew man?

¹⁵ Meki wi luku na eksempre fu den dri Hebrew man Sadrak, Meisak nanga Abedneikow. Di Kownu Nebukadnesar taigi den fu anbegi a popki di a ben meki, dan den no ben wani du dati. A krin piki di den gi a kownu e sori taki den ben prakseri na fesi san den ben musu du fu kan tan gi yesi na Yehovah (Eks. 20:4, 5; Dan. 3:4-6, 12, 16-18). Fa a de nanga wi? Kon meki wi taki dati yu basi na wroko aksi yu fu gi moni gi wan fesa di abi fu du nanga falsi anbegi? San yu o du? Fosi yu kon na ini so wan situwâsi, a bun fu prakseri nownow kaba fa Yehovah e denki fu a tori disi. Dan te so wan sani pasa, yu o sabi san yu musu taki èn a o moro makelek gi yu fu du san bun, neleki den dri Hebrew man.

16. Te wi e frustan fa Yehovah e denki, dan fa dati o yepi wi fu teki wan bun bosroiti te wi kon siki wantronso?

¹⁶ Te wi e meki ten fu prakseri fa Yehovah e denki fu sani, dan dati kan yepi wi tu te wi kon siki wantronso. A no de fu taki dati wi no o teki brudu noso den fo prenspari pisi di teki puru fu brudu. Ma toku wi o abi fu gebroiki Bijbel gronprakseri fu bosroiti gi wisrefi efu wi o teki son datrayepi di abi fu du nanga brudu (Tori 15:28, 29). San na a moro bun ten fu teki den sortu bosroiti disi? A no te wi didon na ati-oso, fu di na a ten dati wi o bruya èn a o muilek fu teki wan bun bosroiti. Now na a ten fu ondrosuku den sortu tori dati èn fu skrifi krin na tapu wi brudukarta sortu datrayepi  wi wani. Wi musu taki nanga wi datra tu. *

17-19. Fu san ede a prenspari fu meki muiti now fu kon sabi fa Yehovah e denki fu sani? Gi wan eksempre di e sori fu san ede wi musu sreka wisrefi na fesi.

¹⁷ Luku wan lasti eksempre. Di Petrus taigi Yesus fu ’du ensrefi wan bun’, dan wantewante Yesus sori en taki a rai fu en no bun. A sori leki Yesus prakseri na fesi san Yehovah ben wani taki a du èn a ben sabi den profeititori di ben taki fu a libi nanga a dede fu en. Den sani disi gi en a krakti fu tan gi yesi na Yehovah èn fu gi en libi leki wan srakti-ofrandi.​—Leisi Mateyus 16:21-23.

¹⁸ Na ini a ten disi, Yehovah wani taki wi de mati fu en èn taki wi du ala san wi man fu preiki a bun nyunsu (Mat. 6:33; 28:19, 20; Yak. 4:8). Neleki Petrus, sma di abi a bun fu wi na prakseri, kan gi wi a deki-ati fu du wan tra sani nanga wi libi. Fu eksempre, kande yu basi wani gi yu wan moro hei posisi pe yu o kisi moro moni. Ma san yu o du efu a wroko dati o meki taki yu misi konmakandra noso taki yu no e preiki so furu moro? Noso kon meki wi taki dati yu e kisi na okasi fu froisi go na wan tra presi so taki yu kan go doro nanga skoro. San yu o du? A de so taki na a momenti dati yu o begi, ondrosuku sani èn taki nanga famiriman noso den owruman fu sabi san yu o du? A no moro bun fu meki muiti now fu kon sabi fa Yehovah e denki fu a tori èn fu kon abi a srefi denki neleki en? Efu yu e du disi, dan te so wan sani miti yu na ini a ten di e kon, yu no o si en leki wan tesi srefi. Yu o sabi kaba san yu musu du fu di yu bosroiti kaba fu poti na anbegi fu Yehovah na a fosi presi.

¹⁹ Kande yu kan prakseri tra situwâsi di ben kan miti yu sondro taki yu fruwakti dati. A tru taki wi no kan sreka wisrefi gi ala situwâsi di kan opo kon. Ma te wi abi a gwenti fu denki dipi fu den sani di wi studeri, dan wi o kon sabi fa Yehovah e denki. Dan te wi kon na ini wan situwâsi di wi no ben fruwakti, wi o man memre san wi ben studeri èn wi o man teki koni bosroiti. Sobun, te wi e studeri, wi musu pruberi fu kon sabi fa Yehovah e denki fu sani èn wi musu meki muiti fu kon abi a srefi denki leki en. Boiti dati, wi musu prakseri fa a denki fu Yehovah kan yepi wi fu teki koni bosroiti now èn na ini a ten di e kon.

20, 21. (a) San wi o man du na ini a nyun grontapu? (b) Fa wi kan abi wan koloku libi nownow kaba?

²⁰ Wi no man wakti fu de na ini a nyun grontapu. Furu fu wi abi a howpu fu libi na ini a paradijs na grontapu. Te Gado Kownukondre o tiri, dan nowan sma o pina moro. Na ini a nyun grontapu wi o man teki wi eigi bosroiti èn wi o man du san wi lobi.

²¹ Ma disi no wani taki dati wi o man du ala san wi wani. Te wi musu bosroiti san bun èn san no bun, dan wi o meki den wet fu Yehovah tiri wi èn wi o luku fa a e denki fu a tori. Disi o meki taki freide de pasa marki èn wi o prisiri srefisrefi (Ps. 37:11). Ma fosi a ten dati doro, wi musu tan meki muiti fu denki neleki Yehovah. Disi o meki taki wi abi wan koloku libi nownow kaba.